Dhanyashtakam

ධන්යාෂ්ටකම්

ශ්ලොක 1

(ප්රහර්ෂණීවෘත්තම් -)

තජ්ජ්ඤානං ප්රශමකරං යදින්ද්රියාණාං

තජ්ජ්ඤේයං යදුපනිෂත්සු නිශ්චිතාර්ථම් .

තේ ධන්යා භුවි පරමාර්ථනිශ්චිතේහාඃ

ශේෂාස්තු භ්රමනිලයේ පරිභ්රමන්තඃ .. 1..

(වසන්තතිලකාවෘත්තම් -)

ආදෞ විජිත්ය විෂයාන්මදමෝහරාග-

ද්වේෂාදිශත්රුගණමාහෘතයෝගරාජ්යාඃ .

ජ්ඤාත්වා මතං සමනුභූයපරාත්මවිද්යා-

කාන්තාසුඛං වනගෘහේ විචරන්ති ධන්යාඃ .. 2..

ත්යක්ත්වා ගෘහේ රතිමධෝගතිහේතුභූතාම්

ආත්මේච්ඡයෝපනිෂදර්ථරසං පිබන්තඃ .

වීතස්පෘහා විෂයභෝගපදේ විරක්තා

ධන්යාශ්චරන්ති විජනේෂු විරක්තසඞ්ගාඃ .. 3..

ත්යක්ත්වා මමාහමිති බන්ධකරේ පදේ ද්වේ

මානාවමානසදෘශාඃ සමදර්ශිනශ්ච .

කර්තාරමන්යමවගම්ය තදර්පිතානි

කුර්වන්ති කර්මපරිපාකඵලානි ධන්යාඃ .. 4..

ත්යක්ත්වීෂණාත්රයමවේක්ෂිතමෝක්ෂමර්ගා

භෛක්ෂාමෘතේන පරිකල්පිතදේහයාත්රාඃ .

ජ්යෝතිඃ පරාත්පරතරං පරමාත්මසඤ්ජ්ඤං

ධන්යා ද්විජාරහසි හෘද්යවලෝකයන්ති .. 5..

නාසන්න සන්න සදසන්න මහසන්නචාණු

න ස්ත්රී පුමාන්න ච නපුංසකමේකබීජම් .

යෛර්බ්රහ්ම තත්සමමුපාසිතමේකචිත්තෛඃ

ධන්යා විරේජුරිත්තරේභවපාශබද්ධාඃ .. 6..

අජ්ඤානපඞ්කපරිමග්නමපේතසාරං

දුඃඛාලයං මරණජන්මජරාවසක්තම් .

සංසාරබන්ධනමනිත්යමවේක්ෂ්ය ධන්යා

ජ්ඤානාසිනා තදවශීර්ය විනිශ්චයන්ති .. 7..

ශාන්තෛරනන්යමතිභිර්මධුරස්වභාවෛඃ

ඒකත්වනිශ්චිතමනෝභිරපේතමෝහෛඃ .

සාකං වනේෂු විජිතාත්මපදස්වරුපං

තද්වස්තු සම්යගනිශං විමෘශන්ති ධන්යාඃ .. 8..

(මාලිනීවෘත්තම් -)

අහිමිව ජනයෝගං සර්වදා වර්ජයේද්යඃ

කුණපමිව සුනාරීං ත්යක්තුකාමෝ විරාගී .

විෂමිව විෂයාන්යෝ මන්යමානෝ දුරන්තාන්

ජයති පරමහංසෝ මුක්තිභාවං සමේති .. 9..

(ශාර්දූලවික්රීඩිතවෘත්තම් -)

සම්පූර්ණං ජගදේව නන්දනවනං සර්වේ(අ)පි කල්පද්රුමා

ගාඞ්ගං වරි සමස්තවාරිනිවහඃ පුණ්යාඃ සමස්තාඃ ක්රියාඃ .

වාචඃ ප්රාකෘතසංස්කෘතාඃ ශ්රුතිශිරෝවාරාණසී මේදිනී

සර්වාවස්ථිතිරස්ය වස්තුවිෂයා දෘෂ්ටේ පරබ්රහ්මණි .. 10..

.. ඉති ශ්රීමද් ශඞ්කරාචාර්යවිරචිතං ධන්යාෂ්ටකං සමාප්තම් ..