Sri Rudram Namakam
Sri Rudram Namakam
zrI rudraM namakam
zloka 1
kRSNa yajurvedIya taittirIya saMhitA
caturthaM-vai~zvadeva-GkANDa-mpaJcamaH prapAThakaH
o-nnamo bhagavate॑ rudrA॒ya ||
nama॑ste rudra ma॒nyava॑ u॒tota॒ iSa॑ve॒ namaH॑ |
nama॑ste astu॒ dhanva॑ne bA॒hubhyA॑mu॒ta te॒ namaH॑ ||
yA ta॒ iSuH॑ zi॒vata॑mA zi॒va-mba॒bhUva॑ te॒ dhanuH॑ |
zi॒vA za॑ra॒vyA॑ yA tava॒ tayA॑ no rudra mRDaya |
yA te॑ rudra zi॒vA ta॒nUragho॒rA-'pA॑pakAzinI |
tayA॑ nasta॒nuvA॒ zanta॑mayA॒ giri॑zantA॒bhicA॑kazIhi ||
yAmiSu॑-Ggirizanta॒ haste॒ bibha॒rSyasta॑ve |
zi॒vA-Ggi॑ritra॒ tA-Gku॑ru॒ mA higM॑sIH॒ puru॑Sa॒-Jjaga॑t||
zi॒vena॒ vaca॑sA tvA॒ giri॒zAcchA॑ vadAmasi |
yathA॑ na॒-ssarva॒mijjaga॑daya॒kSmagM su॒manA॒ asa॑t ||
adhya॑vocadadhiva॒ktA pra॑tha॒mo daivyo॑ bhi॒Sak |
ahIg॑zca॒ sarvA᳚Jja॒mbhaya॒n-thsarvA᳚zca yAtudhA॒nyaH॑ ||
a॒sau yastA॒mro a॑ru॒Na u॒ta ba॒bhrussu॑ma॒GgalaH॑ |
ye ce॒mAgM ru॒drA a॒bhito॑ di॒kSu zri॒tA-ssa॑hasra॒zo-'vai॑SA॒gM॒ heDa॑ Imahe ||
a॒sau yo॑-'va॒sarpa॑ti॒ nIla॑grIvo॒ vilo॑hitaH |
u॒taina॑-Ggo॒pA a॑dRza॒nnadR॑zannudahA॒ryaH॑ |
u॒tainaM॒-vi~zvA॑ bhU॒tAni॒ sa dR॒STo mR॑DayAti naH ||
namo॑ astu॒ nIla॑grIvAya sahasrA॒kSAya॑ mI॒DhuSe᳚ |
atho॒ ye a॑sya॒ satvA॑no॒-'ha-ntebhyo॑-'kara॒nnamaH॑ ||
pramu॑Jca॒ dhanva॑na॒stvamu॒bhayo॒rArtni॑ yo॒rjyAm |
yAzca॑ te॒ hasta॒ iSa॑vaH॒ parA॒ tA bha॑gavo vapa ||
a॒va॒tatya॒ dhanu॒stvagM saha॑srAkSa॒ zate॑Sudhe |
ni॒zIrya॑ za॒lyAnA॒-mmukhA॑ zi॒vo naH॑ su॒manA॑ bhava ||
vijya॒-ndhanuH॑ kapa॒rdino॒ viza॑lyo॒ bANa॑vAgM u॒ta |
ane॑zanna॒syeSa॑va A॒bhura॑sya niSa॒GgathiH॑ ||
yA te॑ he॒tirmI॑DuSTama॒ haste॑ ba॒bhUva॑ te॒ dhanuH॑ |
tayA॒-'smAn, vi॒zvata॒stvama॑ya॒kSmayA॒ pari॑bbhuja ||
nama॑ste a॒stvAyu॑dhA॒yAnA॑tatAya dhR॒SNave᳚ |
u॒bhAbhyA॑mu॒ta te॒ namo॑ bA॒hubhyA॒-ntava॒ dhanva॑ne ||
pari॑ te॒ dhanva॑no he॒tira॒smAn vR॑Naktu vi॒zvataH॑ |
