Chaurashtakam (Sri Chauragraganya Purushashtakam)

caurASTakam (zrI caurAgragaNya puruSASTakam)

zloka 1

vraje prasiddhaM navanItacauraM

gopAGganAnAM ca dukUlacauram |

anekajanmArjitapApacauraM

caurAgragaNyaM puruSaM namAmi || 1||

zrIrAdhikAyA hRdayasya cauraM

navAmbudazyAmalakAnticauram |

padAzritAnAM ca samastacauraM

caurAgragaNyaM puruSaM namAmi || 2||

akiJcanIkRtya padAzritaM yaH

karoti bhikSuM pathi gehahInam |

kenApyaho bhISaNacaura IdRg-

dRSTaHzruto vA na jagattraye'pi || 3||

yadIya nAmApi haratyazeSaM

giriprasArAn api pAparAzIn |

AzcaryarUpo nanu caura IdRg

dRSTaH zruto vA na mayA kadApi || 4||

dhanaM ca mAnaM ca tathendriyANi

prANAMzca hRtvA mama sarvameva |

palAyase kutra dhRto'dya caura

tvaM bhaktidAmnAsi mayA niruddhaH || 5||

chinatsi ghoraM yamapAzabandhaM

bhinatsi bhImaM bhavapAzabandham |

chinatsi sarvasya samastabandhaM

naivAtmano bhaktakRtaM tu bandham || 6||

manmAnase tAmasarAzighore

kArAgRhe duHkhamaye nibaddhaH |

labhasva he caura! hare! cirAya

svacauryadoSocitameva daNDam || 7||

kArAgRhe vasa sadA hRdaye madIye

madbhaktipAzadRDhabandhananizcalaH san |

tvAM kRSNa he! pralayakoTizatAntare'pi

sarvasvacaura! hRdayAn na hi mocayAmi || 8||

iti zrIbilvamaGgalaThAkUraviracitaM caurASTakaM sampUrNam |

cauragragaNya puruSASTakam |