Sri Hari Vayu Stuti

ଶ୍ରୀ ହରି ଵାଯୁ ସ୍ତୁତି

ଶ୍ଲୋକ 1

ଅଥ ନଖସ୍ତୁତିଃ

ପାନ୍ତ୍ଵସ୍ମାନ୍ ପୁରୁହୂତଵୈରିବଲଵନ୍ମାତଙ୍ଗମାଦ୍ଯଦ୍ଘଟା-

-କୁମ୍ଭୋଚ୍ଚାଦ୍ରିଵିପାଟନାଧିକପଟୁ ପ୍ରତ୍ଯେକ ଵଜ୍ରାଯିତାଃ ।

ଶ୍ରୀମତ୍କଣ୍ଠୀରଵାସ୍ଯପ୍ରତତସୁନଖରା ଦାରିତାରାତିଦୂର-

-ପ୍ରଧ୍ଵସ୍ତଧ୍ଵାନ୍ତଶାନ୍ତପ୍ରଵିତତମନସା ଭାଵିତା ଭୂରିଭାଗୈଃ

ଶ୍ଲୋକ 2

ଲକ୍ଷ୍ମୀକାନ୍ତ ସମନ୍ତତୋଽପି କଲଯନ୍ ନୈଵେଶିତୁସ୍ତେ ସମଂ

ପଶ୍ଯାମ୍ଯୁତ୍ତମଵସ୍ତୁ ଦୂରତରତୋପାସ୍ତଂ ରସୋ ଯୋଽଷ୍ଟମଃ ।

ଯଦ୍ରୋଷୋତ୍କର ଦକ୍ଷ ନେତ୍ର କୁଟିଲ ପ୍ରାନ୍ତୋତ୍ଥିତାଗ୍ନି ସ୍ଫୁରତ୍

ଖଦ୍ଯୋତୋପମ ଵିସ୍ଫୁଲିଙ୍ଗଭସିତା ବ୍ରହ୍ମେଶଶକ୍ରୋତ୍କରାଃ

॥ 1 ॥

ଶ୍ଲୋକ 3

ଅଥ ଵାଯୁସ୍ତୁତିଃ

ଶ୍ରୀମଦ୍ଵିଷ୍ଣ୍ଵଙ୍ଘ୍ରିନିଷ୍ଠାତିଗୁଣଗୁରୁତମଶ୍ରୀମଦାନନ୍ଦତୀର୍ଥ-

-ତ୍ରୈଲୋକ୍ଯାଚାର୍ଯପାଦୋଜ୍ଜ୍ଵଲଜଲଜଲସତ୍ପାଂସଵୋଽସ୍ମାନ୍ ପୁନନ୍ତୁ ।

ଵାଚାଂ ଯତ୍ର ପ୍ରଣେତ୍ରୀ ତ୍ରିଭୁଵନମହିତା ଶାରଦା ଶାରଦେନ୍ଦୁ-

-ଜ୍ଯୋତ୍ସ୍ନାଭଦ୍ରସ୍ମିତଶ୍ରୀଧଵଲିତକକୁଭା ପ୍ରେମଭାରଂ ବଭାର

॥ 2 ॥

ଶ୍ଲୋକ 4

ଉତ୍କଣ୍ଠାକୁଣ୍ଠକୋଲାହଲଜଵଵିଜିତାଜସ୍ରସେଵାନୁଵୃଦ୍ଧ-

-ପ୍ରାଜ୍ଞାତ୍ମଜ୍ଞାନଧୂତାନ୍ଧତମସସୁମନୋମୌଲିରତ୍ନାଵଲୀନାମ୍ ।

ଭକ୍ତ୍ଯୁଦ୍ରେକାଵଗାଢପ୍ରଘଟନସଧଟାତ୍କାରସଙ୍ଘୃଷ୍ଯମାଣ-

ପ୍ରାନ୍ତପ୍ରାଗ୍ର୍ଯାଙ୍ଘ୍ରିପୀଠୋତ୍ଥିତକନକରଜଃପିଞ୍ଜରାରଞ୍ଜିତାଶାଃ

॥ 1 ॥

ଶ୍ଲୋକ 5

ଜନ୍ମାଧିଵ୍ଯାଧ୍ଯୁପାଧିପ୍ରତିହତିଵିରହପ୍ରାପକାଣାଂ ଗୁଣାନାଂ

ଅଗ୍ର୍ଯାଣାମର୍ପକାଣାଂ ଚିରମୁଦିତଚିଦାନନ୍ଦସନ୍ଦୋହଦାନାମ୍ ।

ଏତେଷାମେଷ ଦୋଷପ୍ରମୁଷିତମନସାଂ ଦ୍ଵେଷିଣାଂ ଦୂଷକାଣାଂ

ଦୈତ୍ଯାନାମାର୍ତିମନ୍ଧେ ତମସି ଵିଦଧତାଂ ସଂସ୍ତଵେ ନାସ୍ମି ଶକ୍ତଃ

