Sri Surya Shatakam

shrI sUrya shatakam

shloka 1

|| sUryashatakam ||

mahAkavishrImayUrapraNItam

|| shrI gaNeshAya namaH ||

jambhArAtIbhakumbhodbhavamiva dadhataH sAndrasindUrareNuM

raktAH siktA ivaughairudayagiritaTIdhAtudhArAdravasya | var saktaiH

AyAntyA tulyakAlaM kamalavanaruchevAruNA vo vibhUtyai

bhUyAsurbhAsayanto bhuvanamabhinavA bhAnavo bhAnavIyAH || 1 ||

bhaktiprahvAya dAtuM mukulapuTakuTIkoTarakroDalInAM

lakShmImAkraShTukAmA iva kamalavanoddhATanaM kurvate ye |

kAlAkArAndhakArAnanapatitajagatsAdhvasadhvaMsakalyAH

kalyANaM vaH kriyAsuH kisalayaruchayaste karA bhAskarasya || 2 ||

garbheShvambhoruhANAM shikhariShu cha shitAgreShu tulyaM patantaH

prArambhe vAsarasya vyuparatisamaye chaikarUpAstathaiva |

niShparyAyaM pravRRittAstribhuvanabhavanaprA~NgaNe pAntu yuShmA-

nUShmANaM santatAdhvashramajamiva bhRRishaM bibhrato bradhnapAdAH || 3 ||

prabhrashyatyuttarIyatviShi tamasi samuddIkShya vItAvRRitInprA-

gjantUMstantUnyathA yAnatanu vitanute tigmarochirmarIchIn |

te sAndrIbhUya sadyaH kramavishadadashAshAdashAlIvishAlaM

shashvatsampAdayanto.ambaramamalamalaM ma~NgalaM vo dishantu || 4 ||

nyakkurvannoShadhIshe muShitaruchi shuchevauShadhIH proShitAbhA

bhAsvadgrAvodgatena prathamamiva kRRitAbhyudgatiH pAvakena |

pakShachChedavraNAsRRiksruta iva dRRiShado darshayanprAtaradre-

rAtAmrastIvrabhAnoranabhimatanude stAdgabhastyudgamo vaH || 5 ||

shIrNaghrANA~NghripANInvraNibhirapaghanairghargharAvyaktaghoShAn

dIrghAghrAtAnaghaughai punarapi ghaTayatyeka ullAghayan yaH |

gharmAMshostasya vo.antardviguNaghanaghRRiNAnighnanirvighnavRRitte-

rdattArghAH siddhasa~Nghairvidadhatu ghRRiNayaH shIghramaMhovidhAtam || 6 ||

bibhrANA vAmanatvaM prathamamatha tathaivAMshavaH prAMshavo vaH

krAntAkAshAntarAlAstadanu dashadishaH pUrayantastato.api |

dhvAntAdAchChidya devadviSha iva balito vishvamAshvashnuvAnAH var devadruha

kRRichChrANyuchChrAyahelopahasitaharayo hAridashvA harantu || 7 ||

udgADhenAruNimnA vidadhati bahulaM ye.aruNasyAruNatvaM

mUrdhoddhUtau khalInakShatarudhirarucho ye rathAshvAnaneShu |

shailAnAM shekharatvaM shritashikharishikhAstanvate ye dishantu var shikharashikhAH

pre~NkhantaH khe kharAMshoH khachitadinamukhAste mayUkhAH sukhaM vaH || 8 ||

dattAnandAH prajAnAM samuchitasamayAkRRiShTasRRiShTaiH payobhiH var akliShTasRRiShTaiH

pUrvAhNe viprakIrNA dishi dishi viramatyahni saMhArabhAjaH |

dIptAMshordIrghaduHkhaprabhavabhavabhayodanvaduttAranAvo

gAvo vaH pAvanAnAM paramaparimitAM prItimutpAdayantu || 9 ||

bandhadhvaMsaikahetuM shirasi natirasAbaddhasandhyA~njalInAM

lokAnAM ye prabodhaM vidadhati vipulAmbhojakhaNDAshayeva |

yuShmAkaM te svachittaprathitapRRithutaraprArthanAkalpavRRikShAH var prathima

kalpantAM nirvikalpaM dinakarakiraNAH ketavaH kalmaShasya || 10 ||

dhArA rAyo dhanAyApadi sapadi karAlambabhUtAH prapAte

tattvAlokaikadIpAstridashapatipuraprasthitau vIthya eva |

nirvANodyogiyogipragamanijatanudvAri vetrAyamANA-

strAyantAM tIvrabhAnordivasamukhasukhA rashmayaH kalmaShAdvaH || 11 ||

var tIvrabhAsaH var kashmalAdvaH

prAchi prAgAcharantyo.anatichiramachale chAruchUDAmaNitvaM

mu~nchantyo rochanAmbhaH prachuramiva dishAmuchchakaishcharchanAya |

chATUtkaishchakranAmnAM chaturamavichalairlochanairarchyamAnA- var suchiraM

shcheShTantAM chintitAnAmuchitamacharamAshchaNDarochIrucho vaH || 12 ||

ekaM jyotirdRRishau dve trijagati gaditAnyabjajAsyaishchaturbhi-

rbhUtAnAM pa~nchamaM yAnyalamRRituShu tathA ShaTsu nAnAvidhAni |

yuShmAkaM tAni saptatridashamuninutAnyaShTadigbhA~nji bhAno-

ryAnti prAhNe navatvaM dasha dadhatu shivaM dIdhitInAM shatAni || 13 || var dadatu

