Srimad Bhagawad Gita Chapter 11

shrImadbhagavadgItA mUlam - ekAdasho.adhyAyaH

shloka 1

OM shrI paramAtmane namaH

atha ekAdasho.adhyAyaH |

vishvarUpasandarshanayogaH

arjuna uvAcha

madanugrahAya paramaM guhyamadhyAtmasanjnitam |

yattvayoktaM vachastena moho.ayaM vigato mama || 1 ||

bhavApyayau hi bhUtAnAM shrutau vistarasho mayA |

tvattaH kamalapatrAkSha mAhAtmyamapi chAvyayam || 2 ||

evametadyathAttha tvamAtmAnaM parameshvara |

draShTumichChAmi te rUpamaishvaraM puruShottama || 3 ||

manyase yadi tachChakyaM mayA draShTumiti prabho |

yogeshvara tato me tvaM darshayAtmAnamavyayam || 4 ||

shrIbhagavAnuvAcha

pashya me pArtha rUpANi shatasho.atha sahasrashaH |

nAnAvidhAni divyAni nAnAvarNAkRRitIni cha || 5 ||

pashyAdityAnvasUnrudrAnashvinau marutastathA |

bahUnyadRRiShTapUrvANi pashyAshcharyANi bhArata || 6 ||

ihaikasthaM jagatkRRitsnaM pashyAdya sacharAcharam |

mama dehe guDAkesha yachchAnyaddraShTumichChasi || 7 ||

na tu mAM shakyase draShTumanenaiva svachakShuShA |

divyaM dadAmi te chakShuH pashya me yogamaishvaram || 8 ||

sa~njaya uvAcha

evamuktvA tato rAjanmahAyogeshvaro hariH |

darshayAmAsa pArthAya paramaM rUpamaishvaram || 9 ||

anekavaktranayana-manekAdbhutadarshanam |

anekadivyAbharaNaM divyAnekodyatAyudham || 10 ||

divyamAlyAmbaradharaM divyagandhAnulepanam |

sarvAshcharyamayaM devamanantaM vishvatomukham || 11 ||

divi sUryasahasrasya bhavedyugapadutthitA |

yadi bhAH sadRRishI sA syAdbhAsastasya mahAtmanaH || 12 ||

tatraikasthaM jagatkRRitsnaM pravibhaktamanekadhA |

apashyaddevadevasya sharIre pANDavastadA || 13 ||

tataH sa vismayAviShTo hRRiShTaromA dhana~njayaH |

praNamya shirasA devaM kRRitA~njalirabhAShata || 14 ||

arjuna uvAcha

pashyAmi devAMstava deva dehe sarvAMstathA bhUtavisheShasa~NghAn|

brahmANamIshaM kamalAsanastha-mRRiShIMshcha sarvAnuragAMshcha divyAn || 15 ||

anekabAhUdaravaktranetraM pashyAmi tvAM sarvato.anantarUpam|

nAntaM na madhyaM na punastavAdiM pashyAmi vishveshvara vishvarUpa || 16 ||

kirITinaM gadinaM chakriNaM cha tejorAshiM sarvato dIptimantam|

pashyAmi tvAM durnirIkShyaM samantAddIptAnalArkadyutimaprameyam || 17 ||

tvamakSharaM paramaM veditavyaM tvamasya vishvasya paraM nidhAnam|

tvamavyayaH shAshvatadharmagoptA sanAtanastvaM puruSho mato me || 18 ||

anAdimadhyAntamanantavIrya-manantabAhuM shashisUryanetram|

pashyAmi tvAM dIptahutAshavaktraM svatejasA vishvamidaM tapantam || 19 ||

dyAvApRRithivyoridamantaraM hi vyAptaM tvayaikena dishashcha sarvAH|

dRRiShTvAdbhutaM rUpamugraM tavedaM lokatrayaM pravyathitaM mahAtman || 20 ||

amI hi tvAM surasaNghA vishanti kechidbhItAH prAnjalayo gRRiNanti|

svastItyuktvA maharShisiddhasa~NghAH stuvanti tvAM stutibhiH puShkalAbhiH || 21 ||

