mahA gaNapati sahasranAma stotram

muniruvAca

kathaM nAmnAM sahasraM taM gaNeza upadiSTavAn |

zivadaM tanmamAcakSva lokAnugrahatatpara || 1 ||

brahmovAca

devaH pUrvaM purArAtiH puratrayajayodyame |

anarcanAdgaNezasya jAto vighnAkulaH kila || 2 ||

manasA sa vinirdhArya dadRze vighnakAraNam |

mahAgaNapatiM bhaktyA samabhyarcya yathAvidhi || 3 ||

vighnaprazamanopAyamapRcchadaparizramam |

santuSTaH pUjayA zambhormahAgaNapatiH svayam || 4 ||

sarvavighnaprazamanaM sarvakAmaphalapradam |

tatastasmai svayaM nAmnAM sahasramidamabravIt || 5 ||

asya zrImahAgaNapatisahasranAmastotramAlAmantrasya |

gaNeza RSiH, mahAgaNapatirdevatA, nAnAvidhAnicchandAMsi |

humiti bIjam, tuGgamiti zaktiH, svAhAzaktiriti kIlakam |

sakalavighnavinAzanadvArA zrImahAgaNapatiprasAdasiddhyarthe jape viniyogaH |

atha karanyAsaH

gaNezvaro gaNakrIDa ityaGguSThAbhyAM namaH |

kumAragururIzAna iti tarjanIbhyAM namaH ||

brahmANDakumbhazcidvyometi madhyamAbhyAM namaH |

rakto raktAmbaradhara ityanAmikAbhyAM namaH

sarvasadgurusaMsevya iti kaniSThikAbhyAM namaH |

luptavighnaH svabhaktAnAmiti karatalakarapRSThAbhyAM namaH ||

atha aGganyAsaH

chandazchandodbhava iti hRdayAya namaH |

niSkalo nirmala iti zirase svAhA |

sRSTisthitilayakrIDa iti zikhAyai vaSaT |

jJAnaM vijJAnamAnanda iti kavacAya hum |

aSTAGgayogaphalabhRditi netratrayAya vauSaT |

anantazaktisahita ityastrAya phaT |

bhUrbhuvaH svaroM iti digbandhaH |

atha dhyAnam

gajavadanamacintyaM tIkSNadaMSTraM trinetraM

bRhadudaramazeSaM bhUtirAjaM purANam |

amaravarasupUjyaM raktavarNaM surezaM

pazupatisutamIzaM vighnarAjaM namAmi ||

zrIgaNapatiruvAca

OM gaNezvaro gaNakrIDo gaNanAtho gaNAdhipaH |

ekadanto vakratuNDo gajavaktro mahodaraH || 1 ||

lambodaro dhUmravarNo vikaTo vighnanAzanaH |

sumukho durmukho buddho vighnarAjo gajAnanaH || 2 ||

bhImaH pramoda AmodaH surAnando madotkaTaH |

herambaH zambaraH zambhurlambakarNo mahAbalaH || 3 ||

nandano lampaTo bhImo meghanAdo gaNaJjayaH |

vinAyako virUpAkSo vIraH zUravarapradaH || 4 ||

mahAgaNapatirbuddhipriyaH kSipraprasAdanaH |

rudrapriyo gaNAdhyakSa umAputro'ghanAzanaH || 5 ||

kumAragururIzAnaputro mUSakavAhanaH |

siddhipriyaH siddhipatiH siddhaH siddhivinAyakaH || 6 ||

avighnastumburuH siMhavAhano mohinIpriyaH |

kaTaGkaTo rAjaputraH zAkalaH sammitomitaH || 7 ||

kUSmANDasAmasambhUtirdurjayo dhUrjayo jayaH |

bhUpatirbhuvanapatirbhUtAnAM patiravyayaH || 8 ||

vizvakartA vizvamukho vizvarUpo nidhirguNaH |

kaviH kavInAmRSabho brahmaNyo brahmavitpriyaH || 9 ||

jyeSTharAjo nidhipatirnidhipriyapatipriyaH |

hiraNmayapurAntaHsthaH sUryamaNDalamadhyagaH || 10 ||

karAhatidhvastasindhusalilaH pUSadantabhit |

umAGkakelikutukI muktidaH kulapAvanaH || 11 ||

kirITI kuNDalI hArI vanamAlI manomayaH |

vaimukhyahatadaityazrIH pAdAhatijitakSitiH || 12 ||

sadyojAtaH svarNamuJjamekhalI durnimittahRt |

duHsvapnahRtprasahano guNI nAdapratiSThitaH || 13 ||

surUpaH sarvanetrAdhivAso vIrAsanAzrayaH |

