Devi Mahatmyam Durga Saptasati Chapter 4

ଦେଵୀ ମାହାତ୍ମ୍ଯଂ ଦୁର୍ଗା ସପ୍ତଶତି ଚତୁର୍ଥୋଽଧ୍ଯାଯଃ

ଶ୍ଲୋକ 1

ଶକ୍ରାଦିସ୍ତୁତିର୍ନାମ ଚତୁର୍ଧୋଽଧ୍ଯାଯଃ ॥

ଧ୍ଯାନଂ

କାଲାଭ୍ରାଭାଂ କଟାକ୍ଷୈର୍ ଅରି କୁଲ ଭଯଦାଂ ମୌଲି ବଦ୍ଧେନ୍ଦୁ ରେଖାଂ

ଶଙ୍ଖ-ଚକ୍ରଂ କୃପାଣଂ ତ୍ରିଶିଖମପି କରୈ-ରୁଦ୍ଵହନ୍ତୀଂ ତ୍ରିନେର଼୍ତ୍ରମ୍ ।

ସିଂହ ସ୍କନ୍ଦାଧିରୂଢାଂ ତ୍ରିଭୁଵନ-ମଖିଲଂ ତେଜସା ପୂରଯନ୍ତୀଂ

ଧ୍ଯାଯେ-ଦ୍ଦୁର୍ଗାଂ ଜଯାଖ୍ଯାଂ ତ୍ରିଦଶ-ପରିଵୃତାଂ ସେଵିତାଂ ସିଦ୍ଧି କାମୈଃ ॥

ଋଷିରୁଵାଚ

ଶ୍ଲୋକ 2

ଶକ୍ରାଦଯଃ ସୁରଗଣା ନିହତେଽତିଵୀର୍ଯେ

ତସ୍ମିନ୍ଦୁରାତ୍ମନି ସୁରାରିବଲେ ଚ ଦେଵ୍ଯା ।

ତାଂ ତୁଷ୍ଟୁଵୁଃ ପ୍ରଣତିନମ୍ରଶିରୋଧରାଂସା

ଵାଗ୍ଭିଃ ପ୍ରହର୍ଷପୁଲକୋଦ୍ଗମଚାରୁଦେହାଃ

॥1॥

ଶ୍ଲୋକ 3

ଦେଵ୍ଯା ଯଯା ତତମିଦଂ ଜଗଦାତ୍ମଶକ୍ତ୍ଯା

ନିଃଶେଷଦେଵଗଣଶକ୍ତିସମୂହମୂର୍ତ୍ଯା ।

ତାମମ୍ବିକାମଖିଲଦେଵମହର୍ଷିପୂଜ୍ଯାଂ

ଭକ୍ତ୍ଯା ନତାଃ ସ୍ମ ଵିଦଧାତୁଶୁଭାନି ସା ନଃ

॥ 2 ॥

ଶ୍ଲୋକ 4

ଯସ୍ଯାଃ ପ୍ରଭାଵମତୁଲଂ ଭଗଵାନନନ୍ତୋ

ବ୍ରହ୍ମା ହରଶ୍ଚ ନହି ଵକ୍ତୁମଲଂ ବଲଂ ଚ ।

ସା ଚଣ୍ଡିକାଽଖିଲ ଜଗତ୍ପରିପାଲନାଯ

ନାଶାଯ ଚାଶୁଭଭଯସ୍ଯ ମତିଂ କରୋତୁ

॥3॥

ଶ୍ଲୋକ 5

ଯା ଶ୍ରୀଃ ସ୍ଵଯଂ ସୁକୃତିନାଂ ଭଵନେଷ୍ଵଲକ୍ଷ୍ମୀଃ

ପାପାତ୍ମନାଂ କୃତଧିଯାଂ ହୃଦଯେଷୁ ବୁଦ୍ଧିଃ ।

ଶ୍ରଦ୍ଥା ସତାଂ କୁଲଜନପ୍ରଭଵସ୍ଯ ଲଜ୍ଜା

ତାଂ ତ୍ଵାଂ ନତାଃ ସ୍ମ ପରିପାଲଯ ଦେଵି ଵିଶ୍ଵମ୍

॥4॥

ଶ୍ଲୋକ 6

କିଂ ଵର୍ଣଯାମ ତଵରୂପ ମଚିନ୍ତ୍ଯମେତତ୍

କିଞ୍ଚାତିଵୀର୍ଯମସୁରକ୍ଷଯକାରି ଭୂରି ।

କିଂ ଚାହଵେଷୁ ଚରିତାନି ତଵାତ୍ଭୁତାନି

