Ganga Ashtakam

gaGgASTakaM

zloka 1

bhagavati tava tIre nIramAtrAzano'ham

vigataviSayatRSNaH kRSNamArAdhayAmi |

sakala kaluSabhaGge svargasopAnasaGge

taralatarataraGge devi gaGge prasIda || 1 ||

bhagavati bhavalIlA maulimAle tavAmbhaH

kaNamaNuparimANaM prANino ye spRzanti |

amaranagaranArI cAmara grAhiNInAM

vigata kalikalaGkAtaGkamaGke luThanti || 2 ||

brahmANDaM khaNDayantI harazirasi jaTAvallimullAsayantI

svarlokAdApatantI kanakagiriguhAgaNDazailAt skhalantI |

kSoNIpRSThe luThantI duritacayacamUrnirbharaM bhartsayantI

pAthodhiM pUrayantI suranagarasaritpAvanI naH punAtu || 3 ||

majjanmAtaGga kumbhacyuta madamadirAmodamattAlijAlaM

snAnaiH siddhAGganAnAM kucayuga vilasatkuGkumAsaGgapiGgam |

sAyaM prAtarmunInAM kuzakusumacayaizchinnatIrasthanIraM

pAyAnno gAGgamambhaH karikalabha karAkrAnta raGgastaraGgam || 4 ||

AdAvAdi pitAmahasya niyama vyApAra pAtre jalaM

pazcAtpannagazAyino bhagavataH pAdodakaM pAvanam |

bhUyaH zambhujaTAvibhUSaNa maNirjahnormaharSeriyaM

kanyA kalmaSanAzinI bhagavatI bhAgIrathI dRzyate || 5 ||

zailendrAdavatAriNI nijajale majjajjanottAriNI

pArAvAravihAriNI bhavabhayazreNI samutsAriNI |

zeSAGgairanukAriNI harazirovallIdalAkAriNI

kAzIprAntavihAriNI vijayate gaGgA manohAriNI || 6 ||

kuto vIcirvIcistava yadi gatA locanapathaM

tvamApItA pItAmbarapuravAsaM vitarasi |

tvadutsaGge gaGge patati yadi kAyastanubhRtAM

tadA mAtaH zAntakratavapadalAbho'pyatilaghuH || 7 ||

gaGge trailokyasAre sakalasuravadhUdhautavistIrNatoye

pUrNabrahmasvarUpe haricaraNarajohAriNi svargamArge |

prAyazcitaM yadi syAttava jalakaNikA brahmahatyAdi pApe

kastvAM stotuM samarthaH trijagadaghahare devi gaGge prasIda || 8 ||

mAtarjAhnavI zambhusaGgamilite maulau nidhAyAJjaliM

tvattIre vapuSo'vasAnasamaye nArAyaNAGghridvayam |

sAnandaM smarato bhaviSyati mama prANaprayANotsave

bhUyAdbhaktiravicyutA hariharAdvaitAtmikA zAzvatI || 9 ||

gaGgASTakamidaM puNyaM yaH paThetprayato naraH |

sarvapApavinirmukto viSNulokaM sa gacchati || 10 ||