ચાક્ષુષોપનિષદ્ (ચક્ષુષ્મતી વિદ્યા)

ચાક્ષુષોપનિષદ્ (ચક્ષુષ્મતી વિદ્યા)

શ્લોક 1

અસ્યાઃ ચાક્ષુષીવિદ્યાયાઃ અહિર્બુધ્ન્ય ઋષિઃ । ગાયત્રી છન્દઃ । સૂર્યો દેવતા । ચક્ષુરોગનિવૃત્તયે જપે વિનિયોગઃ ।

ૐ ચક્ષુશ્ચક્ષુશ્ચક્ષુઃ તેજઃ સ્થિરો ભવ । માં પાહિ પાહિ । ત્વરિતં ચક્ષુરોગાન્ શમય શમય । મમ જાતરૂપં તેજો દર્શય દર્શય । યથાહં અન્ધો ન સ્યાં તથા કલ્પય કલ્પય । કલ્યાણં કુરુ કુરુ । યાનિ મમ પૂર્વજન્મોપાર્જિતાનિ ચક્ષુઃ પ્રતિરોધક દુષ્કૃતાનિ સર્વાણિ નિર્મૂલય નિર્મૂલય ।

ૐ નમઃ ચક્ષુસ્તેજોદાત્રે દિવ્યાય ભાસ્કરાય । ૐ નમઃ કરુણાકરાયાઽમૃતાય । ૐ નમઃ સૂર્યાય । ૐ નમો ભગવતે સૂર્યાયાક્ષિતેજસે નમઃ । ખેચરાય નમઃ । મહતે નમઃ । રજસે નમઃ । તમસે નમઃ । અસતો મા સદ્ગમય । તમસો મા જ્યોતિર્ગમય । મૃત્યોર્મા અમૃતં ગમય । ઉષ્ણો ભગવાન્ શુચિરૂપઃ । હંસો ભગવાન્ શુચિરપ્રતિરૂપઃ ।

ય ઇમાં ચક્ષુષ્મતીં વિદ્યાં બ્રાહ્મણો નિત્યમધીતે ન તસ્ય અક્ષિરોગો ભવતિ । ન તસ્ય કુલે અન્ધો ભવતિ । અષ્ટૌ બ્રાહ્મણાન્ ગ્રાહયિત્વા વિદ્યાસિદ્ધિર્ભવતિ ।

વિશ્વરૂપં ઘૃણિનં જાતવેદસં હિરણ્મયં પુરુષં જ્યોતીરૂપં તપન્તં સહસ્રરશ્મિઃ શતધાવર્તમાનઃ । પુરઃ પ્રજાનામુદયત્યેષ સૂર્યઃ ।

ૐ નમો ભગવતે આદિત્યાય અક્ષિતેજસે અહો વાહિનિ વાહિનિ સ્વાહા ।