mahA gaNapati sahasranAma stotram

muniruvAcha

kathaM nAmnAM sahasraM taM gaNesha upadiShTavAn |

shivadaM tanmamAchakShva lokAnugrahatatpara || 1 ||

brahmovAcha

devaH pUrvaM purArAtiH puratrayajayodyame |

anarchanAdgaNeshasya jAto vighnAkulaH kila || 2 ||

manasA sa vinirdhArya dadRRishe vighnakAraNam |

mahAgaNapatiM bhaktyA samabhyarchya yathAvidhi || 3 ||

vighnaprashamanopAyamapRRichChadaparishramam |

santuShTaH pUjayA shambhormahAgaNapatiH svayam || 4 ||

sarvavighnaprashamanaM sarvakAmaphalapradam |

tatastasmai svayaM nAmnAM sahasramidamabravIt || 5 ||

asya shrImahAgaNapatisahasranAmastotramAlAmantrasya |

gaNesha RRiShiH, mahAgaNapatirdevatA, nAnAvidhAnichChandAMsi |

humiti bIjam, tu~Ngamiti shaktiH, svAhAshaktiriti kIlakam |

sakalavighnavinAshanadvArA shrImahAgaNapatiprasAdasiddhyarthe jape viniyogaH |

atha karanyAsaH

gaNeshvaro gaNakrIDa itya~NguShThAbhyAM namaH |

kumAragururIshAna iti tarjanIbhyAM namaH ||

brahmANDakumbhashchidvyometi madhyamAbhyAM namaH |

rakto raktAmbaradhara ityanAmikAbhyAM namaH

sarvasadgurusaMsevya iti kaniShThikAbhyAM namaH |

luptavighnaH svabhaktAnAmiti karatalakarapRRiShThAbhyAM namaH ||

atha a~NganyAsaH

ChandashChandodbhava iti hRRidayAya namaH |

niShkalo nirmala iti shirase svAhA |

sRRiShTisthitilayakrIDa iti shikhAyai vaShaT |

jnAnaM vijnAnamAnanda iti kavachAya hum |

aShTA~NgayogaphalabhRRiditi netratrayAya vauShaT |

anantashaktisahita ityastrAya phaT |

bhUrbhuvaH svaroM iti digbandhaH |

atha dhyAnam

gajavadanamachintyaM tIkShNadaMShTraM trinetraM

bRRihadudaramasheShaM bhUtirAjaM purANam |

amaravarasupUjyaM raktavarNaM sureshaM

pashupatisutamIshaM vighnarAjaM namAmi ||

shrIgaNapatiruvAcha

OM gaNeshvaro gaNakrIDo gaNanAtho gaNAdhipaH |

ekadanto vakratuNDo gajavaktro mahodaraH || 1 ||

lambodaro dhUmravarNo vikaTo vighnanAshanaH |

sumukho durmukho buddho vighnarAjo gajAnanaH || 2 ||

bhImaH pramoda AmodaH surAnando madotkaTaH |

herambaH shambaraH shambhurlambakarNo mahAbalaH || 3 ||

nandano lampaTo bhImo meghanAdo gaNa~njayaH |

vinAyako virUpAkSho vIraH shUravarapradaH || 4 ||

mahAgaNapatirbuddhipriyaH kShipraprasAdanaH |

rudrapriyo gaNAdhyakSha umAputro.aghanAshanaH || 5 ||

kumAragururIshAnaputro mUShakavAhanaH |

siddhipriyaH siddhipatiH siddhaH siddhivinAyakaH || 6 ||

avighnastumburuH siMhavAhano mohinIpriyaH |

kaTa~NkaTo rAjaputraH shAkalaH sammitomitaH || 7 ||

kUShmANDasAmasambhUtirdurjayo dhUrjayo jayaH |

bhUpatirbhuvanapatirbhUtAnAM patiravyayaH || 8 ||

vishvakartA vishvamukho vishvarUpo nidhirguNaH |

kaviH kavInAmRRiShabho brahmaNyo brahmavitpriyaH || 9 ||

jyeShTharAjo nidhipatirnidhipriyapatipriyaH |

hiraNmayapurAntaHsthaH sUryamaNDalamadhyagaH || 10 ||

karAhatidhvastasindhusalilaH pUShadantabhit |

umA~NkakelikutukI muktidaH kulapAvanaH || 11 ||

kirITI kuNDalI hArI vanamAlI manomayaH |

vaimukhyahatadaityashrIH pAdAhatijitakShitiH || 12 ||

sadyojAtaH svarNamu~njamekhalI durnimittahRRit |

duHsvapnahRRitprasahano guNI nAdapratiShThitaH || 13 ||

surUpaH sarvanetrAdhivAso vIrAsanAshrayaH |

pItAmbaraH khaNDaradaH khaNDavaishAkhasaMsthitaH || 14 ||