pItAmbaraH khaNDaradaH khaNDavaizAkhasaMsthitaH || 14 ||

citrAGgaH zyAmadazano bhAlacandro havirbhujaH |

yogAdhipastArakasthaH puruSo gajakarNakaH || 15 ||

gaNAdhirAjo vijayaH sthiro gajapatidhvajI |

devadevaH smaraH prANadIpako vAyukIlakaH || 16 ||

vipazcidvarado nAdo nAdabhinnamahAcalaH |

varAharadano mRtyuJjayo vyAghrAjinAmbaraH || 17 ||

icchAzaktibhavo devatrAtA daityavimardanaH |

zambhuvaktrodbhavaH zambhukopahA zambhuhAsyabhUH || 18 ||

zambhutejAH zivAzokahArI gaurIsukhAvahaH |

umAGgamalajo gaurItejobhUH svardhunIbhavaH || 19 ||

yajJakAyo mahAnAdo girivarSmA zubhAnanaH |

sarvAtmA sarvadevAtmA brahmamUrdhA kakupzrutiH || 20 ||

brahmANDakumbhazcidvyomabhAlaHsatyaziroruhaH |

jagajjanmalayonmeSanimeSo'gnyarkasomadRk || 21 ||

girIndraikarado dharmAdharmoSThaH sAmabRMhitaH |

graharkSadazano vANIjihvo vAsavanAsikaH || 22 ||

bhrUmadhyasaMsthitakaro brahmavidyAmadodakaH |

kulAcalAMsaH somArkaghaNTo rudrazirodharaH || 23 ||

nadInadabhujaH sarpAGgulIkastArakAnakhaH |

vyomanAbhiH zrIhRdayo merupRSTho'rNavodaraH || 24 ||

kukSisthayakSagandharvarakSaHkinnaramAnuSaH |

pRthvIkaTiH sRSTiliGgaH zailorurdasrajAnukaH || 25 ||

pAtAlajaGgho munipAtkAlAGguSThastrayItanuH |

jyotirmaNDalalAGgUlo hRdayAlAnanizcalaH || 26 ||

hRtpadmakarNikAzAlI viyatkelisarovaraH |

sadbhaktadhyAnanigaDaH pUjAvArinivAritaH || 27 ||

pratApI kAzyapo mantA gaNako viSTapI balI |

yazasvI dhArmiko jetA prathamaH pramathezvaraH || 28 ||

cintAmaNirdvIpapatiH kalpadrumavanAlayaH |

ratnamaNDapamadhyastho ratnasiMhAsanAzrayaH || 29 ||

tIvrAziroddhRtapado jvAlinImaulilAlitaH |

nandAnanditapIThazrIrbhogado bhUSitAsanaH || 30 ||

sakAmadAyinIpIThaH sphuradugrAsanAzrayaH |

tejovatIziroratnaM satyAnityAvataMsitaH || 31 ||

savighnanAzinIpIThaH sarvazaktyambujAlayaH |

lipipadmAsanAdhAro vahnidhAmatrayAlayaH || 32 ||

unnataprapado gUDhagulphaH saMvRtapArSNikaH |

pInajaGghaH zliSTajAnuH sthUloruH pronnamatkaTiH || 33 ||

nimnanAbhiH sthUlakukSiH pInavakSA bRhadbhujaH |

pInaskandhaH kambukaNTho lamboSTho lambanAsikaH || 34 ||

bhagnavAmaradastuGgasavyadanto mahAhanuH |

hrasvanetratrayaH zUrpakarNo nibiDamastakaH || 35 ||

stabakAkArakumbhAgro ratnamaulirniraGkuzaH |

sarpahArakaTIsUtraH sarpayajJopavItavAn || 36 ||

sarpakoTIrakaTakaH sarpagraiveyakAGgadaH |

sarpakakSodarAbandhaH sarparAjottaracchadaH || 37 ||

rakto raktAmbaradharo raktamAlAvibhUSaNaH |

raktekSano raktakaro raktatAlvoSThapallavaH || 38 ||

zvetaH zvetAmbaradharaH zvetamAlAvibhUSaNaH |

zvetAtapatraruciraH zvetacAmaravIjitaH || 39 ||

sarvAvayavasampUrNaH sarvalakSaNalakSitaH |

sarvAbharaNazobhADhyaH sarvazobhAsamanvitaH || 40 ||

sarvamaGgalamAGgalyaH sarvakAraNakAraNam |

sarvadevavaraH zArGgI bIjapUrI gadAdharaH || 41 ||

zubhAGgo lokasAraGgaH sutantustantuvardhanaH |

kirITI kuNDalI hArI vanamAlI zubhAGgadaH || 42 ||

ikSucApadharaH zUlI cakrapANiH sarojabhRt |

pAzI dhRtotpalaH zAlimaJjarIbhRtsvadantabhRt || 43 ||

kalpavallIdharo vizvAbhayadaikakaro vazI |