atho॒ ya i॑Su॒dhistavA॒re a॒smannidhe॑hi॒ tam || 1 ||
zrI zambha॑ve॒ namaH॑ ||
nama॑ste astu bhagavan-vizvezva॒rAya॑ mahAde॒vAya॑ tryamba॒kAya॑ tripurAnta॒kAya॑ trikAgnikA॒lAya॑ kAlAgniru॒drAya॑ nIlaka॒NThAya॑ mRtyuJja॒yAya॑ sarvezva॒rAya॑ sadAzi॒vAya॑ [zaGka॒rAya॑] zrIma-nmahAde॒vAya॒ namaH॑ |
namo॒ hira॑Nya bAhave senA॒nye॑ di॒zA-Jca॒ pata॑ye॒ namo॒
namo॑ vR॒kSebhyo॒ hari॑kezebhyaH pazU॒nA-mpata॑ye॒ namo॒
namaH॑ sa॒spiJja॑rAya॒ tviSI॑mate pathI॒nA-mpata॑ye॒ namo॒
namo॑ babhlu॒zAya॑ vivyA॒dhine-'nnA॑nA॒-mpata॑ye॒ namo॒
namo॒ hari॑kezAyopavI॒tine॑ pu॒STAnA॒-mpata॑ye॒ namo॒
namo॑ bha॒vasya॑ he॒tyai jaga॑tA॒-mpata॑ye॒ namo॒
namo॑ ru॒drAyA॑tatA॒vine॒ kSetrA॑NA॒-mpata॑ye॒ namo॒
nama॑ssU॒tAyAha॑ntyAya॒ vanA॑nA॒-mpata॑ye॒ namo॒
namo॒ rohi॑tAya stha॒pata॑ye vR॒kSANA॒-mpata॑ye॒ namo॒
namo॑ ma॒ntriNe॑ vANi॒jAya॒ kakSA॑NA॒-mpata॑ye॒ namo॒
namo॑ bhuva॒ntaye॑ vArivaskR॒tA-yauSa॑dhInA॒-mpata॑ye॒ namo॒
nama॑ u॒ccairgho॑SAyAkra॒ndaya॑te pattI॒nA-mpata॑ye॒ namo॒
namaH॑ kRtsnavI॒tAya॒ dhAva॑te॒ sattva॑nA॒-mpata॑ye॒ namaH॑ || 2 ||
nama॒-ssaha॑mAnAya nivyA॒dhina॑ AvyA॒dhinI॑nA॒-mpata॑ye॒ namo॒
namaH॑ kaku॒bhAya॑ niSa॒GgiNe᳚ ste॒nAnA॒-mpata॑ye॒ namo॒
namo॑ niSa॒GgiNa॑ iSudhi॒mate॒ taska॑rANA॒-mpata॑ye॒ namo॒
namo॒ vaJca॑te pari॒vaJca॑te stAyU॒nA-mpata॑ye॒ namo॒
namo॑ nice॒rave॑ parica॒rAyAra॑NyAnA॒-mpata॑ye॒ namo॒
namaH॑ sRkA॒vibhyo॒ jighAgM॑sadbhyo muSNa॒tA-mpata॑ye॒ namo॒
namo॑-'si॒madbhyo॒ nakta॒Jcara॑dbhyaH prakR॒ntAnA॒-mpata॑ye॒ namo॒
nama॑ uSNI॒SiNe॑ girica॒rAya॑ kulu॒JcAnA॒-mpata॑ye॒ namo॒
nama॒ iSu॑madbhyo dhanvA॒vibhya॑zca vo॒ namo॒
nama॑ Atan-vA॒nebhyaH॑ prati॒dadhA॑nebhyazca vo॒ namo॒
nama॑ A॒yaccha॑dbhyo visR॒jadbhya॑zca vo॒ namo॒
namo-'sya॑dbhyo॒ vidya॑dbhyazca vo॒ namo॒
nama॒ AsI॑nebhya॒-zzayA॑nebhyazca vo॒ namo॒
namaH॑ sva॒padbhyo॒ jAgra॑dbhyazca vo॒ namo॒