chitrA~NgaH shyAmadashano bhAlachandro havirbhujaH |

yogAdhipastArakasthaH puruSho gajakarNakaH || 15 ||

gaNAdhirAjo vijayaH sthiro gajapatidhvajI |

devadevaH smaraH prANadIpako vAyukIlakaH || 16 ||

vipashchidvarado nAdo nAdabhinnamahAchalaH |

varAharadano mRRityu~njayo vyAghrAjinAmbaraH || 17 ||

ichChAshaktibhavo devatrAtA daityavimardanaH |

shambhuvaktrodbhavaH shambhukopahA shambhuhAsyabhUH || 18 ||

shambhutejAH shivAshokahArI gaurIsukhAvahaH |

umA~Ngamalajo gaurItejobhUH svardhunIbhavaH || 19 ||

yaj~nakAyo mahAnAdo girivarShmA shubhAnanaH |

sarvAtmA sarvadevAtmA brahmamUrdhA kakupshrutiH || 20 ||

brahmANDakumbhashchidvyomabhAlaHsatyashiroruhaH |

jagajjanmalayonmeShanimeSho.agnyarkasomadRRik || 21 ||

girIndraikarado dharmAdharmoShThaH sAmabRRiMhitaH |

graharkShadashano vANIjihvo vAsavanAsikaH || 22 ||

bhrUmadhyasaMsthitakaro brahmavidyAmadodakaH |

kulAchalAMsaH somArkaghaNTo rudrashirodharaH || 23 ||

nadInadabhujaH sarpA~NgulIkastArakAnakhaH |

vyomanAbhiH shrIhRRidayo merupRRiShTho.arNavodaraH || 24 ||

kukShisthayakShagandharvarakShaHkinnaramAnuShaH |

pRRithvIkaTiH sRRiShTili~NgaH shailorurdasrajAnukaH || 25 ||

pAtAlajaNgho munipAtkAlANguShThastrayItanuH |

jyotirmaNDalalA~NgUlo hRRidayAlAnanishchalaH || 26 ||

hRRitpadmakarNikAshAlI viyatkelisarovaraH |

sadbhaktadhyAnanigaDaH pUjAvArinivAritaH || 27 ||

pratApI kAshyapo mantA gaNako viShTapI balI |

yashasvI dhArmiko jetA prathamaH pramatheshvaraH || 28 ||

chintAmaNirdvIpapatiH kalpadrumavanAlayaH |

ratnamaNDapamadhyastho ratnasiMhAsanAshrayaH || 29 ||

tIvrAshiroddhRRitapado jvAlinImaulilAlitaH |

nandAnanditapIThashrIrbhogado bhUShitAsanaH || 30 ||

sakAmadAyinIpIThaH sphuradugrAsanAshrayaH |

tejovatIshiroratnaM satyAnityAvataMsitaH || 31 ||

savighnanAshinIpIThaH sarvashaktyambujAlayaH |

lipipadmAsanAdhAro vahnidhAmatrayAlayaH || 32 ||

unnataprapado gUDhagulphaH saMvRRitapArShNikaH |

pInaja~NghaH shliShTajAnuH sthUloruH pronnamatkaTiH || 33 ||

nimnanAbhiH sthUlakukShiH pInavakShA bRRihadbhujaH |

pInaskandhaH kambukaNTho lamboShTho lambanAsikaH || 34 ||

bhagnavAmaradastu~Ngasavyadanto mahAhanuH |

hrasvanetratrayaH shUrpakarNo nibiDamastakaH || 35 ||

stabakAkArakumbhAgro ratnamaulirnira~NkushaH |

sarpahArakaTIsUtraH sarpayaj~nopavItavAn || 36 ||

sarpakoTIrakaTakaH sarpagraiveyakA~NgadaH |

sarpakakShodarAbandhaH sarparAjottarachChadaH || 37 ||

rakto raktAmbaradharo raktamAlAvibhUShaNaH |

raktekShano raktakaro raktatAlvoShThapallavaH || 38 ||

shvetaH shvetAmbaradharaH shvetamAlAvibhUShaNaH |

shvetAtapatraruchiraH shvetachAmaravIjitaH || 39 ||

sarvAvayavasampUrNaH sarvalakShaNalakShitaH |

sarvAbharaNashobhADhyaH sarvashobhAsamanvitaH || 40 ||

sarvamaNgalamANgalyaH sarvakAraNakAraNam |

sarvadevavaraH shAr~NgI bIjapUrI gadAdharaH || 41 ||

shubhANgo lokasAraNgaH sutantustantuvardhanaH |

kirITI kuNDalI hArI vanamAlI shubhA~NgadaH || 42 ||

ikShuchApadharaH shUlI chakrapANiH sarojabhRRit |

pAshI dhRRitotpalaH shAlima~njarIbhRRitsvadantabhRRit || 43 ||

kalpavallIdharo vishvAbhayadaikakaro vashI |

akShamAlAdharo j~nAnamudrAvAn mudgarAyudhaH || 44 ||