akSamAlAdharo jJAnamudrAvAn mudgarAyudhaH || 44 ||

pUrNapAtrI kambudharo vidhRtAGkuzamUlakaH |

karasthAmraphalazcUtakalikAbhRtkuThAravAn || 45 ||

puSkarasthasvarNaghaTIpUrNaratnAbhivarSakaH |

bhAratIsundarInAtho vinAyakaratipriyaH || 46 ||

mahAlakSmIpriyatamaH siddhalakSmImanoramaH |

ramAramezapUrvAGgo dakSiNomAmahezvaraH || 47 ||

mahIvarAhavAmAGgo ratikandarpapazcimaH |

AmodamodajananaH sapramodapramodanaH || 48 ||

saMvardhitamahAvRddhirRddhisiddhipravardhanaH |

dantasaumukhyasumukhaH kAntikandalitAzrayaH || 49 ||

madanAvatyAzritAGghriH kRtavaimukhyadurmukhaH |

vighnasampallavaH padmaH sarvonnatamadadravaH || 50 ||

vighnakRnnimnacaraNo drAviNIzaktisatkRtaH |

tIvrAprasannanayano jvAlinIpAlitaikadRk || 51 ||

mohinImohano bhogadAyinIkAntimaNDanaH |

kAminIkAntavaktrazrIradhiSThitavasundharaH || 52 ||

vasudhArAmadonnAdo mahAzaGkhanidhipriyaH |

namadvasumatImAlI mahApadmanidhiH prabhuH || 53 ||

sarvasadgurusaMsevyaH zociSkezahRdAzrayaH |

IzAnamUrdhA devendrazikhaH pavananandanaH || 54 ||

pratyugranayano divyo divyAstrazataparvadhRk |

airAvatAdisarvAzAvAraNo vAraNapriyaH || 55 ||

vajrAdyastraparIvAro gaNacaNDasamAzrayaH |

jayAjayaparikaro vijayAvijayAvahaH || 56 ||

ajayArcitapAdAbjo nityAnandavanasthitaH |

vilAsinIkRtollAsaH zauNDI saundaryamaNDitaH || 57 ||

anantAnantasukhadaH sumaGgalasumaGgalaH |

jJAnAzrayaH kriyAdhAra icchAzaktiniSevitaH || 58 ||

subhagAsaMzritapado lalitAlalitAzrayaH |

kAminIpAlanaH kAmakAminIkelilAlitaH || 59 ||

sarasvatyAzrayo gaurInandanaH zrIniketanaH |

guruguptapado vAcAsiddho vAgIzvarIpatiH || 60 ||

nalinIkAmuko vAmArAmo jyeSThAmanoramaH |

raudrImudritapAdAbjo humbIjastuGgazaktikaH || 61 ||

vizvAdijananatrANaH svAhAzaktiH sakIlakaH |

amRtAbdhikRtAvAso madaghUrNitalocanaH || 62 ||

ucchiSTocchiSTagaNako gaNezo gaNanAyakaH |

sArvakAlikasaMsiddhirnityasevyo digambaraH || 63 ||

anapAyo'nantadRSTiraprameyo'jarAmaraH |

anAvilo'pratihatiracyuto'mRtamakSaraH || 64 ||

apratarkyo'kSayo'jayyo'nAdhAro'nAmayomalaH |

ameyasiddhiradvaitamaghoro'gnisamAnanaH || 65 ||

anAkAro'bdhibhUmyagnibalaghno'vyaktalakSaNaH |

AdhArapIThamAdhAra AdhArAdheyavarjitaH || 66 ||

Akhuketana AzApUraka AkhumahArathaH |

ikSusAgaramadhyastha ikSubhakSaNalAlasaH || 67 ||

ikSucApAtirekazrIrikSucApaniSevitaH |

indragopasamAnazrIrindranIlasamadyutiH || 68 ||

indIvaradalazyAma indumaNDalamaNDitaH |

idhmapriya iDAbhAga iDAvAnindirApriyaH || 69 ||

ikSvAkuvighnavidhvaMsI itikartavyatepsitaH |

IzAnamaulirIzAna IzAnapriya ItihA || 70 ||

ISaNAtrayakalpAnta IhAmAtravivarjitaH |

upendra uDubhRnmauliruDunAthakarapriyaH || 71 ||

unnatAnana uttuGga udArastridazAgraNIH |

UrjasvAnUSmalamada UhApohadurAsadaH || 72 ||

RgyajuHsAmanayana RddhisiddhisamarpakaH |

Rjucittaikasulabho RNatrayavimocanaH || 73 ||

luptavighnaH svabhaktAnAM luptazaktiH suradviSAm |

luptazrIrvimukhArcAnAM lUtAvisphoTanAzanaH || 74 ||

ekArapIThamadhyastha ekapAdakRtAsanaH |

ejitAkhiladaityazrIredhitAkhilasaMzrayaH || 75 ||

