Sri Lakshmi Narayana Hrudaya Stotram

zrI lakSmI nArAyaNa hRdaya stotram

atha nArAyana hRdaya stotram

asya zrInArAyaNahRdayastotramantrasya bhArgava RSiH, anuSTupchandaH, zrIlakSmInArAyaNo devatA, OM bIjaM, namazzaktiH, nArAyaNAyeti kIlakaM, zrIlakSmInArAyaNa prItyarthe jape viniyogaH |

karanyAsaH |

OM nArAyaNaH paraM jyotiriti aGguSThAbhyAM namaH |

nArAyaNaH paraM brahmeti tarjanIbhyAM namaH |

nArAyaNaH paro deva iti madhyamAbhyAM namaH |

nArAyaNaH paraM dhAmeti anAmikAbhyAM namaH |

nArAyaNaH paro dharma iti kaniSThikAbhyAM namaH |

vizvaM nArAyaNa iti karatalakarapRSThAbhyAM namaH |

aGganyAsaH |

nArAyaNaH paraM jyotiriti hRdayAya namaH |

nArAyaNaH paraM brahmeti zirase svAhA |

nArAyaNaH paro deva iti zikhAyai vauSaT |

nArAyaNaH paraM dhAmeti kavacAya hum |

nArAyaNaH paro dharma iti netrAbhyAM vauSaT |

vizvaM nArAyaNa iti astrAya phaT |

digbandhaH |

OM aindryAdidazadizaM OM namaH sudarzanAya sahasrArAya huM phaT badhnAmi namazcakrAya svAhA | iti pratidizaM yojyam |

atha dhyAnam |

udyAdAdityasaGkAzaM pItavAsaM caturbhujam |

zaGkhacakragadApANiM dhyAyellakSmIpatiM harim || 1 ||

trailokyAdhAracakraM tadupari kamaThaM tatra cAnantabhogI

tanmadhye bhUmipadmAGkuzazikharadalaM karNikAbhUtamerum |

tatrasthaM zAntamUrtiM maNimayamakuTaM kuNDalodbhAsitAGgaM

lakSmInArAyaNAkhyaM sarasijanayanaM santataM cintayAmi || 2 ||

atha mUlASTakam |

om || nArAyaNaH paraM jyotirAtmA nArAyaNaH paraH |

nArAyaNaH paraM brahma nArAyaNa namo'stu te || 1 ||

nArAyaNaH paro devo dhAtA nArAyaNaH paraH |

nArAyaNaH paro dhAtA nArAyaNa namo'stu te || 2 ||

nArAyaNaH paraM dhAma dhyAnaM nArAyaNaH paraH |

nArAyaNa paro dharmo nArAyaNa namo'stu te || 3 ||

nArAyaNaH parovedyaH vidyA nArAyaNaH paraH |

vizvaM nArAyaNaH sAkSAnnArAyaNa namo'stu te || 4 ||

nArAyaNAdvidhirjAto jAto nArAyaNAdbhavaH |

jAto nArAyaNAdindro nArAyaNa namo'stu te || 5 ||

ravirnArAyaNastejaH candro nArAyaNo mahaH |

vahnirnArAyaNaH sAkSAnnArAyaNa namo'stu te || 6 ||

nArAyaNa upAsyaH syAdgururnArAyaNaH paraH |

nArAyaNaH paro bodho nArAyaNa namo'stu te || 7 ||

nArAyaNaH phalaM mukhyaM siddhirnArAyaNaH sukham |

sevyonArAyaNaH zuddho nArAyaNa namo'stu te || 8 || [hari]

