Devi Aparadha Kshamapana Stotram

devyaparAdha kShamApaNa stotram

shloka 1

na mantraM no yantraM tadapi cha na jAne stutimaho

na chAhvAnaM dhyAnaM tadapi cha na jAne stutikathAH |

na jAne mudrAste tadapi cha na jAne vilapanaM

paraM jAne mAtastvadanusaraNaM kleshaharaNam || 1 ||

vidheraj~nAnena draviNaviraheNAlasatayA

vidheyAshakyatvAttava charaNayoryA chyutirabhUt |

tadetat kShantavyaM janani sakaloddhAriNi shive

kuputro jAyeta kvachidapi kumAtA na bhavati || 2 ||

pRRithivyAM putrAste janani bahavaH santi saralAH

paraM teShAM madhye viralataralo.ahaM tava sutaH |

madIyo.ayaM tyAgaH samuchitamidaM no tava shive

kuputro jAyeta kvachidapi kumAtA na bhavati || 3 ||

jaganmAtarmAtastava charaNasevA na rachitA

na vA dattaM devi draviNamapi bhUyastava mayA |

tathApi tvaM snehaM mayi nirupamaM yatprakuruShe

kuputro jAyeta kvachidapi kumAtA na bhavati || 4 ||

parityaktA devAnvividhavidhisevAkulatayA

mayA pa~nchAshIteradhikamapanIte tu vayasi |

idAnIM chenmAtastava yadi kRRipA nApi bhavitA

nirAlambo lambodarajanani kaM yAmi sharaNam || 5 ||

shvapAko jalpAko bhavati madhupAkopamagirA

nirAtaNko raNko viharati chiraM koTikanakaiH |

tavAparNe karNe vishati manuvarNe phalamidaM

janaH ko jAnIte janani japanIyaM japavidhau || 6 ||

chitAbhasmAlepo garalamashanaM dikpaTadharo

jaTAdhArI kaNThe bhujagapatihArI pashupatiH |

kapAlI bhUtesho bhajati jagadIshaikapadavIM

bhavAnI tvatpANigrahaNaparipATI phalamidam || 7 ||

na mokShasyAkANkShA na cha vibhavavAnChApi cha na me

na vij~nAnApekShA shashimukhi sukhechChApi na punaH |

atastvAM saMyAche janani jananaM yAtu mama vai

mRRiDAnI rudrANI shiva shiva bhavAnIti japataH || 8 ||

nArAdhitAsi vidhinA vividhopachAraiH

kiM rUkShachintanaparairna kRRitaM vachobhiH |

shyAme tvameva yadi ki~nchana mayyanAthe

dhatse kRRipAmuchitamamba paraM tavaiva || 9 ||

Apatsu magnaH smaraNaM tvadIyaM

karomi durge karuNArNave shive |

naitachChaThatvaM mama bhAvayethAH

kShudhAtRRiShArtAH jananIM smaranti || 10 ||

jagadamba vichitramatra kiM

paripUrNA karuNAsti chenmayi |

aparAdhaparamparAvRRitaM

na hi mAtA samupekShate sutam || 11 ||

matsamaH pAtakI nAsti pApaghnI tvatsamA na hi |

evaM j~nAtvA mahAdevI yathA yogyaM tathA kuru || 12 ||

iti shrImachCha~NkarAchArya virachitaM devyaparAdhakShamApaNa stotram |