ಗೋಪಿಕಾ ಗೀತಾ (ಭಾಗವತ ಪುರಾಣ)

ಗೋಪಿಕಾ ಗೀತಾ (ಭಾಗವತ ಪುರಾಣ)

ಶ್ಲೋಕ 1

ಗೋಪ್ಯ ಊಚುಃ ।

ಜಯತಿ ತೇಽಧಿಕಂ ಜನ್ಮನಾ ವ್ರಜಃ

ಶ್ರಯತ ಇನ್ದಿರಾ ಶಶ್ವದತ್ರ ಹಿ ।

ದಯಿತ ದೃಶ್ಯತಾಂ ದಿಕ್ಷು ತಾವಕಾ-

ಸ್ತ್ವಯಿ ಧೃತಾಸವಸ್ತ್ವಾಂ ವಿಚಿನ್ವತೇ

ಶ್ಲೋಕ 2

ಶರದುದಾಶಯೇ ಸಾಧುಜಾತಸ-

ತ್ಸರಸಿಜೋದರಶ್ರೀಮುಷಾ ದೃಶಾ ।

ಸುರತನಾಥ ತೇಽಶುಲ್ಕದಾಸಿಕಾ

ವರದ ನಿಘ್ನತೋ ನೇಹ ಕಿಂ ವಧಃ

॥ 1॥

ಶ್ಲೋಕ 3

ವಿಷಜಲಾಪ್ಯಯಾದ್ವ್ಯಾಲರಾಕ್ಷಸಾ-

ದ್ವರ್ಷಮಾರುತಾದ್ವೈದ್ಯುತಾನಲಾತ್ ।

ವೃಷಮಯಾತ್ಮಜಾದ್ವಿಶ್ವತೋಭಯಾ-

ದೃಷಭ ತೇ ವಯಂ ರಕ್ಷಿತಾ ಮುಹುಃ

॥ 2॥

ಶ್ಲೋಕ 4

ನ ಖಲು ಗೋಪಿಕಾನನ್ದನೋ ಭವಾ-

ನಖಿಲದೇಹಿನಾಮನ್ತರಾತ್ಮದೃಕ್ ।

ವಿಖನಸಾರ್ಥಿತೋ ವಿಶ್ವಗುಪ್ತಯೇ

ಸಖ ಉದೇಯಿವಾನ್ಸಾತ್ವತಾಂ ಕುಲೇ

॥ 3॥

ಶ್ಲೋಕ 5

ವಿರಚಿತಾಭಯಂ ವೃಷ್ಣಿಧುರ್ಯ ತೇ

ಚರಣಮೀಯುಷಾಂ ಸಂಸೃತೇರ್ಭಯಾತ್ ।

ಕರಸರೋರುಹಂ ಕಾನ್ತ ಕಾಮದಂ

ಶಿರಸಿ ಧೇಹಿ ನಃ ಶ್ರೀಕರಗ್ರಹಮ್

॥ 4॥

ಶ್ಲೋಕ 6

ವ್ರಜಜನಾರ್ತಿಹನ್ವೀರ ಯೋಷಿತಾಂ

ನಿಜಜನಸ್ಮಯಧ್ವಂಸನಸ್ಮಿತ ।

ಭಜ ಸಖೇ ಭವತ್ಕಿಙ್ಕರೀಃ ಸ್ಮ ನೋ

ಜಲರುಹಾನನಂ ಚಾರು ದರ್ಶಯ

॥ 5॥

ಶ್ಲೋಕ 7

ಪ್ರಣತದೇಹಿನಾಂ ಪಾಪಕರ್ಶನಂ

ತೃಣಚರಾನುಗಂ ಶ್ರೀನಿಕೇತನಮ್ ।

ಫಣಿಫಣಾರ್ಪಿತಂ ತೇ ಪದಾಮ್ಬುಜಂ

ಕೃಣು ಕುಚೇಷು ನಃ ಕೃನ್ಧಿ ಹೃಚ್ಛಯಮ್

॥ 6॥

ಶ್ಲೋಕ 8

ಮಧುರಯಾ ಗಿರಾ ವಲ್ಗುವಾಕ್ಯಯಾ

ಬುಧಮನೋಜ್ಞಯಾ ಪುಷ್ಕರೇಕ್ಷಣ ।

ವಿಧಿಕರೀರಿಮಾ ವೀರ ಮುಹ್ಯತೀ-

ರಧರಸೀಧುನಾಽಽಪ್ಯಾಯಯಸ್ವ ನಃ

॥ 7॥

ಶ್ಲೋಕ 9

ತವ ಕಥಾಮೃತಂ ತಪ್ತಜೀವನಂ

ಕವಿಭಿರೀಡಿತಂ ಕಲ್ಮಷಾಪಹಮ್ ।

ಶ್ರವಣಮಙ್ಗಲಂ ಶ್ರೀಮದಾತತಂ

ಭುವಿ ಗೃಣನ್ತಿ ತೇ ಭೂರಿದಾ ಜನಾಃ

॥ 8॥

ಶ್ಲೋಕ 10

ಪ್ರಹಸಿತಂ ಪ್ರಿಯ ಪ್ರೇಮವೀಕ್ಷಣಂ

ವಿಹರಣಂ ಚ ತೇ ಧ್ಯಾನಮಙ್ಗಲಮ್ ।

ರಹಸಿ ಸಂವಿದೋ ಯಾ ಹೃದಿಸ್ಪೃಶಃ

ಕುಹಕ ನೋ ಮನಃ ಕ್ಷೋಭಯನ್ತಿ ಹಿ

॥ 9॥

ಶ್ಲೋಕ 11

