Brahma Samhita

ব্রহ্ম সংহিতা

শ্লোক 1

ঈশ্বরঃ পরমঃ কৃষ্ণঃ সচ্চিদানন্দবিগ্রহঃ ।

অনাদিরাদির্গোবিন্দঃ সর্বকারণকারণম্

শ্লোক 2

সহস্রপত্রকমলং গোকুলাখ্যং মহত্পদম্ ।

তত্কর্ণিকারং তদ্ধাম তদনন্তাশসম্ভবম্

॥ 1 ॥

শ্লোক 3

কর্ণিকারং মহদ্যন্ত্রং ষট্কোণং বজ্রকীলকম্

ষডঙ্গ ষট্পদীস্থানং প্রকৃত্যা পুরুষেণ চ ।

প্রেমানন্দমহানন্দরসেনাবস্থিতং হি যত্

জ্যোতীরূপেণ মনুনা কামবীজেন সঙ্গতম্

॥ 2 ॥

শ্লোক 4

তত্কিঞ্জল্কং তদংশানাং তত্পত্রাণি শ্রিযামপি

॥ 3 ॥

শ্লোক 5

চতুরস্রং তত্পরিতঃ শ্বেতদ্বীপাখ্যমদ্ভুতম্ ।

চতুরস্রং চতুর্মূর্তেশ্চতুর্ধাম চতুষ্কৃতম্ ।

চতুর্ভিঃ পুরুষার্থৈশ্চ চতুর্ভির্হেতুভির্বৃতম্ ।

শূলৈর্দশভিরানদ্ধমূর্ধ্বাধো দিগ্বিদিক্ষ্বপি ।

অষ্টভির্নিধিভির্জুষ্টমষ্টভিঃ সিদ্ধিভিস্তথা ।

মনুরূপৈশ্চ দশভির্দিক্পালৈঃ পরিতো বৃতম্ ।

শ্যামৈর্গৌরৈশ্চ রক্তৈশ্চ শুক্লৈশ্চ পার্ষদর্ষভৈঃ ।

শোভিতং শক্তিভিস্তাভিরদ্ভুতাভিঃ সমন্ততঃ

॥ 4 ॥

শ্লোক 6

এবং জ্যোতির্মযো দেবঃ সদানন্দং পরাত্পরঃ ।

আত্মারামস্য তস্যাস্তি প্রকৃত্যা ন সমাগমঃ

॥ 5 ॥

শ্লোক 7

মাযযাঽরমমাণস্য ন বিযোগস্তযা সহ ।

আত্মনা রমযা রেমে ত্যক্তকালং সিসৃক্ষযা

॥ 6 ॥

শ্লোক 8

নিযতিঃ সা রমাদেবী তত্প্রিযা তদ্বশং তদা ।

তল্লিঙ্গং ভগবান্ শম্ভুর্জোতিরূপঃ সনাতনঃ ।

যা যোনিঃ সাপরাশক্তিঃ কামো বীজং মহদ্ধরেঃ

॥ 7 ॥

শ্লোক 9

লিঙ্গযোন্যাত্মিকা জাতা ইমা মাহেশ্বরী প্রজাঃ

॥ 8 ॥

শ্লোক 10

শক্তিমান্ পুরুষঃ সোঽযং লিঙ্গরূপী মহেশ্বরঃ ।

তস্মিন্নাবিরভূল্লিঙ্গে মহাবিষ্ণুর্জগত্পতিঃ

॥ 9 ॥

শ্লোক 11

সহস্রশীর্ষা পুরুষঃ সহস্রাক্ষঃ সহস্রপাত্ ।

সহস্রবাহুর্বিশ্বাত্মা সহস্রাংশঃ সহস্রসূঃ

॥ 10 ॥

শ্লোক 12

নারাযণঃ স ভগবানাপস্তস্মাত্সনাতনাত্ ।

আবিরাসীত্কারণার্ণো নিধিঃ সঙ্কর্ষণাত্মকঃ ।

যোগনিদ্রাং গতস্তস্মিন্ সহস্রাংশঃ স্বযং মহান্

॥ 11 ॥

শ্লোক 13

তদ্রোমবিল জালেষু বীজং সঙ্কর্ষণস্য চ ।

হৈমান্যণ্ডানি জাতানি মহাভূতাবৃতানি তু

॥ 12 ॥

শ্লোক 14

প্রত্যণ্ডমেবমেকাংশাদেকাংশাদ্বিশতি স্বযম্ ।

সহস্রমূর্ধা বিশ্বাত্মা মহাবিষ্ণুঃ সনাতনঃ

