Devi Aparadha Kshamapana Stotram

devyaparAdha kSamApaNa stotram

zloka 1

na mantraM no yantraM tadapi ca na jAne stutimaho

na cAhvAnaM dhyAnaM tadapi ca na jAne stutikathAH |

na jAne mudrAste tadapi ca na jAne vilapanaM

paraM jAne mAtastvadanusaraNaM klezaharaNam || 1 ||

vidherajJAnena draviNaviraheNAlasatayA

vidheyAzakyatvAttava caraNayoryA cyutirabhUt |

tadetat kSantavyaM janani sakaloddhAriNi zive

kuputro jAyeta kvacidapi kumAtA na bhavati || 2 ||

pRthivyAM putrAste janani bahavaH santi saralAH

paraM teSAM madhye viralataralo'haM tava sutaH |

madIyo'yaM tyAgaH samucitamidaM no tava zive

kuputro jAyeta kvacidapi kumAtA na bhavati || 3 ||

jaganmAtarmAtastava caraNasevA na racitA

na vA dattaM devi draviNamapi bhUyastava mayA |

tathApi tvaM snehaM mayi nirupamaM yatprakuruSe

kuputro jAyeta kvacidapi kumAtA na bhavati || 4 ||

parityaktA devAnvividhavidhisevAkulatayA

mayA paJcAzIteradhikamapanIte tu vayasi |

idAnIM cenmAtastava yadi kRpA nApi bhavitA

nirAlambo lambodarajanani kaM yAmi zaraNam || 5 ||

zvapAko jalpAko bhavati madhupAkopamagirA

nirAtaGko raGko viharati ciraM koTikanakaiH |

tavAparNe karNe vizati manuvarNe phalamidaM

janaH ko jAnIte janani japanIyaM japavidhau || 6 ||

citAbhasmAlepo garalamazanaM dikpaTadharo

jaTAdhArI kaNThe bhujagapatihArI pazupatiH |

kapAlI bhUtezo bhajati jagadIzaikapadavIM

bhavAnI tvatpANigrahaNaparipATI phalamidam || 7 ||

na mokSasyAkAGkSA na ca vibhavavAJchApi ca na me

na vijJAnApekSA zazimukhi sukhecchApi na punaH |

atastvAM saMyAce janani jananaM yAtu mama vai

mRDAnI rudrANI ziva ziva bhavAnIti japataH || 8 ||

nArAdhitAsi vidhinA vividhopacAraiH

kiM rUkSacintanaparairna kRtaM vacobhiH |

zyAme tvameva yadi kiJcana mayyanAthe

dhatse kRpAmucitamamba paraM tavaiva || 9 ||

Apatsu magnaH smaraNaM tvadIyaM

karomi durge karuNArNave zive |

naitacchaThatvaM mama bhAvayethAH

kSudhAtRSArtAH jananIM smaranti || 10 ||

jagadamba vicitramatra kiM

paripUrNA karuNAsti cenmayi |

aparAdhaparamparAvRtaM

na hi mAtA samupekSate sutam || 11 ||

matsamaH pAtakI nAsti pApaghnI tvatsamA na hi |

evaM jJAtvA mahAdevI yathA yogyaM tathA kuru || 12 ||

iti zrImacchaGkarAcArya viracitaM devyaparAdhakSamApaNa stotram |