ସର୍ଵେଷୁ ଦେଵ୍ଯସୁରଦେଵଗଣାଦିକେଷୁ ।

॥5॥

ଶ୍ଲୋକ 7

ହେତୁଃ ସମସ୍ତଜଗତାଂ ତ୍ରିଗୁଣାପି ଦୋଷୈଃ

ନ ଜ୍ଞାଯସେ ହରିହରାଦିଭିରଵ୍ଯପାରା ।

ସର୍ଵାଶ୍ରଯାଖିଲମିଦଂ ଜଗଦଂଶଭୂତଂ

ଅଵ୍ଯାକୃତା ହି ପରମା ପ୍ରକୃତିସ୍ତ୍ଵମାଦ୍ଯା

॥6॥

ଶ୍ଲୋକ 8

ଯସ୍ଯାଃ ସମସ୍ତସୁରତା ସମୁଦୀରଣେନ

ତୃପ୍ତିଂ ପ୍ରଯାତି ସକଲେଷୁ ମଖେଷୁ ଦେଵି ।

ସ୍ଵାହାସି ଵୈ ପିତୃ ଗଣସ୍ଯ ଚ ତୃପ୍ତି ହେତୁ

ରୁଚ୍ଚାର୍ଯସେ ତ୍ଵମତ ଏଵ ଜନୈଃ ସ୍ଵଧାଚ

॥6॥

ଶ୍ଲୋକ 9

ଯା ମୁକ୍ତିହେତୁରଵିଚିନ୍ତ୍ଯ ମହାଵ୍ରତା ତ୍ଵଂ

ଅଭ୍ଯସ୍ଯସେ ସୁନିଯତେନ୍ଦ୍ରିଯତତ୍ଵସାରୈଃ ।

ମୋକ୍ଷାର୍ଥିଭିର୍ମୁନିଭିରସ୍ତସମସ୍ତଦୋଷୈ

ର୍ଵିଦ୍ଯାଽସି ସା ଭଗଵତୀ ପରମା ହି ଦେଵି

॥8॥

ଶ୍ଲୋକ 10

ଶବ୍ଦାତ୍ମିକା ସୁଵିମଲର୍ଗ୍ଯଜୁଷାଂ ନିଧାନଂ

ମୁଦ୍ଗୀଥରମ୍ଯପଦପାଠଵତାଂ ଚ ସାମ୍ନାମ୍ ।

ଦେଵୀ ତ୍ରଯୀ ଭଗଵତୀ ଭଵଭାଵନାଯ

ଵାର୍ତାସି ସର୍ଵ ଜଗତାଂ ପରମାର୍ତିହନ୍ତ୍ରୀ

॥9॥

ଶ୍ଲୋକ 11

ମେଧାସି ଦେଵି ଵିଦିତାଖିଲଶାସ୍ତ୍ରସାରା

ଦୁର୍ଗାଽସି ଦୁର୍ଗଭଵସାଗରସନୌରସଙ୍ଗା ।

ଶ୍ରୀଃ କୈଟ ଭାରିହୃଦଯୈକକୃତାଧିଵାସା

ଗୌରୀ ତ୍ଵମେଵ ଶଶିମୌଲିକୃତ ପ୍ରତିଷ୍ଠା

॥10॥

ଶ୍ଲୋକ 12

ଈଷତ୍ସହାସମମଲଂ ପରିପୂର୍ଣ ଚନ୍ଦ୍ର

ବିମ୍ବାନୁକାରି କନକୋତ୍ତମକାନ୍ତିକାନ୍ତମ୍ ।

ଅତ୍ଯଦ୍ଭୁତଂ ପ୍ରହୃତମାତ୍ତରୁଷା ତଥାପି

ଵକ୍ତ୍ରଂ ଵିଲୋକ୍ଯ ସହସା ମହିଷାସୁରେଣ

॥11॥

ଶ୍ଲୋକ 13

ଦୃଷ୍ଟ୍ଵାତୁ ଦେଵି କୁପିତଂ ଭ୍ରୁକୁଟୀକରାଲ

ମୁଦ୍ଯଚ୍ଛଶାଙ୍କସଦୃଶଚ୍ଛଵି ଯନ୍ନ ସଦ୍ଯଃ ।

ପ୍ରାଣାନ୍ ମୁମୋଚ ମହିଷସ୍ତଦତୀଵ ଚିତ୍ରଂ

କୈର୍ଜୀଵ୍ଯତେ ହି କୁପିତାନ୍ତକଦର୍ଶନେନ ।

॥12॥