AvRRittibhrAntavishvAH shramamiva dadhataH shoShiNaH svoShmaNeva

grIShme dAvAgnitaptA iva rasamasakRRidye dharitryA dhayanti |

te prAvRRiShyAttapAnAtishayaruja ivodvAntatoyA himartau

mArtaNDasyAprachaNDAshchiramashubhabhide.abhIShavo vo bhavantu || 14 ||

tanvAnA digvadhUnAM samadhikamadhurAlokaramyAmavasthA-

mAruDhaprauDhileshotkalitakapilimAla~NkRRitiH kevalaiva |

ujjRRimbhAmbhojanetradyutini dinamukhe ki~nchidudbhidyamAnA

shmashrushreNIva bhAsAM dishatu dashashatI sharma gharmatviSho vaH || 15 ||

maulIndormaiSha moShIddyutimiti vRRiShabhANkena yaH shaNkineva

pratyagrodghATitAmbhoruhakuharaguhAsusthiteneva dhAtrA |

kRRiShNena dhvAntakRRiShNasvatanuparibhavatrasnuneva stuto.alaM

trANAya stAttanIyAnapi timiraripoH sa tviShAmudgamo vaH || 16 ||

vistIrNaM vyoma dIrghAH sapadi dasha disho vyastavelAmbhaso.abdhIn

kurvadbhirdRRishyanAnAnaganagaranagAbhogapRRithvIM cha pRRithvIm |

padminyuchChvAsyate yairuShasi jagadapi dhvaMsayitvA tamisrA-

musrA visraMsayantu drutamanabhimataM te sahasratviSho vaH || 17 || var visrAvayantu

astavyastatvashUnyo nijaruchiranishAnashvaraH kartumIsho

vishvaM veshmeva dIpaH pratihatatimiraM yaH pradeshasthito.api |

dikkAlApekShayAsau tribhuvanamaTatastigmabhAnornavAkhyAM

yAtaH shAtakratavyAM dishi dishatu shivaM so.archiShAmudgamo vaH || 18 ||

mAgAnmlAniM mRRiNAlI mRRiduriti dayayevApraviShTo.ahilokaM

lokAlokasya pArshvaM pratapati na paraM yastadAkhyArthameva |

UrdhvaM brahmANDakhaNDasphuTanabhayaparityaktadairghyo dyusImni

sveChAvashyAvakAshAvadhiravatu sa vastApano rochiroghaH || 19 ||

ashyAmaH kAla eko na bhavati bhuvanAnto.api vIte.andhakAre var vItAndhakAraH

sadyaH prAleyapAdo na vilayamachalashchandramA apyupaiti |

bandhaH siddhA~njalInAM na hi kumudavanasyApi yatrojjihAne

tatprAtaH prekShaNIyaM dishatu dinapaterdhAma kAmAdhikaM vaH || 20 ||

yatkAntiM pa~NkajAnAM na harati kurute pratyutAdhikyaramyAM var pratyutAtIva ramyAM

no dhatte tArakAbhAM tirayati nitarAmAshu yannityameva | var nAdhatte

kartuM nAlaM nimeShaM divasamapi paraM yattadekaM trilokyA-

shchakShuH sAmAnyachakShurvisadRRishamaghabhidbhAsvatastAnmaho vaH || 21 ||

kShmAM kShepIyaH kShapAmbhaHshishiratarajalasparshatarShAdRRiteva

drAgAshA netumAshAdviradakarasaraHpuShkarANIva bodham |

prAtaH prolla~Nghya viShNoH padamapi ghRRiNayevAtivegAddavIya-

syuddAma dyotamAnA dahatu dinapaterdurnimittaM dyutirvaH || 22 ||

no kalpApAyavAyoradayarayadalatkShmAdharasyApi gamyA var shamyA

gADhodgIrNojjvalashrIrahani na rahitA no tamaHkajjalena |

prAptotpattiH pata~NgAnna punarupagatA moShamuShNatviSho vo

vartiH saivAnyarUpA sukhayatu nikhiladvIpadIpasya dIptiH || 23 ||

niHsheShAshAvapUrapravaNaguruguNashlAghanIyasvarUpA

paryAptaM nodayAdau dinagamasamayopaplave.apyunnataiva |

atyantaM yAnabhij~nA kShaNamapi tamasA sAkamekatra vastuM

bradhnasyeddhA ruchirvo ruchiriva ruchitasyAptaye vastunostu || 24 || var chirurasya, ruchirasya

