Agastya Kruta Sri Lakshmi Stotram

agastya kRRita shrI lakShmI stotraM

shloka 1

jaya padmapalAshAkShi jaya tvaM shrIpatipriye |

jaya mAtarmahAlakShmi saMsArArNavatAriNi || 1 ||

mahAlakShmi namastubhyaM namastubhyaM sureshvari |

haripriye namastubhyaM namastubhyaM dayAnidhe || 2 ||

padmAlaye namastubhyaM namastubhyaM cha sarvade |

sarvabhUtahitArthAya vasuvRRiShTiM sadA kuru || 3 ||

jaganmAtarnamastubhyaM namastubhyaM dayAnidhe |

dayAvati namastubhyaM vishveshvari namo.astu te || 4 ||

namaH kShIrArNavasute namastrailokyadhAriNi |

vasuvRRiShTe namastubhyaM rakSha mAM sharaNAgatam || 5 ||

rakSha tvaM devadeveshi devadevasya vallabhe |

dAridryAttrAhi mAM lakShmi kRRipAM kuru mamopari || 6 ||

namastrailokyajanani namastrailokyapAvani |

brahmAdayo namanti tvAM jagadAnandadAyini || 7 ||

viShNupriye namastubhyaM namastubhyaM jagaddhite |

Artihantri namastubhyaM samRRiddhiM kuru me sadA || 8 ||

abjavAse namastubhyaM chapalAyai namo namaH |

cha~nchalAyai namastubhyaM lalitAyai namo namaH || 9 ||

namaH pradyumnajanani mAtastubhyaM namo namaH |

paripAlaya mAM mAtaH mAM tubhyaM sharaNAgatam || 10 ||

sharaNye tvAM prapanno.asmi kamale kamalAlaye |

trAhi trAhi mahAlakShmi paritrANaparAyaNe || 11 ||

pANDityaM shobhate naiva na shobhante guNA nare |

shIlatvaM naiva shobheta mahAlakShmi tvayA vinA || 12 ||

tAvadvirAjate rUpaM tAvachChIlaM virAjate |

tAvadguNA narANAM cha yAvallakShmIH prasIdati || 13 ||

lakShmi tvayA.ala~NkRRitamAnavA ye

pApairvimuktA nRRipalokamAnyAH |

guNairvihInA guNino bhavanti

dushshIlinaH shIlavatAM variShThAH || 14 ||

lakShmIrbhUShayate rUpaM lakShmIrbhUShayate kulam |

lakShmIrbhUShayate vidyAM sarvA lakShmIrvishiShyate || 15 ||

lakShmI tvadguNakIrtanena kamalA bhUryAtyalaM jihmatAm

rudrAdyA ravichandradevapatayo vaktuM cha naiva kShamAH |

asmAbhistava rUpalakShaNaguNAnvaktuM kathaM shakyate

mAtarmAM paripAhi vishvajananI kRRitvA mameShTaM dhruvam || 16 ||

dInArtibhItaM bhavatApapIDitaM

dhanairvihInaM tava pArshvamAgatam |

kRRipAnidhitvAnmama lakShmi satvaraM

dhanapradAnAddhananAyakaM kuru || 17 ||

mAM vilokya jananI haripriye

nirdhanaM tava samIpamAgatam |

dehi me jhaTiti lakShmi karAgraM

vastrakA~nchanavarAnnamadbhutam || 18 ||

tvameva jananI lakShmIH pitA lakShmIstvameva cha |

bhrAtA tvaM cha sakhA lakShmIrvidyA lakShmIstvameva cha || 19 ||

trAhi trAhi mahAlakShmi trAhi trAhi sureshvari |

trAhi trAhi jaganmAtaH dAridryAttrAhi vegataH || 20 ||

namastubhyaM jagaddhAtri namastubhyaM namo namaH |

dharmAdhAre namastubhyaM namaH sampattidAyinI || 21 ||

dAridryArNavamagno.ahaM nimagno.ahaM rasAtale |

majjantaM mAM kare dhRRitvA tUddhara tvaM rame drutam || 22 ||

kiM lakShmi bahunoktena jalpitena punaH punaH |

anyanme sharaNaM nAsti satyaM satyaM haripriye || 23 ||

etachChrutvA.agastyavAkyaM hRRiShyamANA haripriyA |

uvAcha madhurAM vANIM tuShTA.ahaM tava sarvadA || 24 ||

shrIlakShmIruvAcha |

yattvayoktamidaM stotraM yaH paThiShyati mAnavaH |

shRRiNoti cha mahAbhAgastasyAhaM vashavartinI || 25 ||

nityaM paThati yo bhaktyA tvalakShmIstasya nashyati |

RRiNaM cha nashyate tIvraM viyogaM naiva pashyati || 26 ||

yaH paThetprAtarutthAya shraddhAbhaktisamanvitaH |

gRRihe tasya sadA tiShTennityaM shrIH patinA saha || 27 ||

sukhasaubhAgyasampanno manasvI buddhimAnbhavet |

putravAn guNavAn shreShTho bhogabhoktA cha mAnavaH || 28 ||

idaM stotraM mahApuNyaM lakShmyAgastyaprakIrtitam |

viShNuprasAdajananaM chaturvargaphalapradam || 29 ||

rAjadvAre jayashchaiva shatroshchaiva parAjayaH |

bhUtapretapishAchAnAM vyAghrANAM na bhayaM tathA || 30 ||

na shastrAnalatoyaughAdbhayaM tasya prajAyate |

durvRRittAnAM cha pApAnAM bahuhAnikaraM param || 31 ||

mandurAkarishAlAsu gavAM goShThe samAhitaH |

paThettaddoShashAntyarthaM mahApAtakanAshanam || 32 ||

sarvasaukhyakaraM nRRINAmAyurArogyadaM tathA |

agastyamuninA proktaM prajAnAM hitakAmyayA || 33 ||

ityagastyavirachitaM shrI lakShmI stotram |