Srimad Bhagawad Gita Chapter 9

shrImadbhagavadgItA mUlam - navamo.adhyAyaH

shloka 1

OM shrIparamAtmane namaH

atha navamo.adhyAyaH |

rAjavidyArAjaguhyayogaH

shrIbhagavAnuvAcha

idaM tu te guhyatamaM pravakShyAmyanasUyave |

jnAnaM vijnAnasahitaM yajj~nAtvA mokShyase.ashubhAt || 1 ||

rAjavidyA rAjaguhyaM pavitramidamuttamam |

pratyakShAvagamaM dharmyaM susukhaM kartumavyayam || 2 ||

ashraddadhAnAH puruShA dharmasyAsya parantapa |

aprApya mAM nivartante mRRityusaMsAravartmani || 3 ||

mayA tatamidaM sarvaM jagadavyaktamUrtinA |

matsthAni sarvabhUtAni na chAhaM teShvavasthitaH || 4 ||

na cha matsthAni bhUtAni pashya me yogamaishvaram |

bhUtabhRRinna cha bhUtastho mamAtmA bhUtabhAvanaH || 5 ||

yathAkAshasthito nityaM vAyuH sarvatrago mahAn |

tathA sarvANi bhUtAni matsthAnItyupadhAraya || 6 ||

sarvabhUtAni kaunteya prakRRitiM yAnti mAmikAm |

kalpakShaye punastAni kalpAdau visRRijAmyaham || 7 ||

prakRRitiM svAmavaShTabhya visRRijAmi punaH punaH |

bhUtagrAmamimaM kRRitsnamavashaM prakRRitervashAt || 8 ||

na cha mAM tAni karmANi nibadhnanti dhana~njaya |

udAsInavadAsInamasaktaM teShu karmasu || 9 ||

mayAdhyakSheNa prakRRitiH sUyate sacharAcharam |

hetunAnena kaunteya jagadviparivartate || 10 ||

avajAnanti mAM mUDhA mAnuShIM tanumAshritam |

paraM bhAvamajAnanto mama bhUtamaheshvaram || 11 ||

moghAshA moghakarmANo moghaj~nAnA vichetasaH |

rAkShasImAsurIM chaiva prakRRitiM mohinIM shritAH || 12 ||

mahAtmAnastu mAM pArtha daivIM prakRRitimAshritAH |

bhajantyananyamanaso j~nAtvA bhUtAdimavyayam || 13 ||

satataM kIrtayanto mAM yatantashcha dRRiDhavratAH |

namasyantashcha mAM bhaktyA nityayuktA upAsate || 14 ||

jnAnayajnena chApyanye yajanto mAmupAsate |

ekatvena pRRithaktvena bahudhA vishvatomukham || 15 ||

ahaM kraturahaM yaj~naH svadhAhamahamauShadham |

mantro.ahamahamevAjyamahamagnirahaM hutam || 16 ||

pitAhamasya jagato mAtA dhAtA pitAmahaH |

vedyaM pavitramo~NkAra RRiksAma yajureva cha || 17 ||

gatirbhartA prabhuH sAkShI nivAsaH sharaNaM suhRRit |

prabhavaH pralayaH sthAnaM nidhAnaM bIjamavyayam || 18 ||

tapAmyahamahaM varShaM nigRRihNAmyutsRRijAmi cha |

amRRitaM chaiva mRRityushcha sadasachchAhamarjuna || 19 ||

traividyA mAM somapAH pUtapApA yaj~nairiShTvA svargatiM prArthayante|

te puNyamAsAdya surendralokamashnanti divyAndivi devabhogAn || 20 ||

te taM bhuktvA svargalokaM vishAlaM kShINe puNye martyalokaM vishanti|

evaM trayIdharmamanuprapannA gatAgataM kAmakAmA labhante || 21 ||

ananyAshchintayanto mAM ye janAH paryupAsate |

teShAM nityAbhiyuktAnAM yogakShemaM vahAmyaham || 22||

ye.apyanyadevatA bhaktA yajante shraddhayAnvitAH |

te.api mAmeva kaunteya yajantyavidhi pUrvakam || 23 ||

ahaM hi sarvayaj~nAnAM bhoktA cha prabhureva cha |

na tu mAmabhijAnanti tattvenAtashchyavanti te || 24 ||

yAnti devavratA devAnpitRRInyAnti pitRRivratAH |

bhUtAni yAnti bhUtejyA yAnti madyAjino.api mAm || 25 ||

patraM puShpaM phalaM toyaM yo me bhaktyA prayachChati |

tadahaM bhaktyupahRRitamashnAmi prayatAtmanaH || 26 ||

yatkaroShi yadashnAsi yajjuhoShi dadAsi yat |

yattapasyasi kaunteya tatkuruShva madarpaNam || 27 ||

shubhAshubhaphalairevaM mokShyase karmabandhanaiH |

sannyAsayogayuktAtmA vimukto mAmupaiShyasi || 28 ||

samo.ahaM sarvabhUteShu na me dveShyo.asti na priyaH |

ye bhajanti tu mAM bhaktyA mayi te teShu chApyaham || 29 ||

api chetsudurAchAro bhajate mAmananyabhAk |

sAdhureva sa mantavyaH samyagvyavasito hi saH || 30 ||

kShipraM bhavati dharmAtmA shashvachChAntiM nigachChati |

kaunteya pratijAnIhi na me bhaktaH praNashyati || 31 ||

mAM hi pArtha vyapAshritya ye.api syuH pApayonayaH |

striyo vaishyAstathA shUdrAste.api yAnti parAM gatim || 32 ||

kiM punarbrAhmaNAH puNyA bhaktA rAjarShayastathA |

anityamasukhaM lokamimaM prApya bhajasva mAm || 33 ||

manmanA bhava madbhakto madyAjI mAM namaskuru |

mAmevaiShyasi yuktvaivamAtmAnaM matparAyaNaH || 34 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde rAjavidyArAjaguhyayogo nAma navamo.adhyAyaH ||9 ||