Sri Kalika Sahasra Nama Stotram

zrI kAlikA sahasra nAma stotram

zloka 1

zrI ziva uvAca |

kathito'yaM mahAmantraH sarvamantrottamottamaH |

yAmAsAdya mayA prAptamaizvaryapadamuttamam || 1 ||

saMyuktaH parayA bhaktyA yathokta vidhinA bhavAn |

kurutAmarcanaM devyAstrailokyavijigISayA || 2 ||

zrIparazurAma uvAca |

prasanno yadi me deva parameza purAtana |

rahasyaM paramaM devyAH kRpayA kathaya prabho || 3 ||

vinArcanaM vinA homaM vinA nyAsaM vinA balim |

vinA gandhaM vinA puSpaM vinA nityoditAM kriyAm || 4 ||

prANAyAmaM vinA dhyAnaM vinA bhUtavizodhanam |

vinA dAnaM vinA jApaM yena kAlI prasIdati || 5 ||

zrI ziva uvAca |

pRSTaM tvayottamaM prAjJa bhRguvaMza samudbhava |

bhaktAnAmapi bhakto'si tvameva sAdhayiSyasi || 6 ||

devIM dAnavakoTighnIM lIlayA rudhirapriyAm |

sadA stotrapriyAmugrAM kAmakautukalAlasAm || 7 ||

sarvadA''nandahRdayAmAsavotsava mAnasAm |

mAdhvIka matsyamAMsAnurAgiNIM vaiSNavIM parAm || 8 ||

zmazAnavAsinIM pretagaNanRtyamahotsavAm |

yogaprabhAvAM yogezIM yogIndrahRdayasthitAm || 9 ||

tAmugrakAlikAM rAma prasIdayitumarhasi |

tasyAH stotraM paraM puNyaM svayaM kAlyA prakAzitam || 10 ||

tava tat kathayiSyAmi zrutvA vatsAvadhAraya |

gopanIyaM prayatnena paThanIyaM parAtparam || 11 ||

yasyaikakAlapaThanAt sarve vighnAH samAkulAH |

nazyanti dahane dIpte pataGgA iva sarvataH || 12 ||

gadyapadyamayI vANI tasya gaGgApravAhavat |

tasya darzanamAtreNa vAdino niSprabhAM gatAH || 13 ||

tasya haste sadaivAsti sarvasiddhirna saMzayaH |

rAjAno'pi ca dAsatvaM bhajante kiM pare janAH || 14 ||

nizIthe muktakezastu nagnaH zaktisamAhitaH |

manasA cintayet kAlIM mahAkAlena cAlitAm || 15 ||

paThet sahasranAmAkhyaM stotraM mokSasya sAdhanam |

prasannA kAlikA tasya putratvenAnukampate || 16 ||

yathA brahmamRtairbrahmakusumaiH pUjitA parA |

prasIdati tathAnena stutA kAlI prasIdati || 17 ||

viniyogaH –

asya zrI dakSiNakAlikA sahasranAma stotrasya mahAkAlabhairava RSiH anuSTup chandaH zmazAnakAlI devatA dharmArthakAmamokSArthe pAThe viniyogaH |