aizvaryanidhiraizvaryamaihikAmuSmikapradaH |

airammadasamonmeSa airAvatasamAnanaH || 76 ||

oGkAravAcya oGkAra ojasvAnoSadhIpatiH |

audAryanidhirauddhatyadhairya aunnatyaniHsamaH || 77 ||

aGkuzaH suranAgAnAmaGkuzAkArasaMsthitaH |

aH samastavisargAntapadeSu parikIrtitaH || 78 ||

kamaNDaludharaH kalpaH kapardI kalabhAnanaH |

karmasAkSI karmakartA karmAkarmaphalapradaH || 79 ||

kadambagolakAkAraH kUSmANDagaNanAyakaH |

kAruNyadehaH kapilaH kathakaH kaTisUtrabhRt || 80 ||

kharvaH khaDgapriyaH khaDgaH khAntAntaHsthaH khanirmalaH |

khalvATazRGganilayaH khaTvAGgI khadurAsadaH || 81 ||

guNADhyo gahano gadyo gadyapadyasudhArNavaH |

gadyagAnapriyo garjo gItagIrvANapUrvajaH || 82 ||

guhyAcArarato guhyo guhyAgamanirUpitaH |

guhAzayo guDAbdhistho gurugamyo gururguruH || 83 ||

ghaNTAghargharikAmAlI ghaTakumbho ghaTodaraH |

GakAravAcyo GAkAro GakArAkArazuNDabhRt || 84 ||

caNDazcaNDezvarazcaNDI caNDezazcaNDavikramaH |

carAcarapitA cintAmaNizcarvaNalAlasaH || 85 ||

chandazchandodbhavazchando durlakSyazchandavigrahaH |

jagadyonirjagatsAkSI jagadIzo jaganmayaH || 86 ||

japyo japaparo jApyo jihvAsiMhAsanaprabhuH |

sravadgaNDollasaddhAnajhaGkAribhramarAkulaH || 87 ||

TaGkArasphArasaMrAvaSTaGkAramaNinUpuraH |

ThadvayIpallavAntasthasarvamantreSu siddhidaH || 88 ||

DiNDimuNDo DAkinIzo DAmaro DiNDimapriyaH |

DhakkAninAdamudito DhauGko DhuNDhivinAyakaH || 89 ||

tattvAnAM prakRtistattvaM tattvampadanirUpitaH |

tArakAntarasaMsthAnastArakastArakAntakaH || 90 ||

sthANuH sthANupriyaH sthAtA sthAvaraM jaGgamaM jagat |

dakSayajJapramathano dAtA dAnaM damo dayA || 91 ||

dayAvAndivyavibhavo daNDabhRddaNDanAyakaH |

dantaprabhinnAbhramAlo daityavAraNadAraNaH || 92 ||

daMSTrAlagnadvIpaghaTo devArthanRgajAkRtiH |

dhanaM dhanapaterbandhurdhanado dharaNIdharaH || 93 ||

dhyAnaikaprakaTo dhyeyo dhyAnaM dhyAnaparAyaNaH |

dhvaniprakRticItkAro brahmANDAvalimekhalaH || 94 ||

nandyo nandipriyo nAdo nAdamadhyapratiSThitaH |

niSkalo nirmalo nityo nityAnityo nirAmayaH || 95 ||

paraM vyoma paraM dhAma paramAtmA paraM padam || 96 ||

parAtparaH pazupatiH pazupAzavimocanaH |

pUrNAnandaH parAnandaH purANapuruSottamaH || 97 ||

padmaprasannavadanaH praNatAjJAnanAzanaH |

pramANapratyayAtItaH praNatArtinivAraNaH || 98 ||

phaNihastaH phaNipatiH phUtkAraH phaNitapriyaH |

bANArcitAGghriyugalo bAlakelikutUhalI |

brahma brahmArcitapado brahmacArI bRhaspatiH || 99 ||

bRhattamo brahmaparo brahmaNyo brahmavitpriyaH |

bRhannAdAgryacItkAro brahmANDAvalimekhalaH || 100 ||

bhrUkSepadattalakSmIko bhargo bhadro bhayApahaH |

bhagavAn bhaktisulabho bhUtido bhUtibhUSaNaH || 101 ||

bhavyo bhUtAlayo bhogadAtA bhrUmadhyagocaraH |

mantro mantrapatirmantrI madamatto mano mayaH || 102 ||

mekhalAhIzvaro mandagatirmandanibhekSaNaH |

mahAbalo mahAvIryo mahAprANo mahAmanAH || 103 ||

yajJo yajJapatiryajJagoptA yajJaphalapradaH |

yazaskaro yogagamyo yAjJiko yAjakapriyaH || 104 ||

raso rasapriyo rasyo raJjako rAvaNArcitaH |

