Bhaja Govindam
Bhaja Govindam
Bhaja Govindam
bhaja govindam (moha mudgaram)
Śloka 1
bhaja govindaṃ bhaja govindaṃ
govindaṃ bhaja mūḍhamate |
samprāpte sannihite kāle
nahi nahi rakṣati ḍukṛṅkaraṇe || 1 ||
bhaja govindaṃ bhaja govindaṃ ...
mūḍha jahīhi dhanāgamatṛṣṇāṃ
kuru sadbuddhiṃ manasi vitṛṣṇām |
yallabhase nijakarmopāttaṃ
vittaṃ tena vinodaya cittam || 2 ||
bhaja govindaṃ bhaja govindaṃ ...
nārīstanabhara-nābhīdeśaṃ
dṛṣṭvā mā gā mohāveśam |
etanmāṃsavasādivikāraṃ
manasi vicintaya vāraṃ vāram || 3 ||
bhaja govindaṃ bhaja govindaṃ ...
nalinīdala-gatajalamatitaralaṃ
tadvajjīvitamatiśaya-capalam |
viddhi vyādhyabhimānagrastaṃ
lokaṃ śokahataṃ ca samastam || 4 ||
bhaja govindaṃ bhaja govindaṃ ...
yāvadvittopārjanasaktaḥ
tāvannijaparivāro raktaḥ |
paścājjīvati jarjaradehe
vārtāṃ ko'pi na pṛcchati gehe || 5 ||
bhaja govindaṃ bhaja govindaṃ ...
yāvatpavano nivasati dehe
tāvatpṛcchati kuśalaṃ gehe |
gatavati vāyau dehāpāye
bhāryā bibhyati tasminkāye || 6 ||
bhaja govindaṃ bhaja govindaṃ ...
bālastāvatkrīḍāsaktaḥ
taruṇastāvattaruṇīsaktaḥ |
vṛddhastāvaccintāsaktaḥ
parame brahmaṇi ko'pi na saktaḥ || 7 ||
bhaja govindaṃ bhaja govindaṃ ...
kā te kāntā kaste putraḥ
saṃsāro'yamatīva vicitraḥ |
kasya tvaṃ kaḥ kuta āyātaḥ
tattvaṃ cintaya tadiha bhrātaḥ || 8 ||
bhaja govindaṃ bhaja govindaṃ ...
satsaṅgatve nissaṅgatvaṃ
nissaṅgatve nirmohatvam |
nirmohatve niścalatattvaṃ
niścalatattve jīvanmuktiḥ || 9 ||
bhaja govindaṃ bhaja govindaṃ ...
vayasi gate kaḥ kāmavikāraḥ
śuṣke nīre kaḥ kāsāraḥ |
kṣīṇe vitte kaḥ parivāraḥ
jñāte tattve kaḥ saṃsāraḥ || 10 ||
bhaja govindaṃ bhaja govindaṃ ...
mā kuru dhana-jana-yauvana-garvaṃ
harati nimeṣātkālaḥ sarvam |
māyāmayamidamakhilaṃ hitvā
brahmapadaṃ tvaṃ praviśa viditvā || 11 ||
bhaja govindaṃ bhaja govindaṃ ...
dinayāminyau sāyaṃ prātaḥ
śiśiravasantau punarāyātaḥ |
kālaḥ krīḍati gacchatyāyuḥ
tadapi na muñcatyāśāvāyuḥ || 12 ||
bhaja govindaṃ bhaja govindaṃ ...
kā te kāntā dhanagatacintā
vātula kiṃ tava nāsti niyantā |
trijagati sajjanasaṅgatirekā
bhavati bhavārṇavataraṇe naukā || 13 ||
bhaja govindaṃ bhaja govindaṃ ...
dvādaśa-mañjarikābhiraśeṣaḥ
kathito vaiyākaraṇasyaiṣaḥ |
upadeśo'bhūdvidyā-nipuṇaiḥ
śrīmacchaṅkara-bhagavaccharaṇaiḥ || 14 ||
bhaja govindaṃ bhaja govindaṃ ...
jaṭilo muṇḍī luñchitakeśaḥ
kāṣāyāmbara-bahukṛtaveṣaḥ |
paśyannapi ca na paśyati mūḍhaḥ
udaranimittaṃ bahukṛtaveṣaḥ || 15 ||
bhaja govindaṃ bhaja govindaṃ ...
aṅgaṃ galitaṃ palitaṃ muṇḍaṃ
daśanavihīnaṃ jātaṃ tuṇḍam |
vṛddho yāti gṛhītvā daṇḍaṃ
tadapi na muñcatyāśāpiṇḍam || 16 ||
bhaja govindaṃ bhaja govindaṃ ...
agre vahniḥ pṛṣṭhe bhānuḥ
rātrau cubuka-samarpita-jānuḥ |
karatala-bhikṣastarutalavāsaḥ
tadapi na muñcatyāśāpāśaḥ || 17 ||
bhaja govindaṃ bhaja govindaṃ ...