ଶ୍ଲୋକ 14

ଦେଵିପ୍ରସୀଦ ପରମା ଭଵତୀ ଭଵାଯ

ସଦ୍ଯୋ ଵିନାଶଯସି କୋପଵତୀ କୁଲାନି ।

ଵିଜ୍ଞାତମେତଦଧୁନୈଵ ଯଦସ୍ତମେତତ୍

ନ୍ନୀତଂ ବଲଂ ସୁଵିପୁଲଂ ମହିଷାସୁରସ୍ଯ

॥13॥

ଶ୍ଲୋକ 15

ତେ ସମ୍ମତା ଜନପଦେଷୁ ଧନାନି ତେଷାଂ

ତେଷାଂ ଯଶାଂସି ନ ଚ ସୀଦତି ଧର୍ମଵର୍ଗଃ ।

ଧନ୍ଯାସ୍ତ​ଏଵ ନିଭୃତାତ୍ମଜଭୃତ୍ଯଦାରା

ଯେଷାଂ ସଦାଭ୍ଯୁଦଯଦା ଭଵତୀ ପ୍ରସନ୍ନା

॥14॥

ଶ୍ଲୋକ 16

ଧର୍ମ୍ଯାଣି ଦେଵି ସକଲାନି ସଦୈଵ କର୍ମାନି

ଣ୍ଯତ୍ଯାଦୃତଃ ପ୍ରତିଦିନଂ ସୁକୃତୀ କରୋତି ।

ସ୍ଵର୍ଗଂ ପ୍ରଯାତି ଚ ତତୋ ଭଵତୀ ପ୍ରସାଦା

ଲ୍ଲୋକତ୍ରଯେଽପି ଫଲଦା ନନୁ ଦେଵି ତେନ

॥15॥

ଶ୍ଲୋକ 17

ଦୁର୍ଗେ ସ୍ମୃତା ହରସି ଭୀତି ମଶେଶ ଜନ୍ତୋଃ

ସ୍ଵସ୍ଥୈଃ ସ୍ମୃତା ମତିମତୀଵ ଶୁଭାଂ ଦଦାସି ।

ଦାରିଦ୍ର୍ଯଦୁଃଖଭଯହାରିଣି କା ତ୍ଵଦନ୍ଯା

ସର୍ଵୋପକାରକରଣାଯ ସଦାର୍ଦ୍ରଚିତ୍ତା

॥16॥

ଶ୍ଲୋକ 18

ଏଭିର୍ହତୈର୍ଜଗଦୁପୈତି ସୁଖଂ ତଥୈତେ

କୁର୍ଵନ୍ତୁ ନାମ ନରକାଯ ଚିରାଯ ପାପମ୍ ।

ସଙ୍ଗ୍ରାମମୃତ୍ଯୁମଧିଗମ୍ଯ ଦିଵମ୍ପ୍ରଯାନ୍ତୁ

ମତ୍ଵେତି ନୂନମହିତାନ୍ଵିନିହଂସି ଦେଵି

॥17॥

ଶ୍ଲୋକ 19

ଦୃଷ୍ଟ୍ଵୈଵ କିଂ ନ ଭଵତୀ ପ୍ରକରୋତି ଭସ୍ମ

ସର୍ଵାସୁରାନରିଷୁ ଯତ୍ପ୍ରହିଣୋଷି ଶସ୍ତ୍ରମ୍ ।

ଲୋକାନ୍ପ୍ରଯାନ୍ତୁ ରିପଵୋଽପି ହି ଶସ୍ତ୍ରପୂତା

ଇତ୍ଥଂ ମତିର୍ଭଵତି ତେଷ୍ଵହି ତେଽଷୁସାଧ୍ଵୀ

॥18॥

ଶ୍ଲୋକ 20

ଖଡ୍ଗ ପ୍ରଭାନିକରଵିସ୍ଫୁରଣୈସ୍ତଧୋଗ୍ରୈଃ

ଶୂଲାଗ୍ରକାନ୍ତିନିଵହେନ ଦୃଶୋଽସୁରାଣାମ୍ ।

ଯନ୍ନାଗତା ଵିଲଯମଂଶୁମଦିନ୍ଦୁଖଣ୍ଡ

ଯୋଗ୍ଯାନନଂ ତଵ ଵିଲୋକ ଯତାଂ ତଦେତତ୍

॥19॥

ଶ୍ଲୋକ 21

ଦୁର୍ଵୃତ୍ତ ଵୃତ୍ତ ଶମନଂ ତଵ ଦେଵି ଶୀଲଂ

