Srimad Bhagawad Gita Chapter 7

shrImadbhagavadgItA mUlam - saptamo.adhyAyaH

shloka 1

OM shrI paramAtmane namaH

atha saptamo.adhyAyaH |

jnAnavijnAnayogaH

shrIbhagavAnuvAcha

mayyAsaktamanAH pArtha yogaM yu~njanmadAshrayaH |

asaMshayaM samagraM mAM yathA j~nAsyasi tachChRRiNu || 1 ||

jnAnaM te.ahaM savijnAnamidaM vakShyAmyasheShataH |

yajjnAtvA neha bhUyo.anyajjnAtavyamavashiShyate || 2 ||

manuShyANAM sahasreShu kashchidyatati siddhaye |

yatatAmapi siddhAnAM kashchinmAM vetti tattvataH || 3 ||

bhUmirApo.analo vAyuH khaM mano buddhireva cha |

aha~NkAra itIyaM me bhinnA prakRRitiraShTadhA || 4 ||

apareyamitastvanyAM prakRRitiM viddhi me parAm |

jIvabhUtAM mahAbAho yayedaM dhAryate jagat || 5 ||

etadyonIni bhUtAni sarvANItyupadhAraya |

ahaM kRRitsnasya jagataH prabhavaH pralayastathA || 6 ||

mattaH parataraM nAnyatkinchidasti dhananjaya |

mayi sarvamidaM protaM sUtre maNigaNA iva || 7 ||

raso.ahamapsu kaunteya prabhAsmi shashisUryayoH |

praNavaH sarvavedeShu shabdaH khe pauruShaM nRRiShu || 8 ||

puNyo gandhaH pRRithivyAM cha tejashchAsmi vibhAvasau |

jIvanaM sarvabhUteShu tapashchAsmi tapasviShu || 9 ||

bIjaM mAM sarvabhUtAnAM viddhi pArtha sanAtanam |

buddhirbuddhimatAmasmi tejastejasvinAmaham || 10 ||

balaM balavatAM chAhaM kAmarAgavivarjitam |

dharmAviruddho bhUteShu kAmo.asmi bharatarShabha || 11 ||

ye chaiva sAttvikA bhAvA rAjasAstAmasAshcha ye |

matta eveti tAnviddhi na tvahaM teShu te mayi || 12 ||

tribhirguNamayairbhAvairebhiH sarvamidaM jagat |

mohitaM nAbhijAnAti mAmebhyaH paramavyayam || 13 ||

daivI hyeShA guNamayI mama mAyA duratyayA |

mAmeva ye prapadyante mAyAmetAM taranti te || 14 ||

na mAM duShkRRitino mUDhAH prapadyante narAdhamAH |

mAyayApahRRitaj~nAnA AsuraM bhAvamAshritAH || 15 ||

chaturvidhA bhajante mAM janAH sukRRitino.arjuna |

Arto jijnAsurarthArthI jnAnI cha bharatarShabha || 16 ||

teShAM j~nAnI nityayukta ekabhaktirvishiShyate |

priyo hi j~nAnino.atyarthamahaM sa cha mama priyaH || 17 ||

udArAH sarva evaite j~nAnI tvAtmaiva me matam |

AsthitaH sa hi yuktAtmA mAmevAnuttamAM gatim || 18 ||

bahUnAM janmanAmante j~nAnavAnmAM prapadyate |

vAsudevaH sarvamiti sa mahAtmA sudurlabhaH || 19 ||

kAmaistaistairhRRitaj~nAnAH prapadyante.anyadevatAH |

taM taM niyamamAsthAya prakRRityA niyatAH svayA || 20 ||

yo yo yAM yAM tanuM bhaktaH shraddhayArchitumichChati |

tasya tasyAchalAM shraddhAM tAmeva vidadhAmyaham || 21 ||

sa tayA shraddhayA yuktastasyArAdhanamIhate |

labhate cha tataH kAmAnmayaiva vihitAnhi tAn || 22 ||

antavattu phalaM teShAM tadbhavatyalpamedhasAm |

devAndevayajo yAnti madbhaktA yAnti mAmapi || 23 ||

avyaktaM vyaktimApannaM manyante mAmabuddhayaH |

paraM bhAvamajAnanto mamAvyayamanuttamam || 24 ||

nAhaM prakAshaH sarvasya yogamAyAsamAvRRitaH |

mUDho.ayaM nAbhijAnAti loko mAmajamavyayam || 25 ||

vedAhaM samatItAni vartamAnAni chArjuna |

bhaviShyANi cha bhUtAni mAM tu veda na kashchana || 26 ||

ichChAdveShasamutthena dvandvamohena bhArata |

sarvabhUtAni sammohaM sarge yAnti parantapa || 27 ||

yeShAM tvantagataM pApaM janAnAM puNyakarmaNAm |

te dvandvamohanirmuktA bhajante mAM dRRiDhavratAH || 28 ||

jarAmaraNamokShAya mAmAshritya yatanti ye |

te brahma tadviduH kRRitsnamadhyAtmaM karma chAkhilam || 29 ||

sAdhibhUtAdhidaivaM mAM sAdhiyaj~naM cha ye viduH |

prayANakAle.api cha mAM te viduryuktachetasaH || 30 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAdejnAnavijnAnayogo nAma saptamo.adhyAyaH ||7 ||