dhyAnam –

zavArUDhAM mahAbhImAM ghoradaMSTrAM hasanmukhIM

caturbhujAM khaDgamuNDavarAbhayakarAM zivAm |

muNDamAlAdharAM devIM lalAjjihvAM digambarAM

evaM saJcintayetkAlIM zmazAnAlayavAsinIm ||

stotram –

zmazAnakAlikA kAlI bhadrakAlI kapAlinI |

guhyakAlI mahAkAlI kurukullA virodhinI || 1 ||

kAlikA kAlarAtrizca mahAkAlanitambinI |

kAlabhairavabhAryA ca kulavartmaprakAzinI || 2 ||

kAmadA kAminI kanyA kamanIyasvarUpiNI |

kastUrIrasaliptAGgI kuJjarezvaragAminI || 3 ||

kakAravarNasarvAGgI kAminI kAmasundarI |

kAmArtA kAmarUpA ca kAmadhenuH kalAvatI || 4 ||

kAntA kAmasvarUpA ca kAmAkhyA kulakAminI |

kulInA kulavatyambA durgA durgatinAzinI || 5 ||

kaumArI kalajA kRSNA kRSNadehA kRzodarI |

kRzAGgI kulizAGgI ca krIGkArI kamalA kalA || 6 ||

karAlAsyA karAlI ca kulakAntA'parAjitA |

ugrA ugraprabhA dIptA vipracittA mahAbalA || 7 ||

nIlA ghanA meghanAdA mAtrA mudrA mitAmitA |

brAhmI nArAyaNI bhadrA subhadrA bhaktavatsalA || 8 ||

mAhezvarI ca cAmuNDA vArAhI nArasiMhikA |

vajrAGgI vajrakaGkAlI nRmuNDasragviNI zivA || 9 ||

mAlinI naramuNDAlI galadraktavibhUSaNA |

raktacandanasiktAGgI sindUrAruNamastakA || 10 ||

ghorarUpA ghoradaMSTrA ghorAghoratarA zubhA |

mahAdaMSTrA mahAmAyA sudatI yugadanturA || 11 ||

sulocanA virUpAkSI vizAlAkSI trilocanA |

zAradenduprasannAsyA sphuratsmerAmbujekSaNA || 12 ||

aTTahAsapraphullAsyA smeravaktrA subhASiNI |

praphullapadmavadanA smitAsyA priyabhASiNI || 13 ||

koTarAkSI kulazreSThA mahatI bahubhASiNI |

sumatiH kumatizcaNDA caNDamuNDAtiveginI || 14 ||

sukezI muktakezI ca dIrghakezI mahAkacA |

pretadehAkarNapUrA pretapANisumekhalA || 15 ||

pretAsanA priyapretA puNyadA kulapaNDitA |

puNyAlayA puNyadehA puNyazlokA ca pAvanI || 16 ||

pUtA pavitrA paramA parA puNyavibhUSaNA |

puNyanAmnI bhItiharA varadA khaDgapANinI || 17 ||

nRmuNDahastA zAntA ca chinnamastA sunAsikA |

dakSiNA zyAmalA zyAmA zAntA pInonnatastanI || 18 ||

digambarA ghorarAvA sRkkAntaraktavAhinI |

ghorarAvA zivAsaGgA niHsaGgA madanAturA || 19 ||

mattA pramattA madanA sudhAsindhunivAsinI |

atimattA mahAmattA sarvAkarSaNakAriNI || 20 ||

gItapriyA vAdyaratA pretanRtyaparAyaNA |

caturbhujA dazabhujA aSTAdazabhujA tathA || 21 ||

kAtyAyanI jaganmAtA jagatI paramezvarI |

jagadbandhurjagaddhAtrI jagadAnandakAriNI || 22 ||

jagajjIvavatI haimavatI mAyA mahAlayA |

nAgayajJopavItAGgI nAginI nAgazAyinI || 23 ||

nAgakanyA devakanyA gAndhArI kinnarI surI |

moharAtrI mahArAtrI dAruNAmAsurAsurI || 24 ||

vidyAdharI vasumatI yakSiNI yoginI jarA |

rAkSasI DAkinI vedamayI vedavibhUSaNA || 25 ||