pUrNapAtrI kambudharo vidhRRitA~NkushamUlakaH |

karasthAmraphalashchUtakalikAbhRRitkuThAravAn || 45 ||

puShkarasthasvarNaghaTIpUrNaratnAbhivarShakaH |

bhAratIsundarInAtho vinAyakaratipriyaH || 46 ||

mahAlakShmIpriyatamaH siddhalakShmImanoramaH |

ramArameshapUrvA~Ngo dakShiNomAmaheshvaraH || 47 ||

mahIvarAhavAmA~Ngo ratikandarpapashchimaH |

AmodamodajananaH sapramodapramodanaH || 48 ||

saMvardhitamahAvRRiddhirRRiddhisiddhipravardhanaH |

dantasaumukhyasumukhaH kAntikandalitAshrayaH || 49 ||

madanAvatyAshritA~NghriH kRRitavaimukhyadurmukhaH |

vighnasampallavaH padmaH sarvonnatamadadravaH || 50 ||

vighnakRRinnimnacharaNo drAviNIshaktisatkRRitaH |

tIvrAprasannanayano jvAlinIpAlitaikadRRik || 51 ||

mohinImohano bhogadAyinIkAntimaNDanaH |

kAminIkAntavaktrashrIradhiShThitavasundharaH || 52 ||

vasudhArAmadonnAdo mahAsha~NkhanidhipriyaH |

namadvasumatImAlI mahApadmanidhiH prabhuH || 53 ||

sarvasadgurusaMsevyaH shochiShkeshahRRidAshrayaH |

IshAnamUrdhA devendrashikhaH pavananandanaH || 54 ||

pratyugranayano divyo divyAstrashataparvadhRRik |

airAvatAdisarvAshAvAraNo vAraNapriyaH || 55 ||

vajrAdyastraparIvAro gaNachaNDasamAshrayaH |

jayAjayaparikaro vijayAvijayAvahaH || 56 ||

ajayArchitapAdAbjo nityAnandavanasthitaH |

vilAsinIkRRitollAsaH shauNDI saundaryamaNDitaH || 57 ||

anantAnantasukhadaH sumaNgalasumaNgalaH |

j~nAnAshrayaH kriyAdhAra ichChAshaktiniShevitaH || 58 ||

subhagAsaMshritapado lalitAlalitAshrayaH |

kAminIpAlanaH kAmakAminIkelilAlitaH || 59 ||

sarasvatyAshrayo gaurInandanaH shrIniketanaH |

guruguptapado vAchAsiddho vAgIshvarIpatiH || 60 ||

nalinIkAmuko vAmArAmo jyeShThAmanoramaH |

raudrImudritapAdAbjo humbIjastu~NgashaktikaH || 61 ||

vishvAdijananatrANaH svAhAshaktiH sakIlakaH |

amRRitAbdhikRRitAvAso madaghUrNitalochanaH || 62 ||

uchChiShTochChiShTagaNako gaNesho gaNanAyakaH |

sArvakAlikasaMsiddhirnityasevyo digambaraH || 63 ||

anapAyo.anantadRRiShTiraprameyo.ajarAmaraH |

anAvilo.apratihatirachyuto.amRRitamakSharaH || 64 ||

apratarkyo.akShayo.ajayyo.anAdhAro.anAmayomalaH |

ameyasiddhiradvaitamaghoro.agnisamAnanaH || 65 ||

anAkAro.abdhibhUmyagnibalaghno.avyaktalakShaNaH |

AdhArapIThamAdhAra AdhArAdheyavarjitaH || 66 ||

Akhuketana AshApUraka AkhumahArathaH |

ikShusAgaramadhyastha ikShubhakShaNalAlasaH || 67 ||

ikShuchApAtirekashrIrikShuchApaniShevitaH |

indragopasamAnashrIrindranIlasamadyutiH || 68 ||

indIvaradalashyAma indumaNDalamaNDitaH |

idhmapriya iDAbhAga iDAvAnindirApriyaH || 69 ||

ikShvAkuvighnavidhvaMsI itikartavyatepsitaH |

IshAnamaulirIshAna IshAnapriya ItihA || 70 ||

IShaNAtrayakalpAnta IhAmAtravivarjitaH |

upendra uDubhRRinmauliruDunAthakarapriyaH || 71 ||

unnatAnana uttu~Nga udArastridashAgraNIH |

UrjasvAnUShmalamada UhApohadurAsadaH || 72 ||

RRigyajuHsAmanayana RRiddhisiddhisamarpakaH |

RRijuchittaikasulabho RRiNatrayavimochanaH || 73 ||

luptavighnaH svabhaktAnAM luptashaktiH suradviShAm |

luptashrIrvimukhArchAnAM lUtAvisphoTanAshanaH || 74 ||

ekArapIThamadhyastha ekapAdakRRitAsanaH |

ejitAkhiladaityashrIredhitAkhilasaMshrayaH || 75 ||

aishvaryanidhiraishvaryamaihikAmuShmikapradaH |