॥ 13 ॥

শ্লোক 15

বামাঙ্গাদসৃজদ্বিষ্ণুং দক্ষিণাঙ্গাত্প্রজাপতিম্ ।

জ্যোতির্লিঙ্গমযং শম্ভুং কূর্চদেশাদবাসৃজত্

॥ 14 ॥

শ্লোক 16

অহঙ্কারাত্মকং বিশ্বং তস্মাদেতদ্ব্যজাযত

॥ 15 ॥

শ্লোক 17

অথ তৈস্ত্রিবিধৈর্বেশৈর্লীলামুদ্বহতঃ কিল ।

যোগনিদ্রা ভগবতী তস্য শ্রীরিব সঙ্গতা

॥ 16 ॥

শ্লোক 18

সসৃক্ষাযাং ততো নাভেস্তস্য পদ্মং বিনির্যযৌ ।

তন্নালং হেমনলিনং ব্রহ্মণো লোকমদ্ভুতম্

॥ 17 ॥

শ্লোক 19

তত্ত্বানি পূর্বরূঢানি কারণানি পরস্পরম্ ।

সমবাযাপ্রযোগাচ্চ বিভিন্নানি পৃথক্ পৃথক্ ।

চিচ্ছক্ত্যা সজ্জমানোঽথ ভগবানাদিপূরুষঃ ।

যোজযন্মাযযা দেবো যোগনিদ্রামকল্পযত্

॥ 18 ॥

শ্লোক 20

যোজযিত্বা তু তান্যেব প্রবিবেশ স্বযং গুহাম্ ।

গুহাং প্রবিষ্টে তস্মিংস্তু জীবাত্মা প্রতিবুধ্যতে

॥ 19 ॥

শ্লোক 21

স নিত্যো নিত্যসম্বন্ধঃ প্রকৃতিশ্চ পরৈব সা

॥ 20 ॥

শ্লোক 22

এবং সর্বাত্মসম্বন্ধং নাভ্যাং পদ্মং হরেরভূত্ ।

তত্র ব্রহ্মাভবদ্ভূযশ্চতুর্বেদী চতুর্মুখঃ

॥ 21 ॥

শ্লোক 23

স জাতো ভগবচ্ছক্ত্যা তত্কালং কিল চোদিতঃ ।

সিসৃক্ষাযাং মতিং চক্রে পূর্বসংস্কারসংস্কৃতঃ ।

দদর্শ কেবলং ধ্বান্তং নান্যত্কিমপি সর্বতঃ

॥ 22 ॥

শ্লোক 24

উবাচ পুরতস্তস্মৈ তস্য দিব্যা সরস্বতী ।

কামঃ কৃষ্ণায গোবিন্দ হে গোপীজন ইত্যপি ।

বল্লভায প্রিযা বহ্নের্মন্ত্রং তে দাস্যতি প্রিযম্

॥ 23 ॥

শ্লোক 25

তপস্ত্বং তপ এতেন তব সিদ্ধির্ভবিষ্যতি

॥ 24 ॥

শ্লোক 26

অথ তেপে স সুচিরং প্রীণন্ গোবিন্দমব্যযম্ ।

শ্বেতদ্বীপপতিং কৃষ্ণং গোলোকস্থং পরাত্পরম্ ।

প্রকৃত্যা গুণরূপিণ্যা রূপিণ্যা পর্যুপাসিতম্ ।

সহস্রদলসম্পন্নে কোটিকিঞ্জল্কবৃংহিতে ।

ভূমিশ্চিন্তামণিস্তত্র কর্ণিকারে মহাসনে ।

সমাসীনং চিদানন্দং জ্যোতিরূপং সনাতনম্ ।

শব্দব্রহ্মমযং বেণুং বাদযন্তং মুখাম্বুজে ।

বিলাসিনীগণবৃতং স্বৈঃ স্বৈরংশৈরভিষ্টুতম্

॥ 25 ॥

শ্লোক 27

অথ বেণুনিনাদস্য ত্রযীমূর্তিমযী গতিঃ ।

স্ফুরন্তী প্রবিবেশাশু মুখাব্জানি স্বযম্ভুবঃ ।

গাযত্রীং গাযতস্তস্মাদধিগত্য সরোজজঃ ।

সংস্কৃতশ্চাদিগুরুণা দ্বিজতামগমত্ততঃ

॥ 26 ॥

শ্লোক 28