zrutismRtimahAvidyA guhyavidyA purAtanI |

cintyA'cintyA svadhA svAhA nidrA tandrA ca pArvatI || 26 ||

aparNA nizcalA lolA sarvavidyA tapasvinI |

gaGgA kAzI zacI sItA satI satyaparAyaNA || 27 ||

nItiH sunItiH surucistuSTiH puSTirdhRtiH kSamA |

vANI buddhirmahAlakSmI lakSmIrnIlasarasvatI || 28 ||

srotasvatI srotavatI mAtaGgI vijayA jayA |

nadI sindhuH sarvamayI tArA zUnyanivAsinI || 29 ||

zuddhA taraGgiNI medhA lAkinI bahurUpiNI |

sadAnandamayI satyA sarvAnandasvarUpiNI || 30 ||

sunandA nandinI stutyA stavanIyA svabhAvinI |

raGkiNI TaGkiNI citrA vicitrA citrarUpiNI || 31 ||

padmA padmAlayA padmasukhI padmavibhUSaNA |

zAkinI hAkinI kSAntA rAkiNI rudhirapriyA || 32 ||

bhrAntirbhavAnI rudrANI mRDAnI zatrumardinI |

upendrANI mahezAnI jyotsnA cendrasvarUpiNI || 33 ||

sUryAtmikA rudrapatnI raudrI strI prakRtiH pumAn |

zaktiH sUktirmatimatI bhuktirmuktiH pativratA || 34 ||

sarvezvarI sarvamAtA zarvANI haravallabhA |

sarvajJA siddhidA siddhA bhAvyA bhavyA bhayApahA || 35 ||

kartrI hartrI pAlayitrI zarvarI tAmasI dayA |

tamisrA yAminIsthA ca sthirA dhIrA tapasvinI || 36 ||

cArvaGgI caJcalA lolajihvA cArucaritriNI |

trapA trapAvatI lajjA nirlajjA hrIM rajovatI || 37 ||

sattvavatI dharmaniSThA zreSThA niSThuravAdinI |

gariSThA duSTasaMhartrI viziSTA zreyasI ghRNA || 38 ||

bhImA bhayAnakA bhImanAdinI bhIH prabhAvatI |

vAgIzvarI zrIryamunA yajJakartrI yajuHpriyA || 39 ||

RksAmAtharvanilayA rAgiNI zobhanasvarA |

kalakaNThI kambukaNThI veNuvINAparAyaNA || 40 ||

vaMzinI vaiSNavI svacchA dhAtrI trijagadIzvarI |

madhumatI kuNDalinI RddhiH siddhiH zucismitA || 41 ||

rambhorvazI ratI rAmA rohiNI revatI ramA |

zaGkhinI cakriNI kRSNA gadinI padminI tathA || 42 ||

zUlinI parighAstrA ca pAzinI zArGgapANinI |

pinAkadhAriNI dhUmrA zarabhI vanamAlinI || 43 ||

vajriNI samaraprItA veginI raNapaNDitA |

jaTinI bimbinI nIlA lAvaNyAmbudhicandrikA || 44 ||

balipriyA sadApUjyA pUrNA daityendramAthinI |

mahiSAsurasaMhantrI vAsinI raktadantikA || 45 ||

raktapA rudhirAktAGgI raktakharparahastinI |

raktapriyA mAMsarucirvAsavAsaktamAnasA || 46 ||

galacchoNitamuNDAlikaNThamAlAvibhUSaNA |

zavAsanA citAntasthA mAhezI vRSavAhinI || 47 ||

vyAghratvagambarA cInacelinI siMhavAhinI |

vAmadevI mahAdevI gaurI sarvajJabhAvinI || 48 ||

bAlikA taruNI vRddhA vRddhamAtA jarAturA |

subhrurvilAsinI brahmavAdinI brAhmaNI mahI || 49 ||

svapnavatI citralekhA lopAmudrA surezvarI |

amoghA'rundhatI tIkSNA bhogavatyanuvAdinI || 50 ||

mandAkinI mandahAsA jvAlAmukhyasurAntakA |