airammadasamonmeSha airAvatasamAnanaH || 76 ||

oNkAravAchya oNkAra ojasvAnoShadhIpatiH |

audAryanidhirauddhatyadhairya aunnatyaniHsamaH || 77 ||

aNkushaH suranAgAnAmaNkushAkArasaMsthitaH |

aH samastavisargAntapadeShu parikIrtitaH || 78 ||

kamaNDaludharaH kalpaH kapardI kalabhAnanaH |

karmasAkShI karmakartA karmAkarmaphalapradaH || 79 ||

kadambagolakAkAraH kUShmANDagaNanAyakaH |

kAruNyadehaH kapilaH kathakaH kaTisUtrabhRRit || 80 ||

kharvaH khaDgapriyaH khaDgaH khAntAntaHsthaH khanirmalaH |

khalvATashRRiNganilayaH khaTvANgI khadurAsadaH || 81 ||

guNADhyo gahano gadyo gadyapadyasudhArNavaH |

gadyagAnapriyo garjo gItagIrvANapUrvajaH || 82 ||

guhyAchArarato guhyo guhyAgamanirUpitaH |

guhAshayo guDAbdhistho gurugamyo gururguruH || 83 ||

ghaNTAghargharikAmAlI ghaTakumbho ghaTodaraH |

~NakAravAchyo ~NAkAro ~NakArAkArashuNDabhRRit || 84 ||

chaNDashchaNDeshvarashchaNDI chaNDeshashchaNDavikramaH |

charAcharapitA chintAmaNishcharvaNalAlasaH || 85 ||

ChandashChandodbhavashChando durlakShyashChandavigrahaH |

jagadyonirjagatsAkShI jagadIsho jaganmayaH || 86 ||

japyo japaparo jApyo jihvAsiMhAsanaprabhuH |

sravadgaNDollasaddhAnajha~NkAribhramarAkulaH || 87 ||

TaNkArasphArasaMrAvaShTaNkAramaNinUpuraH |

ThadvayIpallavAntasthasarvamantreShu siddhidaH || 88 ||

DiNDimuNDo DAkinIsho DAmaro DiNDimapriyaH |

DhakkAninAdamudito Dhau~Nko DhuNDhivinAyakaH || 89 ||

tattvAnAM prakRRitistattvaM tattvampadanirUpitaH |

tArakAntarasaMsthAnastArakastArakAntakaH || 90 ||

sthANuH sthANupriyaH sthAtA sthAvaraM ja~NgamaM jagat |

dakShayaj~napramathano dAtA dAnaM damo dayA || 91 ||

dayAvAndivyavibhavo daNDabhRRiddaNDanAyakaH |

dantaprabhinnAbhramAlo daityavAraNadAraNaH || 92 ||

daMShTrAlagnadvIpaghaTo devArthanRRigajAkRRitiH |

dhanaM dhanapaterbandhurdhanado dharaNIdharaH || 93 ||

dhyAnaikaprakaTo dhyeyo dhyAnaM dhyAnaparAyaNaH |

dhvaniprakRRitichItkAro brahmANDAvalimekhalaH || 94 ||

nandyo nandipriyo nAdo nAdamadhyapratiShThitaH |

niShkalo nirmalo nityo nityAnityo nirAmayaH || 95 ||

paraM vyoma paraM dhAma paramAtmA paraM padam || 96 ||

parAtparaH pashupatiH pashupAshavimochanaH |

pUrNAnandaH parAnandaH purANapuruShottamaH || 97 ||

padmaprasannavadanaH praNatAj~nAnanAshanaH |

pramANapratyayAtItaH praNatArtinivAraNaH || 98 ||

phaNihastaH phaNipatiH phUtkAraH phaNitapriyaH |

bANArchitA~Nghriyugalo bAlakelikutUhalI |

brahma brahmArchitapado brahmachArI bRRihaspatiH || 99 ||

bRRihattamo brahmaparo brahmaNyo brahmavitpriyaH |

bRRihannAdAgryachItkAro brahmANDAvalimekhalaH || 100 ||

bhrUkShepadattalakShmIko bhargo bhadro bhayApahaH |

bhagavAn bhaktisulabho bhUtido bhUtibhUShaNaH || 101 ||

bhavyo bhUtAlayo bhogadAtA bhrUmadhyagocharaH |

mantro mantrapatirmantrI madamatto mano mayaH || 102 ||

mekhalAhIshvaro mandagatirmandanibhekShaNaH |

mahAbalo mahAvIryo mahAprANo mahAmanAH || 103 ||

yajno yajnapatiryajnagoptA yajnaphalapradaH |

yashaskaro yogagamyo yAj~niko yAjakapriyaH || 104 ||

raso rasapriyo rasyo ra~njako rAvaNArchitaH |

rAjyarakShAkaro ratnagarbho rAjyasukhapradaH || 105 ||

lakSho lakShapatirlakShyo layastho laDDukapriyaH |