vibhrANaH shaktimAshu prashamitabalavattArakaurjityagurvIM

kurvANo lIlayAdhaH shikhinamapi lasachchandrakAntAvabhAsam |

AdadhyAdandhakAre ratimatishayinImAvahanvIkShaNAnAM var AdeyAdIkShaNAnAM

bAlo lakShmImapArAmapara iva guho.aharpaterAtapo vaH || 25 ||

jyotsnAMshAkarShapANDudyuti timiramaShIsheShakalmAShamISha-

jjRRimbhodbhUtena pi~NgaM sarasijarajasA sandhyayA shoNashochiH |

prAtaHprArambhakAle sakalamapi jagachchitramunmIlayantI

kAntistIkShNatviSho.akShNAM mudamupanayatAttUlikevAtulAM vaH || 26 ||

AyAntI kiM sumeroH saraNiraruNitA pAdmarAgaiH parAgai-

rAhosvitsvasya mAhArajanavirachitA vaijayantI rathasya |

mA~njiShThI praShThavAhAvalividhutashirashchAmarAlI nu lokai- var chAmarAlIva

rAsha~NkyAlokitaivaM savituraghanude stAtprabhAtaprabhA vaH || 27 ||

dhvAntadhvaMsaM vidhatte na tapati ruchimannAtirUpaM vyanakti

nyaktvaM nItvApi naktaM na vitaratitarAM tAvadahnastviShaM yaH | var nyaktAmahni

sa prAtarmA viraMsIdasakalapaTimA pUrayanyuShmadAshA-

mAshAkAshAvakAshAvataraNataruNaprakramo.arkaprakAshaH || 28 ||

tIvraM nirvANaheturyadapi cha vipulaM yatprakarSheNa chANu

pratyakShaM yatparokShaM yadiha yadaparaM nashvaraM shAshvataM cha |

yatsarvasya prasiddhaM jagati katipaye yogino yadvidanti

jyotistaddviprakAraM savituravatu vo bAhyamAbhyantaraM cha || 29 ||

ratnAnAM maNDanAya prabhavati niyatoddeshalabdhAvakAshaM

vahnerdArvAdi dagdhuM nijajaDimatayA kartumAnandamindoH |

yachcha trailokyabhUShAvidhiraghadahanaM hlAdi vRRiShTyAshu tadvo var yattu

bAhulyotpAdyakAryAdhikataramavatAdekamevArkatejaH || 30 ||

mIlachchakShurvijihmashruti jaDarasanaM nighnitaghrANavRRitti

svavyApArAkShamatvakparimuShitamanaH shvAsamAtrAvasheSham |

visrastA~NgaM patitvA svapadapaharatAdashriyaM vo.arkajanmA var apriyaM

kAlavyAlAvalIDhaM jagadagada ivotthApayanprAkpratApaH || 31 ||

niHsheShaM naishamambhaH prasabhamapanudannashruleshAnukAri

stokastokApanItAruNaruchirachirAdastadoShAnuSha~NgaH |

dAtA dRRiShTiM prasannAM tribhuvananayanasyAshu yuShmadviruddhaM

vadhyAdbradhnasya siddhA~njanavidhiraparaH prAktano.archiHprachAraH || 32 ||

bhUtvA jambhasya bhettuH kakubhi paribhavArambhabhUH shubhrabhAno- var sthitvA

rbibhrANA babhrubhAvaM prasabhamabhinavAmbhojajRRimbhApragalbhA |

bhUShA bhUyiShThashobhA tribhuvanabhavanasyAsya vaibhAkarI prAg-

vibhrAntA bhrAjamAnA vibhavatu vibhavodbhUtaye sA vibhA vaH || 33 || var nirbhAnti, vibhrAnti

saMsaktaM siktamUlAdabhinavabhuvanodyAnakautUhalinyA

yAminyA kanyayevAmRRitakarakalashAvarjitenAmRRitena |

arkAlokaH kriyAdvo mudamudayashirashchakravAlAlavAlA-

dudyanbAlapravAlapratimaruchirahaHpAdapaprAkprarohaH || 34 ||

bhinnaM bhAsAruNasya kvachidabhinavayA vidrumANAM tviSheva

tva~NnnakShatraratnadyutinikarakarAlAntarAlaM kvachichcha |

nAntarniHsheShakRRiShNashriyamudadhimiva dhvAntarAshiM pibanstA-

daurvaH pUrvo.apyapUrvo.agniriva bhavadaghapluShTaye.arkAvabhAsaH || 35 ||

gandharvairgadyapadyavyatikaritavachohRRidyamAtodyavAdyai-

rAdyairyo nAradAdyairmunibhirabhinuto vedavedyairvibhidya |

var vItavedyairvividya, vedavidbhirvibhidya

AsAdyApadyate yaM punarapi cha jagadyauvanaM sadya udya-

nnuddyoto dyotitadyaurdyatu divasakRRito.asAvavadyAni vo.adya || 36 ||

AvAnaishchandrakAntaishchyutatimiratayA tAnavAttArakANA- var AvAntaiH

meNA~NkAlokalopAdupahatamahasAmoShadhInAM layena |

ArAdutprekShyamANA kShaNamudayataTAntarhitasyAhimAMsho-

rAbhA prAbhAtikI vo.avatu na tu nitarAM tAvadAvirbhavantI || 37 ||

sAnau sA naudaye nAruNitadalapunaryauvanAnAM vanAnA- var lasadyauvanAnAM

mAlImAlIDhapUrvA parihRRitakuharopAntanimnA tanimnA |

bhA vo.abhAvopashAntiM dishatu dinapaterbhAsamAnA samAnA-

rAjI rAjIvareNoH samasamayamudetIva yasyA vayasyA || 38 ||

ujjRRimbhAmbhoruhANAM prabhavati payasAM yA shriye noShNatAyai

puShNAtyAlokamAtraM na tu dishati dRRishAM dRRishyamAnA vidhAtam |

pUrvAdrereva pUrvaM divamanu cha punaH pAvanI di~NmukhAnA- var tataH

menAMsyainI vibhAsau nudatu nutipadaikAspadaM prAktanI vaH || 39 ||

vAchAM vAchaspaterapyachalabhiduchitAchAryakANAM prapa~nchai-

rvaira~nchAnAM tathochchAritachaturRRichAM chAnanAnAM chaturNAm | var ruchira

uchyetArchAsu vAchyachyutishuchicharitaM yasya nochchairvivichya var archAsvavAchya