nama॒stiSTha॑dbhyo॒ dhAva॑dbhyazca vo॒ namo॒
namaH॑ sa॒bhAbhyaH॑ sa॒bhApa॑tibhyazca vo॒ namo॒
namo॒ azve॒bhyo-'zva॑patibhyazca vo॒ namaH॑ || 3 ||
nama॑ AvyA॒dhinI᳚bhyo vi॒vidhya॑ntIbhyazca vo॒ namo॒
nama॒ uga॑NAbhyastRgM-ha॒tIbhya॑zca vo॒ namo॒
namo॑ gR॒tsebhyo॑ gR॒tsapa॑tibhyazca vo॒ namo॒
namo॒ vrAte᳚bhyo॒ vrAta॑patibhyazca vo॒ namo॒
namo॑ ga॒Nebhyo॑ ga॒Napa॑tibhyazca vo॒ namo॒
namo॒ virU॑pebhyo vi॒zvarU॑pebhyazca vo॒ namo॒
namo॑ maha॒dbhyaH॑, kSulla॒kebhya॑zca vo॒ namo॒
namo॑ ra॒thibhyo॑-'ra॒thebhya॑zca vo॒ namo॒
namo॒ rathe᳚bhyo॒ ratha॑patibhyazca vo॒ namo॒
nama॒-ssenA᳚bhya-ssenA॒nibhya॑zca vo॒ namo॒
namaH॑, kSa॒ttRbhyaH॑ saGgrahI॒tRbhya॑zca vo॒ namo॒
nama॒stakSa॑bhyo rathakA॒rebhya॑zca vo॒ namo॒
namaH॒ kulA॑lebhyaH ka॒rmAre᳚bhyazca vo॒ namo॒
namaH॑ pu॒JjiSTe᳚bhyo niSA॒debhya॑zca vo॒ namo॒
nama॑ iSu॒kRdbhyo॑ dhanva॒kRdbhya॑zca vo॒ namo॒
namo॑ mRga॒yubhyaH॑ zva॒nibhya॑zca vo॒ namo॒
nama॒-zzvabhya॒-zzvapa॑tibhyazca vo॒ namaH॑ || 4 ||
namo॑ bha॒vAya॑ ca ru॒drAya॑ ca॒
namaH॑ za॒rvAya॑ ca pazu॒pata॑ye ca॒
namo॒ nIla॑grIvAya ca ziti॒kaNThA॑ya ca॒
namaH॑ kapa॒rdine॑ ca॒ vyu॑ptakezAya ca॒
namaH॑ sahasrA॒kSAya॑ ca za॒tadha॑nvane ca॒
namo॑ giri॒zAya॑ ca zipivi॒STAya॑ ca॒
namo॑ mI॒DhuSTa॑mAya॒ ceSu॑mate ca॒
namo᳚ hra॒svAya॑ ca vAma॒nAya॑ ca॒
namo॑ bRha॒te ca॒ varSI॑yase ca॒
namo॑ vR॒ddhAya॑ ca saM॒vR~dhva॑ne ca॒
namo॒ agri॑yAya ca pratha॒mAya॑ ca॒
nama॑ A॒zave॑ cAji॒rAya॑ ca॒
nama॒-zzIghri॑yAya ca॒ zIbhyA॑ya ca॒
nama॑ U॒rmyA॑ya cAvasva॒nyA॑ya ca॒
namaH॑ srota॒syA॑ya ca॒ dvIpyA॑ya ca || 5 ||
namo᳚ jye॒SThAya॑ ca kani॒SThAya॑ ca॒
namaH॑ pUrva॒jAya॑ cApara॒jAya॑ ca॒
namo॑ madhya॒mAya॑ cApaga॒lbhAya॑ ca॒
namo॑ jagha॒nyA॑ya ca॒ budhni॑yAya ca॒
namaH॑ so॒bhyA॑ya ca pratisa॒ryA॑ya ca॒
namo॒ yAmyA॑ya ca॒ kSemyA॑ya ca॒
nama॑ urva॒ryA॑ya ca॒ khalyA॑ya ca॒
nama॒-zzlokyA॑ya cA-'vasA॒nyA॑ya ca॒