ত্রয্যা প্রবুদ্ধোঽথ বিধির্বিজ্ঞাততত্ত্বসাগরঃ ।

তুষ্টাব বেদসারেণ স্তোত্রেণানেন কেশবম্

॥ 27 ॥

শ্লোক 29

চিন্তামণিপ্রকরসদ্মসু কল্পবৃক্ষ

লক্ষাবৃতেষু সুরভীরভিপালযন্তম্ ।

লক্ষ্মীসহস্রশতসম্ভ্রমসেব্যমানং

গোবিন্দমাদিপুরুষং তমহং ভজামি

॥ 28 ॥

শ্লোক 30

বেণুং ক্বণন্তমরবিন্দদলাযতাক্ষং

বর্হাবতংসমসিতাম্বুদসুন্দরাঙ্গম্ ।

কন্দর্পকোটিকমনীযবিশেষশোভং

গোবিন্দমাদিপুরুষং তমহং ভজামি

॥ 29 ॥

শ্লোক 31

আলোলচন্দ্রকলসদ্বনমাল্যবংশী-

-রত্নাঙ্গদং প্রণযকেলিকলাবিলাসম্ ।

শ্যামং ত্রিভঙ্গললিতং নিযতপ্রকাশং

গোবিন্দমাদিপুরুষং তমহং ভজামি

॥ 30 ॥

শ্লোক 32

অঙ্গানি যস্য সকলেন্দ্রিযবৃত্তিমন্তি

পশ্যন্তি পান্তি কলযন্তি চিরং জগন্তি ।

আনন্দচিন্মযসদুজ্জ্বলবিগ্রহস্য

গোবিন্দমাদিপুরুষং তমহং ভজামি

॥ 31 ॥

শ্লোক 33

অদ্বৈতমচ্যুতমনাদিমনন্তরূপং

আদ্যং পুরাণপুরুষং নবযৌবনং চ ।

বেদেষু দুর্লভমদুর্লভমাত্মভক্তৌ

গোবিন্দমাদিপুরুষং তমহং ভজামি

॥ 32 ॥

শ্লোক 34

পন্থাস্তু কোটিশতবত্সরসম্প্রগম্যো

বাযোরথাপি মনসো মুনিপুঙ্গবানাম্ ।

সোঽপ্যস্তি যত্প্রপদসীম্ন্যবিচিন্ত্যতত্ত্বে

গোবিন্দমাদিপুরুষং তমহং ভজামি

॥ 33 ॥

শ্লোক 35

একোঽপ্যসৌ রচযিতুং জগদণ্ডকোটিং

যচ্ছক্তিরস্তি জগদণ্ডচযা যদন্তঃ ।

অণ্ডান্তরস্থপরমাণুচযান্তরস্থং

গোবিন্দমাদিপুরুষং তমহং ভজামি

॥ 34 ॥

শ্লোক 36

যদ্ভাবভাবিতধিযো মনুজাস্তথৈব

সম্প্রাপ্য রূপমহিমাসনযানভূষাঃ ।

সূক্তৈর্যমেব নিগমপ্রথিতৈঃ স্তুবন্তি

গোবিন্দমাদিপুরুষং তমহং ভজামি

॥ 35 ॥

শ্লোক 37

আনন্দচিন্মযরসপ্রতিভাবিতাভি-

-স্তাভির্য এব নিজরূপতযা কলাভিঃ ।

গোলোক এব নিবসত্যখিলাত্মভূতো

গোবিন্দমাদিপুরুষং তমহং ভজামি

॥ 36 ॥

শ্লোক 38

প্রেমাঞ্জনচ্ছুরিতভক্তিবিলোচনেন

সন্তঃ সদৈব হৃদযেষু বিলোকযন্তি ।

যং শ্যামসুন্দরমচিন্ত্যগুণস্বরূপং

গোবিন্দমাদিপুরুষং তমহং ভজামি

॥ 37 ॥

শ্লোক 39

রামাদিমূর্তিষু কলানিযমেন তিষ্ঠন্

নানাবতারমকরোদ্ভুবনেষু কিন্তু ।

কৃষ্ণঃ স্বযং সমভবত্পরমঃ পুমান্ যো

গোবিন্দমাদিপুরুষং তমহং ভজামি

॥ 38 ॥

শ্লোক 40

যস্য প্রভা প্রভবতো জগদণ্ডকোটি-