rudrAdityA vasavo ye cha sAdhyA vishve.ashvinau marutashchoShmapAshcha|

gandharvayakShAsurasiddhasa~NghA vIkShante tvAM vismitAshchaiva sarve || 22 ||

rUpaM mahatte bahuvaktranetraM mahAbAho bahubAhUrupAdam|

bahUdaraM bahudaMShTrAkarAlaM dRRiShTvA lokAH pravyathitAstathAham || 23 ||

nabhaHspRRishaM dIptamanekavarNaM vyAttAnanaM dIptavishAlanetram|

dRRiShTvA hi tvAM pravyathitAntarAtmA dhRRitiM na vindAmi shamaM cha viShNo || 24 ||

daMShTrAkarAlAni cha te mukhAni dRRiShTvaiva kAlAnalasannibhAni|

disho na jAne na labhe cha sharma prasIda devesha jagannivAsa || 25 ||

amI cha tvAM dhRRitarAShTrasya putrAH sarve sahaivAvanipAlasa~NghaiH|

bhIShmo droNaH sUtaputrastathAsau sahAsmadIyairapi yodhamukhyaiH || 26 ||

vaktrANi te tvaramANA vishanti daMShTrAkarAlAni bhayAnakAni|

kechidvilagnA dashanAntareShu sandRRishyante chUrNitairuttamA~NgaiH || 27 ||

yathA nadInAM bahavo.ambuvegAH samudramevAbhimukhA dravanti|

tathA tavAmI naralokavIrA vishanti vaktrANyabhivijvalanti || 28 ||

yathA pradIptaM jvalanaM pata~NgA vishanti nAshAya samRRiddhavegAH|

tathaiva nAshAya vishanti lokAstavApi vaktrANi samRRiddhavegAH || 29 ||

lelihyase grasamAnaH samantAllokAnsamagrA-nvadanairjvaladbhiH|

tejobhirApUrya jagatsamagraM bhAsastavogrAH pratapanti viShNo || 30 ||

AkhyAhi me ko bhavAnugrarUpo namo.astu te devavara prasIda|

vij~nAtumichChAmi bhavantamAdyaM na hi prajAnAmi tava pravRRittim || 31 ||

shrIbhagavAnuvAcha

kAlo.asmi lokakShayakRRitpravRRiddho lokAnsamAhartumiha pravRRittaH|

RRite.api tvAM na bhaviShyanti sarve ye.avasthitAH pratyanIkeShu yodhAH || 32 ||

tasmAttvamuttiShTha yasho labhasva jitvA shatrUnbhu~NkShva rAjyaM samRRiddham|

mayaivaite nihatAH pUrvameva nimittamAtraM bhava savyasAchin || 33 ||

droNaM cha bhIShmaM cha jayadrathaM cha karNaM tathAnyAnapi yodhavIrAn|

mayA hatAMstvaM jahi mA vyathiShThA yudhyasva jetAsi raNe sapatnAn || 34 ||

sa~njaya uvAcha

etachChrutvA vachanaM keshavasya kRRitA~njalirvepamAnaH kirITI|

namaskRRitvA bhUya evAha kRRiShNaM sagadgadaM bhItabhItaH praNamya || 35 ||

arjuna uvAcha

sthAne hRRiShIkesha tava prakIrtyA jagatprahRRiShyatyanurajyate cha|

rakShAMsi bhItAni disho dravanti sarve namasyanti cha siddhasa~NghAH || 36 ||

kasmAchcha te na nameranmahAtmangarIyase brahmaNo.apyAdikartre|

ananta devesha jagannivAsa tvamakSharaM sadasattatparaM yat || 37 ||

tvamAdidevaH puruShaH purANastvamasya vishvasya paraM nidhAnam|

vettAsi vedyaM cha paraM cha dhAma tvayA tataM vishvamanantarUpa || 38 ||

