Srimad Bhagawad Gita Chapter 6

shrImadbhagavadgItA mUlam - ShaShTho.adhyAyaH

shloka 1

OM shrI paramAtmane namaH

atha ShaShTho.adhyAyaH |

AtmasaMyamayogaH

shrIbhagavAnuvAcha

anAshritaH karmaphalaM kAryaM karma karoti yaH |

sa sannyAsI cha yogI cha na niragnirna chAkriyaH || 1 ||

yaM sannyAsamiti prAhuryogaM taM viddhi pANDava |

na hyasannyastasa~Nkalpo yogI bhavati kashchana || 2 ||

ArurukShormuneryogaM karma kAraNamuchyate |

yogArUDhasya tasyaiva shamaH kAraNamuchyate || 3 ||

yadA hi nendriyArtheShu na karmasvanuShajjate |

sarvasa~NkalpasannyAsI yogArUDhastadochyate || 4 ||

uddharedAtmanAtmAnaM nAtmAnamavasAdayet |

Atmaiva hyAtmano bandhurAtmaiva ripurAtmanaH || 5 ||

bandhurAtmAtmanastasya yenAtmaivAtmanA jitaH |

anAtmanastu shatrutve vartetAtmaiva shatruvat || 6 ||

jitAtmanaH prashAntasya paramAtmA samAhitaH |

shItoShNasukhaduHkheShu tathA mAnApamAnayoH || 7 ||

jnAnavijnAnatRRiptAtmA kUTastho vijitendriyaH |

yukta ityuchyate yogI samaloShTAshmakA~nchanaH || 8 ||

suhRRinmitrAryudAsInamadhyasthadveShyabandhuShu |

sAdhuShvapi cha pApeShu samabuddhirvishiShyate || 9 ||

yogI yu~njIta satatamAtmAnaM rahasi sthitaH |

ekAkI yatachittAtmA nirAshIraparigrahaH || 10 ||

shuchau deshe pratiShThApya sthiramAsanamAtmanaH |

nAtyuchChritaM nAtinIchaM chailAjinakushottaram || 11 ||

tatraikAgraM manaH kRRitvA yatachittendriyakriyAH |

upavishyAsane yu~njyAdyogamAtmavishuddhaye || 12 ||

samaM kAyashirogrIvaM dhArayannachalaM sthiraH |

samprekShya nAsikAgraM svaM dishashchAnavalokayan || 13 ||

prashAntAtmA vigatabhIrbrahmachArivrate sthitaH |

manaH saMyamya machchitto yukta AsIta matparaH || 14 ||

yu~njannevaM sadAtmAnaM yogI niyatamAnasaH |

shAntiM nirvANaparamAM matsaMsthAmadhigachChati || 15 ||

nAtyashnatastu yogo.asti na chaikAntamanashnataH |

na chAtisvapnashIlasya jAgrato naiva chArjuna || 16 ||

yuktAhAravihArasya yuktacheShTasya karmasu |

yuktasvapnAvabodhasya yogo bhavati duHkhahA || 17 ||

yadA viniyataM chittamAtmanyevAvatiShThate |

niHspRRihaH sarvakAmebhyo yukta ityuchyate tadA || 18 ||

yathA dIpo nivAtastho ne~Ngate sopamA smRRitA |

yogino yatachittasya yu~njato yogamAtmanaH || 19 ||

yatroparamate chittaM niruddhaM yogasevayA |

yatra chaivAtmanAtmAnaM pashyannAtmani tuShyati || 20 ||

sukhamAtyantikaM yattadbuddhigrAhyamatIndriyam |

vetti yatra na chaivAyaM sthitashchalati tattvataH || 21 ||

yaM labdhvA chAparaM lAbhaM manyate nAdhikaM tataH |

yasminsthito na duHkhena guruNApi vichAlyate || 22 ||

taM vidyAdduHkhasaMyogaviyogaM yogasanjnitam |

sa nishchayena yoktavyo yogo.anirviNNachetasA || 23 ||

sa~NkalpaprabhavAnkAmAMstyaktvA sarvAnasheShataH |