॥ 2 ॥

ଶ୍ଲୋକ 6

ଅସ୍ଯାଵିଷ୍କର୍ତୁକାମଂ କଲିମଲକଲୁଷେଽସ୍ମିନ୍ ଜନେ ଜ୍ଞାନମାର୍ଗଂ

ଵନ୍ଦ୍ଯଂ ଚନ୍ଦ୍ରେନ୍ଦ୍ରରୁଦ୍ରଦ୍ଯୁମଣିଫଣିଵଯୋନାଯକାଦ୍ଯୈରିହାଦ୍ଯ ।

ମଧ୍ଵାଖ୍ଯଂ ମନ୍ତ୍ରସିଦ୍ଧଂ କିମୁତ କୃତଵତୋ ମାରୁତସ୍ଯାଵତାରଂ

ପାତାରଂ ପାରମେଷ୍ଟ୍ଯଂ ପଦମପଵିପଦଃ ପ୍ରାପ୍ତୁରାପନ୍ନପୁଂସାମ୍

॥ 3 ॥

ଶ୍ଲୋକ 7

ଉଦ୍ଯଦ୍ଵିଦ୍ଯୁତ୍ପ୍ରଚଣ୍ଡାଂ ନିଜରୁଚିନିକରଵ୍ଯାପ୍ତଲୋକାଵକାଶୋ

ବିଭ୍ରଦ୍ଭୀମୋ ଭୁଜେ ଯୋଽଭ୍ଯୁଦିତଦିନକରାଭାଙ୍ଗଦାଢ୍ଯ ପ୍ରକାଣ୍ଡେ ।

ଵୀର୍ଯୋଦ୍ଧାର୍ଯାଂ ଗଦାଗ୍ର୍ଯାମଯମିହ ସୁମତିଂ ଵାଯୁଦେଵୋ ଵିଦଧ୍ଯାତ୍

ଅଧ୍ଯାତ୍ମଜ୍ଞାନନେତା ଯତିଵରମହିତୋ ଭୂମିଭୂଷାମଣିର୍ମେ

॥ 4 ॥

ଶ୍ଲୋକ 8

ସଂସାରୋତ୍ତାପନିତ୍ଯୋପଶମଦସଦଯସ୍ନେହହାସାମ୍ବୁପୂର-

-ପ୍ରୋଦ୍ଯଦ୍ଵିଦ୍ଯାନଵଦ୍ଯଦ୍ଯୁତିମଣିକିରଣଶ୍ରେଣିସମ୍ପୂରିତାଶଃ ।

ଶ୍ରୀଵତ୍ସାଙ୍କାଧିଵାସୋଚିତତରସରଲଶ୍ରୀମଦାନନ୍ଦତୀର୍ଥ-

-କ୍ଷୀରାମ୍ଭୋଧିର୍ଵିଭିନ୍ଦ୍ଯାଦ୍ଭଵଦନଭିମତଂ ଭୂରି ମେ ଭୂତିହେତୁଃ

॥ 5 ॥

ଶ୍ଲୋକ 9

ମୂର୍ଧନ୍ଯେଷୋଽଞ୍ଜଲିର୍ମେ ଦୃଢତରମିହ ତେ ବଧ୍ଯତେ ବନ୍ଧପାଶ-

-ଚ୍ଛେତ୍ରେ ଦାତ୍ରେ ସୁଖାନାଂ ଭଜତି ଭୁଵି ଭଵିଷ୍ଯଦ୍ଵିଧାତ୍ରେ ଦ୍ଯୁଭର୍ତ୍ରେ ।

ଅତ୍ଯନ୍ତଂ ସନ୍ତତଂ ତ୍ଵଂ ପ୍ରଦିଶ ପଦଯୁଗେ ହନ୍ତ ସନ୍ତାପଭାଜା-

-ମସ୍ମାକଂ ଭକ୍ତିମେକାଂ ଭଗଵତ ଉତ ତେ ମାଧଵସ୍ଯାଥ ଵାଯୋଃ

॥ 6 ॥

ଶ୍ଲୋକ 10

ସାଭ୍ରୋଷ୍ଣାଭୀଶୁଶୁଭ୍ରପ୍ରଭମଭଯ ନଭୋ ଭୂରିଭୂଭୃଦ୍ଵିଭୂତି-

-ଭ୍ରାଜିଷ୍ଣୁର୍ଭୂରୃଭୂଣାଂ ଭଵନମପି ଵିଭୋଽଭେଦି ବଭ୍ରେ ବଭୂଵେ ।

ଯେନ ଭ୍ରୂଵିଭ୍ରମସ୍ତେ ଭ୍ରମଯତୁ ସୁଭୃଶଂ ବଭ୍ରୁଵଦ୍ଦୁର୍ଭୃତାଶାନ୍