prAchyaM varchashchakAsachchiramupachinutAttasya chaNDArchiSho vaH || 40 || var shriyaM

mUrdhnyadrerdhAturAgastaruShu kisalayo vidrumaughaH samudre

var – kisalayAdvidrumaughAtsamudre

diNmAtaNgottamA~NgeShvabhinavanihitaH sAndrasindUrareNuH |

var vihitaH, nihitAtsandrasindUrareNoH

sImni vyomnashcha hemnaH surashikharibhuvo jAyate yaH prakAshaH

shoNimnAsau kharAMshoruShasi dishatu vaH sharma shobhaikadeshaH || 41 ||

astAdrIshottamA~Nge shritashashini tamaHkAlakUTe nipIte

yAti vyaktiM purastAdaruNakisalaye pratyuShaHpArijAte |

udyantyAraktapItAmbaravishadatarodvIkShitA tIkShNabhAno-

var ruchiratarodvIkShitA var tIvrabhAsaH

rlakShmIrlakShmIrivAstu sphuTakamalapuTApAshrayA shreyase vaH || 42 || var puTopAshraya

nodanvA~njanmabhUmirna tadudarabhuvo bAndhavAH kaustubhAdyA

yasyAH padmaM na pANau na cha narakaripUraHsthalI vAsaveshma |

tejorUpAparaiva triShu bhuvanataleShvAdadhAnA vyavasthAM var tribhuvanabhavane

sA shrIH shreyAMsi dishyAdashishiramahaso maNDalAgrodgatA vaH || 43 ||

|| iti dyutivarNanam || var tejovarNanam

|| atha ashvavarNanam ||

rakShantvakShuNNahemopalapaTalamalaM lAghavAdutpatantaH

pAtaNgAH paNgvavaj~nAjitapavanajavA vAjinaste jaganti |

yeShAM vItAnyachihnonnayamapi vahatAM mArgamAkhyAti merA-

vudyannuddAmadIptirdyumaNimaNishilAvedikAjAtavedAH || 44 ||

pluShTAH pRRiShTheM.ashupAtairatinikaTatayA dattadAhAtirekai-

rekAhAkrAntakRRitsnatridivapathapRRithushvAsashoShAH shrameNa |

tIvrodanyAstvarantAmahitavihataye saptayaH saptasapte-

rabhyAshAkAshagaNgAjalasaralagalAvANnatAgrAnanA vaH || 45 || var galavarjitAgrAnanAH

matvAnyAnpArshvato.ashvAn sphaTikataTadRRiShaddRRiShTadehA dravantI

vyaste.ahanyastasandhyeyamiti mRRidupadA padmarAgopaleShu |

sAdRRishyAdRRishyamUrtirmarakatakaTake kliShTasUtA sumero-

rmUrdhanyAvRRittilabdhadhruvagatiravatu bradhnavAhAvalirvaH || 46 || var druta

helAlolaM vahantI viShadharadamanasyAgrajenAvakRRiShTA

svarvAhinyAH sudUraM janitajavajayA syandanasya syadena |

nirvyAjaM tAyamAne haritimani nije sphItaphenAhitashrI- var sphItaphenAsmitashrIH

rashreyAMsyashvapa~NktiH shamayatu yamunevAparA tApanI vaH || 47 ||

mArgopAnte sumerornuvati kRRitanatau nAkadhAmnAM nikAye

vIkShya vrIDAnatAnAM pratikuharamukhaM kinnarINAM mukhAni |

sUte.asUyatyapIShajjaDagati vahatAM kandharArdhairvaladbhi- var kandharAgraiH

rvAhAnAM vyasyatAdvaH samamasamaharerheShitaM kalmaShANi || 48 ||

dhunvanto nIradAlIrnijaruchiharitAH pArshvayoH pakShatulyA-

stAlUttAnaiH khalInaiH khachitamukharuchashchyotatA lohitena |

uDDIyeva vrajanto viyati gativashAdarkavAhAH kriyAsuH

kShemaM hemAdrihRRidyadrumashikharashiraHshreNishAkhAshukA vaH || 49 ||

|| ityashvavarNanam ||

|| atha aruNavarNanam ||

prAtaH shailAgrara~Nge rajanijavanikApAyasaMlakShyalakShmI-

rvikShiptApUrvapuShpA~njalimuDunikaraM sUtradhArAyamANaH |

yAmeShva~NkeShvivAhnaH kRRitaruchiShu chaturShveva jAtapratiShThA- var yAtaH pratiShThAM

mavyAtprastAvayanvo jagadaTanamahAnATikAM sUryasUtaH || 50 ||

AkrAntyA vAhyamAnaM pashumiva hariNA vAhako.agryo harINAM

bhrAmyantaM pakShapAtAjjagati samaruchiH sarvakarmaikasAkShI |

shatruM netrashrutInAmavajayati vayojyeShThabhAve same.api

sthAmnAM dhAmnAM nidhiryaH sa bhavadaghanude nUtanaH stAdanUruH || 51 ||

dattArghairdUranamrairviyati vinayato vIkShitaH siddhasArthaiH var siddhasAdhyaiH

