Brahma Samhita

බ්රහ්ම සංහිතා

ශ්ලොක 1

ඊශ්වරඃ පරමඃ කෘෂ්ණඃ සච්චිදානන්දවිග්රහඃ .

අනාදිරාදිර්ගෝවින්දඃ සර්වකාරණකාරණම් .. 1 ..

සහස්රපත්රකමලං ගෝකුලාඛ්යං මහත්පදම් .

තත්කර්ණිකාරං තද්ධාම තදනන්තාශසම්භවම් .. 2 ..

කර්ණිකාරං මහද්යන්ත්රං ෂට්කෝණං වජ්රකීලකම්

ෂඩඞ්ග ෂට්පදීස්ථානං ප්රකෘත්යා පුරුෂේණ ච .

ප්රේමානන්දමහානන්දරසේනාවස්ථිතං හි යත්

ජ්යෝතීරූපේණ මනුනා කාමබීජේන සඞ්ගතම් .. 3 ..

තත්කිඤ්ජල්කං තදංශානාං තත්පත්රාණි ශ්රියාමපි .. 4 ..

චතුරස්රං තත්පරිතඃ ශ්වේතද්වීපාඛ්යමද්භුතම් .

චතුරස්රං චතුර්මූර්තේශ්චතුර්ධාම චතුෂ්කෘතම් .

චතුර්භිඃ පුරුෂාර්ථෛශ්ච චතුර්භිර්හේතුභිර්වෘතම් .

ශූලෛර්දශභිරානද්ධමූර්ධ්වාධෝ දිග්විදික්ෂ්වපි .

අෂ්ටභිර්නිධිභිර්ජුෂ්ටමෂ්ටභිඃ සිද්ධිභිස්තථා .

මනුරූපෛශ්ච දශභිර්දික්පාලෛඃ පරිතෝ වෘතම් .

ශ්යාමෛර්ගෞරෛශ්ච රක්තෛශ්ච ශුක්ලෛශ්ච පාර්ෂදර්ෂභෛඃ .

ශෝභිතං ශක්තිභිස්තාභිරද්භුතාභිඃ සමන්තතඃ .. 5 ..

ඒවං ජ්යෝතිර්මයෝ දේවඃ සදානන්දං පරාත්පරඃ .

ආත්මාරාමස්ය තස්යාස්ති ප්රකෘත්යා න සමාගමඃ .. 6 ..

මායයා(අ)රමමාණස්ය න වියෝගස්තයා සහ .

ආත්මනා රමයා රේමේ ත්යක්තකාලං සිසෘක්ෂයා .. 7 ..

නියතිඃ සා රමාදේවී තත්ප්රියා තද්වශං තදා .

තල්ලිඞ්ගං භගවාන් ශම්භුර්ජෝතිරූපඃ සනාතනඃ .

යා යෝනිඃ සාපරාශක්තිඃ කාමෝ බීජං මහද්ධරේඃ .. 8 ..

ලිඞ්ගයෝන්යාත්මිකා ජාතා ඉමා මාහේශ්වරී ප්රජාඃ .. 9 ..

ශක්තිමාන් පුරුෂඃ සෝ(අ)යං ලිඞ්ගරූපී මහේශ්වරඃ .

තස්මින්නාවිරභූල්ලිඞ්ගේ මහාවිෂ්ණුර්ජගත්පතිඃ .. 10 ..

සහස්රශීර්ෂා පුරුෂඃ සහස්රාක්ෂඃ සහස්රපාත් .

සහස්රබාහුර්විශ්වාත්මා සහස්රාංශඃ සහස්රසූඃ .. 11 ..

නාරායණඃ ස භගවානාපස්තස්මාත්සනාතනාත් .

ආවිරාසීත්කාරණාර්ණෝ නිධිඃ සඞ්කර්ෂණාත්මකඃ .

යෝගනිද්රාං ගතස්තස්මින් සහස්රාංශඃ ස්වයං මහාන් .. 12 ..

තද්රෝමබිල ජාලේෂු බීජං සඞ්කර්ෂණස්ය ච .

හෛමාන්යණ්ඩානි ජාතානි මහාභූතාවෘතානි තු .. 13 ..

