zrI rAdhA kRpA kaTAkSa stotram

munIndra–vRnda–vandite triloka–zoka–hAriNi

prasanna-vaktra-paNkaje nikuJja-bhU-vilAsini

vrajendra–bhAnu–nandini vrajendra–sUnu–saGgate

kadA kariSyasIha mAM kRpAkaTAkSa–bhAjanam ||1||

azoka–vRkSa–vallarI vitAna–maNDapa–sthite

pravAlabAla–pallava prabhAruNAGghri–komale |

varAbhayasphuratkare prabhUtasampadAlaye

kadA kariSyasIha mAM kRpAkaTAkSa–bhAjanam ||2||

anaGga-raNga maGgala-prasaGga-bhaGgura-bhruvAM

savibhramaM sasambhramaM dRganta–bANapAtanaiH |

nirantaraM vazIkRtapratItanandanandane

kadA kariSyasIha mAM kRpAkaTAkSa–bhAjanam ||3||

taDit–suvarNa–campaka –pradIpta–gaura–vigrahe

mukha–prabhA–parAsta–koTi–zAradendumaNDale |

vicitra-citra saJcaraccakora-zAva-locane

kadA kariSyasIha mAM kRpAkaTAkSa–bhAjanam ||4||

madonmadAti–yauvane pramoda–mAna–maNDite

priyAnurAga–raJjite kalA–vilAsa – paNDite |

ananyadhanya–kuJjarAjya–kAmakeli–kovide

kadA kariSyasIha mAM kRpAkaTAkSa–bhAjanam ||5||

azeSa–hAvabhAva–dhIrahIrahAra–bhUSite

prabhUtazAtakumbha–kumbhakumbhi–kumbhasustani |

prazastamanda–hAsyacUrNa pUrNasaukhya –sAgare

kadA kariSyasIha mAM kRpAkaTAkSa–bhAjanam ||6||

mRNAla-vAla-vallarI taraGga-raGga-dorlate

latAgra–lAsya–lola–nIla–locanAvalokane |

lalallulanmilanmanojJa–mugdha–mohinAzrite

kadA kariSyasIha mAM kRpAkaTAkSa–bhAjanam ||7||

suvarNamalikAJcita –trirekha–kambu–kaNThage

trisUtra–maGgalI-guNa–triratna-dIpti–dIdhite |

salola–nIlakuntala–prasUna–guccha–gumphite

kadA kariSyasIha mAM kRpAkaTAkSa–bhAjanam ||8||

nitamba–bimba–lambamAna–puSpamekhalAguNe

prazastaratna-kiGkiNI-kalApa-madhya maJjule |

karIndra–zuNDadaNDikA–varohasaubhagoruke

kadA kariSyasIha mAM kRpAkaTAkSa–bhAjanam ||9||

aneka–mantranAda–maJju nUpurArava–skhalat

samAja–rAjahaMsa–vaMza–nikvaNAti–gaurave |

vilolahema–vallarI–viDambicAru–caGkrame

kadA kariSyasIha mAM kRpAkaTAkSa–bhAjanam ||10||

ananta–koTi–viSNuloka–namra–padmajArcite

himAdrijA–pulomajA–viriJcajA-varaprade |

apAra–siddhi–Rddhi–digdha–satpadAGgulI-nakhe

kadA kariSyasIha mAM kRpAkaTAkSa–bhAjanam ||11||

makhezvari kriyezvari svadhezvari surezvari

triveda–bhAratIzvari pramANa–zAsanezvari |

ramezvari kSamezvari pramoda–kAnanezvari

vrajezvari vrajAdhipe zrIrAdhike namostute ||12||

itI mamadbhutaM-stavaM nizamya bhAnunandinI

karotu santataM janaM kRpAkaTAkSa-bhAjanam |

bhavettadaiva saJcita trirUpa–karma nAzanaM

labhettadA vrajendra–sUnu–maNDala–pravezanam ||13||

rAkAyAM ca sitASTamyAM dazamyAM ca vizuddhadhIH |

ekAdazyAM trayodazyAM yaH paThetsAdhakaH sudhIH ||14||

yaM yaM kAmayate kAmaM taM tamApnoti sAdhakaH |

rAdhAkRpAkaTAkSeNa bhaktiHsyAt premalakSaNA ||15||

Urudaghne nAbhidaghne hRddaghne kaNThadaghnake |

rAdhAkuNDajale sthitA yaH paThet sAdhakaH zatam ||16||

tasya sarvArtha siddhiH syAd vAksAmarthyaM tathA labhet |

aizvaryaM ca labhet sAkSAddRzA pazyati rAdhikAm ||17||

tena sa tatkSaNAdeva tuSTA datte mahAvaram |

yena pazyati netrAbhyAM tat priyaM zyAmasundaram ||18||

nityalIlA–pravezaM ca dadAti zrI-vrajAdhipaH |

ataH parataraM prArthyaM vaiSNavasya na vidyate ||19||

|| iti zrImadUrdhvAmnAye zrIrAdhikAyAH kRpAkaTAkSastotraM sampUrNam ||