rAjyarakSAkaro ratnagarbho rAjyasukhapradaH || 105 ||

lakSo lakSapatirlakSyo layastho laDDukapriyaH |

lAsapriyo lAsyaparo lAbhakRllokavizrutaH || 106 ||

vareNyo vahnivadano vandyo vedAntagocaraH |

vikartA vizvatazcakSurvidhAtA vizvatomukhaH || 107 ||

vAmadevo vizvanetA vajrivajranivAraNaH |

vivasvadbandhano vizvAdhAro vizvezvaro vibhuH || 108 ||

zabdabrahma zamaprApyaH zambhuzaktigaNezvaraH |

zAstA zikhAgranilayaH zaraNyaH zambarezvaraH || 109 ||

SaDRtukusumasragvI SaDAdhAraH SaDakSaraH |

saMsAravaidyaH sarvajJaH sarvabheSajabheSajam || 110 ||

sRSTisthitilayakrIDaH surakuJjarabhedakaH |

sindUritamahAkumbhaH sadasadbhaktidAyakaH || 111 ||

sAkSI samudramathanaH svayaMvedyaH svadakSiNaH |

svatantraH satyasaGkalpaH sAmagAnarataH sukhI || 112 ||

haMso hastipizAcIzo havanaM havyakavyabhuk |

havyaM hutapriyo hRSTo hRllekhAmantramadhyagaH || 113 ||

kSetrAdhipaH kSamAbhartA kSamAkSamaparAyaNaH |

kSiprakSemakaraH kSemAnandaH kSoNIsuradrumaH || 114 ||

dharmaprado'rthadaH kAmadAtA saubhAgyavardhanaH |

vidyAprado vibhavado bhuktimuktiphalapradaH || 115 ||

AbhirUpyakaro vIrazrIprado vijayapradaH |

sarvavazyakaro garbhadoSahA putrapautradaH || 116 ||

medhAdaH kIrtidaH zokahArI daurbhAgyanAzanaH |

prativAdimukhastambho ruSTacittaprasAdanaH || 117 ||

parAbhicArazamano duHkhahA bandhamokSadaH |

lavastruTiH kalA kASThA nimeSastatparakSaNaH || 118 ||

ghaTI muhUrtaH praharo divA naktamaharnizam |

pakSo mAsartvayanAbdayugaM kalpo mahAlayaH || 119 ||

rAzistArA tithiryogo vAraH karaNamaMzakam |

lagnaM horA kAlacakraM meruH saptarSayo dhruvaH || 120 ||

rAhurmandaH kavirjIvo budho bhaumaH zazI raviH |

kAlaH sRSTiH sthitirvizvaM sthAvaraM jaGgamaM jagat || 121 ||

bhUrApo'gnirmarudvyomAhaGkRtiH prakRtiH pumAn |

brahmA viSNuH zivo rudra IzaH zaktiH sadAzivaH || 122 ||

tridazAH pitaraH siddhA yakSA rakSAMsi kinnarAH |

siddhavidyAdharA bhUtA manuSyAH pazavaH khagAH || 123 ||

samudrAH saritaH zailA bhUtaM bhavyaM bhavodbhavaH |

sAGkhyaM pAtaJjalaM yogaM purANAni zrutiH smRtiH || 124 ||

vedAGgAni sadAcAro mImAMsA nyAyavistaraH |

Ayurvedo dhanurvedo gAndharvaM kAvyanATakam || 125 ||

vaikhAnasaM bhAgavataM mAnuSaM pAJcarAtrakam |

zaivaM pAzupataM kAlAmukhambhairavazAsanam || 126 ||

zAktaM vainAyakaM sauraM jainamArhatasaMhitA |

sadasadvyaktamavyaktaM sacetanamacetanam || 127 ||

bandho mokSaH sukhaM bhogo yogaH satyamaNurmahAn |

svasti humphaT svadhA svAhA zrauSaT vauSaT vaSaN namaH 128 ||

jJAnaM vijJAnamAnando bodhaH saMvitsamo'samaH |

eka ekAkSarAdhAra ekAkSaraparAyaNaH || 129 ||

ekAgradhIrekavIra eko'nekasvarUpadhRk |

dvirUpo dvibhujo dvyakSo dvirado dvIparakSakaH || 130 ||

dvaimAturo dvivadano dvandvahIno dvayAtigaH |

tridhAmA trikarastretA trivargaphaladAyakaH || 131 ||

triguNAtmA trilokAdistrizaktIzastrilocanaH |

caturvidhavacovRttiparivRttipravartakaH || 132 ||

caturbAhuzcaturdantazcaturAtmA caturbhujaH |

caturvidhopAyamayazcaturvarNAzramAzrayaH 133 ||

caturthIpUjanaprItazcaturthItithisambhavaH ||

