Srimad Bhagawad Gita Chapter 5

shrImadbhagavadgItA mUlam - pa~nchamo.adhyAyaH

shloka 1

OM shrI paramAtmane namaH

atha pa~nchamo.adhyAyaH |

karmasannyAsayogaH

arjuna uvAcha

sannyAsaM karmaNAM kRRiShNa punaryogaM cha shaMsasi |

yachChreya etayorekaM tanme brUhi sunishchitam || 1 ||

shrIbhagavAnuvAcha

sannyAsaH karmayogashcha niHshreyasakarAvubhau |

tayostu karmasannyAsAtkarmayogo vishiShyate || 2 ||

jneyaH sa nityasannyAsI yo na dveShTi na kANkShati |

nirdvandvo hi mahAbAho sukhaM bandhAtpramuchyate || 3 ||

sA~Nkhyayogau pRRithagbAlAH pravadanti na paNDitAH |

ekamapyAsthitaH samyagubhayorvindate phalam || 4 ||

yatsA~NkhyaiH prApyate sthAnaM tadyogairapi gamyate |

ekaM sA~NkhyaM cha yogaM cha yaH pashyati sa pashyati || 5 ||

sannyAsastu mahAbAho duHkhamAptumayogataH |

yogayukto munirbrahma nachireNAdhigachChati || 6 ||

yogayukto vishuddhAtmA vijitAtmA jitendriyaH |

sarvabhUtAtmabhUtAtmA kurvannapi na lipyate || 7 ||

naiva ki~nchitkaromIti yukto manyeta tattvavit |

pashyanshRRiNvanspRRishanjighrannashnangachChansvapa~nshvasan || 8 ||

pralapanvisRRijangRRihNannunmiShannimiShannapi |

indriyANIndriyArtheShu vartanta iti dhArayan || 9 ||

brahmaNyAdhAya karmANi sa~NgaM tyaktvA karoti yaH |

lipyate na sa pApena padmapatramivAmbhasA || 10 ||

kAyena manasA buddhyA kevalairindriyairapi |

yoginaH karma kurvanti sa~NgaM tyaktvAtmashuddhaye || 11 ||

yuktaH karmaphalaM tyaktvA shAntimApnoti naiShThikIm |

ayuktaH kAmakAreNa phale sakto nibadhyate || 12 ||

sarvakarmANi manasA sannyasyAste sukhaM vashI |

navadvAre pure dehI naiva kurvanna kArayan || 13 ||

na kartRRitvaM na karmANi lokasya sRRijati prabhuH |

na karmaphalasaMyogaM svabhAvastu pravartate || 14 ||

nAdatte kasyachitpApaM na chaiva sukRRitaM vibhuH |

ajnAnenAvRRitaM jnAnaM tena muhyanti jantavaH || 15 ||

jnAnena tu tadajnAnaM yeShAM nAshitamAtmanaH |

teShAmAdityavajj~nAnaM prakAshayati tatparam || 16 ||

tadbuddhayastadAtmAnastanniShThAstatparAyaNAH |

gachChantyapunarAvRRittiM j~nAnanirdhUtakalmaShAH || 17 ||

vidyAvinayasampanne brAhmaNe gavi hastini |

shuni chaiva shvapAke cha paNDitAH samadarshinaH || 18 ||

ihaiva tairjitaH sargo yeShAM sAmye sthitaM manaH |

nirdoShaM hi samaM brahma tasmAdbrahmaNi te sthitAH || 19 ||

na prahRRiShyetpriyaM prApya nodvijetprApya chApriyam |

sthirabuddhirasammUDho brahmavidbrahmaNi sthitaH || 20 ||

bAhyasparsheShvasaktAtmA vindatyAtmani yatsukham |

sa brahmayogayuktAtmA sukhamakShayamashnute || 21 ||

ye hi saMsparshajA bhogA duHkhayonaya eva te |

AdyantavantaH kaunteya na teShu ramate budhaH || 22 ||

shaknotIhaiva yaH soDhuM prAksharIravimokShaNAt |

kAmakrodhodbhavaM vegaM sa yuktaH sa sukhI naraH || 23 ||

yo.antaHsukho.antarArAmastathAntarjyotireva yaH |

sa yogI brahmanirvANaM brahmabhUto.adhigachChati || 24 ||

labhante brahmanirvANamRRiShayaH kShINakalmaShAH |

ChinnadvaidhA yatAtmAnaH sarvabhUtahite ratAH || 25 ||

kAmakrodhaviyuktAnAM yatInAM yatachetasAm |

abhito brahmanirvANaM vartate viditAtmanAm || 26 ||

sparshAnkRRitvA bahirbAhyAMshchakShushchaivAntare bhruvoH |

prANApAnau samau kRRitvA nAsAbhyantarachAriNau || 27 ||

yatendriyamanobuddhirmunirmokShaparAyaNaH |

vigatechChAbhayakrodho yaH sadA mukta eva saH || 28 ||

bhoktAraM yaj~natapasAM sarvalokamaheshvaram |

suhRRidaM sarvabhUtAnAM j~nAtvA mAM shAntimRRichChati || 29 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde karmasannyAsayogo nAma pa~nchamo.adhyAyaH ||5 ||