Dhanyashtakam

dhanyASTakam

zloka 1

(praharSaNIvRttam -)

tajjJAnaM prazamakaraM yadindriyANAM

tajjJeyaM yadupaniSatsu nizcitArtham |

te dhanyA bhuvi paramArthanizcitehAH

zeSAstu bhramanilaye paribhramantaH || 1||

(vasantatilakAvRttam -)

Adau vijitya viSayAnmadamoharAga-

dveSAdizatrugaNamAhRtayogarAjyAH |

jJAtvA mataM samanubhUyaparAtmavidyA-

kAntAsukhaM vanagRhe vicaranti dhanyAH || 2||

tyaktvA gRhe ratimadhogatihetubhUtAm

AtmecchayopaniSadartharasaM pibantaH |

vItaspRhA viSayabhogapade viraktA

dhanyAzcaranti vijaneSu viraktasaGgAH || 3||

tyaktvA mamAhamiti bandhakare pade dve

mAnAvamAnasadRzAH samadarzinazca |

kartAramanyamavagamya tadarpitAni

kurvanti karmaparipAkaphalAni dhanyAH || 4||

tyaktvISaNAtrayamavekSitamokSamargA

bhaikSAmRtena parikalpitadehayAtrAH |

jyotiH parAtparataraM paramAtmasaJjJaM

dhanyA dvijArahasi hRdyavalokayanti || 5||

nAsanna sanna sadasanna mahasannacANu

na strI pumAnna ca napuMsakamekabIjam |

yairbrahma tatsamamupAsitamekacittaiH

dhanyA virejurittarebhavapAzabaddhAH || 6||

ajJAnapaGkaparimagnamapetasAraM

duHkhAlayaM maraNajanmajarAvasaktam |

saMsArabandhanamanityamavekSya dhanyA

jJAnAsinA tadavazIrya vinizcayanti || 7||

zAntairananyamatibhirmadhurasvabhAvaiH

ekatvanizcitamanobhirapetamohaiH |

sAkaM vaneSu vijitAtmapadasvarupaM

tadvastu samyaganizaM vimRzanti dhanyAH || 8||

(mAlinIvRttam -)

ahimiva janayogaM sarvadA varjayedyaH

kuNapamiva sunArIM tyaktukAmo virAgI |

viSamiva viSayAnyo manyamAno durantAn

jayati paramahaMso muktibhAvaM sameti || 9||

(zArdUlavikrIDitavRttam -)

sampUrNaM jagadeva nandanavanaM sarve'pi kalpadrumA

gAGgaM vari samastavArinivahaH puNyAH samastAH kriyAH |

vAcaH prAkRtasaMskRtAH zrutizirovArANasI medinI

sarvAvasthitirasya vastuviSayA dRSTe parabrahmaNi || 10||

|| iti zrImad zaGkarAcAryaviracitaM dhanyASTakaM samAptam ||