mAnadA mAninI mAnyA mAnanIyA madoddhatA || 51 ||

madirA madirAnmAdA medhyA navyA prasAdinI |

sumadhyA'nantaguNinI sarvalokottamottamA || 52 ||

jayadA jitvarA jaitrI jayazrIrjayazAlinI |

sukhadA zubhadA satyA sabhAsaGkSobhakAriNI || 53 ||

zivadUtI bhUtimatI vibhUtirbhISaNAnanA |

kaumArI kulajA kuntI kulastrI kulapAlikA || 54 ||

kIrtiryazasvinI bhUSA bhUSyA bhUtapatipriyA |

saguNA nirguNA dhRSTA niSThA kASThA pratiSThitA || 55 ||

dhaniSThA dhanadA dhanyA vasudhA svaprakAzinI |

urvI gurvI guruzreSThA saguNA triguNAtmikA || 56 ||

mahAkulInA niSkAmA sakAmA kAmajIvanA |

kAmadevakalA rAmA'bhirAmA zivanartakI || 57 ||

cintAmaNiH kalpalatA jAgratI dInavatsalA |

kArtikI kIrtikA kRtyA ayodhyA viSamA samA || 58 ||

sumantrA mantriNI ghUrNA hlAdinI klezanAzinI |

trailokyajananI hRSTA nirmAMsA manorUpiNI || 59 ||

taDAganimnajaTharA zuSkamAMsAsthimAlinI |

avantI mathurA mAyA trailokyapAvanIzvarI || 60 ||

vyaktA'vyaktA'nekamUrtiH zarvarI bhImanAdinI |

kSemaGkarI zaGkarI ca sarvasammohakAriNI || 61 ||

UrdhvatejasvinI klinnA mahAtejasvinI tathA |

advaitA bhoginI pUjyA yuvatI sarvamaGgalA || 62 ||

sarvapriyaGkarI bhogyA dharaNI pizitAzanA |

bhayaGkarI pApaharA niSkalaGkA vazaGkarI || 63 ||

AzA tRSNA candrakalA nidrAnyA vAyuveginI |

sahasrasUryasaGkAzA candrakoTisamaprabhA || 64 ||

vahnimaNDalasaMsthA ca sarvatattvapratiSThitA |

sarvAcAravatI sarvadevakanyAdhidevatA || 65 ||

dakSakanyA dakSayajJanAzinI durgatArikA |

ijyA pUjyA vibhA bhUtiH satkIrtirbrahmarUpiNI || 66 ||

rambhoruzcaturA rAkA jayantI karuNA kuhuH |

manasvinI devamAtA yazasyA brahmacAriNI || 67 ||

RddhidA vRddhidA vRddhiH sarvAdyA sarvadAyinI |

AdhArarUpiNI dhyeyA mUlAdhAranivAsinI || 68 ||

ajJA prajJA pUrNamanAzcandramukhyanukUlinI |

vAvadUkA nimnanAbhiH satyA sandhyA dRDhavratA || 69 ||

AnvIkSikI daNDanItistrayI tridivasundarI |

jvalinI jvAlinI zailatanayA vindhyavAsinI || 70 ||

ameyA khecarI dhairyA turIyA vimalA''turA |

pragalbhA vAruNI chAyA zazinI visphuliGginI || 71 ||

bhuktiH siddhiH sadAprAptiH prAkAmyA mahimA'NimA |

icchAsiddhirvisiddhA ca vazitvordhvanivAsinI || 72 ||

laghimA caiva gAyatrI sAvitrI bhuvanezvarI |

manoharA citA divyA devyudArA manoramA || 73 ||

piGgalA kapilA jihvArasajJA rasikA rasA |

suSumneDA bhogavatI gAndhArI narakAntakA || 74 ||

pAJcAlI rukmiNI rAdhArAdhyA bhImAdhirAdhikA |

amRtA tulasI vRndA kaiTabhI kapaTezvarI || 75 ||

ugracaNDezvarI vIrA jananI vIrasundarI |

ugratArA yazodAkhyA daivakI devamAnitA || 76 ||

niraJjanA citradevI krodhinI kuladIpikA |