ಚಲಸಿ ಯದ್ವ್ರಜಾಚ್ಚಾರಯನ್ಪಶೂನ್

ನಲಿನಸುನ್ದರಂ ನಾಥ ತೇ ಪದಮ್ ।

ಶಿಲತೃಣಾಙ್ಕುರೈಃ ಸೀದತೀತಿ ನಃ

ಕಲಿಲತಾಂ ಮನಃ ಕಾನ್ತ ಗಚ್ಛತಿ

॥ 10॥

ಶ್ಲೋಕ 12

ದಿನಪರಿಕ್ಷಯೇ ನೀಲಕುನ್ತಲೈ-

ರ್ವನರುಹಾನನಂ ಬಿಭ್ರದಾವೃತಮ್ ।

ಘನರಜಸ್ವಲಂ ದರ್ಶಯನ್ಮುಹು-

ರ್ಮನಸಿ ನಃ ಸ್ಮರಂ ವೀರ ಯಚ್ಛಸಿ

॥ 11॥

ಶ್ಲೋಕ 13

ಪ್ರಣತಕಾಮದಂ ಪದ್ಮಜಾರ್ಚಿತಂ

ಧರಣಿಮಣ್ಡನಂ ಧ್ಯೇಯಮಾಪದಿ ।

ಚರಣಪಙ್ಕಜಂ ಶನ್ತಮಂ ಚ ತೇ

ರಮಣ ನಃ ಸ್ತನೇಷ್ವರ್ಪಯಾಧಿಹನ್

॥ 12॥

ಶ್ಲೋಕ 14

ಸುರತವರ್ಧನಂ ಶೋಕನಾಶನಂ

ಸ್ವರಿತವೇಣುನಾ ಸುಷ್ಠು ಚುಮ್ಬಿತಮ್ ।

ಇತರರಾಗವಿಸ್ಮಾರಣಂ ನೃಣಾಂ

ವಿತರ ವೀರ ನಸ್ತೇಽಧರಾಮೃತಮ್

॥ 13॥

ಶ್ಲೋಕ 15

ಅಟತಿ ಯದ್ಭವಾನಹ್ನಿ ಕಾನನಂ

ತ್ರುಟಿರ್ಯುಗಾಯತೇ ತ್ವಾಮಪಶ್ಯತಾಮ್ ।

ಕುಟಿಲಕುನ್ತಲಂ ಶ್ರೀಮುಖಂ ಚ ತೇ

ಜಡ ಉದೀಕ್ಷತಾಂ ಪಕ್ಷ್ಮಕೃದ್ದೃಶಾಮ್

॥ 14॥

ಶ್ಲೋಕ 16

ಪತಿಸುತಾನ್ವಯಭ್ರಾತೃಬಾನ್ಧವಾ-

ನತಿವಿಲಙ್ಘ್ಯ ತೇಽನ್ತ್ಯಚ್ಯುತಾಗತಾಃ ।

ಗತಿವಿದಸ್ತವೋದ್ಗೀತಮೋಹಿತಾಃ

ಕಿತವ ಯೋಷಿತಃ ಕಸ್ತ್ಯಜೇನ್ನಿಶಿ

॥ 15॥

ಶ್ಲೋಕ 17

ರಹಸಿ ಸಂವಿದಂ ಹೃಚ್ಛಯೋದಯಂ

ಪ್ರಹಸಿತಾನನಂ ಪ್ರೇಮವೀಕ್ಷಣಮ್ ।

ಬೃಹದುರಃ ಶ್ರಿಯೋ ವೀಕ್ಷ್ಯ ಧಾಮ ತೇ

ಮುಹುರತಿಸ್ಪೃಹಾ ಮುಹ್ಯತೇ ಮನಃ

॥ 16॥

ಶ್ಲೋಕ 18

ವ್ರಜವನೌಕಸಾಂ ವ್ಯಕ್ತಿರಙ್ಗ ತೇ

ವೃಜಿನಹನ್ತ್ರ್ಯಲಂ ವಿಶ್ವಮಙ್ಗಲಮ್ ।

ತ್ಯಜ ಮನಾಕ್ ಚ ನಸ್ತ್ವತ್ಸ್ಪೃಹಾತ್ಮನಾಂ

ಸ್ವಜನಹೃದ್ರುಜಾಂ ಯನ್ನಿಷೂದನಮ್

॥ 17॥

ಶ್ಲೋಕ 19

ಯತ್ತೇ ಸುಜಾತಚರಣಾಮ್ಬುರುಹಂ ಸ್ತನೇಷ

ಭೀತಾಃ ಶನೈಃ ಪ್ರಿಯ ದಧೀಮಹಿ ಕರ್ಕಶೇಷು ।

ತೇನಾಟವೀಮಟಸಿ ತದ್ವ್ಯಥತೇ ನ ಕಿಂಸ್ವಿತ್

ಕೂರ್ಪಾದಿಭಿರ್ಭ್ರಮತಿ ಧೀರ್ಭವದಾಯುಷಾಂ ನಃ

॥ 18॥

ಶ್ಲೋಕ 20

ಇತಿ ಶ್ರೀಮದ್ಭಾಗವತ ಮಹಾಪುರಾಣೇ ಪಾರಮಹಂಸ್ಯಾಂ ಸಂಹಿತಾಯಾಂ

ದಶಮಸ್ಕನ್ಧೇ ಪೂರ್ವಾರ್ಧೇ ರಾಸಕ್ರೀಡಾಯಾಂ ಗೋಪೀಗೀತಂ ನಾಮೈಕತ್ರಿಂಶೋಽಧ್ಯಾಯಃ ॥