paJcAkSarAtmA paJcAtmA paJcAsyaH paJcakRttamaH || 134 ||

paJcAdhAraH paJcavarNaH paJcAkSaraparAyaNaH |

paJcatAlaH paJcakaraH paJcapraNavamAtRkaH || 135 ||

paJcabrahmamayasphUrtiH paJcAvaraNavAritaH |

paJcabhakSapriyaH paJcabANaH paJcazikhAtmakaH || 136 ||

SaTkoNapIThaH SaTcakradhAmA SaDgranthibhedakaH |

SaDaGgadhvAntavidhvaMsI SaDaGgulamahAhradaH || 137 ||

SaNmukhaH SaNmukhabhrAtA SaTzaktiparivAritaH |

SaDvairivargavidhvaMsI SaDUrmibhayabhaJjanaH || 138 ||

SaTtarkadUraH SaTkarmA SaDguNaH SaDrasAzrayaH |

saptapAtAlacaraNaH saptadvIporumaNDalaH || 139 ||

saptasvarlokamukuTaH saptasaptivarapradaH |

saptAGgarAjyasukhadaH saptarSigaNavanditaH || 140 ||

saptacchandonidhiH saptahotraH saptasvarAzrayaH |

saptAbdhikelikAsAraH saptamAtRniSevitaH || 141 ||

saptacchando modamadaH saptacchando makhaprabhuH |

aSTamUrtirdhyeyamUrtiraSTaprakRtikAraNam || 142 ||

aSTAGgayogaphalabhRdaSTapatrAmbujAsanaH |

aSTazaktisamAnazrIraSTaizvaryapravardhanaH || 143 ||

aSTapIThopapIThazrIraSTamAtRsamAvRtaH |

aSTabhairavasevyo'STavasuvandyo'STamUrtibhRt || 144 ||

aSTacakrasphuranmUrtiraSTadravyahaviHpriyaH |

aSTazrIraSTasAmazrIraSTaizvaryapradAyakaH |

navanAgAsanAdhyAsI navanidhyanuzAsitaH || 145 ||

navadvArapurAvRtto navadvAraniketanaH |

navanAthamahAnAtho navanAgavibhUSitaH || 146 ||

navanArAyaNastulyo navadurgAniSevitaH |

navaratnavicitrAGgo navazaktiziroddhRtaH || 147 ||

dazAtmako dazabhujo dazadikpativanditaH |

dazAdhyAyo dazaprANo dazendriyaniyAmakaH || 148 ||

dazAkSaramahAmantro dazAzAvyApivigrahaH |

ekAdazamahArudraiHstutazcaikAdazAkSaraH || 149 ||

dvAdazadvidazASTAdidordaNDAstraniketanaH |

trayodazabhidAbhinno vizvedevAdhidaivatam || 150 ||

caturdazendravaradazcaturdazamanuprabhuH |

caturdazAdyavidyADhyazcaturdazajagatpatiH || 151 ||

sAmapaJcadazaH paJcadazIzItAMzunirmalaH |

tithipaJcadazAkArastithyA paJcadazArcitaH || 152 ||

SoDazAdhAranilayaH SoDazasvaramAtRkaH |

SoDazAntapadAvAsaH SoDazendukalAtmakaH || 153 ||

kalAsaptadazI saptadazasaptadazAkSaraH |

aSTAdazadvIpapatiraSTAdazapurANakRt || 154 ||

aSTAdazauSadhIsRSTiraSTAdazavidhiH smRtaH |

aSTAdazalipivyaSTisamaSTijJAnakovidaH || 155 ||

aSTAdazAnnasampattiraSTAdazavijAtikRt |

ekaviMzaH pumAnekaviMzatyaGgulipallavaH || 156 ||

caturviMzatitattvAtmA paJcaviMzAkhyapUruSaH |

saptaviMzatitArezaH saptaviMzatiyogakRt || 157 ||

dvAtriMzadbhairavAdhIzazcatustriMzanmahAhradaH |

SaTtriMzattattvasambhUtiraSTatriMzatkalAtmakaH || 158 ||

paJcAzadviSNuzaktIzaH paJcAzanmAtRkAlayaH |

dvipaJcAzadvapuHzreNItriSaSTyakSarasaMzrayaH |

paJcAzadakSarazreNIpaJcAzadrudravigrahaH || 159 ||

catuHSaSTimahAsiddhiyoginIvRndavanditaH |

namadekonapaJcAzanmarudvarganirargalaH || 160 ||

catuHSaSTyarthanirNetA catuHSaSTikalAnidhiH |

aSTaSaSTimahAtIrthakSetrabhairavavanditaH || 161 ||

caturnavatimantrAtmA SaNNavatyadhikaprabhuH |

zatAnandaH zatadhRtiH zatapatrAyatekSaNaH || 162 ||

zatAnIkaH zatamakhaH zatadhArAvarAyudhaH |

sahasrapatranilayaH sahasraphaNibhUSaNaH || 163 ||