atha prArthanAdazakam |

nArAyaNa tvamevAsi daharAkhye hRdi sthitaH |

prerakaH preryamANAnAM tvayA preritamAnasaH || 9 ||

tvadAjJAM zirasA dhRtvA japAmi janapAvanam |

nAnopAsanamArgANAM bhavakRdbhAvabodhakaH || 10 ||

bhAvArthakRdbhavAtIto bhava saukhyaprado mama |

tvanmAyAmohitaM vizvaM tvayaiva parikalpitam || 11 ||

tvadadhiSThAnamAtreNa sA vai sarvArthakAriNI |

tvametAM ca puraskRtya sarvakAmAnpradarzaya || 12 ||

na me tvadanyastrAtAsti tvadanyanna hi daivatam |

tvadanyaM na hi jAnAmi pAlakaM puNyavardhanam || 13 ||

yAvatsAMsAriko bhAvo manasstho bhAvanAtmakaH |

tAvatsiddhirbhavetsAdhyA sarvathA sarvadA vibho || 14 ||

pApinAmahamevAgryo dayAlUnAM tvamagraNIH |

dayanIyo madanyo'sti tava ko'tra jagattraye || 15 ||

tvayAhaM naiva sRSTazcenna syAttava dayAlutA |

Amayo vA na sRSTazcedauSadhasya vRthodayaH || 16 ||

pApasaGghaparizrAntaH pApAtmA pAparUpadhRt |

tvadanyaH ko'tra pApebhyastrAtAsti jagatItale || 17 ||

tvameva mAtA ca pitA tvameva

tvameva bandhuzca sakhA tvameva |

tvameva sevyazca gurustvameva

tvameva sarvaM mama deva deva || 18 ||

prArthanAdazakaM caiva mUlASTakamataH param |

yaH paThecchRNuyAnnityaM tasya lakSmIH sthirA bhavet || 19 ||

nArAyaNasya hRdayaM sarvAbhISTaphalapradam |

lakSmIhRdayakaM stotraM yadi cettadvinAkRtam || 20 ||

tatsarvaM niSphalaM proktaM lakSmIH kruddhyati sarvadA |

etatsaGkalitaM stotraM sarvakAmaphalapradam || 21 ||

lakSmIhRdayakaM caiva tathA nArAyaNAtmakam |

japedyaH saGkalIkRtya sarvAbhISTamavApnuyAt || 22 ||

nArAyaNasya hRdayamAdau japtvA tataH param |

lakSmIhRdayakaM stotraM japennArAyaNaM punaH || 23 ||

punarnArAyaNaM japtvA punarlakSmInutiM japet |

punarnArAyaNaM jApyaM saGkalIkaraNaM bhavet || 24 ||

evaM madhye dvivAreNa japetsaGkalitaM tu tat |

lakSmIhRdayakaM stotraM sarvakAmaprakAzitam || 25 ||

tadvajjapAdikaM kuryAdetatsaGkalitaM zubham |

sarvAnkAmAnavApnoti AdhivyAdhibhayaM haret || 26 ||

gopyametatsadA kuryAnna sarvatra prakAzayet |

iti guhyatamaM zAstraM prAptaM brahmAdikaiH purA || 27 ||

tasmAtsarvaprayatnena gopayetsAdhayesudhIH |

yatraitatpustakaM tiSThellakSmInArAyaNAtmakam || 28 ||

bhUtapaizAcavetAla bhayaM naiva tu sarvadA |

lakSmIhRdayakaM proktaM vidhinA sAdhayetsudhIH || 29 ||

bhRguvAre ca rAtrau ca pUjayetpustakadvayam |

sarvathA sarvadA satyaM gopayetsAdhayetsudhIH |

gopanAtsAdhanAlloke dhanyo bhavati tattvataH || 30 ||

ityatharvarahasye uttarabhAge nArAyaNahRdayaM sampUrNam |

atha lakSmI hRdaya stotram

asya zrI mahAlakSmIhRdayastotra mahAmantrasya bhArgava RSiH, anuSTupAdIni nAnAchandAMsi, AdyAdi zrImahAlakSmIrdevatA, zrIM bIjaM, hrIM zaktiH, aiM kIlakaM, AdyAdimahAlakSmI prasAdasiddhyarthaM jape viniyogaH ||