-কোটিষ্বশেষবসুধাদি বিভূতিভিন্নম্ ।

তদ্ব্রহ্ম নিষ্কলমনন্তমশেষভূতং

গোবিন্দমাদিপুরুষং তমহং ভজামি

॥ 39 ॥

শ্লোক 41

মাযা হি যস্য জগদণ্ডশতানি সূতে

ত্রৈগুণ্যতদ্বিষযবেদবিতাযমানা ।

সত্ত্বাবলম্বিপরসত্ত্বং বিশুদ্ধসত্ত্বং

গোবিন্দমাদিপুরুষং তমহং ভজামি

॥ 40 ॥

শ্লোক 42

আনন্দচিন্মযরসাত্মতযা মনঃসু

যঃ প্রাণিনাং প্রতিফলন্ স্মরতামুপেত্য ।

লীলাযিতেন ভুবনানি জযত্যজস্রং

গোবিন্দমাদিপুরুষং তমহং ভজামি

॥ 41 ॥

শ্লোক 43

গোলোকনাম্নি নিজধাম্নি তলে চ তস্য

দেবি মহেশহরিধামসু তেষু তেষু ।

তে তে প্রভাবনিচযা বিহিতাশ্চ যেন

গোবিন্দমাদিপুরুষং তমহং ভজামি

॥ 42 ॥

শ্লোক 44

সৃষ্টিস্থিতিপ্রলযসাধনশক্তিরেকা

ছাযেব যস্য ভুবনানি বিভর্তি দুর্গা ।

ইচ্ছানুরূপমপি যস্য চ চেষ্টতে সা

গোবিন্দমাদিপুরুষং তমহং ভজামি

॥ 43 ॥

শ্লোক 45

ক্ষীরং যথা দধি বিকারবিশেষযোগাত্

সঞ্জাযতে ন হি ততঃ পৃথগস্তি হেতোঃ ।

যঃ শম্ভুতামপি তথা সমুপৈতি কার্যা-

-দ্গোবিন্দমাদিপুরুষং তমহং ভজামি

॥ 44 ॥

শ্লোক 46

দীপার্চিরেব হি দশান্তরমভ্যুপেত্য

দীপাযতে বিবৃতহেতুসমানধর্মা ।

যস্তাদৃগেব হি চ বিষ্ণুতযা বিভাতি

গোবিন্দমাদিপুরুষং তমহং ভজামি

॥ 45 ॥

শ্লোক 47

যঃ কারণার্ণবজলে ভজতি স্ম যোগ-

-নিদ্রামনন্তজগদণ্ডসরোমকূপঃ ।

আধারশক্তিমবলম্ব্য পরাং স্বমূর্তিং

গোবিন্দমাদিপুরুষং তমহং ভজামি

॥ 46 ॥

শ্লোক 48

যস্যৈকনিশ্বসিতকালমথাবলম্ব্য

জীবন্তি লোমবিলজা জগদণ্ডনাথাঃ ।

বিষ্ণুর্মহান্ স ইহ যস্য কলাবিশেষো

গোবিন্দমাদিপুরুষং তমহং ভজামি

॥ 47 ॥

শ্লোক 49

ভাস্বান্ যথাশ্মশকলেষু নিজেষু তেজঃ

স্বীযং কিযত্প্রকটযত্যপি তদ্বদত্র ।

ব্রহ্মা য এষ জগদণ্ডবিধানকর্তা

গোবিন্দমাদিপুরুষং তমহং ভজামি

॥ 48 ॥

শ্লোক 50

যত্পাদপল্লবযুগং বিনিধায কুম্ভ-

-দ্বন্দ্বে প্রণামসমযে স গণাধিরাজঃ ।

বিঘ্নান্ বিহন্তুমলমস্য জগত্ত্রযস্য

গোবিন্দমাদিপুরুষং তমহং ভজামি

॥ 49 ॥

শ্লোক 51

অগ্নির্মহী গগনমম্বু মরুদ্দিশশ্চ

কালস্তথাত্মমনসীতি জগত্ত্রযাণি ।

যস্মাদ্ভবন্তি বিভবন্তি বিশন্তি যং চ

গোবিন্দমাদিপুরুষং তমহং ভজামি

॥ 50 ॥

শ্লোক 52