lAsapriyo lAsyaparo lAbhakRRillokavishrutaH || 106 ||

vareNyo vahnivadano vandyo vedAntagocharaH |

vikartA vishvatashchakShurvidhAtA vishvatomukhaH || 107 ||

vAmadevo vishvanetA vajrivajranivAraNaH |

vivasvadbandhano vishvAdhAro vishveshvaro vibhuH || 108 ||

shabdabrahma shamaprApyaH shambhushaktigaNeshvaraH |

shAstA shikhAgranilayaH sharaNyaH shambareshvaraH || 109 ||

ShaDRRitukusumasragvI ShaDAdhAraH ShaDakSharaH |

saMsAravaidyaH sarvaj~naH sarvabheShajabheShajam || 110 ||

sRRiShTisthitilayakrIDaH suraku~njarabhedakaH |

sindUritamahAkumbhaH sadasadbhaktidAyakaH || 111 ||

sAkShI samudramathanaH svayaMvedyaH svadakShiNaH |

svatantraH satyasa~NkalpaH sAmagAnarataH sukhI || 112 ||

haMso hastipishAchIsho havanaM havyakavyabhuk |

havyaM hutapriyo hRRiShTo hRRillekhAmantramadhyagaH || 113 ||

kShetrAdhipaH kShamAbhartA kShamAkShamaparAyaNaH |

kShiprakShemakaraH kShemAnandaH kShoNIsuradrumaH || 114 ||

dharmaprado.arthadaH kAmadAtA saubhAgyavardhanaH |

vidyAprado vibhavado bhuktimuktiphalapradaH || 115 ||

AbhirUpyakaro vIrashrIprado vijayapradaH |

sarvavashyakaro garbhadoShahA putrapautradaH || 116 ||

medhAdaH kIrtidaH shokahArI daurbhAgyanAshanaH |

prativAdimukhastambho ruShTachittaprasAdanaH || 117 ||

parAbhichArashamano duHkhahA bandhamokShadaH |

lavastruTiH kalA kAShThA nimeShastatparakShaNaH || 118 ||

ghaTI muhUrtaH praharo divA naktamaharnisham |

pakSho mAsartvayanAbdayugaM kalpo mahAlayaH || 119 ||

rAshistArA tithiryogo vAraH karaNamaMshakam |

lagnaM horA kAlachakraM meruH saptarShayo dhruvaH || 120 ||

rAhurmandaH kavirjIvo budho bhaumaH shashI raviH |

kAlaH sRRiShTiH sthitirvishvaM sthAvaraM ja~NgamaM jagat || 121 ||

bhUrApo.agnirmarudvyomAha~NkRRitiH prakRRitiH pumAn |

brahmA viShNuH shivo rudra IshaH shaktiH sadAshivaH || 122 ||

tridashAH pitaraH siddhA yakShA rakShAMsi kinnarAH |

siddhavidyAdharA bhUtA manuShyAH pashavaH khagAH || 123 ||

samudrAH saritaH shailA bhUtaM bhavyaM bhavodbhavaH |

sANkhyaM pAtanjalaM yogaM purANAni shrutiH smRRitiH || 124 ||

vedA~NgAni sadAchAro mImAMsA nyAyavistaraH |

Ayurvedo dhanurvedo gAndharvaM kAvyanATakam || 125 ||

vaikhAnasaM bhAgavataM mAnuShaM pA~ncharAtrakam |

shaivaM pAshupataM kAlAmukhambhairavashAsanam || 126 ||

shAktaM vainAyakaM sauraM jainamArhatasaMhitA |

sadasadvyaktamavyaktaM sachetanamachetanam || 127 ||

bandho mokShaH sukhaM bhogo yogaH satyamaNurmahAn |

svasti humphaT svadhA svAhA shrauShaT vauShaT vaShaN namaH 128 ||

jnAnaM vijnAnamAnando bodhaH saMvitsamo.asamaH |

eka ekAkSharAdhAra ekAkSharaparAyaNaH || 129 ||

ekAgradhIrekavIra eko.anekasvarUpadhRRik |

dvirUpo dvibhujo dvyakSho dvirado dvIparakShakaH || 130 ||

dvaimAturo dvivadano dvandvahIno dvayAtigaH |

tridhAmA trikarastretA trivargaphaladAyakaH || 131 ||

triguNAtmA trilokAdistrishaktIshastrilochanaH |

chaturvidhavachovRRittiparivRRittipravartakaH || 132 ||

chaturbAhushchaturdantashchaturAtmA chaturbhujaH |

chaturvidhopAyamayashchaturvarNAshramAshrayaH 133 ||

chaturthIpUjanaprItashchaturthItithisambhavaH ||

panchAkSharAtmA panchAtmA panchAsyaH panchakRRittamaH || 134 ||