RSyAdinyAsaH –

OM bhArgavRSaye namaH zirasi |

OM anuSTupAdinAnAchandobhyo namo mukhe |

OM AdyAdizrImahAlakSmI devatAyai namo hRdaye |

OM zrIM bIjAya namo guhye |

OM hrIM zaktaye namaH pAdayoH |

OM aiM kIlakAya namo nAbhau |

OM viniyogAya namaH sarvAGge |

karanyAsaH –

OM zrIM aGguSThAbhyAM namaH |

OM hrIM tarjanIbhyAM namaH |

OM aiM madhyamAbhyAM namaH |

OM zrIM anAmikAbhyAM namaH |

OM hrIM kaniSThikAbhyAM namaH |

OM aiM karatala karapRSThAbhyAM namaH |

aGganyAsaH –

OM zrIM hRdayAya namaH |

OM hrIM zirase svAhA |

OM aiM zikhAyai vaSaT |

OM zrIM kavacAya hum |

OM hrIM netratrayAya vauSaT |

OM aiM astrAya phaT |

OM zrIM hrIM aiM iti digbandhaH |

atha dhyAnam |

hastadvayena kamale dhArayantIM svalIlayA |

hAranUpurasaMyuktAM lakSmIM devIM vicintaye ||

kauzeyapItavasanAmaravindanetrAM

padmadvayAbhayavarodyatapadmahastAm |

udyacchatArkasadRzIM paramAGkasaMsthAM

dhyAyedvidhIzanatapAdayugAM janitrIm ||

pItavastrAM suvarNAGgIM padmahastadvAyAnvitAm |

lakSmIM dhyAtveti mantreNa sa bhavetpRthivIpatiH ||

mAtuluGgaM gadAM kheTaM pANau pAtraM ca bibhratI |

nAgaM liGgaM ca yoniM ca bibhratIM caiva mUrdhani ||

[ iti dhyAtvA mAnasopacAraiH sampUjya |

zaGkhacakragadAhaste zubhravarNe suvAsinI |

mama dehi varaM lakSmIH sarvasiddhipradAyinI |

iti samprArthya OM zrIM hrIM aiM mahAlakSmyai kamaladhAriNyai siMhavAhinyai svAhA iti mantraM japtvA punaH pUrvavaddhRdayAdi SaDaGganyAsaM kRtvA stotraM paThet | ]