namo॒ vanyA॑ya ca॒ kakSyA॑ya ca॒
namaH॑ zra॒vAya॑ ca pratizra॒vAya॑ ca॒
nama॑ A॒zuSe॑NAya cA॒zura॑thAya ca॒
nama॒-zzUrA॑ya cAvabhinda॒te ca॒
namo॑ va॒rmiNe॑ ca varU॒thine॑ ca॒
namo॑ bi॒lmine॑ ca kava॒cine॑ ca॒
namaH॑ zru॒tAya॑ ca zrutase॒nAya॑ ca || 6 ||
namo॑ dundu॒bhyA॑ya cAhana॒nyA॑ya ca॒
namo॑ dhR॒SNave॑ ca pramR॒zAya॑ ca॒
namo॑ dU॒tAya॑ ca॒ prahi॑tAya ca॒
namo॑ niSa॒GgiNe॑ ceSudhi॒mate॑ ca॒
nama॑stI॒kSNeSa॑ve cAyu॒dhine॑ ca॒
namaH॑ svAyu॒dhAya॑ ca su॒dhanva॑ne ca॒
nama॒-ssrutyA॑ya ca॒ pathyA॑ya ca॒
namaH॑ kA॒TyA॑ya ca nI॒pyA॑ya ca॒
nama॒-ssUdyA॑ya ca sara॒syA॑ya ca॒
namo॑ nA॒dyAya॑ ca vaiza॒ntAya॑ ca॒
namaH॒ kUpyA॑ya cAva॒TyA॑ya ca॒
namo॒ varSyA॑ya cAva॒rSyAya॑ ca॒
namo॑ me॒ghyA॑ya ca vidyu॒tyA॑ya ca॒
nama I॒dhriyA॑ya cAta॒pyA॑ya ca॒
namo॒ vAtyA॑ya ca॒ reSmi॑yAya ca॒
namo॑ vAsta॒vyA॑ya ca vAstu॒pAya॑ ca || 7 ||
nama॒-ssomA॑ya ca ru॒drAya॑ ca॒
nama॑stA॒mrAya॑ cAru॒NAya॑ ca॒
namaH॑ za॒GgAya॑ ca pazu॒pata॑ye ca॒
nama॑ u॒grAya॑ ca bhI॒mAya॑ ca॒
namo॑ agreva॒dhAya॑ ca dUreva॒dhAya॑ ca॒
namo॑ ha॒ntre ca॒ hanI॑yase ca॒
namo॑ vR॒kSebhyo॒ hari॑kezebhyo॒
nama॑stA॒rAya॒
nama॑zza॒mbhave॑ ca mayo॒bhave॑ ca॒
namaH॑ zaGka॒rAya॑ ca mayaska॒rAya॑ ca॒
namaH॑ zi॒vAya॑ ca zi॒vata॑rAya ca॒
nama॒stIrthyA॑ya ca॒ kUlyA॑ya ca॒
namaH॑ pA॒ryA॑ya cAvA॒ryA॑ya ca॒
namaH॑ pra॒tara॑NAya co॒ttara॑NAya ca॒
nama॑ AtA॒ryA॑ya cAlA॒dyA॑ya ca॒
nama॒-zzaSpyA॑ya ca॒ phenyA॑ya ca॒
namaH॑ sika॒tyA॑ya ca pravA॒hyA॑ya ca || 8 ||
nama॑ iri॒NyA॑ya ca prapa॒thyA॑ya ca॒
namaH॑ kigMzi॒lAya॑ ca॒ kSaya॑NAya ca॒
namaH॑ kapa॒rdine॑ ca pula॒staye॑ ca॒
namo॒ goSThyA॑ya ca॒ gRhyA॑ya ca॒
nama॒stalpyA॑ya ca॒ gehyA॑ya ca॒
namaH॑ kA॒TyA॑ya ca gahvare॒SThAya॑ ca॒
namo᳚ hrada॒yyA॑ya ca nive॒SpyA॑ya ca॒
namaH॑ pAgM sa॒vyA॑ya ca raja॒syA॑ya ca॒
nama॒-zzuSkyA॑ya ca hari॒tyA॑ya ca॒
namo॒ lopyA॑ya cola॒pyA॑ya ca॒
nama॑ U॒rvyA॑ya ca sU॒rmyA॑ya ca॒