vAyuryamo.agnirvaruNaH shashA~NkaH prajApatistvaM prapitAmahashcha|

namo namaste.astu sahasrakRRitvaH punashcha bhUyo.api namo namaste || 39 ||

namaH purastAdatha pRRiShThataste namo.astu te sarvata eva sarva|

anantavIryAmitavikramastvaM sarvaM samApnoShi tato.asi sarvaH || 40 ||

sakheti matvA prasabhaM yaduktaM he kRRiShNa he yAdava he sakheti|

ajAnatA mahimAnaM tavedaM mayA pramAdAtpraNayena vApi || 41 ||

yachchAvahAsArthamasatkRRito.asi vihArashayyAsanabhojaneShu|

eko.athavApyachyuta tatsamakShaM tatkShAmaye tvAmahamaprameyam || 42 ||

pitAsi lokasya charAcharasya tvamasya pUjyashcha gururgarIyAn|

na tvatsamo.astyabhyadhikaH kuto.anyo lokatraye.apyapratimaprabhAva || 43 ||

tasmAtpraNamya praNidhAya kAyaM prasAdaye tvAmahamIshamIDyam|

piteva putrasya sakheva sakhyuH priyaH priyAyArhasi deva soDhum || 44 ||

adRRiShTapUrvaM hRRiShito.asmi dRRiShTvA bhayena cha pravyathitaM mano me|

tadeva me darshaya devarUpaM prasIda devesha jagannivAsa || 45 ||

kirITinaM gadinaM chakrahastamichChAmi tvAM draShTumahaM tathaiva|

tenaiva rUpeNa chaturbhujena sahasrabAho bhava vishvamUrte || 46 ||

shrIbhagavAnuvAcha

mayA prasannena tavArjunedaM rUpaM paraM darshitamAtmayogAt|

tejomayaM vishvamanantamAdyaM yanme tvadanyena na dRRiShTapUrvam || 47 ||

na vedayaj~nAdhyayanairna dAnairna cha kriyAbhirna tapobhirugraiH|

evaMrUpaH shakya ahaM nRRiloke draShTuM tvadanyena kurupravIra || 48 ||

mA te vyathA mA cha vimUDhabhAvo dRRiShTvA rUpaM ghoramIdRRi~Nmamedam|

vyapetabhIH prItamanAH punastvaM tadeva me rUpamidaM prapashya || 49 ||

sa~njaya uvAcha

ityarjunaM vAsudevastathoktvA svakaM rUpaM darshayAmAsa bhUyaH|

AshvAsayAmAsa cha bhItamenaM bhUtvA punaH saumyavapurmahAtmA || 50 ||

arjuna uvAcha

dRRiShTvedaM mAnuShaM rUpaM tava saumyaM janArdana |

idAnImasmi saMvRRittaH sachetAH prakRRitiM gataH || 51 ||

shrIbhagavAnuvAcha

sudurdarshamidaM rUpaM dRRiShTavAnasi yanmama |

devA apyasya rUpasya nityaM darshanakA~NkShiNaH || 52 ||

nAhaM vedairna tapasA na dAnena na chejyayA |

shakya evaMvidho draShTuM dRRiShTavAnasi mAM yathA || 53 ||

bhaktyA tvananyayA shakya ahamevaMvidho.arjuna |

j~nAtuM draShTuM cha tattvena praveShTuM cha parantapa || 54 ||

matkarmakRRinmatparamo madbhaktaH sa~NgavarjitaH |

nirvairaH sarvabhUteShu yaH sa mAmeti pANDava || 55 ||

OM tatsaditi shrImadbhagavadgItAsUpaniShatsu brahmavidyAyAM yogashAstre

shrIkRRiShNArjunasaMvAde vishvarUpadarshanayogo nAmaikAdasho.adhyAyaH ||11 ||