sAnAthyaM sArathirvaH sa dashashatarucheH sAtirekaM karotu |

ApIya prAtareva pratatahimapayaHsyandinIrindubhAso

yaH kAShThAdIpano.agre jaDita iva bhRRishaM sevate pRRiShThato.arkam || 52 ||

mu~nchanrashmIndinAdau dinagamasamaye saMharaMshcha svatantra-

stotraprakhyAtavIryo.avirataharipadAkrAntibaddhAbhiyogaH | var vitata

kAlotkarShAllaghutvaM prasabhamadhipatau yojayanyo dvijAnAM

sevAprItena pUShNAtmasama iva kRRitastrAyatAM so.aruNo vaH || 53 || var svasama

shAtaH shyAmAlatAyAH parashuriva tamo.araNyavahnerivArchiH var dAhe davAbhaH

prAchyevAgre grahItuM grahakumudavanaM prAgudasto.agrahastaH |

var prAchIvAgre, grahakumudaruchiM

aikyaM bhindandyubhUmyoravadhiriva vidhAteva vishvaprabodhe

vAhAnAM vo vinetA vyapanayatu vipannAma dhAmAdhipasya || 54 ||

paurastyastoyadartoH pavana iva patatpAvakasyeva dhUmo var patan

vishvasyevAdisargaH praNava iva paraM pAvano vedarAsheH

sandhyAnRRityotsavechChoriva madanaripornandinAndIninAdaH

saurasyAgre sukhaM vo vitaratu vinatAnandanaH syandanasya || 55 || var syandano vaH

paryAptaM taptachAmIkarakaTakataTe shliShTashItetarAMshA-

vAsIdatsyandanAshvAnukRRitimarakate padmarAgAyamANaH | var ashvAnukRRitamarakate

yaH sotkarShAM vibhUShAM kuruta iva kulakShmAbhRRidIshasya mero-

renAMsyahnAya dUraM gamayatu sa guruH kAdraveyadviSho vaH || 56 ||

nItvAshvAnsapta kakShA iva niyamavashaM vetrakalpapratoda- var kakShyA

stUrNaM dhvAntasya rAshAvitarajana ivotsArite dUrabhAji |

pUrvaM praShTho rathasya kShitibhRRidadhipatIndarshayaMstrAyatAM va-

strailokyAsthAnadAnodyatadivasapateH prAkpratIhArapAlaH || 57 ||

vajri~njAtaM vikAsIkShaNakamalavanaM bhAsi nAbhAsi vahne! var no bhAsi

tAtaM natvAshvapArshvAnnaya yama! mahiShaM rAkShasA vIkShitAH stha |

saptInsi~ncha prachetaH! pavana! bhaja javaM vittapAveditastvaM

vande sharveti jalpanpratidishamadhipAnpAtu pUShNo.agraNIrvaH || 58 ||

pAshAnAshAntapAlAdaruNa varuNato mA grahIH pragrahArthaM

tRRiShNAM kRRiShNasya chakre jahihi nahi ratho yAti me naikachakraH |

yoktuM yugyaM kimuchchaiHshravasamabhilaShasyaShTamaM vRRitrashatro- var tvAShTrashatroH

styaktAnyApekShavishvopakRRitiriva raviH shAsti yaM so.avatAdvaH || 59 ||

no mUrchChAchChinnavA~nChaH shramavivashavapurnaiva nApyAsyashoShI

pAnthaH pathyetarANi kShapayatu bhavatAM bhAsvato.agresaraH saH |

yaH saMshritya trilokImaTati paTutaraistApyamAno mayUkhai-

rArAdArAmalekhAmiva haritamaNishyAmalAmashvapa~Nktim || 60 || var haritatRRiNa

sIdanto.antarnimajjajjaDakhuramusalAH saikate nAkanadyAH

skandantaH kandarAlIH kanakashikhariNo mekhalAsu skhalantaH |

dUraM dUrvAsthalotkA marakatadRRiShadi sthAsnavo yanna yAtAH

pUShNo.ashvAH pUrayaMstaistadavatu javanairhuNkRRitenAgrago vaH || 61 || var prerayan huNkRRitairagraNIH

|| ityaruNavarNanam || var sUtavarNanam

|| atha rathavarNanam ||

pInoraHpreritAbhraishcharamakhurapuTAgrasthitaiH prAtaradrA-

vAdIrghANgairudasto haribhirapagatAsaNganiHshabdachakraH |

uttAnAnUrumUrdhAvanatihaThabhavadvipratIpapraNAmaH

prAhNe shreyo vidhattAM savituravataranvyomavIthIM ratho vaH || 62 || var preyo

dhvAntaughadhvaMsadIkShAvidhipaTu vahatA prAksahasraM karANA- var vidhiguru drAksahasraM