panchAdhAraH panchavarNaH pa~nchAkSharaparAyaNaH |

panchatAlaH panchakaraH pa~nchapraNavamAtRRikaH || 135 ||

panchabrahmamayasphUrtiH panchAvaraNavAritaH |

panchabhakShapriyaH panchabANaH pa~nchashikhAtmakaH || 136 ||

ShaTkoNapIThaH ShaTchakradhAmA ShaDgranthibhedakaH |

ShaDaNgadhvAntavidhvaMsI ShaDaNgulamahAhradaH || 137 ||

ShaNmukhaH ShaNmukhabhrAtA ShaTshaktiparivAritaH |

ShaDvairivargavidhvaMsI ShaDUrmibhayabha~njanaH || 138 ||

ShaTtarkadUraH ShaTkarmA ShaDguNaH ShaDrasAshrayaH |

saptapAtAlacharaNaH saptadvIporumaNDalaH || 139 ||

saptasvarlokamukuTaH saptasaptivarapradaH |

saptA~NgarAjyasukhadaH saptarShigaNavanditaH || 140 ||

saptachChandonidhiH saptahotraH saptasvarAshrayaH |

saptAbdhikelikAsAraH saptamAtRRiniShevitaH || 141 ||

saptachChando modamadaH saptachChando makhaprabhuH |

aShTamUrtirdhyeyamUrtiraShTaprakRRitikAraNam || 142 ||

aShTA~NgayogaphalabhRRidaShTapatrAmbujAsanaH |

aShTashaktisamAnashrIraShTaishvaryapravardhanaH || 143 ||

aShTapIThopapIThashrIraShTamAtRRisamAvRRitaH |

aShTabhairavasevyo.aShTavasuvandyo.aShTamUrtibhRRit || 144 ||

aShTachakrasphuranmUrtiraShTadravyahaviHpriyaH |

aShTashrIraShTasAmashrIraShTaishvaryapradAyakaH |

navanAgAsanAdhyAsI navanidhyanushAsitaH || 145 ||

navadvArapurAvRRitto navadvAraniketanaH |

navanAthamahAnAtho navanAgavibhUShitaH || 146 ||

navanArAyaNastulyo navadurgAniShevitaH |

navaratnavichitrA~Ngo navashaktishiroddhRRitaH || 147 ||

dashAtmako dashabhujo dashadikpativanditaH |

dashAdhyAyo dashaprANo dashendriyaniyAmakaH || 148 ||

dashAkSharamahAmantro dashAshAvyApivigrahaH |

ekAdashamahArudraiHstutashchaikAdashAkSharaH || 149 ||

dvAdashadvidashAShTAdidordaNDAstraniketanaH |

trayodashabhidAbhinno vishvedevAdhidaivatam || 150 ||

chaturdashendravaradashchaturdashamanuprabhuH |

chaturdashAdyavidyADhyashchaturdashajagatpatiH || 151 ||

sAmapanchadashaH panchadashIshItAMshunirmalaH |

tithipanchadashAkArastithyA panchadashArchitaH || 152 ||

ShoDashAdhAranilayaH ShoDashasvaramAtRRikaH |

ShoDashAntapadAvAsaH ShoDashendukalAtmakaH || 153 ||

kalAsaptadashI saptadashasaptadashAkSharaH |

aShTAdashadvIpapatiraShTAdashapurANakRRit || 154 ||

aShTAdashauShadhIsRRiShTiraShTAdashavidhiH smRRitaH |

aShTAdashalipivyaShTisamaShTij~nAnakovidaH || 155 ||

aShTAdashAnnasampattiraShTAdashavijAtikRRit |

ekaviMshaH pumAnekaviMshatya~NgulipallavaH || 156 ||

chaturviMshatitattvAtmA pa~nchaviMshAkhyapUruShaH |

saptaviMshatitAreshaH saptaviMshatiyogakRRit || 157 ||

dvAtriMshadbhairavAdhIshashchatustriMshanmahAhradaH |

ShaTtriMshattattvasambhUtiraShTatriMshatkalAtmakaH || 158 ||

panchAshadviShNushaktIshaH panchAshanmAtRRikAlayaH |

dvipa~nchAshadvapuHshreNItriShaShTyakSharasaMshrayaH |

panchAshadakSharashreNIpanchAshadrudravigrahaH || 159 ||

chatuHShaShTimahAsiddhiyoginIvRRindavanditaH |

namadekonapa~nchAshanmarudvarganirargalaH || 160 ||

chatuHShaShTyarthanirNetA chatuHShaShTikalAnidhiH |

aShTaShaShTimahAtIrthakShetrabhairavavanditaH || 161 ||

chaturnavatimantrAtmA ShaNNavatyadhikaprabhuH |

shatAnandaH shatadhRRitiH shatapatrAyatekShaNaH || 162 ||

shatAnIkaH shatamakhaH shatadhArAvarAyudhaH |