stotram |

vande lakSmIM paramazivamayIM zuddhajAmbUnadAbhAM

tejorUpAM kanakavasanAM sarvabhUSojjvalAGgIm |

bIjApUraM kanakakalazaM hemapadmaM dadhAnA-

-mAdyAM zaktiM sakalajananIM viSNuvAmAGkasaMsthAm || 1 ||

zrImatsaubhAgyajananIM staumi lakSmIM sanAtanIm |

sarvakAmaphalAvAptisAdhanaikasukhAvahAm || 2 ||

smarAmi nityaM devezi tvayA preritamAnasaH |

tvadAjJAM zirasA dhRtvA bhajAmi paramezvarIm || 3 ||

samastasampatsukhadAM mahAzriyaM

samastasaubhAgyakarIM mahAzriyam |

samastakalyANakarIM mahAzriyaM

bhajAmyahaM jJAnakarIM mahAzriyam || 4 ||

vijJAnasampatsukhadAM sanAtanIM

vicitravAgbhUtikarIM manoharAm |

anantasammodasukhapradAyinIM

namAmyahaM bhUtikarIM haripriyAm || 5 ||

samastabhUtAntarasaMsthitA tvaM

samastabhoktrIzvari vizvarUpe |

tannAsti yattvadvyatiriktavastu

tvatpAdapadmaM praNamAmyahaM zrIH || 6 ||

dAridrya duHkhaughatamopahantrI

tvatpAdapadmaM mayi sannidhatsva |

dInArtivicchedanahetubhUtaiH

kRpAkaTAkSairabhiSiJca mAM zrIH || 7 ||

amba prasIda karuNAsudhayArdradRSTyA

mAM tvatkRpAdraviNagehamimaM kuruSva |

Alokaya praNatahRdgatazokahantrI

tvatpAdapadmayugalaM praNamAmyahaM zrIH || 8 ||

zAntyai namo'stu zaraNAgatarakSaNAyai

kAntyai namo'stu kamanIyaguNAzrayAyai |

kSAntyai namo'stu duritakSayakAraNAyai

dAtryai namo'stu dhanadhAnyasamRddhidAyai || 9 ||

zaktyai namo'stu zazizekharasaMstutAyai

ratyai namo'stu rajanIkarasodarAyai |

bhaktyai namo'stu bhavasAgaratArakAyai

matyai namo'stu madhusUdanavallabhAyai || 10 ||

lakSmyai namo'stu zubhalakSaNalakSitAyai

siddhyai namo'stu zivasiddhasupUjitAyai |

dhRtyai namo'stvamitadurgatibhaJjanAyai

gatyai namo'stu varasadgatidAyikAyai || 11 ||

devyai namo'stu divi devagaNArcitAyai

bhUtyai namo'stu bhuvanArtivinAzanAyai |

dhAtryai namo'stu dharaNIdharavallabhAyai

puSTyai namo'stu puruSottamavallabhAyai || 12 ||

sutIvradAridryaviduHkhahantryai

namo'stu te sarvabhayApahantryai |

zrIviSNuvakSaHsthalasaMsthitAyai

namo namaH sarvavibhUtidAyai || 13 ||

jayatu jayatu lakSmIrlakSaNAlaGkRtAGgI

jayatu jayatu padmA padmasadmAbhivandyA |

jayatu jayatu vidyA viSNuvAmAGkasaMsthA

jayatu jayatu samyaksarvasampatkarI zrIH || 14 ||

jayatu jayatu devI devasaGghAbhipUjyA

jayatu jayatu bhadrA bhArgavI bhAgyarUpA |