namaH॑ pa॒rNyA॑ya ca parNaza॒dyA॑ya ca॒
namo॑-'pagu॒ramA॑NAya cAbhighna॒te ca॒
nama॑ Akhkhida॒te ca॑ prakhkhida॒te ca॒
namo॑ vaH kiri॒kebhyo॑ de॒vAnA॒g॒m॒ hRda॑yebhyo॒
namo॑ vikSINa॒kebhyo॒ namo॑ vicinva॒tkebhyo॒
nama॑ Anir ha॒tebhyo॒ nama॑ AmIva॒tkebhyaH॑ || 9 ||
drApe॒ andha॑saspate॒ dari॑dra॒nnIla॑lohita |
e॒SA-mpuru॑SANAme॒SA-mpa॑zU॒nA-mmA bhermA-'ro॒ mo e॑SA॒-GkiJca॒nAma॑mat |
yA te॑ rudra zi॒vA ta॒nU-zzi॒vA vi॒zvAha॑bheSajI |
zi॒vA ru॒drasya॑ bheSa॒jI tayA॑ no mRDa jI॒vase᳚ ||
i॒mAgM ru॒drAya॑ ta॒vase॑ kapa॒rdine᳚ kSa॒yadvI॑rAya॒ prabha॑rAmahe ma॒tim |
yathA॑ na॒zzamasa॑ddvi॒pade॒ catu॑Spade॒ vizva॑-mpu॒STa-GgrAme॑ a॒sminnanA॑turam |
mR॒DA no॑ rudro॒ta no॒ maya॑skRdhi kSa॒yadvI॑rAya॒ nama॑sA vidhema te |
yaccha-Jca॒ yozca॒ manu॑rAya॒je pi॒tA tada॑zyAma॒ tava॑ rudra॒ praNI॑tau |
mA no॑ ma॒hAnta॑mu॒ta mA no॑ arbha॒ka-mmA na॒ ukSa॑ntamu॒ta mA na॑ ukSi॒tam |
mA no॑-'vadhIH pi॒tara॒-mmota mA॒tara॑-mpri॒yA mA na॑sta॒nuvo॑ rudra rIriSaH |
mA na॑sto॒ke tana॑ye॒ mA na॒ Ayu॑Si॒ mA no॒ goSu॒ mA no॒ azve॑Su rIriSaH |
vI॒rAnmA no॑ rudra bhAmi॒to-'va॑dhIrha॒viSmaM॑to॒ nama॑sA vidhema te |
A॒rAtte॑ go॒ghna u॒ta pU॑ruSa॒ghne kSa॒yadvI॑rAya su॒mnama॒sme te॑ astu |
rakSA॑ ca no॒ adhi॑ ca deva brU॒hyadhA॑ ca na॒-zzarma॑ yaccha dvi॒barhAH᳚ |
stu॒hi zru॒ta-Gga॑rta॒sadaM॒-yu~vA॑na-mmR॒ganna bhI॒mamu॑paha॒tnumu॒gram |
mR॒DA ja॑ri॒tre ru॑dra॒ stavA॑no a॒nyante॑ a॒smanniva॑pantu॒ senAH᳚ |
pari॑No ru॒drasya॑ he॒tirvR॑Naktu॒ pari॑ tve॒Sasya॑ durma॒ti ra॑ghA॒yoH |
ava॑ sthi॒rA ma॒ghava॑dbhya-stanuSva॒ mIDhva॑sto॒kAya॒ tana॑yAya mRDaya |
mIDhu॑STama॒ ziva॑tama zi॒vo naH॑ su॒manA॑ bhava |
pa॒ra॒me vR॒kSa Ayu॑dhanni॒dhAya॒ kRttiM॒-va~sA॑na॒ Aca॑ra॒ pinA॑ka॒-mbibhra॒dAga॑hi |
viki॑rida॒ vilo॑hita॒ nama॑ste astu bhagavaH |
yAste॑ sa॒hasragM॑ he॒tayo॒nyama॒smanniva॑pantu॒ tAH |