manasaivendriyagrAmaM viniyamya samantataH || 24 ||

shanaiH shanairuparamedbuddhyA dhRRitigRRihItayA |

AtmasaMsthaM manaH kRRitvA na ki~nchidapi chintayet || 25 ||

yato yato nishcharati manashcha~nchalamasthiram |

tatastato niyamyaitadAtmanyeva vashaM nayet || 26 ||

prashAntamanasaM hyenaM yoginaM sukhamuttamam |

upaiti shAntarajasaM brahmabhUtamakalmaSham || 27 ||

yu~njannevaM sadAtmAnaM yogI vigatakalmaShaH |

sukhena brahmasaMsparshamatyantaM sukhamashnute || 28 ||

sarvabhUtasthamAtmAnaM sarvabhUtAni chAtmani |

IkShate yogayuktAtmA sarvatra samadarshanaH || 29 ||

yo mAM pashyati sarvatra sarvaM cha mayi pashyati |

tasyAhaM na praNashyAmi sa cha me na praNashyati || 30 ||

sarvabhUtasthitaM yo mAM bhajatyekatvamAsthitaH |

sarvathA vartamAno.api sa yogI mayi vartate || 31 ||

Atmaupamyena sarvatra samaM pashyati yo.arjuna |

sukhaM vA yadi vA duHkhaM sa yogI paramo mataH || 32 ||

arjuna uvAcha

yo.ayaM yogastvayA proktaH sAmyena madhusUdana |

etasyAhaM na pashyAmi cha~nchalatvAtsthitiM sthirAm || 33 ||

cha~nchalaM hi manaH kRRiShNa pramAthi balavaddRRiDham |

tasyAhaM nigrahaM manye vAyoriva suduShkaram || 34 ||

shrIbhagavAnuvAcha

asaMshayaM mahAbAho mano durnigrahaM chalam |

abhyAsena tu kaunteya vairAgyeNa cha gRRihyate || 35 ||

asaMyatAtmanA yogo duShprApa iti me matiH |

vashyAtmanA tu yatatA shakyo.avAptumupAyataH || 36 ||

arjuna uvAcha

ayatiH shraddhayopeto yogAchchalitamAnasaH |

aprApya yogasaMsiddhiM kAM gatiM kRRiShNa gachChati || 37 ||

kachchinnobhayavibhraShTashChinnAbhramiva nashyati |

apratiShTho mahAbAho vimUDho brahmaNaH pathi || 38 ||

etanme saMshayaM kRRiShNa ChettumarhasyasheShataH |

tvadanyaH saMshayasyAsya ChettA na hyupapadyate || 39 ||

shrIbhagavAnuvAcha

pArtha naiveha nAmutra vinAshastasya vidyate |

na hi kalyANakRRitkashchiddurgatiM tAta gachChati || 40 ||

prApya puNyakRRitAM lokAnuShitvA shAshvatIH samAH |

shuchInAM shrImatAM gehe yogabhraShTo.abhijAyate || 41 ||

athavA yoginAmeva kule bhavati dhImatAm |

etaddhi durlabhataraM loke janma yadIdRRisham || 42 ||

tatra taM buddhisaMyogaM labhate paurvadehikam |

yatate cha tato bhUyaH saMsiddhau kurunandana || 43 ||

pUrvAbhyAsena tenaiva hriyate hyavasho.api saH |

jij~nAsurapi yogasya shabdabrahmAtivartate || 44 ||

prayatnAdyatamAnastu yogI saMshuddhakilbiShaH |

anekajanmasaMsiddhastato yAti parAM gatim || 45 ||

tapasvibhyo.adhiko yogI j~nAnibhyo.api mato.adhikaH |

karmibhyashchAdhiko yogI tasmAdyogI bhavArjuna || 46 ||

yoginAmapi sarveShAM madgatenAntarAtmanA |

shraddhAvAnbhajate yo mAM sa me yuktatamo mataH || 47 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde AtmasaMyamayogo nAma ShaShTho.adhyAyaH ||6 ||