jayatu jayatu nityA nirmalajJAnavedyA

jayatu jayatu satyA sarvabhUtAntarasthA || 15 ||

jayatu jayatu ramyA ratnagarbhAntarasthA

jayatu jayatu zuddhA zuddhajAmbUnadAbhA |

jayatu jayatu kAntA kAntimadbhAsitAGgI

jayatu jayatu zAntA zIghramAgaccha saumye || 16 ||

yasyAH kalAyAH kamalodbhavAdyA

rudrAzca zakra pramukhAzca devAH |

jIvanti sarve'pi sazaktayaste

prabhutvamAptAH paramAyuSaste || 17 ||

lilekha niTile vidhirmama lipiM visRjyAntaraM

tvayA vilikhitavyametaditi tatphalaprAptaye |

tadantaraphalesphuTaM kamalavAsinI zrIrimAM

samarpaya samudrikAM sakalabhAgyasaMsUcikAm || 18 ||

kalayA te yathA devi jIvanti sacarAcarAH |

tathA sampatkare lakSmi sarvadA samprasIda me || 19 ||

yathA viSNurdhruve nityaM svakalAM sannyavezayat |

tathaiva svakalAM lakSmi mayi samyak samarpaya || 20 ||

sarvasaukhyaprade devi bhaktAnAmabhayaprade |

acalAM kuru yatnena kalAM mayi nivezitAm || 21 ||

mudAstAM matphAle paramapadalakSmIH sphuTakalA

sadA vaikuNThazrIrnivasatu kalA me nayanayoH |

vasetsatye loke mama vacasi lakSmIrvarakalA

zriyaH zvetadvIpe nivasatu kalA me svakarayoH || 22 ||

tAvannityaM mamAGgeSu kSIrAbdhau zrIkalA vaset |

sUryAcandramasau yAvadyAvallakSmIpatiH zriyAH || 23 ||

sarvamaGgalasampUrNA sarvaizvaryasamanvitA |

AdyAdi zrIrmahAlakSmI tvatkalA mayi tiSThatu || 24 ||

ajJAnatimiraM hantuM zuddhajJAnaprakAzikA |

sarvaizvaryapradA me'stu tvatkalA mayi saMsthitA || 25 ||

alakSmIM haratu kSipraM tamaH sUryaprabhA yathA |

vitanotu mama zreyastvatkalA mayi saMsthitA || 26 ||

aizvaryamaGgalotpattistvatkalAyAM nidhIyate |

mayi tasmAtkRtArtho'smi pAtramasmi sthitestava || 27 ||

bhavadAvezabhAgyArho bhAgyavAnasmi bhArgavi |

tvatprasAdAtpavitro'haM lokamAtarnamo'stu te || 28 ||

punAsi mAM tvatkalayaiva yasmA-

-dataH samAgaccha mamAgratastvam |

paraM padaM zrIrbhava suprasannA

mayyacyutena pravizAdilakSmIH || 29 ||

zrIvaikuNThasthite lakSmi samAgaccha mamAgrataH |

nArAyaNena saha mAM kRpAdRSTyA'valokaya || 30 ||

satyalokasthite lakSmi tvaM mamAgaccha sannidhim |

vAsudevena sahitA prasIda varadA bhava || 31 ||

zvetadvIpasthite lakSmi zIghramAgaccha suvrate |

viSNunA sahite devi jaganmAtaH prasIda me || 32 ||

kSIrAmbudhisthite lakSmi samAgaccha samAdhavA |

tvatkRpAdRSTisudhayA satataM mAM vilokaya || 33 ||

