Bhavani Ashtakam

bhavAnI aSTakam

zloka 1

na tAto na mAtA na bandhurna dAtA

na putro na putrI na bhRtyo na bhartA

na jAyA na vidyA na vRttirmamaiva

gatistvaM gatistvaM tvamekA bhavAni || 1 ||

bhavAbdhAvapAre mahAduHkhabhIru

papAta prakAmI pralobhI pramattaH

kusaMsArapAzaprabaddhaH sadAhaM

gatistvaM gatistvaM tvamekA bhavAni || 2 ||

na jAnAmi dAnaM na ca dhyAnayogaM

na jAnAmi tantraM na ca stotramantram

na jAnAmi pUjAM na ca nyAsayogaM

gatistvaM gatistvaM tvamekA bhavAni || 3 ||

na jAnAmi puNyaM na jAnAmi tIrthaM

na jAnAmi muktiM layaM vA kadAcit

na jAnAmi bhaktiM vrataM vApi mAtaH

gatistvaM gatistvaM tvamekA bhavAni || 4 ||

kukarmI kusaGgI kubuddhiH kudAsaH

kulAcArahInaH kadAcAralInaH

kudRSTiH kuvAkyaprabandhaH sadAhaM

gatistvaM gatistvaM tvamekA bhavAni || 5 ||

prajezaM ramezaM mahezaM surezaM

dinezaM nizIthezvaraM vA kadAcit

na jAnAmi cAnyat sadAhaM zaraNye

gatistvaM gatistvaM tvamekA bhavAni || 6 ||

vivAde viSAde pramAde pravAse

jale cAnale parvate zatrumadhye

araNye zaraNye sadA mAM prapAhi

gatistvaM gatistvaM tvamekA bhavAni || 7 ||

anAtho daridro jarArogayukto

mahAkSINadInaH sadA jADyavaktraH

vipattau praviSTaH pranaSTaH sadAhaM

gatistvaM gatistvaM tvamekA bhavAni || 8 ||

|| iti zrImadAdizaGkarAcAryaviracitaM bhavAnyaSTakaM sampUrNam ||