Surya Mandala Stotram

සූර්ය මණ්ඩල ස්තෝත්රම්

ශ්ලොක 1

නමෝ(අ)ස්තු සූර්යාය සහස්රරශ්මයේ

සහස්රශාඛාන්විත සම්භවාත්මනේ .

සහස්රයෝගෝද්භව භාවභාගිනේ

සහස්රසඞ්ඛ්යායුධධාරිණේ නමඃ .. 1 ..

යන්මණ්ඩලං දීප්තිකරං විශාලං

රත්නප්රභං තීව්රමනාදිරූපම් .

දාරිද්ර්යදුඃඛක්ෂයකාරණං ච

පුනාතු මාං තත්සවිතුර්වරේණ්යම් .. 2 ..

යන්මණ්ඩලං දේවගණෛඃ සුපූජිතං

විප්රෛඃ ස්තුතං භාවනමුක්තිකෝවිදම් .

තං දේවදේවං ප්රණමාමි සූර්යං

පුනාතු මාං තත්සවිතුර්වරේණ්යම් .. 3 ..

යන්මණ්ඩලං ජ්ඤානඝනන්ත්වගම්යං

ත්රෛලෝක්යපූජ්යං ත්රිගුණාත්මරූපම් .

සමස්තතේජෝමයදිව්යරූපං

පුනාතු මාං තත්සවිතුර්වරේණ්යම් .. 4 ..

යන්මණ්ඩලං ගූඪමතිප්රබෝධං

ධර්මස්ය වෘද්ධිං කුරුතේ ජනානාම් .

යත්සර්වපාපක්ෂයකාරණං ච

පුනාතු මාං තත්සවිතුර්වරේණ්යම් .. 5 ..

යන්මණ්ඩලං ව්යාධිවිනාශදක්ෂං

යදෘග්යජුඃ සාමසු සම්ප්රගීතම් .

ප්රකාශිතං යේන ච භූර්භුවඃ ස්වඃ

පුනාතු මාං තත්සවිතුර්වරේණ්යම් .. 6 ..

යන්මණ්ඩලං වේදවිදෝ වදන්ති

ගායන්ති යච්චාරණසිද්ධසඞ්ඝාඃ .

යද්යෝගිනෝ යෝගජුෂාං ච සඞ්ඝාඃ

පුනාතු මාං තත්සවිතුර්වරේණ්යම් .. 7 ..

යන්මණ්ඩලං සර්වජනෛශ්ච පූජිතං

ජ්යෝතිශ්ච කුර්යාදිහ මර්ත්යලෝකේ .

යත්කාලකාලාද්යමනාදිරූපං

පුනාතු මාං තත්සවිතුර්වරේණ්යම් .. 8 ..

යන්මණ්ඩලං විෂ්ණුචතුර්මුඛාඛ්යං

යදක්ෂරං පාපහරං ජනානාම් .

යත්කාලකල්පක්ෂයකාරණං ච

පුනාතු මාං තත්සවිතුර්වරේණ්යම් .. 9 ..

යන්මණ්ඩලං විශ්වසෘජං ප්රසිද්ධං

උත්පත්තිරක්ෂප්රලය ප්රගල්භම් .

යස්මින් ජගත්සංහරතේ(අ)ඛිලං ච

පුනාතු මාං තත්සවිතුර්වරේණ්යම් .. 10 ..

යන්මණ්ඩලං සර්වගතස්ය විෂ්ණෝඃ

ආත්මා පරං‍ධාම විශුද්ධතත්ත්වම් .

සූක්ෂ්මාන්තරෛර්යෝගපථානුගම්යං

පුනාතු මාං තත්සවිතුර්වරේණ්යම් .. 11 ..

යන්මණ්ඩලං වේදවිදෝපගීතං

යද්යෝගිනාං යෝග පථානුගම්යම් .

තත්සර්ව වේද්යං ප්රණමාමි සූර්යං

පුනාතු මාං තත්සවිතුර්වරේණ්යම් .. 12 ..

සූර්යමණ්ඩලසු ස්තෝත්රං යඃ පඨේත්සතතං නරඃ .

සර්වපාපවිශුද්ධාත්මා සූර්යලෝකේ මහීයතේ ..

ඉති ශ්රී භවිෂ්යෝත්තරපුරාණේ ශ්රී කෘෂ්ණාර්ජුන සංවාදේ සූර්යමණ්ඩල ස්තෝත්රම් .