maryamNA yo garimNaH padamatulamupAnIyatAdhyAsanena |

sa shrAntAnAM nitAntaM bharamiva marutAmakShamANAM visoDhuM

skandhAtskandhaM vrajanvo vRRijinavijitaye bhAsvataH syandano.astu || 63 ||

yoktrIbhUtAnyugasya grasitumiva puro dandashUkAndadhAno

dvedhAvyastAmbuvAhAvalivihitabRRihatpakShavikShepashobhaH |

sAvitraH syandano.asau niratishayarayaprINitAnUrurenaH-

kShepIyo vo garutmAniva haratu harIchChAvidheyaprachAraH || 64 ||

ekAhenaiva dIrghAM tribhuvanapadavIM la~Nghayan yo laghiShThaH var kRRistnAM

pRRiShThe merorgarIyAn dalitamaNidRRiShattviMShi piMSha~nshirAMsi |

sarvasyaivopariShTAdatha cha punaradhastAdivAstAdrimUrndhi

bradhnasyAvyAtsa evaM duradhigamaparispandanaH syandano vaH || 65 ||

dhUrdhvastAgryagrahANi dhvajapaTapavanAndolitendUni dUraM var dUrAt

rAhau grAsAbhilAShAdanusarati punardattachakravyathAni |

shrAntAshvashvAsahelAdhutavibudhadhunInirjharAmbhAMsi bhadraM

deyAsurvo davIyo divi divasapateH syandanaprasthitAni || 66 ||

akShe rakShAM nibadhya pratisaravalayairyojayantyo yugAgraM

dhUHstambhe dagdhadhUpAH prahitasumanaso gochare kUbarasya |

charchAshchakre charantyo malayajapayasA siddhavadhvastrisandhyaM var charchAM

vandante yaM dyumArge sa nudatu duritAnyaMshumatsyandano vaH || 67 ||

utkIrNasvarNareNudrutakhuradalitA pArshvayoH shashvadashvai- var reNurdruta

rashrAntabhrAntachakrakramanikhilamilanneminimnA bhareNa |

merormUrdhanyaghaM vo vighaTayatu raverekavIthI rathasya

svoShmodaktAmburiktaprakaTitapulinoddhUsarA svardhunIva || 68 || var svoShmodastAmbu

nantuM nAkAlayAnAmanishamanuyatAM paddhatiH pa~Nktireva var upayatAM

kShodo nakShatrarAsheradayarayamilachchakrapiShTasya dhUliH |

heShahlAdo harINAM surashikharidarIH pUrayanneminAdo var nAdo

yasyAvyAttIvrabhAnoH sa divi bhuvi yathA vyaktachihno ratho vaH || 69 ||

niHspandAnAM vimAnAvalivitatadivAM devavRRindArakANAM var valitadishA

vRRindairAnandasAndrodyamamapi vahatAM vindatAM vandituM no |

mandAkinyAmamandaH pulinabhRRiti mRRidurmandare mandirAbhe var mandarAbhe

mandArairmaNDitAraM dadhadari dinakRRitsyandanaH stAnmude vaH || 70 ||

chakrI chakrArapa~NktiM harirapi cha harIn dhUrjaTirdhUrdhvajAntA-

nakShaM nakShatranAtho.aruNamapi varuNaH kUbarAgraM kuberaH |

raMhaH sa~NghaH surANAM jagadupakRRitaye nityayuktasya yasya

stauti prItiprasanno.anvahamahimarucheH so.avatAtsyandano vaH || 71 || var rucha

netrAhInena mUle vihitaparikaraH siddhasAdhyairmarudbhiH

pAdopAnte stuto.alaM baliharirabhasAkarShaNAbaddhavegaH |

bhrAmyanvyomAmburAshAvashishirakiraNasyandanaH santataM vo

dishyAllakShmImapArAmatulitamahimevAparo mandarAdriH || 72 || var atulyAM

|| iti rathavarNanam ||

|| atha maNDalavarNanam ||

yajjyAyo bIjamahnAmapahatatimiraM chakShuShAma~njanaM ya- var jyAyo yadbIjamahnAmapahRRita

ddvAraM yanmuktibhAjAM yadakhilabhuvanajyotiShAmekamokaH |

yadvRRiShTyambhonidhAnaM dharaNirasasudhApAnapAtraM mahadya-

ddishyAdIshasya bhAsAM tadadhIkalamalaM ma~NgalaM maNDalaM vaH || 73 || var devasya