sahasrapatranilayaH sahasraphaNibhUShaNaH || 163 ||

sahasrashIrShA puruShaH sahasrAkShaH sahasrapAt |

sahasranAmasaMstutyaH sahasrAkShabalApahaH || 164 ||

dashasAhasraphaNibhRRitphaNirAjakRRitAsanaH |

aShTAshItisahasrAdyamaharShistotrapAThitaH || 165 ||

lakShAdhAraH priyAdhAro lakShAdhAramanomayaH |

chaturlakShajapaprItashchaturlakShaprakAshakaH || 166 ||

chaturashItilakShANAM jIvAnAM dehasaMsthitaH |

koTisUryapratIkAshaH koTichandrAMshunirmalaH || 167 ||

shivodbhavAdyaShTakoTivainAyakadhurandharaH |

saptakoTimahAmantramantritAvayavadyutiH || 168 ||

trayastriMshatkoTisurashreNIpraNatapAdukaH |

anantadevatAsevyo hyanantashubhadAyakaH || 169 ||

anantanAmAnantashrIrananto.anantasaukhyadaH |

anantashaktisahito hyanantamunisaMstutaH || 170 ||

iti vainAyakaM nAmnAM sahasramidamIritam |

idaM brAhme muhUrte yaH paThati pratyahaM naraH || 171 ||

karasthaM tasya sakalamaihikAmuShmikaM sukham |

AyurArogyamaishvaryaM dhairyaM shauryaM balaM yashaH || 172 ||

medhA praj~nA dhRRitiH kAntiH saubhAgyamabhirUpatA |

satyaM dayA kShamA shAntirdAkShiNyaM dharmashIlatA || 173 ||

jagatsaMvananaM vishvasaMvAdo vedapATavam |

sabhApANDityamaudAryaM gAmbhIryaM brahmavarchasam || 174 ||

ojastejaH kulaM shIlaM pratApo vIryamAryatA |

jnAnaM vijnAnamAstikyaM sthairyaM vishvAsatA tathA || 175 ||

dhanadhAnyAdivRRiddhishcha sakRRidasya japAdbhavet |

vashyaM chaturvidhaM vishvaM japAdasya prajAyate || 176 ||

rAj~no rAjakalatrasya rAjaputrasya mantriNaH |

japyate yasya vashyArthe sa dAsastasya jAyate || 177 ||

dharmArthakAmamokShANAmanAyAsena sAdhanam |

shAkinIDAkinIrakShoyakShagrahabhayApaham || 178 ||

sAmrAjyasukhadaM sarvasapatnamadamardanam |

samastakalahadhvaMsi dagdhabIjaprarohaNam || 179 ||

duHsvapnashamanaM kruddhasvAmichittaprasAdanam |

ShaDvargAShTamahAsiddhitrikAlaj~nAnakAraNam || 180 ||

parakRRityaprashamanaM parachakrapramardanam |

sa~NgrAmamArge saveShAmidamekaM jayAvaham || 181 ||

sarvavandhyatvadoShaghnaM garbharakShaikakAraNam |

paThyate pratyahaM yatra stotraM gaNapateridam || 182 ||

deshe tatra na durbhikShamItayo duritAni cha |

na tadgehaM jahAti shrIryatrAyaM japyate stavaH || 183 ||

kShayakuShThapramehArshabhagandaraviShUchikAH |

gulmaM plIhAnamashamAnamatisAraM mahodaram || 184 ||

kAsaM shvAsamudAvartaM shUlaM shophAmayodaram |

shirorogaM vamiM hikkAM gaNDamAlAmarochakam || 185 ||

vAtapittakaphadvandvatridoShajanitajvaram |

AgantuviShamaM shItamuShNaM chaikAhikAdikam || 186 ||

ityAdyuktamanuktaM vA rogadoShAdisambhavam |

sarvaM prashamayatyAshu stotrasyAsya sakRRijjapaH || 187 ||

prApyate.asya japAtsiddhiH strIshUdraiH patitairapi |

sahasranAmamantro.ayaM japitavyaH shubhAptaye || 188 ||

mahAgaNapateH stotraM sakAmaH prajapannidam |

ichChayA sakalAn bhogAnupabhujyeha pArthivAn || 189 ||

manorathaphalairdivyairvyomayAnairmanoramaiH |

chandrendrabhAskaropendrabrahmasharvAdisadmasu || 190 ||

kAmarUpaH kAmagatiH kAmadaH kAmadeshvaraH |

bhuktvA yathepsitAnbhogAnabhIShTaiH saha bandhubhiH || 191 ||

gaNeshAnucharo bhUtvA gaNo gaNapatipriyaH |

nandIshvarAdisAnandairnanditaH sakalairgaNaiH || 192 ||