kulavAgIzvarI vANI mAtRkA drAviNI dravA || 77 ||

yogezvarI mahAmArI bhrAmarI bindurUpiNI |

dUtI prANezvarI guptA bahulA camarI prabhA || 78 ||

kubjikA jJAninI jyeSThA bhuzuNDI prakaTA tithiH |

draviNI gopanI mAyA kAmabIjezvarI kriyA || 79 ||

zAmbhavI kekarA menA mUSalAstrA tilottamA |

ameyavikramA krUrA sampatzAlA trilocanA || 80 ||

svastirhavyavahA prItiruSmA dhUmrArciraGgadA |

tapinI tApinI vizvA bhogadA dhAriNI dharA || 81 ||

trikhaNDA bodhinI vazyA sakalA zabdarUpiNI |

bIjarUpA mahAmudrA yoginI yonirUpiNI || 82 ||

anaGgakusumA'naGgamekhalA'naGgarUpiNI |

vajrezvarI ca jayinI sarvadvandvakSayaGkarI || 83 ||

SaDaGgayuvatI yogayuktA jvAlAMzumAlinI |

durAzayA durAdhArA durjayA durgarUpiNI || 84 ||

durantA duSkRtiharA durdhyeyA duratikramA |

haMsezvarI trikoNasthA zAkambharyanukampinI || 85 ||

trikoNanilayA nityA paramAmRtaraJjitA |

mahAvidyezvarI zvetA bheruNDA kulasundarI || 86 ||

tvaritA bhaktisaMsaktA bhaktavazyA sanAtanI |

bhaktAnandamayI bhaktabhAvikA bhaktazaGkarI || 87 ||

sarvasaundaryanilayA sarvasaubhAgyazAlinI |

sarvasambhogabhavanA sarvasaukhyanirUpiNI || 88 ||

kumArIpUjanaratA kumArIvratacAriNI |

kumArIbhaktisukhinI kumArIrUpadhAriNI || 89 ||

kumArIpUjakaprItA kumArIprItidA priyA |

kumArIsevakAsaGgA kumArIsevakAlayA || 90 ||

AnandabhairavI bAlabhairavI baTubhairavI |

zmazAnabhairavI kAlabhairavI purabhairavI || 91 ||

mahAbhairavapatnI ca paramAnandabhairavI |

sudhAnandabhairavI ca unmAdAnandabhairavI || 92 ||

muktAnandabhairavI ca tathA taruNabhairavI |

jJAnAnandabhairavI ca amRtAnandabhairavI || 93 ||

mahAbhayaGkarI tIvrA tIvravegA tapasvinI |

tripurA paramezAnI sundarI purasundarI || 94 ||

tripurezI paJcadazI paJcamI puravAsinI |

mahAsaptadazI caiva SoDazI tripurezvarI || 95 ||

mahAGkuzasvarUpA ca mahAcakrezvarI tathA |

navacakrezvarI cakrezvarI tripuramAlinI || 96 ||

rAjarAjezvarI dhIrA mahAtripurasundarI |

sindUrapUrarucirA zrImattripurasundarI || 97 ||

sarvAGgasundarI raktAraktavastrottarIyiNI |

javAyAvakasindUraraktacandanadhAriNI || 98 ||

javAyAvakasindUraraktacandanarUpadhRk |

cAmarI bAlakuTilanirmalA zyAmakezinI || 99 ||

vajramauktikaratnADhyA kirITamukuTojjvalA |

ratnakuNDalasaMyuktasphuradgaNDamanoramA || 100 ||

kuJjarezvarakumbhotthamuktAraJjitanAsikA |

muktAvidrumamANikyahArADhyastanamaNDalA || 101 ||

sUryakAntendukAntADhyasparzAzmakaNThabhUSaNA |

bIjapUrasphuradbIjadantapaGktiranuttamA || 102 ||

kAmakodaNDakAbhugnabhrUkaTAkSapravarSiNI |

mAtaGgakumbhavakSojA lasatkokanadekSaNA || 103 ||

manojJazaSkulIkarNA haMsIgativiDambinI |