ratnagarbhasthite lakSmi paripUrNe hiraNmaye |

samAgaccha samAgaccha sthitvA''zu purato mama || 34 ||

sthirA bhava mahAlakSmi nizcalA bhava nirmale |

prasanne kamale devi prasannahRdayA bhava || 35 ||

zrIdhare zrImahAbhUte tvadantaHsthaM mahAnidhim |

zIghramuddhRtya purataH pradarzaya samarpaya || 36 ||

vasundhare zrIvasudhe vasudogdhri kRpAmaye |

tvatkukSigatasarvasvaM zIghraM me sampradarzaya || 37 ||

viSNupriye ratnagarbhe samastaphalade zive |

tvadgarbhagatahemAdIn sampradarzaya darzaya || 38 ||

rasAtalagate lakSmi zIghramAgaccha me puraH |

na jAne paramaM rUpaM mAtarme sampradarzaya || 39 ||

Avirbhava manovegAcchIghramAgaccha me puraH |

mA vatsa bhairihetyuktvA kAmaM gauriva rakSa mAm || 40 ||

devi zIghraM samAgaccha dharaNIgarbhasaMsthite |

mAtastvadbhRtyabhRtyo'haM mRgaye tvAM kutUhalAt || 41 ||

uttiSTha jAgRhi tvaM me samuttiSTha sujAgRhi |

akSayAn hemakalazAn suvarNena supUritAn || 42 ||

nikSepAnme samAkRSya samuddhRtya mamAgrataH |

samunnatAnanA bhUtvA samAdhehi dharAntarAt || 43 ||

matsannidhiM samAgaccha madAhitakRpArasAt |

prasIda zreyasAM dogdhrI lakSmIrme nayanAgrataH || 44 ||

atropaviza lakSmi tvaM sthirA bhava hiraNmaye |

susthirA bhava samprItyA prasIda varadA bhava || 45 ||

AnItAMstu tathA devi nidhInme sampradarzaya |

adya kSaNena sahasA dattvA saMrakSa mAM sadA || 46 ||

mayi tiSTha tathA nityaM yathendrAdiSu tiSThasi |

abhayaM kuru me devi mahAlakSmIrnamo'stu te || 47 ||

samAgaccha mahAlakSmi zuddhajAmbUnadaprabhe |

prasIda purataH sthitvA praNataM mAM vilokaya || 48 ||

lakSmIrbhuvaM gatA bhAsi yatra yatra hiraNmayI |

tatra tatra sthitA tvaM me tava rUpaM pradarzaya || 49 ||

krIDantI bahudhA bhUmau paripUrNakRpAmayi |

mama mUrdhani te hastamavilambitamarpaya || 50 ||

phaladbhAgyodaye lakSmi samastapuravAsinI |

prasIda me mahAlakSmi paripUrNamanorathe || 51 ||

ayodhyAdiSu sarveSu nagareSu samAsthite |

vaibhavairvividhairyuktaiH samAgaccha mudAnvite || 52 ||

samAgaccha samAgaccha mamAgre bhava susthirA |

karuNArasaniSyandanetradvaya vilAsinI || 53 || [niSpanna]

sannidhatsva mahAlakSmi tvatpANiM mama mastake |

karuNAsudhayA mAM tvamabhiSiJcya sthiraM kuru || 54 ||

sarvarAjagRhe lakSmi samAgaccha balAnvite | [mudAnvite]