kurute gaṅgāsāgaragamanaṃ
vrata-paripālanamathavā dānam |
jñānavihīnaḥ sarvamatena
bhajati na muktiṃ janmaśatena || 18 ||
bhaja govindaṃ bhaja govindaṃ ...
suramandira-taru-mūla-nivāsaḥ
śayyā bhūtalamajinaṃ vāsaḥ |
sarva-parigraha-bhogatyāgaḥ
kasya sukhaṃ na karoti virāgaḥ || 19 ||
bhaja govindaṃ bhaja govindaṃ ...
yogarato vā bhogarato vā
saṅgarato vā saṅgavihīnaḥ |
yasya brahmaṇi ramate cittaṃ
nandati nandati nandatyeva || 20 ||
bhaja govindaṃ bhaja govindaṃ ...
bhagavadgītā kiñcidadhītā
gaṅgājala-lavakaṇikā pītā |
sakṛdapi yena murārisamarcā
kriyate tasya yamena na carcā || 21 ||
bhaja govindaṃ bhaja govindaṃ ...
punarapi jananaṃ punarapi maraṇaṃ
punarapi jananījaṭhare śayanam |
iha saṃsāre bahudustāre
kṛpayā'pāre pāhi murāre || 22 ||
bhaja govindaṃ bhaja govindaṃ ...
rathyācarpaṭa-viracita-kanthaḥ
puṇyāpuṇya-vivarjita-panthaḥ |
yogī yoganiyojita-cittaḥ
ramate bālonmattavadeva || 23 ||
bhaja govindaṃ bhaja govindaṃ ...
kastvaṃ ko'haṃ kuta āyātaḥ
kā me jananī ko me tātaḥ |
iti paribhāvaya sarvamasāraṃ
viśvaṃ tyaktvā svapnavicāram || 24 ||
bhaja govindaṃ bhaja govindaṃ ...
tvayi mayi cānyatraiko viṣṇuḥ
vyarthaṃ kupyasi mayyasahiṣṇuḥ |
bhava samacittaḥ sarvatra tvaṃ
vāñchasyacirādyadi viṣṇutvam || 25 ||
bhaja govindaṃ bhaja govindaṃ ...
śatrau mitre putre bandhau
mā kuru yatnaṃ vigrahasandhau |
sarvasminnapi paśyātmānaṃ
sarvatrotsṛja bhedājñānam || 26 ||
bhaja govindaṃ bhaja govindaṃ ...
kāmaṃ krodhaṃ lobhaṃ mohaṃ
tyaktvā''tmānaṃ paśyati so'ham |
ātmajñānavihīnā mūḍhāḥ
te pacyante narakanigūḍhāḥ || 27 ||
bhaja govindaṃ bhaja govindaṃ ...
geyaṃ gītā-nāmasahasraṃ
dhyeyaṃ śrīpati-rūpamajasram |
neyaṃ sajjana-saṅge cittaṃ
deyaṃ dīnajanāya ca vittam || 28 ||
bhaja govindaṃ bhaja govindaṃ ...
sukhataḥ kriyate kāmābhogaḥ
paścādanta śarīre rogaḥ |
yadyapi loke maraṇaṃ śaraṇaṃ
tadapi na muñcati pāpācaraṇam || 29 ||
bhaja govindaṃ bhaja govindaṃ ...
arthamanarthaṃ bhāvaya nityaṃ
nāstitataḥ sukhaleśaḥ satyam |
putrādapi dhanabhājāṃ bhītiḥ
sarvatraiṣā vihitā rītiḥ || 30 ||
bhaja govindaṃ bhaja govindaṃ ...
prāṇāyāmaṃ pratyāhāraṃ
nityānitya vivekavicāram |
jāpyasametasamādhividhānaṃ
kurvavadhānaṃ mahadavadhānam || 31 ||
bhaja govindaṃ bhaja govindaṃ ...
gurucaraṇāmbuja-nirbharabhaktaḥ
saṃsārādacirādbhava muktaḥ |
sendriyamānasa-niyamādevaṃ
drakṣyasi nijahṛdayasthaṃ devam || 32 ||
bhaja govindaṃ bhaja govindaṃ ...
mūḍhaḥ kaścana vaiyākaraṇo
ḍuḥkṛṅkaraṇādhyayanadhurīṇaḥ |
śrīmacchaṅkara-bhagavacchiṣyaiḥ
bodhita āsīcchodhita-karaṇaḥ || 33 ||
bhaja govindaṃ bhaja govindaṃ ...
bhaja govindaṃ bhaja govindaṃ
govindaṃ bhaja mūḍhamate |
nāmasmaraṇādanyamupāyaṃ
nahi paśyāmo bhavataraṇe || 34 ||
bhaja govindaṃ bhaja govindaṃ ...