ରୂପଂ ତଥୈତଦଵିଚିନ୍ତ୍ଯମତୁଲ୍ଯମନ୍ଯୈଃ ।

ଵୀର୍ଯଂ ଚ ହନ୍ତୃ ହୃତଦେଵପରାକ୍ରମାଣାଂ

ଵୈରିଷ୍ଵପି ପ୍ରକଟିତୈଵ ଦଯା ତ୍ଵଯେତ୍ଥମ୍

॥20॥

ଶ୍ଲୋକ 22

କେନୋପମା ଭଵତୁ ତେଽସ୍ଯ ପରାକ୍ରମସ୍ଯ

ରୂପଂ ଚ ଶତୃଭଯ କାର୍ଯତିହାରି କୁତ୍ର ।

ଚିତ୍ତେକୃପା ସମରନିଷ୍ଟୁରତା ଚ ଦୃଷ୍ଟା

ତ୍ଵଯ୍ଯେଵ ଦେଵି ଵରଦେ ଭୁଵନତ୍ରଯେଽପି

॥21॥

ଶ୍ଲୋକ 23

ତ୍ରୈଲୋକ୍ଯମେତଦଖିଲଂ ରିପୁନାଶନେନ

ତ୍ରାତଂ ତ୍ଵଯା ସମରମୂର୍ଧନି ତେଽପି ହତ୍ଵା ।

ନୀତା ଦିଵଂ ରିପୁଗଣା ଭଯମପ୍ଯପାସ୍ତଂ

ଅସ୍ମାକମୁନ୍ମଦସୁରାରିଭଵଂ ନମସ୍ତେ

॥22॥

ଶ୍ଲୋକ 24

ଶୂଲେନ ପାହି ନୋ ଦେଵି ପାହି ଖଡ୍ଗେନ ଚାମ୍ଭିକେ ।

ଘଣ୍ଟାସ୍ଵନେନ ନଃ ପାହି ଚାପଜ୍ଯାନିସ୍ଵନେନ ଚ

॥23॥

ଶ୍ଲୋକ 25

ପ୍ରାଚ୍ଯାଂ ରକ୍ଷ ପ୍ରତୀଚ୍ଯାଂ ଚ ଚଣ୍ଡିକେ ରକ୍ଷ ଦକ୍ଷିଣେ ।

ଭ୍ରାମଣେନାତ୍ମଶୂଲସ୍ଯ ଉତ୍ତରସ୍ଯାଂ ତଥେଶ୍ଵରୀ

॥24॥

ଶ୍ଲୋକ 26

ସୌମ୍ଯାନି ଯାନି ରୂପାଣି ତ୍ରୈଲୋକ୍ଯେ ଵିଚରନ୍ତିତେ ।

ଯାନି ଚାତ୍ଯନ୍ତ ଘୋରାଣି ତୈରକ୍ଷାସ୍ମାଂସ୍ତଥାଭୁଵମ୍

॥25॥

ଶ୍ଲୋକ 27

ଖଡ୍ଗଶୂଲଗଦାଦୀନି ଯାନି ଚାସ୍ତ୍ରାଣି ତେଽମ୍ବିକେ ।

କରପଲ୍ଲଵସଙ୍ଗୀନି ତୈରସ୍ମାନ୍ରକ୍ଷ ସର୍ଵତଃ

॥26॥

ଶ୍ଲୋକ 28

ଋଷିରୁଵାଚ

॥27॥

ଶ୍ଲୋକ 29

ଏଵଂ ସ୍ତୁତା ସୁରୈର୍ଦିଵ୍ଯୈଃ କୁସୁମୈର୍ନନ୍ଦନୋଦ୍ଭଵୈଃ ।

ଅର୍ଚିତା ଜଗତାଂ ଧାତ୍ରୀ ତଥା ଗନ୍ଧାନୁ ଲେପନୈଃ

॥28॥

ଶ୍ଲୋକ 30

ଭକ୍ତ୍ଯା ସମସ୍ତୈସ୍ରି ଶୈର୍ଦିଵ୍ଯୈର୍ଧୂପୈଃ ସୁଧୂପିତା ।

ପ୍ରାହ ପ୍ରସାଦସୁମୁଖୀ ସମସ୍ତାନ୍ ପ୍ରଣତାନ୍ ସୁରାନ୍।

॥29॥

ଶ୍ଲୋକ 31

ଦେଵ୍ଯୁଵାଚ

॥30॥

ଶ୍ଲୋକ 32