sthitvA''zu purato me'dya prasAdenA'bhayaM kuru || 55 ||

sAdaraM mastake hastaM mama tvaM kRpayArpaya |

sarvarAjagRhe lakSmi tvatkalA mayi tiSThatu || 56 ||

AdyAdi zrImahAlakSmi viSNuvAmAGkasaMsthite |

pratyakSaM kuru me rUpaM rakSa mAM zaraNAgatam || 57 ||

prasIda me mahAlakSmi suprasIda mahAzive |

acalA bhava samprItyA susthirA bhava madgRhe || 58 ||

yAvattiSThanti vedAzca yAvaccandradivAkarau |

yAvadviSNuzca yAvattvaM tAvatkuru kRpAM mayi || 59 ||

cAndrIkalA yathA zukle vardhate sA dine dine |

tathA dayA te mayyeva vardhatAmabhivardhatAm || 60 ||

yathA vaikuNThanagare yathA vai kSIrasAgare |

tathA madbhavane tiSTha sthiraM zrIviSNunA saha || 61 ||

yoginAM hRdaye nityaM yathA tiSThasi viSNunA |

tathA madbhavane tiSTha sthiraM zrIviSNunA saha || 62 ||

nArAyaNasya hRdaye bhavatI yathAste

nArAyaNo'pi tava hRtkamale yathAste |

nArAyaNastvamapi nityamubhau tathaiva

tau tiSThatAM hRdi mamApi dayAnvitau zrIH || 63 ||

vijJAnavRddhiM hRdaye kuru zrIH

saubhAgyavRddhiM kuru me gRhe zrIH |

dayAsuvRddhiM kurutAM mayi zrIH

suvarNavRddhiM kuru me gRhe zrIH || 64 ||

na mAM tyajethAH zritakalpavalli

sadbhaktacintAmaNikAmadheno |

vizvasya mAtarbhava suprasannA

gRhe kalatreSu ca putravarge || 65 ||

AdyAdimAye tvamajANDabIjaM

tvameva sAkAranirAkRtistvam |

tvayA dhRtAzcAbjabhavANDasaGghA-

-zcitraM caritraM tava devi viSNoH || 66 ||

brahmarudrAdayo devA vedAzcApi na zaknuyuH |

mahimAnaM tava stotuM mando'haM zaknuyAM katham || 67 ||

amba tvadvatsavAkyAni sUktAsUktAni yAni ca |

tAni svIkuru sarvajJe dayAlutvena sAdaram || 68 ||

bhavatIM zaraNaM gatvA kRtArthAH syuH purAtanAH |

iti saJcintya manasA tvAmahaM zaraNaM vraje || 69 ||

anantA nityasukhinastvadbhaktAstvatparAyaNAH |

iti vedapramANAddhi devi tvAM zaraNaM vraje || 70 ||

tava pratijJA madbhaktA na nazyantItyapi kvacit |

iti saJcintya saJcintya prANAn sandhArayAmyaham || 71 ||

tvadadhInastvahaM mAtastvatkRpA mayi vidyate |

yAvatsampUrNakAmaH syAttAvaddehi dayAnidhe || 72 ||

kSaNamAtraM na zaknomi jIvituM tvatkRpAM vinA |

na jIvantIha jalajA jalaM tyaktvA jalagrahAH || 73 ||

yathA hi putravAtsalyAjjananI prasnutastanI |

vatsaM tvaritamAgatya samprINayati vatsalA || 74 ||

yadi syAM tava putro'haM mAtA tvaM yadi mAmakI |

dayApayodharastanyasudhAbhirabhiSiJca mAm || 75 ||

mRgyo na guNalezo'pi mayi doSaikamandire |

pAMsUnAM vRSTibindUnAM doSANAM ca na me matiH || 76 ||

pApinAmahamevAgryo dayAlUnAM tvamagraNIH |

dayanIyo madanyo'sti tava ko'tra jagattraye || 77 ||

vidhinAhaM na sRSTazcenna syAttava dayAlutA |

Amayo vA na sRSTazcedauSadhasya vRthodayaH || 78 ||

kRpA madagrajA kiM te ahaM kiM vA tadagrajaH |

vicArya dehi me vittaM tava devi dayAnidhe || 79 ||

mAtA pitA tvaM gurusadgatiH zrI-

-stvameva saJjIvanahetubhUtA |

anyaM na manye jagadekanAthe

tvameva sarvaM mama devi satye || 80 ||

AdyAdilakSmIrbhava suprasannA

vizuddhavijJAnasukhaikadogdhrI |

ajJAnahantrI triguNAtiriktA

prajJAnanetrI bhava suprasannA || 81 ||

azeSavAgjADyamalApahantrI

navaM navaM spaSTasuvAkpradAyinI |

mameha jihvAgra suraGganartakI [nartinI]

