Srimad Bhagawad Gita Chapter 1

shrImadbhagavadgItA mUlam - prathamo.adhyAyaH

shloka 1

OM shrI paramAtmane namaH

atha prathamo.adhyAyaH |

arjunaviShAdayogaH

dhRRitarAShTra uvAcha

dharmakShetre kurukShetre samavetA yuyutsavaH |

mAmakAH pANDavAshchaiva kimakurvata sa~njaya || 1 ||

sa~njaya uvAcha

dRRiShTvA tu pANDavAnIkaM vyUDhaM duryodhanastadA |

AchAryamupasa~Ngamya rAjA vachanamabravIt || 2 ||

pashyaitAM pANDuputrANAmAchArya mahatIM chamUm |

vyUDhAM drupadaputreNa tava shiShyeNa dhImatA || 3 ||

atra shUrA maheShvAsA bhImArjunasamA yudhi |

yuyudhAno virATashcha drupadashcha mahArathaH || 4 ||

dhRRiShTaketushchekitAnaH kAshirAjashcha vIryavAn |

purujitkuntibhojashcha shaibyashcha narapu~NgavaH || 5 ||

yudhAmanyushcha vikrAnta uttamaujAshcha vIryavAn |

saubhadro draupadeyAshcha sarva eva mahArathAH || 6 ||

asmAkaM tu vishiShTA ye tAnnibodha dvijottama |

nAyakA mama sainyasya sanjnArthaM tAnbravImi te || 7 ||

bhavAnbhIShmashcha karNashcha kRRipashcha samiti~njayaH |

ashvatthAmA vikarNashcha saumadattistathaiva cha || 8 ||

anye cha bahavaH shUrA madarthe tyaktajIvitAH |

nAnAshastrapraharaNAH sarve yuddhavishAradAH || 9 ||

aparyAptaM tadasmAkaM balaM bhIShmAbhirakShitam |

paryAptaM tvidameteShAM balaM bhImAbhirakShitam || 10 ||

ayaneShu cha sarveShu yathAbhAgamavasthitAH |

bhIShmamevAbhirakShantu bhavantaH sarva eva hi || 11 ||

tasya sa~njanayanharShaM kuruvRRiddhaH pitAmahaH |

siMhanAdaM vinadyochchaiH sha~NkhaM dadhmau pratApavAn || 12 ||

tataH sha~NkhAshcha bheryashcha paNavAnakagomukhAH |

sahasaivAbhyahanyanta sa shabdastumulo.abhavat || 13 ||

tataH shvetairhayairyukte mahati syandane sthitau |

mAdhavaH pANDavashchaiva divyau sha~Nkhau pradaghmatuH || 14 ||

pAnchajanyaM hRRiShIkesho devadattaM dhananjayaH |

pauNDraM dadhmau mahAsha~NkhaM bhImakarmA vRRikodaraH || 15 ||

anantavijayaM rAjA kuntIputro yudhiShThiraH |

nakulaH sahadevashcha sughoShamaNipuShpakau || 16 ||

kAshyashcha parameShvAsaH shikhaNDI cha mahArathaH |

dhRRiShTadyumno virATashcha sAtyakishchAparAjitaH || 17 ||

drupado draupadeyAshcha sarvashaH pRRithivIpate |

saubhadrashcha mahAbAhuH sha~NkhAndadhmuH pRRithakpRRithak || 18 ||

sa ghoSho dhArtarAShTrANAM hRRidayAni vyadArayat |

nabhashcha pRRithivIM chaiva tumulo vyanunAdayan || 19 ||

atha vyavasthitAndRRiShTvA dhArtarAShTrAnkapidhvajaH |

pravRRitte shastrasampAte dhanurudyamya pANDavaH || 20 ||

hRRiShIkeshaM tadA vAkyamidamAha mahIpate|

arjuna uvAcha

senayorubhayormadhye rathaM sthApaya me.achyuta || 21 ||

yAvadetAnnirIkShe.ahaM yoddhukAmAnavasthitAn |

kairmayA saha yoddhavyamasminraNasamudyame || 22 ||

yotsyamAnAnavekShe.ahaM ya ete.atra samAgatAH |

dhArtarAShTrasya durbuddheryuddhe priyachikIrShavaH || 23 ||