bhAnoH tadadhikamamalaM maNDalaM ma~NgalaM

velAvardhiShNu sindhoH paya iva khamivArdhodgatAgyragrahoDu

stokodbhinnasvachihnaprasavamiva madhorAsyamasyanmanAMsi | var mahAMsi

prAtaH pUShNo.ashubhAni prashamayatu shiraHshekharIbhUtamadreH

paurastyasyodgabhastistimitatamatamaHkhaNDanaM maNDalaM vaH || 74 ||

pratyuptastaptahemojjvalaruchirachalaH padmarAgeNa yena

jyAyaH kinjalkapunjo yadalikulashiterambarendIvarasya |

kAlavyAlasya chihnaM mahitatamamahomUrndhi ratnaM mahadya-

ddIptAMshoH prAtaravyAttadavikalajaganmaNDanaM maNDalaM vaH || 75 ||

kastrAtA tArakANAM patati tanuravashyAyabinduryathendu-

rvidrANA dRRiksmarArerurasi muraripoH kaustubho nodgabhastiH |

vahneH sApahnaveva dyutirudayagate yatra tanmaNDalaM vo

mArtaNDIyaM punItAddivi bhuvi cha tamAMsIva mRRiShNanmahAMsi || 76 ||

yatprAchyAM prAkchakAsti prabhavati cha yataH prAchyasAvujjihAnA-

diddhaM madhye yadahno bhavati tataruchA yena chotpAdyate.ahaH |

yatparyAyeNa lokAnavati cha jagatAM jIvitaM yachcha tadvo

vishvAnugrAhi vishvaM sRRijadapi cha ravermaNDalaM muktaye.astu || 77 ||

shuShyantyUDhAnukArA makaravasatayo mAravINAM sthalInAM

yenottaptAH sphuTantastaDiti tilatulAM yAntyagendrA yugAnte | var chaTiti

tachchaNDAMshorakANDatribhuvanadahanAsha~NkayA dhAma kRRichChAt var kRRitsnaM

saMhRRityAlokamAtraM pralaghu vidadhataH stAnmude maNDalaM vaH || 78 || var AhRRityAlokamAtraM pratanu

udyaddyUdyAnavApyAM bahulatamatamaHpa~NkapUraM vidArya var bahala

prodbhinnaM patrapArshveShvaviralamaruNachChAyayA visphurantyA |

kalyANAni kriyAdvaH kamalamiva mahanmaNDalaM chaNDabhAno- var chaNDarashmeH

ranvItaM tRRiptihetorasakRRidalikulAkAriNA rAhuNA yat || 79 ||

chakShurdakShadviSho yanna tu dahati puraH pUrayatyeva kAmaM var na dahati nitarAM punaH

nAstaM juShTaM marudbhiryadiha niyaminAM yAnapAtraM bhavAbdhau |

yadvItashrAnti shashvadbhramadapi jagatAM bhrAntimabhrAnti hanti

bradhnasyAkhyAdviruddhakriyamatha cha hitAdhAyi tanmaNDalaM vaH || 80 ||

|| iti maNDalavarNanam ||

|| atha sUryavarNanam |

siddhaiH siddhAntamishraM shritavidhi vibudhaishchAraNaishchATugarbhaM

gItyA gandharvamukhyairmuhurahipatibhiryAtudhAnairyatAtma |

sArdhaM sAdhyairmunIndrairmuditamatamano mokShibhiH pakShapAtA- var mokShubhiH

tprAtaH prArabhyamANastutiravatu ravirvishvavandyodayo vaH || 81 ||

bhAsAmAsannabhAvAdadhikatarapaToshchakravAlasya tApA-

chChedAdachChinnagachChatturagakhurapuTanyAsaniHshaNkaTaNkaiH | var nyasta

niHsaNgasyandanANgabhramaNanikaShaNAtpAtu vastriprakAraM var triprakAraiH

taptAMshustatparIkShApara iva paritaH paryaTanhATakAdrim || 82 ||

no shuShkaM nAkanadyA vikasitakanakAmbhojayA bhrAjitaM tu var kanakAmbhoruhA

pluShTA naivopabhogyA bhavati bhRRishataraM nandanodyAnalakShmIH |

no shRRi~NgANi drutAni drutamamaragireH kAladhautAni dhautA-

nIddhaM dhAma dyumArge mradayati dayayA yatra so.arko.avatAdvaH || 83 ||

dhvAntasyaivAntaheturna bhavati malinaikAtmanaH pApmano.api

prAkpAdopAntabhAjAM janayati na paraM pa~NkajAnAM prabodham |

kartA niHshreyasAnAmapi na tu khalu yaH kevalaM vAsarANAM

so.avyAdekodyamechChAvihitabahubRRihadvishvakAryo.aryamA vaH || 84 ||

loTa.NlloShTAvicheShTaH shritashayanatalo niHsahIbhUtadehaH

sandehI prANitavye sapadi dasha dishaH prekShamANo.andhakArAH |

niHshvAsAyAsaniShThaH paramaparavasho jAyate jIvalokaH var chirataravasho

shokenevAnyalokAnudayakRRiti gate yatra so.arko.avatAdvaH || 85 || var lokAbhyudaya