bhava prasannA vadane ca me zrIH || 82 ||

samastasampatsuvirAjamAnA

samastatejazcayabhAsamAnA |

viSNupriye tvaM bhava dIpyamAnA

vAgdevatA me nayane prasannA || 83 ||

sarvapradarze sakalArthade tvaM

prabhAsulAvaNyadayApradogdhrI |

suvarNade tvaM sumukhI bhava zrI-

-rhiraNmayI me nayane prasannA || 84 ||

sarvArthadA sarvajagatprasUtiH

sarvezvarI sarvabhayApahantrI |

sarvonnatA tvaM sumukhI bhava zrI-

-rhiraNmayI me nayane prasannA || 85 ||

samastavighnaughavinAzakAriNI

samastabhaktoddharaNe vicakSaNA |

anantasaubhAgyasukhapradAyinI

hiraNmayI me nayane prasannA || 86 ||

devi prasIda dayanIyatamAya mahyaM

devAdhinAthabhavadevagaNAbhivandye |

mAtastathaiva bhava sannihitA dRzorme

patyA samaM mama mukhe bhava suprasannA || 87 ||

mA vatsa bhairabhayadAnakaro'rpitaste

maulau mameti mayi dInadayAnukampe |

mAtaH samarpaya mudA karuNAkaTAkSaM

mAGgalyabIjamiha naH sRja janma mAtaH || 88 ||

kaTAkSa iha kAmadhuktava manastu cintAmaNiH

karaH surataruH sadA navanidhistvamevendire |

bhave tava dayAraso mama rasAyanaM cAnvahaM

mukhaM tava kalAnidhirvividhavAJchitArthapradam || 89 ||

yathA rasasparzanato'yaso'pi

suvarNatA syAtkamale tathA te |

kaTAkSasaMsparzanato janAnA-

-mamaGgalAnAmapi maGgalatvam || 90 ||

dehIti nAstIti vacaH pravezA-

-dbhIto rame tvAM zaraNaM prapadye |

ataH sadA'sminnabhayapradA tvaM

sahaiva patyA mayi sannidhehi || 91 ||

kalpadrumeNa maNinA sahitA suramyA

zrIste kalA mayi rasena rasAyanena |

AstAM yato mama ziraHkaradRSTipAda-

-spRSTAH suvarNavapuSaH sthirajaGgamAH syuH || 92 ||

AdyAdiviSNoH sthiradharmapatnI

tvameva patyA mayi sannidhehi |

AdyAdilakSmi tvadanugraheNa

pade pade me nidhidarzanaM syAt || 93 ||

AdyAdilakSmIhRdayaM paThedyaH

sa rAjyalakSmImacalAM tanoti |

mahAdaridro'pi bhaveddhanADhya-

-stadanvaye zrIH sthiratAM prayAti || 94 ||

yasya smaraNamAtreNa tuSTA syAdviSNuvallabhA |

tasyAbhISTaM dadatyAzu taM pAlayati putravat || 95 ||

idaM rahasyaM hRdayaM sarvakAmaphalapradam |

japaH paJcasahasraM tu purazcaraNamucyate || 96 ||

trikAlamekakAlaM vA naro bhaktisamanvitaH |

yaH paThecchRNuyAdvApi sa yAti paramAM zriyam || 97 ||

mahAlakSmIM samuddizya nizi bhArgavavAsare |

idaM zrIhRdayaM japtvA paJcavAraM dhanI bhavet || 98 ||

anena hRdayenAnnaM garbhiNyA abhimantritam |

dadAti tatkule putro jAyate zrIpatiH svayam || 99 ||

nareNa vA'thavA nAryA lakSmIhRdayamantrite |

jale pIte ca tadvaMze mandabhAgyo na jAyate || 100 ||

ya Azvine mAsi ca zuklapakSe

ramotsave sannihite subhaktyA |

paThettathaikottaravAravRddhyA

labhetsa sauvarNamayIM suvRSTim || 101 ||

ya ekabhakto'nvahamekavarSaM

vizuddhadhIH saptativArajApI |

sa mandabhAgyo'pi ramAkaTAkSA-

-dbhavetsahasrAkSazatAdhikazrIH || 102 ||

zrIzAGghribhaktiM haridAsadAsyaM

prasannamantrArthadRDhaikaniSThAm |

guroH smRtiM nirmalabodhabuddhiM

pradehi mAtaH paramaM padaM zrIH || 103 ||

pRthvIpatitvaM puruSottamatvaM

vibhUtivAsaM vividhArthasiddhim |

sampUrNakIrtiM bahuvarSabhogaM

pradehi me lakSmi punaH punastvam || 104 ||

vAdArthasiddhiM bahulokavazyaM

vayaH sthiratvaM lalanAsubhogam |

pautrAdilabdhiM sakalArthasiddhiM

pradehi me bhArgavi janmajanmani || 105 ||

suvarNavRddhiM kuru me gRhe zrIH

sudhAnyavRddhiM kurU me gRhe zrIH |

kalyANavRddhiM kuru me gRhe zrIH

vibhUtivRddhiM kuru me gRhe zrIH || 106 ||

dhyAyellakSmIM prahasitamukhIM koTibAlArkabhAsAM

vidyudvarNAmbaravaradharAM bhUSaNADhyAM suzobhAm |

bIjApUraM sarasijayugaM bibhratIM svarNapAtraM

bhartrAyuktAM muhurabhayadAM mahyamapyacyutazrIH || 107 ||

guhyAtiguhyagoptrI tvaM gRhANAsmatkRtaM japam |

siddhirbhavatu me devi tvatprasAdAnmayi sthitA || 108 ||

iti zrIatharvaNarahasye zrIlakSmIhRdayastotraM sampUrNam ||