Arjuna Kruta Durga Stotram

arjuna kṛta śrī durgā stotram

Śloka 1

arjuna uvāca |

namaste siddhasenāni ārye mandaravāsini |

kumāri kāli kāpāli kapile kṛṣṇapiṅgale || 1 ||

bhadrakāli namastubhyaṃ mahākāli namo'stu te |

caṇḍi caṇḍe namastubhyaṃ tāriṇi varavarṇini || 2 ||

kātyāyani mahābhāge karāli vijaye jaye |

śikhipiñchadhvajadhare nānābharaṇabhūṣite || 3 ||

aṭṭaśūlapraharaṇe khaḍgakheṭakadhāriṇi |

gopendrasyānuje jyeṣṭhe nandagopakulodbhave || 4 ||

mahiṣāsṛkpriye nityaṃ kauśiki pītavāsini |

aṭṭahāse kokamukhe namaste'stu raṇapriye || 5 ||

ume śākambhari śvete kṛṣṇe kaiṭabhanāśini |

hiraṇyākṣi virūpākṣi sudhūmrākṣi namo'stu te || 6 ||

vedaśrutimahāpuṇye brahmaṇye jātavedasi |

jambūkaṭakacaityeṣu nityaṃ sannihitālaye || 7 ||

tvaṃ brahmavidyā vidyānāṃ mahānidrā ca dehinām |

skandamātarbhagavati durge kāntāravāsini || 8 ||

svāhākāraḥ svadhā caiva kalā kāṣṭhā sarasvatī |

sāvitrī vedamātā ca tathā vedānta ucyate || 9 ||

stutāsi tvaṃ mahādevi viśuddhenāntarātmanā |

jayo bhavatu me nityaṃ tvatprasādādraṇājire || 10 ||

kāntārabhayadurgeṣu bhaktānāṃ cālayeṣu ca |

nityaṃ vasasi pātāle yuddhe jayasi dānavān || 11 ||

tvaṃ jambhanī mohinī ca māyā hrīḥ śrīstathaiva ca |

sandhyā prabhāvatī caiva sāvitrī jananī tathā || 12 ||

tuṣṭiḥ puṣṭirdhṛtirdīptiścandrādityavivardhinī |

bhūtirbhūtimatāṃ saṅkhye vīkṣyase siddhacāraṇaiḥ || 13 ||

iti śrīmanmahābhārate bhīṣmaparvaṇi trayoviṃśo'dhyāye arjuna kṛta śrī durgā stotram |