krAma.Nllolo.api lokA.NstadupakRRitikRRitAvAshritaH sthairyakoTiM

nRRINAM dRRiShTiM vijihmAM vidadhadapi karotyantaratyantabhadrAm |

yastApasyApi heturbhavati niyaminAmekanirvANadAyI

bhUyAtsa prAgavasthAdhikatarapariNAmodayo.arkaH shriye vaH || 86 ||

vyApannarturna kAlo vyabhicharati phalaM nauShadhIrvRRiShTiriShTA

naiShTaistRRipyanti devA na hi vahati marunnirmalAbhAni bhAni |

AshAH shAntA na bhindantyavadhimudadhayo bibhrati kShmAbhRRitaH kShmAM

yasmiMstrailokyamevaM na chalati tapati stAtsa sUryaH shriye vaH || 87 ||

kailAse kRRittivAsA viharati virahatrAsadehoDhakAntaH

shrAntaH shete mahAhAvadhijaladhi vinA ChadmanA padmanAbhaH |

yogodyogaikatAno gamayati sakalaM vAsaraM svaM svayambhU-

rbhUritrailokyAchintAbhRRiti bhuvanavibhau yatra bhAsvAnsa vo.avyAt || 88 ||

etadyanmaNDalaM khe tapati dinakRRitastA RRicho.archIMShi yAni

dyotante tAni sAmAnyayamapi puruSho maNDale.aNuryajUMShi |

evaM yaM veda vedatritayamayamayaM vedavedI samagro

vargaH svargApavargaprakRRitiravikRRitiH so.astu sUryaH shriye vaH || 89 ||

nAkaukaHpratyanIkakShatipaTumahasAM vAsavAgresarANAM

sarveShAM sAdhu pAtAM jagadidamaditerAtmajatve same.api |

yenAdityAbhidhAnaM niratishayaguNairAtmani nyastamastu var guNenAtmani

stutyastrailokyavandyaistridashamunigaNaiH soM.ashumAn shreyase vaH || 90 ||

bhUmiM dhAmno.abhivRRiShTyA jagati jalamayIM pAvanIM saMsmRRitAva- var dhAmno.atha

pyAgneyIM dAhashaktyA muhurapi yajamAnAM yathAprArthitArthaiH | var yajamAnAtmikAM

lInAmAkAsha evAmRRitakaraghaTitAM dhvAntapakShasya parva-

NvevaM sUryo.aShTabhedAM bhava iva bhavataH pAtu bibhratsvamUrtim || 91 ||

prAkkAlonnidrapadmAkaraparimalanAvirbhavatpAdashobho

bhaktyA tyaktorukhedodgati divi vinatAsUnunA nIyamAnaH |

saptAshvAptAparAntAnyadhikamadharayanyo jaganti stuto.alaM

devairdevaH sa pAyAdapara iva murArAtirahnAM patirvaH || 92 ||

yaH sraShTA.apAM purastAdachalavarasamabhyunnaterhetureko

lokAnAM yastrayANAM sthita upari paraM durvila~Nghyena dhAmnA | var cha trayANAM

sadyaH siddhyai prasannadyutishubhachaturAshAmukhaH stAdvibhakto var shuchi

dvedhA vedhA ivAviShkRRitakamalaruchiH so.archiShAmAkaro vaH || 93 ||

sAdridyUrvInadIshA dishati dasha disho darshayanprAgdRRisho yaH var drAk dRRisho

sAdRRishyaM dRRishyate no sadashashatadRRishi traidashe yasya deshe |

dIptAMshurvaH sa dishyAdashivayugadashAdarshitadvAdashAtmA

shaM shAstyashvAMshcha yasyAshayavidatishayAddandashUkAshanAdyaH || 94 ||

tIrthAni vyarthakAni hRRidanadasarasInirjharAmbhojinInAM

nodanvanto nudanti pratibhayamashubhashvabhrapAtAnubandhi |

Apo nAkApagAyA api kaluShamuSho majjatAM naiva yatra var svargApagAyAH

trAtuM yAte.anyalokAn sa dishatu divasasyaikaheturhitaM vaH || 95 || var lokaM

etatpAtAlapa~Nkaplutamiva tamasaivaikamudgADhamAsI-

dapraj~nAtApratarkyaM niravagati tathAlakShaNaM suptamantaH |

yAdRRiksRRiShTeH purastAnnishi nishi sakalaM jAyate tAdRRigeva

trailokyaM yadviyogAdavatu ravirasau sargatulyodayo vaH || 96 ||

dvIpe yo.astAchalo.asminbhavati khalu sa evAparatrodayAdri-

ryA yAminyujjvalendudyutiriha divaso.anyatra tIvrAtapaH sA |

yadvashyau deshakAlAviti niyamayato no tu yaM deshakAlA- var nu

vavyAtsa svaprabhutvAhitabhuvanahito heturahnAmino vaH || 97 ||

vyagrairagryagrahendugrasanaguru bharairno samagrairudagraiH var gurutaraiH

pratyagrairIShadugrairudayagirigato gogaNairgaurayan gAm |

udgADhArchirvilInAmaranagaranagagrAvagarbhAmivAhnA-

magre shreyo vidhatte glapayatu gahanaM sa grahagrAmaNIrvaH || 98 ||

yoniH sAmnAM vidhAtA madhuripurajito dhUrjaTiH sha~Nkaro.asau

mRRityuH kAlo.alakAyAH patirapi dhanadaH pAvako jAtavedAH |

itthaM sanjnA DavitthAdivadamRRitabhujAM yA yadRRichChApravRRittA-

stAsAmeko.abhidheyastadanuguNaguNairyaH sa sUryo.avatAdvaH || 99 || var gaNaiH

devaH kiM bAndhavaH syAtpriyasuhRRidathavA.a.achArya Ahosvidaryo var AryaH

rakShA chakShurnu dIpo gururuta janako jIvitaM bIjamojaH |

evaM nirNIyate yaH ka iva na jagatAM sarvathA sarvadA.asau var sarvadAH

sarvAkAropakArI dishatu dashashatAbhIShurabhyarthitaM vaH || 100 ||

shlokA lokasya bhUtyai shatamiti rachitAH shrImayUreNa bhaktyA

yuktashchaitAnpaThedyaH sakRRidapi puruShaH sarvapApairvimuktaH |

ArogyaM satkavitvaM matimatulabalaM kAntimAyuHprakarShaM

vidyAmaishvaryamarthaM sutamapi labhate so.atra sUryaprasAdAt || 101 ||

iti shrImayUrakavipraNItaM sUryashatakaM samAptam |