sa~njaya uvAcha

evamukto hRRiShIkesho guDAkeshena bhArata |

senayorubhayormadhye sthApayitvA rathottamam || 24 ||

bhIShmadroNapramukhataH sarveShAM cha mahIkShitAm |

uvAcha pArtha pashyaitAnsamavetAnkurUniti || 25 ||

tatrApashyatsthitAnpArthaH pitRRInatha pitAmahAn |

AchAryAnmAtulAnbhrAtRRInputrAnpautrAnsakhIMstathA || 26 ||

shvashurAnsuhRRidashchaiva senayorubhayorapi |

tAnsamIkShya sa kaunteyaH sarvAnbandhUnavasthitAn || 27 ||

kRRipayA parayAviShTo viShIdannidamabravIt|

arjuna uvAcha

dRRiShTvemaM svajanaM kRRiShNa yuyutsuM samupasthitam || 28 ||

sIdanti mama gAtrANi mukhaM cha parishuShyati |

vepathushcha sharIre me romaharShashcha jAyate || 29 ||

gANDIvaM sraMsate hastAttvakchaiva paridahyate |

na cha shaknomyavasthAtuM bhramatIva cha me manaH || 30 ||

nimittAni cha pashyAmi viparItAni keshava |

na cha shreyo.anupashyAmi hatvA svajanamAhave || 31 ||

na kA~NkShe vijayaM kRRiShNa na cha rAjyaM sukhAni cha |

kiM no rAjyena govinda kiM bhogairjIvitena vA || 32 ||

yeShAmarthe kA~NkShitaM no rAjyaM bhogAH sukhAni cha |

ta ime.avasthitA yuddhe prANAMstyaktvA dhanAni cha || 33 ||

AchAryAH pitaraH putrAstathaiva cha pitAmahAH |

mAtulAH shvashurAH pautrAH shyAlAH sambandhinastathA || 34 ||

etAnna hantumichChAmi ghnato.api madhusUdana |

api trailokyarAjyasya hetoH kiM nu mahIkRRite || 35 ||

nihatya dhArtarAShTrAnnaH kA prItiH syAjjanArdana |

pApamevAshrayedasmAnhatvaitAnAtatAyinaH || 36 ||

tasmAnnArhA vayaM hantuM dhArtarAShTrAnsvabAndhavAn |

svajanaM hi kathaM hatvA sukhinaH syAma mAdhava || 37 ||

yadyapyete na pashyanti lobhopahatachetasaH |

kulakShayakRRitaM doShaM mitradrohe cha pAtakam || 38 ||

kathaM na j~neyamasmAbhiH pApAdasmAnnivartitum |

kulakShayakRRitaM doShaM prapashyadbhirjanArdana || 39 ||

kulakShaye praNashyanti kuladharmAH sanAtanAH |

dharme naShTe kulaM kRRitsnamadharmo.abhibhavatyuta || 40 ||

adharmAbhibhavAtkRRiShNa praduShyanti kulastriyaH |

strIShu duShTAsu vArShNeya jAyate varNasa~NkaraH || 41 ||

sa~Nkaro narakAyaiva kulaghnAnAM kulasya cha |

patanti pitaro hyeShAM luptapiNDodakakriyAH || 42 ||

doShairetaiH kulaghnAnAM varNasa~NkarakArakaiH |

utsAdyante jAtidharmAH kuladharmAshcha shAshvatAH || 43 ||

utsannakuladharmANAM manuShyANAM janArdana |

narake.aniyataM vAso bhavatItyanushushruma || 44 ||

aho bata mahatpApaM kartuM vyavasitA vayam |

yadrAjyasukhalobhena hantuM svajanamudyatAH || 45 ||

yadi mAmapratIkAramashastraM shastrapANayaH |

dhArtarAShTrA raNe hanyustanme kShemataraM bhavet || 46 ||

sa~njaya uvAcha |

evamuktvArjunaH sa~Nkhye rathopastha upAvishat |

visRRijya sasharaM chApaM shokasaMvignamAnasaH || 47 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde arjunaviShAdayogo nAma prathamo.adhyAyaH ||1 ||