sahasrazIrSA puruSaH sahasrAkSaH sahasrapAt |

sahasranAmasaMstutyaH sahasrAkSabalApahaH || 164 ||

dazasAhasraphaNibhRtphaNirAjakRtAsanaH |

aSTAzItisahasrAdyamaharSistotrapAThitaH || 165 ||

lakSAdhAraH priyAdhAro lakSAdhAramanomayaH |

caturlakSajapaprItazcaturlakSaprakAzakaH || 166 ||

caturazItilakSANAM jIvAnAM dehasaMsthitaH |

koTisUryapratIkAzaH koTicandrAMzunirmalaH || 167 ||

zivodbhavAdyaSTakoTivainAyakadhurandharaH |

saptakoTimahAmantramantritAvayavadyutiH || 168 ||

trayastriMzatkoTisurazreNIpraNatapAdukaH |

anantadevatAsevyo hyanantazubhadAyakaH || 169 ||

anantanAmAnantazrIrananto'nantasaukhyadaH |

anantazaktisahito hyanantamunisaMstutaH || 170 ||

iti vainAyakaM nAmnAM sahasramidamIritam |

idaM brAhme muhUrte yaH paThati pratyahaM naraH || 171 ||

karasthaM tasya sakalamaihikAmuSmikaM sukham |

AyurArogyamaizvaryaM dhairyaM zauryaM balaM yazaH || 172 ||

medhA prajJA dhRtiH kAntiH saubhAgyamabhirUpatA |

satyaM dayA kSamA zAntirdAkSiNyaM dharmazIlatA || 173 ||

jagatsaMvananaM vizvasaMvAdo vedapATavam |

sabhApANDityamaudAryaM gAmbhIryaM brahmavarcasam || 174 ||

ojastejaH kulaM zIlaM pratApo vIryamAryatA |

jJAnaM vijJAnamAstikyaM sthairyaM vizvAsatA tathA || 175 ||

dhanadhAnyAdivRddhizca sakRdasya japAdbhavet |

vazyaM caturvidhaM vizvaM japAdasya prajAyate || 176 ||

rAjJo rAjakalatrasya rAjaputrasya mantriNaH |

japyate yasya vazyArthe sa dAsastasya jAyate || 177 ||

dharmArthakAmamokSANAmanAyAsena sAdhanam |

zAkinIDAkinIrakSoyakSagrahabhayApaham || 178 ||

sAmrAjyasukhadaM sarvasapatnamadamardanam |

samastakalahadhvaMsi dagdhabIjaprarohaNam || 179 ||

duHsvapnazamanaM kruddhasvAmicittaprasAdanam |

SaDvargASTamahAsiddhitrikAlajJAnakAraNam || 180 ||

parakRtyaprazamanaM paracakrapramardanam |

saGgrAmamArge saveSAmidamekaM jayAvaham || 181 ||

sarvavandhyatvadoSaghnaM garbharakSaikakAraNam |

paThyate pratyahaM yatra stotraM gaNapateridam || 182 ||

deze tatra na durbhikSamItayo duritAni ca |

na tadgehaM jahAti zrIryatrAyaM japyate stavaH || 183 ||

kSayakuSThapramehArzabhagandaraviSUcikAH |

gulmaM plIhAnamazamAnamatisAraM mahodaram || 184 ||

kAsaM zvAsamudAvartaM zUlaM zophAmayodaram |

zirorogaM vamiM hikkAM gaNDamAlAmarocakam || 185 ||

vAtapittakaphadvandvatridoSajanitajvaram |

AgantuviSamaM zItamuSNaM caikAhikAdikam || 186 ||

ityAdyuktamanuktaM vA rogadoSAdisambhavam |

sarvaM prazamayatyAzu stotrasyAsya sakRjjapaH || 187 ||

prApyate'sya japAtsiddhiH strIzUdraiH patitairapi |

sahasranAmamantro'yaM japitavyaH zubhAptaye || 188 ||

mahAgaNapateH stotraM sakAmaH prajapannidam |

icchayA sakalAn bhogAnupabhujyeha pArthivAn || 189 ||

manorathaphalairdivyairvyomayAnairmanoramaiH |

candrendrabhAskaropendrabrahmazarvAdisadmasu || 190 ||

kAmarUpaH kAmagatiH kAmadaH kAmadezvaraH |

bhuktvA yathepsitAnbhogAnabhISTaiH saha bandhubhiH || 191 ||

gaNezAnucaro bhUtvA gaNo gaNapatipriyaH |

nandIzvarAdisAnandairnanditaH sakalairgaNaiH || 192 ||

zivAbhyAM kRpayA putranirvizeSaM ca lAlitaH |

