Aparadha Kshamapana Stotram (Devi)

aparAdha kShamApaNa stotram

shloka 1

aparAdhasahasrANi kriyante.aharnishaM mayA |

dAso.ayamiti mAM matvA kShamasva parameshvari || 1 ||

AvAhanaM na jAnAmi na jAnAmi visarjanam |

pUjAM chaiva na jAnAmi kShamyatAM parameshvari || 2 ||

mantrahInaM kriyAhInaM bhaktihInaM sureshvari |

yatpUjitaM mayA devi paripUrNaM tadastu me || 3 ||

aparAdhashataM kRRitvA jagadambeti chochcharet |

yAM gatiM samavApnoti na tAM brahmAdayaH surAH || 4 ||

sAparAdho.asmi sharaNaM prAptastvAM jagadambike |

idAnImanukampyo.ahaM yathechChasi tathA kuru || 5 ||

aj~nAnAdvismRRiterbhrAntyA yannyUnamadhikaM kRRitam |

viparItaM cha tatsarvaM kShamasva parameshvari || 6 ||

kAmeshvari jaganmAtaH sachchidAnandavigrahe |

gRRihANArchAmimAM prItyA prasIda parameshvari || 7 ||

yadakSharapadabhraShTaM mAtrAhInaM cha yadbhavet |

tatsarvaM kShamyatAM devi prasIda parameshvari || 8 ||

guhyAtiguhyagoptrI tvaM gRRihANAsmatkRRitaM japam |

siddhirbhavatu me devi tvatprasAdAnmaheshvari || 9 ||

sarvarUpamayI devI sarvaM devImayaM jagat |

ato.ahaM vishvarUpAM tvAM namAmi parameshvarIm || 10 ||

iti aparAdhakShamApaNastotraM samAptam ||