ଵ୍ରିଯତାଂ ତ୍ରିଦଶାଃ ସର୍ଵେ ଯଦସ୍ମତ୍ତୋଽଭିଵାଞ୍ଛିତମ୍

॥31॥

ଶ୍ଲୋକ 33

ଦେଵା ଊଚୁ

॥32॥

ଶ୍ଲୋକ 34

ଭଗଵତ୍ଯା କୃତଂ ସର୍ଵଂ ନ କିଞ୍ଚିଦଵଶିଷ୍ଯତେ ।

ଯଦଯଂ ନିହତଃ ଶତ୍ରୁ ରସ୍ମାକଂ ମହିଷାସୁରଃ

॥33॥

ଶ୍ଲୋକ 35

ଯଦିଚାପି ଵରୋ ଦେଯ ସ୍ତ୍ଵଯାଽସ୍ମାକଂ ମହେଶ୍ଵରି ।

ସଂସ୍ମୃତା ସଂସ୍ମୃତା ତ୍ଵଂ ନୋ ହିଂ ସେଥାଃପରମାପଦଃ

॥34॥

ଶ୍ଲୋକ 36

ଯଶ୍ଚ ମର୍ତ୍ଯଃ ସ୍ତଵୈରେଭିସ୍ତ୍ଵାଂ ସ୍ତୋଷ୍ଯତ୍ଯମଲାନନେ ।

ତସ୍ଯ ଵିତ୍ତର୍ଦ୍ଧିଵିଭଵୈର୍ଧନଦାରାଦି ସମ୍ପଦାମ୍

॥35॥

ଶ୍ଲୋକ 37

ଵୃଦ୍ଦଯେଽ ସ୍ମତ୍ପ୍ରସନ୍ନା ତ୍ଵଂ ଭଵେଥାଃ ସର୍ଵଦାମ୍ଭିକେ

॥36॥

ଶ୍ଲୋକ 38

ଋଷିରୁଵାଚ

॥37॥

ଶ୍ଲୋକ 39

ଇତି ପ୍ରସାଦିତା ଦେଵୈର୍ଜଗତୋଽର୍ଥେ ତଥାତ୍ମନଃ ।

ତଥେତ୍ଯୁକ୍ତ୍ଵା ଭଦ୍ରକାଲୀ ବଭୂଵାନ୍ତର୍ହିତା ନୃପ

॥38॥

ଶ୍ଲୋକ 40

ଇତ୍ଯେତତ୍କଥିତଂ ଭୂପ ସମ୍ଭୂତା ସା ଯଥାପୁରା ।

ଦେଵୀ ଦେଵଶରୀରେଭ୍ଯୋ ଜଗତ୍ପ୍ରଯହିତୈଷିଣୀ

॥39॥

ଶ୍ଲୋକ 41

ପୁନଶ୍ଚ ଗୌରୀ ଦେହାତ୍ସା ସମୁଦ୍ଭୂତା ଯଥାଭଵତ୍ ।

ଵଧାଯ ଦୁଷ୍ଟ ଦୈତ୍ଯାନାଂ ତଥା ଶୁମ୍ଭନିଶୁମ୍ଭଯୋଃ

॥40॥

ଶ୍ଲୋକ 42

ରକ୍ଷଣାଯ ଚ ଲୋକାନାଂ ଦେଵାନାମୁପକାରିଣୀ ।

ତଚ୍ଛୃ ଣୁଷ୍ଵ ମଯାଖ୍ଯାତଂ ଯଥାଵତ୍କଥଯାମିତେ

ହ୍ରୀଂ ଓଁ

॥41॥

ଶ୍ଲୋକ 43

॥ ଜଯ ଜଯ ଶ୍ରୀ ମାର୍କଣ୍ଡେଯ ପୁରାଣେ ସାଵର୍ନିକେ ମନ୍ଵନ୍ତରେ ଦେଵି ମହତ୍ମ୍ଯେ ଶକ୍ରାଦିସ୍ତୁତିର୍ନାମ ଚତୁର୍ଧୋଽଧ୍ଯାଯଃ ସମାପ୍ତମ୍ ॥

ଆହୁତି

ହ୍ରୀଂ ଜଯନ୍ତୀ ସାଙ୍ଗାଯୈ ସାଯୁଧାଯୈ ସଶକ୍ତିକାଯୈ ସପରିଵାରାଯୈ ସଵାହନାଯୈ ଶ୍ରୀ ମହାଲକ୍ଷ୍ମ୍ଯୈ ଲକ୍ଷ୍ମୀ ବୀଜାଦିଷ୍ଟାଯୈ ମହାହୁତିଂ ସମର୍ପଯାମି ନମଃ ସ୍ଵାହା ॥