zivabhaktaH pUrNakAmo gaNezvaravarAtpunaH || 193 ||

jAtismaro dharmaparaH sArvabhaumo'bhijAyate |

niSkAmastu japannityaM bhaktyA vighnezatatparaH || 194 ||

yogasiddhiM parAM prApya jJAnavairAgyasaMyutaH |

nirantare nirAbAdhe paramAnandasaJjJite || 195 ||

vizvottIrNe pare pUrNe punarAvRttivarjite |

lIno vainAyake dhAmni ramate nityanirvRte || 196 ||

yo nAmabhirhutairdattaiH pUjayedarcaye​ennaraH |

rAjAno vazyatAM yAnti ripavo yAnti dAsatAm || 197 ||

tasya sidhyanti mantrANAM durlabhAzceSTasiddhayaH |

mUlamantrAdapi stotramidaM priyatamaM mama || 198 ||

nabhasye mAsi zuklAyAM caturthyAM mama janmani |

dUrvAbhirnAmabhiH pUjAM tarpaNaM vidhivaccaret || 199 ||

aSTadravyairvizeSeNa kuryAdbhaktisusaMyutaH |

tasyepsitaM dhanaM dhAnyamaizvaryaM vijayo yazaH || 200 ||

bhaviSyati na sandehaH putrapautrAdikaM sukham |

idaM prajapitaM stotraM paThitaM zrAvitaM zrutam || 201 ||

vyAkRtaM carcitaM dhyAtaM vimRSTamabhivanditam |

ihAmutra ca vizveSAM vizvaizvaryapradAyakam || 202 ||

svacchandacAriNApyeSa yena sandhAryate stavaH |

sa rakSyate zivodbhUtairgaNairadhyaSTakoTibhiH || 203 ||

likhitaM pustakastotraM mantrabhUtaM prapUjayet |

tatra sarvottamA lakSmIH sannidhatte nirantaram || 204 ||

dAnairazeSairakhilairvrataizca tIrthairazeSairakhilairmakhaizca |

na tatphalaM vindati yadgaNezasahasranAmasmaraNena sadyaH || 205 ||

etannAmnAM sahasraM paThati dinamaNau pratyahamprojjihAne

sAyaM madhyandine vA triSavaNamathavA santataM vA jano yaH |

sa syAdaizvaryadhuryaH prabhavati vacasAM kIrtimuccaistanoti

dAridryaM hanti vizvaM vazayati suciraM vardhate putrapautraiH || 206 ||

akiJcanopyekacitto niyato niyatAsanaH |

prajapaMzcaturo mAsAn gaNezArcanatatparaH || 207 ||

daridratAM samunmUlya saptajanmAnugAmapi |

labhate mahatIM lakSmImityAjJA pAramezvarI || 208 ||

AyuSyaM vItarogaM kulamativimalaM sampadazcArtinAzaH

kIrtirnityAvadAtA bhavati khalu navA kAntiravyAjabhavyA |

putrAH santaH kalatraM guNavadabhimataM yadyadanyacca tatta -

nnityaM yaH stotrametat paThati gaNapatestasya haste samastam || 209 ||

gaNaJjayo gaNapatirherambo dharaNIdharaH |

mahAgaNapatirbuddhipriyaH kSipraprasAdanaH || 210 ||

amoghasiddhiramRtamantrazcintAmaNirnidhiH |

sumaGgalo bIjamAzApUrako varadaH kalaH || 211 ||

kAzyapo nandano vAcAsiddho DhuNDhirvinAyakaH |

modakairebhiratraikaviMzatyA nAmabhiH pumAn || 212 ||

upAyanaM dadedbhaktyA matprasAdaM cikIrSati |

vatsaraM vighnarAjo'sya tathyamiSTArthasiddhaye || 213 ||

yaH stauti madgatamanA mamArAdhanatatparaH |

stuto nAmnA sahasreNa tenAhaM nAtra saMzayaH || 214 ||

namo namaH suravarapUjitAGghraye

namo namo nirupamamaGgalAtmane |

namo namo vipuladayaikasiddhaye

namo namaH karikalabhAnanAya te || 215 ||

kiGkiNIgaNaracitacaraNaH

prakaTitagurumitacArukaraNaH |

madajalalaharIkalitakapolaH

zamayatu duritaM gaNapatinAmnA || 216 ||

|| iti zrIgaNezapurANe upAsanAkhaNDe IzvaragaNezasaMvAde

gaNezasahasranAmastotraM nAma SaTcatvAriMzodhyAyaH ||