sa॒hasrA॑Ni sahasra॒dhA bA॑hu॒vostava॑ he॒tayaH॑ |
tAsA॒mIzA॑no bhagavaH parA॒cInA॒ mukhA॑ kRdhi || 10 ||
sa॒hasrA॑Ni sahasra॒zo ye ru॒drA adhi॒ bhUmyA᳚m |
teSAgM॑ sahasrayoja॒ne-'va॒dhanvA॑ni tanmasi |
a॒sminma॑ha॒tya॑rNa॒ve᳚-'ntari॑kSe bha॒vA adhi॑ |
nIla॑grIvA-zziti॒kaNThA᳚-zza॒rvA a॒dhaH, kSa॑mAca॒rAH |
nIla॑grIvA-zziti॒kaNThA॒ divagM॑ ru॒drA upa॑zritAH |
ye vR॒kSeSu॑ sa॒spiJja॑rA॒ nIla॑grIvA॒ vilo॑hitAH |
ye bhU॒tAnA॒madhi॑patayo vizi॒khAsaH॑ kapa॒rdinaH॑ |
ye anne॑Su vi॒vidhya॑nti॒ pAtre॑Su॒ piba॑to॒ janAn॑ |
ye pa॒thA-mpa॑thi॒rakSa॑ya ailabR॒dA॑ ya॒vyudhaH॑ |
ye tI॒rthAni॑ pra॒cara॑nti sR॒kAva॑nto niSa॒GgiNaH॑ |
ya e॒tAva॑ntazca॒ bhUyAgM॑sazca॒ dizo॑ ru॒drA vi॑tasthi॒re |
teSAgM॑ sahasrayoja॒ne-'va॒dhanvA॑ni tanmasi |
namo॑ ru॒dhrebhyo॒ ye pR॑thi॒vyAM-ye᳚-'ntari॑kSe॒ ye di॒vi yeSA॒mannaM॒-vAto॑ va॒rSa॒miSa॑va॒stebhyo॒ daza॒ prAcI॒rdaza॑ dakSi॒NA daza॑ pra॒tIcI॒-rdazo-dI॑cI॒-rdazo॒rdhvAstebhyo॒ nama॒ste no॑ mRDayantu॒ te ya-ndvi॒Smo yazca॑ no॒ dveSTi॒ taM-vo~॒ jambhe॑ dadhAmi || 11 ||
trya॑mbakaM-ya~jAmahe suga॒ndhi-mpu॑STi॒vardha॑nam |
u॒rvA॒ru॒kami॑va॒ bandha॑nAnmR॒tyormu॑kSIya॒ mA-'mRtA᳚t |
yo ru॒dro a॒gnau yo a॒psu ya oSa॑dhISu॒ yo ru॒dro vizvA॒ bhuva॑nA vi॒veza॒ tasmai॑ ru॒drAya॒ namo॑ astu |
tamu॑ STuhi॒ ya-ssvi॒Sussu॒dhanvA॒ yo vizva॑sya॒ kSaya॑ti bheSa॒jasya॑ |
yakSvA᳚ma॒he sau᳚mana॒sAya॑ ru॒dra-nnamo᳚bhirde॒vamasu॑ra-nduvasya |
a॒ya-mme॒ hasto॒ bhaga॑vAna॒ya-mme॒ bhaga॑vattaraH |
a॒ya-mme᳚ vi॒zvabhe᳚Sajo॒-'yagM zi॒vAbhi॑marzanaH |
ye te॑ sa॒hasra॑ma॒yuta॒-mpAzA॒ mRtyo॒ martyA॑ya॒ hanta॑ve |
tAn ya॒jJasya॑ mA॒yayA॒ sarvA॒nava॑ yajAmahe |
mR॒tyave॒ svAhA॑ mR॒tyave॒ svAhA᳚ |
o-nnamo bhagavate rudrAya viSNave mRtyu॑rme pA॒hi ||
prANAnA-Ggranthirasi rudro mA॑ vizA॒ntakaH |
tenAnnenA᳚pyAya॒sva ||
namo rudrAya viSNave mRtyu॑rme pA॒hi ||
sadAzi॒vom |
OM zAnti॒-zzAnti॒-zzAntiH॑ |