padmarAgAGgadajyotirdozcatuSkaprakAzinI || 104 ||

nAnAmaNiparisphUrjacchuddhakAJcanakaGkaNA |

nAgendradantanirmANavalayAGkitapANinI || 105 ||

aGgurIyakacitrAGgI vicitrakSudraghaNTikA |

paTTAmbaraparIdhAnA kalamaJjIraziJjinI || 106 ||

karpUrAgarukastUrIkuGkumadravalepitA |

vicitraratnapRthivIkalpazAkhitalasthitA || 107 ||

ratnadvIpasphuradratnasiMhAsanavilAsinI |

SaTcakrabhedanakarI paramAnandarUpiNI || 108 ||

sahasradalapadmAntazcandramaNDalavartinI |

brahmarUpA zivakroDA nAnAsukhavilAsinI || 109 ||

haraviSNuviriJcIndragrahanAyakasevitA |

zivA zaivA ca rudrANI tathaiva zivavAdinI || 110 ||

mAtaGginI zrImatI ca tathaivAnaGgamekhalA |

DAkinI yoginI caiva tathopayoginI matA || 111 ||

mAhezvarI vaiSNavI ca bhrAmarI zivarUpiNI |

alambuSA vegavatI krodharUpA sumekhalA || 112 ||

gAndhArI hastajihvA ca iDA caiva zubhaGkarI |

piGgalA brahmadUtI ca suSumnA caiva gandhinI || 113 ||

AtmayonirbrahmayonirjagadyonirayonijA |

bhagarUpA bhagasthAtrI bhaginI bhagarUpiNI || 114 ||

bhagAtmikA bhagAdhArarUpiNI bhagamAlinI |

liGgAkhyA caiva liGgezI tripurA bhairavI tathA || 115 ||

liGgagItiH sugItizca liGgasthA liGgarUpadhRk |

liGgamAnA liGgabhavA liGgaliGgA ca pArvatI || 116 ||

bhagavatI kauzikI ca premA caiva priyaMvadA |

gRdhrarUpA zivArUpA cakriNI cakrarUpadhRk || 117 ||

liGgAbhidhAyinI liGgapriyA liGganivAsinI |

liGgasthA liGganI liGgarUpiNI liGgasundarI || 118 ||

liGgagItirmahAprItA bhagagItirmahAsukhA |

liGganAmasadAnandA bhaganAmasadAgatiH || 119 ||

liGgamAlAkaNThabhUSA bhagamAlAvibhUSaNA |

bhagaliGgAmRtaprItA bhagaliGgasvarUpiNI || 120 ||

bhagaliGgasya rUpA ca bhagaliGgasukhAvahA |

svayambhUkusumaprItA svayambhUkusumArcitA || 121 ||

svayambhUkusumaprANA svayambhUpuSpatarpitA |

svayambhUpuSpaghaTitA svayambhUpuSpadhAriNI || 122 ||

svayambhUpuSpatilakA svayambhUpuSpacarcitA |

svayambhUpuSpaniratA svayambhUkusumagrahA || 123 ||

svayambhUpuSpayajJAMzA svayambhUkusumAtmikA |

svayambhUpuSpanicitA svayambhUkusumapriyA || 124 ||

svayambhUkusumAdAnalAlasonmattamAnasA |

svayambhUkusumAnandalaharIsnigdhadehinI || 125 ||

svayambhUkusumAdhArA svayambhUkusumAkulA |

svayambhUpuSpanilayA svayambhUpuSpavAsinI || 126 ||

svayambhUkusumasnigdhA svayambhUkusumAtmikA |

svayambhUpuSpakariNI svayambhUpuSpavANikA || 127 ||

svayambhUkusumadhyAnA svayambhUkusumaprabhA |

svayambhUkusumajJAnA svayambhUpuSpabhAginI || 128 ||

svayambhUkusumollAsA svayambhUpuSpavarSiNI |

svayambhUkusumotsAhA svayambhUpuSparUpiNI || 129 ||

svayambhUkusumonmAdA svayambhUpuSpasundarI |

