Agastya Kruta Sri Lakshmi Stotram

agastya kRta zrI lakSmI stotraM

zloka 1

jaya padmapalAzAkSi jaya tvaM zrIpatipriye |

jaya mAtarmahAlakSmi saMsArArNavatAriNi || 1 ||

mahAlakSmi namastubhyaM namastubhyaM surezvari |

haripriye namastubhyaM namastubhyaM dayAnidhe || 2 ||

padmAlaye namastubhyaM namastubhyaM ca sarvade |

sarvabhUtahitArthAya vasuvRSTiM sadA kuru || 3 ||

jaganmAtarnamastubhyaM namastubhyaM dayAnidhe |

dayAvati namastubhyaM vizvezvari namo'stu te || 4 ||

namaH kSIrArNavasute namastrailokyadhAriNi |

vasuvRSTe namastubhyaM rakSa mAM zaraNAgatam || 5 ||

rakSa tvaM devadevezi devadevasya vallabhe |

dAridryAttrAhi mAM lakSmi kRpAM kuru mamopari || 6 ||

namastrailokyajanani namastrailokyapAvani |

brahmAdayo namanti tvAM jagadAnandadAyini || 7 ||

viSNupriye namastubhyaM namastubhyaM jagaddhite |

Artihantri namastubhyaM samRddhiM kuru me sadA || 8 ||

abjavAse namastubhyaM capalAyai namo namaH |

caJcalAyai namastubhyaM lalitAyai namo namaH || 9 ||

namaH pradyumnajanani mAtastubhyaM namo namaH |

paripAlaya mAM mAtaH mAM tubhyaM zaraNAgatam || 10 ||

zaraNye tvAM prapanno'smi kamale kamalAlaye |

trAhi trAhi mahAlakSmi paritrANaparAyaNe || 11 ||

pANDityaM zobhate naiva na zobhante guNA nare |

zIlatvaM naiva zobheta mahAlakSmi tvayA vinA || 12 ||

tAvadvirAjate rUpaM tAvacchIlaM virAjate |

tAvadguNA narANAM ca yAvallakSmIH prasIdati || 13 ||

lakSmi tvayA'laGkRtamAnavA ye

pApairvimuktA nRpalokamAnyAH |

guNairvihInA guNino bhavanti

duzzIlinaH zIlavatAM variSThAH || 14 ||

lakSmIrbhUSayate rUpaM lakSmIrbhUSayate kulam |

lakSmIrbhUSayate vidyAM sarvA lakSmIrviziSyate || 15 ||

lakSmI tvadguNakIrtanena kamalA bhUryAtyalaM jihmatAm

rudrAdyA ravicandradevapatayo vaktuM ca naiva kSamAH |

asmAbhistava rUpalakSaNaguNAnvaktuM kathaM zakyate

mAtarmAM paripAhi vizvajananI kRtvA mameSTaM dhruvam || 16 ||

dInArtibhItaM bhavatApapIDitaM

dhanairvihInaM tava pArzvamAgatam |

kRpAnidhitvAnmama lakSmi satvaraM

dhanapradAnAddhananAyakaM kuru || 17 ||

mAM vilokya jananI haripriye

nirdhanaM tava samIpamAgatam |

dehi me jhaTiti lakSmi karAgraM

vastrakAJcanavarAnnamadbhutam || 18 ||

tvameva jananI lakSmIH pitA lakSmIstvameva ca |

bhrAtA tvaM ca sakhA lakSmIrvidyA lakSmIstvameva ca || 19 ||

trAhi trAhi mahAlakSmi trAhi trAhi surezvari |

trAhi trAhi jaganmAtaH dAridryAttrAhi vegataH || 20 ||

namastubhyaM jagaddhAtri namastubhyaM namo namaH |

dharmAdhAre namastubhyaM namaH sampattidAyinI || 21 ||

dAridryArNavamagno'haM nimagno'haM rasAtale |

majjantaM mAM kare dhRtvA tUddhara tvaM rame drutam || 22 ||

kiM lakSmi bahunoktena jalpitena punaH punaH |

anyanme zaraNaM nAsti satyaM satyaM haripriye || 23 ||

etacchrutvA'gastyavAkyaM hRSyamANA haripriyA |

uvAca madhurAM vANIM tuSTA'haM tava sarvadA || 24 ||

zrIlakSmIruvAca |

yattvayoktamidaM stotraM yaH paThiSyati mAnavaH |

zRNoti ca mahAbhAgastasyAhaM vazavartinI || 25 ||

nityaM paThati yo bhaktyA tvalakSmIstasya nazyati |

RNaM ca nazyate tIvraM viyogaM naiva pazyati || 26 ||

yaH paThetprAtarutthAya zraddhAbhaktisamanvitaH |

gRhe tasya sadA tiSTennityaM zrIH patinA saha || 27 ||

sukhasaubhAgyasampanno manasvI buddhimAnbhavet |

putravAn guNavAn zreSTho bhogabhoktA ca mAnavaH || 28 ||

idaM stotraM mahApuNyaM lakSmyAgastyaprakIrtitam |

viSNuprasAdajananaM caturvargaphalapradam || 29 ||

rAjadvAre jayazcaiva zatrozcaiva parAjayaH |

bhUtapretapizAcAnAM vyAghrANAM na bhayaM tathA || 30 ||

na zastrAnalatoyaughAdbhayaM tasya prajAyate |

durvRttAnAM ca pApAnAM bahuhAnikaraM param || 31 ||

mandurAkarizAlAsu gavAM goSThe samAhitaH |

paThettaddoSazAntyarthaM mahApAtakanAzanam || 32 ||

sarvasaukhyakaraM nRRNAmAyurArogyadaM tathA |

agastyamuninA proktaM prajAnAM hitakAmyayA || 33 ||

ityagastyaviracitaM zrI lakSmI stotram |