Bhagavadgita Parayana

zrImadbhagavadgItA pArAyaNa - dhyAnazlokAH

zloka 1

OM zrI paramAtmane namaH

atha gItA dhyAna zlokAH

OM pArthAya pratibodhitAM bhagavatA nArAyaNena svayaM

vyAsena grathitAM purANamuninA madhye mahAbhAratam |

advaitAmRtavarSiNIM bhagavatIM aSTAdazAdhyAyinIM

amba tvAM anusandadhAmi bhagavadgIte bhavadveSiNIm ||

namo'stute vyAsa vizAlabuddhe phullAravindAyatapatranetra |

yena tvayA bhArata tailapUrNaH prajvAlito jJAnamayaH pradIpaH||

prapannapArijAtAya totravetraikapANaye |

jJAnamudrAya kRSNAya gItAmRtaduhe namaH ||

vasudevasutaM devaM kaMsacANUramardanam |

devakIparamAnandaM kRSNaM vande jagadgurum ||

bhISmadroNataTA jayadrathajalA gAndhAranIlotpalA

zalyagrAhavatI kRpeNa vahanI karNena velAkulA |

azvatthAmavikarNaghoramakarA duryodhanAvartinI

sottIrNA khalu pANDavai raNanadI kaivartakaH kezavaH ||

pArAzaryavacaH sarojamamalaM gItArthagandhotkaTaM

nAnAkhyAnakakesaraM harikathA sambodhanAbodhitam |

loke sajjanaSaTpadairaharahaH pepIyamAnaM mudA

bhUyAdbhAratapaGkajaM kalimala pradhvaMsinaH zreyase ||

mUkaM karoti vAcAlaM paGguM laGghayate girim |

yatkRpA tamahaM vande paramAnandamAdhavam ||

zAntAkAraM bhujagazayanaM padmanAbhaM surezaM

vizvAdhAraM gaganasadRzaM meghavarNaM zubhAGgam |

lakSmIkAntaM kamalanayanaM yogihRddhyAnagamyaM

vande viSNuM bhavabhayaharaM sarva lokaikanAtham ||

yaM brahmAvaruNendrarudramarutaH stunvanti divyaiH stavaiH

vedaiH sAGgapadakramopaniSadaiH gAyanti yaM sAmagAH |

dhyAnAvasthita tadgatena manasA pazyanti yaM yoginaH

yasyAntaM na vidussurAsuragaNAH devAya tasmai namaH ||

nArAyaNaM namaskRtya naraJcaiva narottamam |

devIM sarasvatIM vyAsaM tato jayamudIrayet ||

saccidAnandarUpAya kRSNAyAkliSTakAriNe |

namo vedAntavedyAya gurave buddhisAkSiNe||

sarvopaniSado gAvaH dogdhA gopAlanandanaH |

pArtho vatsaH sudhIrbhoktA dugdhaM gItAmRtaM mahat ||

gItAzAstramidaM puNyaM yaH paThet prayataH pumAn |

viSNoH padamavApnoti bhayazokAdi varjitaH ||

ekaM zAstraM devakIputragItaM eko devo devakIputra eva |

eko mantrastasya nAmAni yAni karmApyekaM tasya devasya sevA ||

|| OM zrI kRSNAya paramAtmane namaH ||