svayambhUkusumArAdhyA svayambhUkusumodbhavA || 130 ||

svayambhUkusumAvyagrA svayambhUpuSpapUrNitA |

svayambhUpUjakaprAjJA svayambhUhotRmAtRkA || 131 ||

svayambhUdAtRrakSitrI svayambhUraktatArikA |

svayambhUpUjakagrastA svayambhUpUjakapriyA || 132 ||

svayambhUvandakAdhArA svayambhUnindakAntakA |

svayambhUpradasarvasvA svayambhUpradaputriNI || 133 ||

svayambhUpradasasmerA svayambhUtazarIriNI |

sarvakAlodbhavaprItA sarvakAlodbhavAtmikA || 134 ||

sarvakAlodbhavodbhAvA sarvakAlodbhavodbhavA |

kuNDapuSpasadAprItA kuNDapuSpasadAratiH || 135 ||

kuNDagolodbhavaprANA kuNDagolodbhavAtmikA |

svayambhUrvA zivA dhAtrI pAvanI lokapAvanI || 136 ||

kIrtiryazasvinI medhA vimedhA zukrasundarI |

azvinI kRttikA puSyA tejaskA candramaNDalA || 137 ||

sUkSmA'sUkSmA balAkA ca varadA bhayanAzinI |

varadA'bhayadA caiva muktibandhavinAzinI || 138 ||

kAmukA kAmadA kAntA kAmAkhyA kulasundarI |

duHkhadA sukhadA mokSA mokSadArthaprakAzinI || 139 ||

duSTAduSTamatizcaiva sarvakAryavinAzinI |

zukrAdhArA zukrarUpA zukrasindhunivAsinI || 140 ||

zukrAlayA zukrabhogA zukrapUjAsadAratiH |

zukrapUjyA zukrahomasantuSTA zukravatsalA || 141 ||

zukramUrtiH zukradehA zukrapUjakaputriNI |

zukrasthA zukriNI zukrasaMspRhA zukrasundarI || 142 ||

zukrasnAtA zukrakarI zukrasevyA'tizukriNI |

mahAzukrA zukrabhavA zukravRSTividhAyinI || 143 ||

zukrAbhidheyA zukrArhA zukravandakavanditA |

zukrAnandakarI zukrasadAnandAbhidhAyikA || 144 ||

zukrotsavA sadAzukrapUrNA zukramanoramA |

zukrapUjakasarvasvA zukranindakanAzinI || 145 ||

zukrAtmikA zukrasaMvat zukrAkarSaNakAriNI |

zAradA sAdhakaprANA sAdhakAsaktamAnasA || 146 ||

sAdhakottamasarvasvA sAdhakAbhaktaraktapA |

sAdhakAnandasantoSA sAdhakAnandakAriNI || 147 ||

AtmavidyA brahmavidyA parabrahmasvarUpiNI |

trikUTasthA paJcakUTA sarvakUTazarIriNI || 148 ||

sarvavarNamayI varNajapamAlAvidhAyinI |

iti zrIkAlikAnAmasahasraM zivabhASitam || 149 ||

guhyAdguhyataraM sAkSAnmahApAtakanAzanam |

pUjAkAle nizIthe ca sandhyayorubhayorapi || 150 ||

labhate gANapatyaM sa yaH paThet sAdhakottamaH |

yaH paThet pAThayedvApi zRNoti zrAvayedapi || 151 ||

sarvapApavinirmuktaH sa yAti kAlikApuram |

zraddhayA'zraddhayA vApi yaH kazcinmAnavaH smaret || 152 ||

durgaM durgazataM tIrtvA sa yAti paramAGgatim |

vandhyA vA kAkavandhyA vA mRtavatsA ca yAGganA || 153 ||

zrutvA stotramidaM putrAn labhate cirajIvinaH |

yaM yaM kAmayate kAmaM paThan stotramanuttamam |

devIpAdaprasAdena tattadApnoti nizcitam || 154 ||

iti zrIkAlikAkulasarvasve haraparazurAmasaMvAde zrI kAlikA sahasranAma stotram |