ප්රත්යණ්ඩමේවමේකාංශාදේකාංශාද්විශති ස්වයම් .

සහස්රමූර්ධා විශ්වාත්මා මහාවිෂ්ණුඃ සනාතනඃ .. 14 ..

වාමාඞ්ගාදසෘජද්විෂ්ණුං දක්ෂිණාඞ්ගාත්ප්රජාපතිම් .

ජ්යෝතිර්ලිඞ්ගමයං ශම්භුං කූර්චදේශාදවාසෘජත් .. 15 ..

අහඞ්කාරාත්මකං විශ්වං තස්මාදේතද්ව්යජායත .. 16 ..

අථ තෛස්ත්රිවිධෛර්වේශෛර්ලීලාමුද්වහතඃ කිල .

යෝගනිද්රා භගවතී තස්ය ශ්රීරිව සඞ්ගතා .. 17 ..

සසෘක්ෂායාං තතෝ නාභේස්තස්ය පද්මං විනිර්යයෞ .

තන්නාලං හේමනලිනං බ්රහ්මණෝ ලෝකමද්භුතම් .. 18 ..

තත්ත්වානි පූර්වරූඪානි කාරණානි පරස්පරම් .

සමවායාප්රයෝගාච්ච විභින්නානි පෘථක් පෘථක් .

චිච්ඡක්ත්යා සජ්ජමානෝ(අ)ථ භගවානාදිපූරුෂඃ .

යෝජයන්මායයා දේවෝ යෝගනිද්රාමකල්පයත් .. 19 ..

යෝජයිත්වා තු තාන්යේව ප්රවිවේශ ස්වයං ගුහාම් .

ගුහාං ප්රවිෂ්ටේ තස්මිංස්තු ජීවාත්මා ප්රතිබුධ්යතේ .. 20 ..

ස නිත්යෝ නිත්යසම්බන්ධඃ ප්රකෘතිශ්ච පරෛව සා .. 21 ..

ඒවං සර්වාත්මසම්බන්ධං නාභ්යාං පද්මං හරේරභූත් .

තත්ර බ්රහ්මාභවද්භූයශ්චතුර්වේදී චතුර්මුඛඃ .. 22 ..

ස ජාතෝ භගවච්ඡක්ත්යා තත්කාලං කිල චෝදිතඃ .

සිසෘක්ෂායාං මතිං චක්රේ පූර්වසංස්කාරසංස්කෘතඃ .

දදර්ශ කේවලං ධ්වාන්තං නාන්යත්කිමපි සර්වතඃ .. 23 ..

උවාච පුරතස්තස්මෛ තස්ය දිව්යා සරස්වතී .

කාමඃ කෘෂ්ණාය ගෝවින්ද හේ ගෝපීජන ඉත්යපි .

වල්ලභාය ප්රියා වහ්නේර්මන්ත්රං තේ දාස්යති ප්රියම් .. 24 ..

තපස්ත්වං තප ඒතේන තව සිද්ධිර්භවිෂ්යති .. 25 ..

අථ තේපේ ස සුචිරං ප්රීණන් ගෝවින්දමව්යයම් .

ශ්වේතද්වීපපතිං කෘෂ්ණං ගෝලෝකස්ථං පරාත්පරම් .

ප්රකෘත්යා ගුණරූපිණ්යා රූපිණ්යා පර්යුපාසිතම් .

සහස්රදලසම්පන්නේ කෝටිකිඤ්ජල්කබෘංහිතේ .

භූමිශ්චින්තාමණිස්තත්ර කර්ණිකාරේ මහාසනේ .

සමාසීනං චිදානන්දං ජ්යෝතිරූපං සනාතනම් .

ශබ්දබ්රහ්මමයං වේණුං වාදයන්තං මුඛාම්බුජේ .

විලාසිනීගණවෘතං ස්වෛඃ ස්වෛරංශෛරභිෂ්ටුතම් .. 26 ..

අථ වේණුනිනාදස්ය ත්රයීමූර්තිමයී ගතිඃ .

ස්ඵුරන්තී ප්රවිවේශාශු මුඛාබ්ජානි ස්වයම්භුවඃ .

ගායත්රීං ගායතස්තස්මාදධිගත්ය සරෝජජඃ .