shivAbhyAM kRRipayA putranirvisheShaM cha lAlitaH |

shivabhaktaH pUrNakAmo gaNeshvaravarAtpunaH || 193 ||

jAtismaro dharmaparaH sArvabhaumo.abhijAyate |

niShkAmastu japannityaM bhaktyA vighneshatatparaH || 194 ||

yogasiddhiM parAM prApya j~nAnavairAgyasaMyutaH |

nirantare nirAbAdhe paramAnandasanjnite || 195 ||

vishvottIrNe pare pUrNe punarAvRRittivarjite |

lIno vainAyake dhAmni ramate nityanirvRRite || 196 ||

yo nAmabhirhutairdattaiH pUjayedarchaye​ennaraH |

rAjAno vashyatAM yAnti ripavo yAnti dAsatAm || 197 ||

tasya sidhyanti mantrANAM durlabhAshcheShTasiddhayaH |

mUlamantrAdapi stotramidaM priyatamaM mama || 198 ||

nabhasye mAsi shuklAyAM chaturthyAM mama janmani |

dUrvAbhirnAmabhiH pUjAM tarpaNaM vidhivachcharet || 199 ||

aShTadravyairvisheSheNa kuryAdbhaktisusaMyutaH |

tasyepsitaM dhanaM dhAnyamaishvaryaM vijayo yashaH || 200 ||

bhaviShyati na sandehaH putrapautrAdikaM sukham |

idaM prajapitaM stotraM paThitaM shrAvitaM shrutam || 201 ||

vyAkRRitaM charchitaM dhyAtaM vimRRiShTamabhivanditam |

ihAmutra cha vishveShAM vishvaishvaryapradAyakam || 202 ||

svachChandachAriNApyeSha yena sandhAryate stavaH |

sa rakShyate shivodbhUtairgaNairadhyaShTakoTibhiH || 203 ||

likhitaM pustakastotraM mantrabhUtaM prapUjayet |

tatra sarvottamA lakShmIH sannidhatte nirantaram || 204 ||

dAnairasheShairakhilairvrataishcha tIrthairasheShairakhilairmakhaishcha |

na tatphalaM vindati yadgaNeshasahasranAmasmaraNena sadyaH || 205 ||

etannAmnAM sahasraM paThati dinamaNau pratyahamprojjihAne

sAyaM madhyandine vA triShavaNamathavA santataM vA jano yaH |

sa syAdaishvaryadhuryaH prabhavati vachasAM kIrtimuchchaistanoti

dAridryaM hanti vishvaM vashayati suchiraM vardhate putrapautraiH || 206 ||

aki~nchanopyekachitto niyato niyatAsanaH |

prajapaMshchaturo mAsAn gaNeshArchanatatparaH || 207 ||

daridratAM samunmUlya saptajanmAnugAmapi |

labhate mahatIM lakShmImityAj~nA pArameshvarI || 208 ||

AyuShyaM vItarogaM kulamativimalaM sampadashchArtinAshaH

kIrtirnityAvadAtA bhavati khalu navA kAntiravyAjabhavyA |

putrAH santaH kalatraM guNavadabhimataM yadyadanyachcha tatta -

nnityaM yaH stotrametat paThati gaNapatestasya haste samastam || 209 ||

gaNa~njayo gaNapatirherambo dharaNIdharaH |

mahAgaNapatirbuddhipriyaH kShipraprasAdanaH || 210 ||

amoghasiddhiramRRitamantrashchintAmaNirnidhiH |

suma~Ngalo bIjamAshApUrako varadaH kalaH || 211 ||

kAshyapo nandano vAchAsiddho DhuNDhirvinAyakaH |

modakairebhiratraikaviMshatyA nAmabhiH pumAn || 212 ||

upAyanaM dadedbhaktyA matprasAdaM chikIrShati |

vatsaraM vighnarAjo.asya tathyamiShTArthasiddhaye || 213 ||

yaH stauti madgatamanA mamArAdhanatatparaH |

stuto nAmnA sahasreNa tenAhaM nAtra saMshayaH || 214 ||

namo namaH suravarapUjitA~Nghraye

namo namo nirupamama~NgalAtmane |

namo namo vipuladayaikasiddhaye

namo namaH karikalabhAnanAya te || 215 ||

ki~NkiNIgaNarachitacharaNaH

prakaTitagurumitachArukaraNaH |

madajalalaharIkalitakapolaH

shamayatu duritaM gaNapatinAmnA || 216 ||

|| iti shrIgaNeshapurANe upAsanAkhaNDe IshvaragaNeshasaMvAde

gaNeshasahasranAmastotraM nAma ShaTchatvAriMshodhyAyaH ||