যচ্চক্ষুরেষ সবিতা সকলগ্রহাণাং

রাজা সমস্তসুরমূর্তিরশেষতেজাঃ ।

যস্যাজ্ঞযা ভ্রমতি সম্ভৃতকালচক্রো

গোবিন্দমাদিপুরুষং তমহং ভজামি

॥ 51 ॥

শ্লোক 53

ধর্মোঽথ পাপনিচযঃ শ্রুতযস্তপাংসি

ব্রহ্মাদিকীটপতগাবধযশ্চ জীবাঃ ।

যদ্দতমাত্রবিভবপ্রকটপ্রভাবা

গোবিন্দমাদিপুরুষং তমহং ভজামি

॥ 52 ॥

শ্লোক 54

যস্ত্বিন্দ্রগোপমথবেন্দ্রমহো স্বকর্ম-

-বন্ধানুরূপফলভাজনমাতনোতি ।

কর্মাণি নির্দহতি কিন্তু চ ভক্তিভাজাং

গোবিন্দমাদিপুরুষং তমহং ভজামি

॥ 53 ॥

শ্লোক 55

যং ক্রোধকামসহজপ্রণযাদিভীতি-

-বাত্সল্যমোহগুরুগৌরবসেব্যভাবৈঃ ।

সঞ্চিন্ত্য তস্য সদৃশীং তনুমাপুরেতে

গোবিন্দমাদিপুরুষং তমহং ভজামি

॥ 54 ॥

শ্লোক 56

শ্রিযঃ কান্তাঃ কান্তঃ পরমপুরুষঃ কল্পতরবো

দ্রুমা ভূমিশ্চিন্তামণিগণমযি তোযমমৃতম্ ।

কথা গানং নাট্যং গমনমপি বংশী প্রিযসখি

চিদানন্দং জ্যোতিঃ পরমপি তদাস্বাদ্যমপি চ ।

স যত্র ক্ষীরাব্ধিঃ স্রবতি সুরভীভ্যশ্চ সুমহান্

নিমেষার্ধাখ্যো বা ব্রজতি ন হি যত্রাপি সমযঃ ।

ভজে শ্বেতদ্বীপং তমহমিহ গোলোকমিতি যং

বিদন্তস্তে সন্তঃ ক্ষিতিবিরলচারাঃ কতিপযে

॥ 55 ॥

শ্লোক 57

অথোবাচ মহাবিষ্ণুর্ভগবন্তং প্রজাপতিম্ ।

ব্রহ্মন্ মহত্ত্ববিজ্ঞানে প্রজাসর্গে চ চেন্মতিঃ ।

পঞ্চশ্লোকীমিমাং বিদ্যাং বত্স দত্তাং নিবোধ মে

॥ 56 ॥

শ্লোক 58

প্রবুদ্ধে জ্ঞানভক্তিভ্যামাত্মন্যানন্দচিন্মযী ।

উদেত্যনুত্তমা ভক্তির্ভগবত্প্রেমলক্ষণা

॥ 57 ॥

শ্লোক 59

প্রমাণৈস্তত্ সদাচারৈস্তদভ্যাসৈর্নিরন্তরম্ ।

বোধযনাত্মনাত্মানং ভক্তিমপ্যুত্তমাং লভেত্

॥ 58 ॥

শ্লোক 60

যস্যাঃ শ্রেযস্করং নাস্তি যযা নির্বৃতিমাপ্নুযাত্ ।

যা সাধযতি মামেব ভক্তিং তামেব সাধযেত্

॥ 59 ॥

শ্লোক 61

ধর্মানন্যান্ পরিত্যজ্য মামেকং ভজ বিশ্বসন্ ।

যাদৃশী যাদৃশী শ্রদ্ধা সিদ্ধির্ভবতি তাদৃশী ।

কুর্বন্নিরন্তরং কর্ম লোকোঽযমনুবর্ততে ।

তেনৈব কর্মণা ধ্যাযন্মাং পরাং ভক্তিমিচ্ছতি

॥ 60 ॥

শ্লোক 62

অহং হি বিশ্বস্য চরাচরস্য

বীজং প্রধানং প্রকৃতিঃ পুমাংশ্চ ।

মযাহিতং তেজ ইদং বিভর্ষি

বিধে বিধেহি ত্বমথো জগন্তি

॥ 61 ॥

শ্লোক 63

ইতি শ্রী ব্রহ্ম সংহিতা সম্পূর্ণম্ ।