සංස්කෘතශ්චාදිගුරුණා ද්විජතාමගමත්තතඃ .. 27 ..

ත්රය්යා ප්රබුද්ධෝ(අ)ථ විධිර්විජ්ඤාතතත්ත්වසාගරඃ .

තුෂ්ටාව වේදසාරේණ ස්තෝත්රේණානේන කේශවම් .. 28 ..

චින්තාමණිප්රකරසද්මසු කල්පවෘක්ෂ

ලක්ෂාවෘතේෂු සුරභීරභිපාලයන්තම් .

ලක්ෂ්මීසහස්රශතසම්භ්රමසේව්යමානං

ගෝවින්දමාදිපුරුෂං තමහං භජාමි .. 29 ..

වේණුං ක්වණන්තමරවින්දදලායතාක්ෂං

බර්හාවතංසමසිතාම්බුදසුන්දරාඞ්ගම් .

කන්දර්පකෝටිකමනීයවිශේෂශෝභං

ගෝවින්දමාදිපුරුෂං තමහං භජාමි .. 30 ..

ආලෝලචන්ද්රකලසද්වනමාල්යවංශී-

-රත්නාඞ්ගදං ප්රණයකේලිකලාවිලාසම් .

ශ්යාමං ත්රිභඞ්ගලලිතං නියතප්රකාශං

ගෝවින්දමාදිපුරුෂං තමහං භජාමි .. 31 ..

අඞ්ගානි යස්ය සකලේන්ද්රියවෘත්තිමන්ති

පශ්යන්ති පාන්ති කලයන්ති චිරං ජගන්ති .

ආනන්දචින්මයසදුජ්ජ්වලවිග්රහස්ය

ගෝවින්දමාදිපුරුෂං තමහං භජාමි .. 32 ..

අද්වෛතමච්යුතමනාදිමනන්තරූපං

ආද්යං පුරාණපුරුෂං නවයෞවනං ච .

වේදේෂු දුර්ලභමදුර්ලභමාත්මභක්තෞ

ගෝවින්දමාදිපුරුෂං තමහං භජාමි .. 33 ..

පන්ථාස්තු කෝටිශතවත්සරසම්ප්රගම්යෝ

වායෝරථාපි මනසෝ මුනිපුඞ්ගවානාම් .

සෝ(අ)ප්යස්ති යත්ප්රපදසීම්න්යවිචින්ත්යතත්ත්වේ

ගෝවින්දමාදිපුරුෂං තමහං භජාමි .. 34 ..

ඒකෝ(අ)ප්යසෞ රචයිතුං ජගදණ්ඩකෝටිං

යච්ඡක්තිරස්ති ජගදණ්ඩචයා යදන්තඃ .

අණ්ඩාන්තරස්ථපරමාණුචයාන්තරස්ථං

ගෝවින්දමාදිපුරුෂං තමහං භජාමි .. 35 ..

යද්භාවභාවිතධියෝ මනුජාස්තථෛව

සම්ප්රාප්ය රූපමහිමාසනයානභූෂාඃ .

සූක්තෛර්යමේව නිගමප්රථිතෛඃ ස්තුවන්ති

ගෝවින්දමාදිපුරුෂං තමහං භජාමි .. 36 ..

ආනන්දචින්මයරසප්රතිභාවිතාභි-

-ස්තාභිර්ය ඒව නිජරූපතයා කලාභිඃ .

ගෝලෝක ඒව නිවසත්යඛිලාත්මභූතෝ

ගෝවින්දමාදිපුරුෂං තමහං භජාමි .. 37 ..

ප්රේමාඤ්ජනච්ඡුරිතභක්තිවිලෝචනේන

සන්තඃ සදෛව හෘදයේෂු විලෝකයන්ති .

යං ශ්යාමසුන්දරමචින්ත්යගුණස්වරූපං

ගෝවින්දමාදිපුරුෂං තමහං භජාමි .. 38 ..

රාමාදිමූර්තිෂු කලානියමේන තිෂ්ඨන්

නානාවතාරමකරෝද්භුවනේෂු කින්තු .

කෘෂ්ණඃ ස්වයං සමභවත්පරමඃ පුමාන් යෝ

ගෝවින්දමාදිපුරුෂං තමහං භජාමි .. 39 ..

යස්ය ප්රභා ප්රභවතෝ ජගදණ්ඩකෝටි-

-කෝටිෂ්වශේෂවසුධාදි විභූතිභින්නම් .

තද්බ්රහ්ම නිෂ්කලමනන්තමශේෂභූතං

ගෝවින්දමාදිපුරුෂං තමහං භජාමි .. 40 ..

මායා හි යස්ය ජගදණ්ඩශතානි සූතේ

ත්රෛගුණ්යතද්විෂයවේදවිතායමානා .

සත්ත්වාවලම්බිපරසත්ත්වං විශුද්ධසත්ත්වං

ගෝවින්දමාදිපුරුෂං තමහං භජාමි .. 41 ..

ආනන්දචින්මයරසාත්මතයා මනඃසු

යඃ ප්රාණිනාං ප්රතිඵලන් ස්මරතාමුපේත්ය .

ලීලායිතේන භුවනානි ජයත්යජස්රං

ගෝවින්දමාදිපුරුෂං තමහං භජාමි .. 42 ..

ගෝලෝකනාම්නි නිජධාම්නි තලේ ච තස්ය

දේවි මහේශහරිධාමසු තේෂු තේෂු .

තේ තේ ප්රභාවනිචයා විහිතාශ්ච යේන

ගෝවින්දමාදිපුරුෂං තමහං භජාමි .. 43 ..

සෘෂ්ටිස්ථිතිප්රලයසාධනශක්තිරේකා

ඡායේව යස්ය භුවනානි බිභර්ති දුර්ගා .

ඉච්ඡානුරූපමපි යස්ය ච චේෂ්ටතේ සා

ගෝවින්දමාදිපුරුෂං තමහං භජාමි .. 44 ..

ක්ෂීරං යථා දධි විකාරවිශේෂයෝගාත්

සඤ්ජායතේ න හි තතඃ පෘථගස්ති හේතෝඃ .

යඃ ශම්භුතාමපි තථා සමුපෛති කාර්යා-

-ද්ගෝවින්දමාදිපුරුෂං තමහං භජාමි .. 45 ..

දීපාර්චිරේව හි දශාන්තරමභ්යුපේත්ය

දීපායතේ විවෘතහේතුසමානධර්මා .

යස්තාදෘගේව හි ච විෂ්ණුතයා විභාති

ගෝවින්දමාදිපුරුෂං තමහං භජාමි .. 46 ..

යඃ කාරණාර්ණවජලේ භජති ස්ම යෝග-

-නිද්රාමනන්තජගදණ්ඩසරෝමකූපඃ .

ආධාරශක්තිමවලම්බ්ය පරාං ස්වමූර්තිං

ගෝවින්දමාදිපුරුෂං තමහං භජාමි .. 47 ..

යස්යෛකනිශ්වසිතකාලමථාවලම්බ්ය

ජීවන්ති ලෝමබිලජා ජගදණ්ඩනාථාඃ .

විෂ්ණුර්මහාන් ස ඉහ යස්ය කලාවිශේෂෝ

ගෝවින්දමාදිපුරුෂං තමහං භජාමි .. 48 ..

භාස්වාන් යථාශ්මශකලේෂු නිජේෂු තේජඃ

ස්වීයං කියත්ප්රකටයත්යපි තද්වදත්ර .

බ්රහ්මා ය ඒෂ ජගදණ්ඩවිධානකර්තා

ගෝවින්දමාදිපුරුෂං තමහං භජාමි .. 49 ..

යත්පාදපල්ලවයුගං විනිධාය කුම්භ-

-ද්වන්ද්වේ ප්රණාමසමයේ ස ගණාධිරාජඃ .

විඝ්නාන් විහන්තුමලමස්ය ජගත්ත්රයස්ය

ගෝවින්දමාදිපුරුෂං තමහං භජාමි .. 50 ..

අග්නිර්මහී ගගනමම්බු මරුද්දිශශ්ච

කාලස්තථාත්මමනසීති ජගත්ත්රයාණි .

යස්මාද්භවන්ති විභවන්ති විශන්ති යං ච

ගෝවින්දමාදිපුරුෂං තමහං භජාමි .. 51 ..

යච්චක්ෂුරේෂ සවිතා සකලග්රහාණාං

රාජා සමස්තසුරමූර්තිරශේෂතේජාඃ .

යස්යාජ්ඤයා භ්රමති සම්භෘතකාලචක්රෝ

ගෝවින්දමාදිපුරුෂං තමහං භජාමි .. 52 ..

ධර්මෝ(අ)ථ පාපනිචයඃ ශ්රුතයස්තපාංසි

බ්රහ්මාදිකීටපතගාවධයශ්ච ජීවාඃ .

යද්දතමාත්රවිභවප්රකටප්රභාවා

ගෝවින්දමාදිපුරුෂං තමහං භජාමි .. 53 ..

යස්ත්වින්ද්රගෝපමථවේන්ද්රමහෝ ස්වකර්ම-

-බන්ධානුරූපඵලභාජනමාතනෝති .

කර්මාණි නිර්දහති කින්තු ච භක්තිභාජාං

ගෝවින්දමාදිපුරුෂං තමහං භජාමි .. 54 ..

යං ක්රෝධකාමසහජප්රණයාදිභීති-

-වාත්සල්යමෝහගුරුගෞරවසේව්යභාවෛඃ .

සඤ්චින්ත්ය තස්ය සදෘශීං තනුමාපුරේතේ

ගෝවින්දමාදිපුරුෂං තමහං භජාමි .. 55 ..

ශ්රියඃ කාන්තාඃ කාන්තඃ පරමපුරුෂඃ කල්පතරවෝ

ද්රුමා භූමිශ්චින්තාමණිගණමයි තෝයමමෘතම් .

කථා ගානං නාට්යං ගමනමපි වංශී ප්රියසඛි

චිදානන්දං ජ්යෝතිඃ පරමපි තදාස්වාද්යමපි ච .

ස යත්ර ක්ෂීරාබ්ධිඃ ස්රවති සුරභීභ්යශ්ච සුමහාන්

නිමේෂාර්ධාඛ්යෝ වා ව්රජති න හි යත්රාපි සමයඃ .

භජේ ශ්වේතද්වීපං තමහමිහ ගෝලෝකමිති යං

විදන්තස්තේ සන්තඃ ක්ෂිතිවිරලචාරාඃ කතිපයේ .. 56 ..

අථෝවාච මහාවිෂ්ණුර්භගවන්තං ප්රජාපතිම් .

බ්රහ්මන් මහත්ත්වවිජ්ඤානේ ප්රජාසර්ගේ ච චේන්මතිඃ .

පඤ්චශ්ලෝකීමිමාං විද්යාං වත්ස දත්තාං නිබෝධ මේ .. 57 ..

ප්රබුද්ධේ ජ්ඤානභක්තිභ්යාමාත්මන්යානන්දචින්මයී .

උදේත්යනුත්තමා භක්තිර්භගවත්ප්රේමලක්ෂණා .. 58 ..

ප්රමාණෛස්තත් සදාචාරෛස්තදභ්යාසෛර්නිරන්තරම් .

බෝධයනාත්මනාත්මානං භක්තිමප්යුත්තමාං ලභේත් .. 59 ..

යස්යාඃ ශ්රේයස්කරං නාස්ති යයා නිර්වෘතිමාප්නුයාත් .

යා සාධයති මාමේව භක්තිං තාමේව සාධයේත් .. 60 ..

ධර්මානන්යාන් පරිත්යජ්ය මාමේකං භජ විශ්වසන් .

යාදෘශී යාදෘශී ශ්රද්ධා සිද්ධිර්භවති තාදෘශී .

කුර්වන්නිරන්තරං කර්ම ලෝකෝ(අ)යමනුවර්තතේ .

තේනෛව කර්මණා ධ්යායන්මාං පරාං භක්තිමිච්ඡති .. 61 ..

අහං හි විශ්වස්ය චරාචරස්ය

බීජං ප්රධානං ප්රකෘතිඃ පුමාංශ්ච .

මයාහිතං තේජ ඉදං බිභර්ෂි

විධේ විධේහි ත්වමථෝ ජගන්ති .. 62 ..

ඉති ශ්රී බ්රහ්ම සංහිතා සම්පූර්ණම් .