ଭ୍ରାନ୍ତିର୍ଭେଦାଵଭାସସ୍ତ୍ଵିତି ଭଯମଭିଭୂର୍ଭୋକ୍ଷ୍ଯତୋ ମାଯିଭିକ୍ଷୂନ୍

॥ 7 ॥

ଶ୍ଲୋକ 11

ଯେଽମୁଂ ଭାଵଂ ଭଜନ୍ତେ ସୁରମୁଖସୁଜନାରାଧିତଂ ତେ ତୃତୀଯଂ

ଭାସନ୍ତେ ଭାସୁରୈସ୍ତେ ସହଚରଚଲିତୈଶ୍ଚାମରୈଶ୍ଚାରୁଵେଷାଃ ।

ଵୈକୁଣ୍ଠେ କଣ୍ଠଲଗ୍ନସ୍ଥିରଶୁଚିଵିଲସତ୍କାନ୍ତିତାରୁଣ୍ଯଲୀଲା-

ଲାଵଣ୍ଯାପୂର୍ଣକାନ୍ତାକୁଚଭରସୁଲଭାଶ୍ଲେଷସମ୍ମୋଦସାନ୍ଦ୍ରାଃ

॥ 8 ॥

ଶ୍ଲୋକ 12

ଆନନ୍ଦାନ୍ମନ୍ଦମନ୍ଦା ଦଦତି ହି ମରୁତଃ କୁନ୍ଦମନ୍ଦାରନନ୍ଦ୍ଯା-

-ଵର୍ତାମୋଦାନ୍ ଦଧାନା ମୃଦୁପଦମୁଦିତୋଦ୍ଗୀତକୈଃ ସୁନ୍ଦରୀଣାମ୍ ।

ଵୃନ୍ଦୈରାଵନ୍ଦ୍ଯମୁକ୍ତେନ୍ଦ୍ଵହିମଗୁମଦନାହୀନ୍ଦ୍ରଦେଵେନ୍ଦ୍ରସେଵ୍ଯେ

ମୌକୁନ୍ଦେ ମନ୍ଦିରେଽସ୍ମିନ୍ନଵିରତମୁଦଯନ୍ମୋଦିନାଂ ଦେଵଦେଵ

॥ 9 ॥

ଶ୍ଲୋକ 13

ଉତ୍ତପ୍ତାଽତ୍ଯୁତ୍କଟତ୍ଵିଟ୍ ପ୍ରକଟକଟକଟଧ୍ଵାନସଙ୍ଘଟ୍ଟନୋଦ୍ଯ-

-ଦ୍ଵିଦ୍ଯୁଦ୍ଵ୍ଯୂଢସ୍ଫୁଲିଙ୍ଗପ୍ରକରଵିକିରଣୋତ୍କ୍ଵାଥିତେ ବାଧିତାଙ୍ଗାନ୍ ।

ଉଦ୍ଗାଢଂ ପାତ୍ଯମାନା ତମସି ତତ ଇତଃ କିଙ୍କରୈଃ ପଙ୍କିଲେ ତେ

ପଙ୍କ୍ତିର୍ଗ୍ରାଵ୍ଣାଂ ଗରିମ୍ଣା ଗ୍ଲପଯତି ହି ଭଵଦ୍ଵେଷିଣୋ ଵିଦ୍ଵଦାଦ୍ଯ

॥ 10 ॥

ଶ୍ଲୋକ 14

ଅସ୍ମିନ୍ନସ୍ମଦ୍ଗୁରୂଣାଂ ହରିଚରଣଚିରଧ୍ଯାନସନ୍ମଙ୍ଗଲାନାଂ

ଯୁଷ୍ମାକଂ ପାର୍ଶ୍ଵଭୂମିଂ ଧୃତରଣରଣିକସ୍ଵର୍ଗିସେଵ୍ଯାଂ ପ୍ରପନ୍ନଃ ।

ଯସ୍ତୂଦାସ୍ତେ ସ ଆସ୍ତେଽଧିଭଵମସୁଲଭକ୍ଲେଶନିର୍ମୂକମସ୍ତ-

-ପ୍ରାଯାନନ୍ଦଂ କଥଞ୍ଚିନ୍ନ ଵସତି ସତତଂ ପଞ୍ଚକଷ୍ଟେଽତିକଷ୍ଟେ

॥ 11 ॥

ଶ୍ଲୋକ 15

କ୍ଷୁତ୍ କ୍ଷାମାନ୍ ରୂକ୍ଷରକ୍ଷୋରଦଖରନଖରକ୍ଷୁଣ୍ଣଵିକ୍ଷୋଭିତାକ୍ଷା-

-ନାମଗ୍ନାନାନ୍ଧକୂପେ କ୍ଷୁରମୁଖମୁଖରୈଃ ପକ୍ଷିଭିର୍ଵିକ୍ଷତାଙ୍ଗାନ୍ ।

ପୂଯାସୃଙ୍ମୂତ୍ରଵିଷ୍ଠାକୃମିକୁଲକଲିଲେ ତତ୍କ୍ଷଣକ୍ଷିପ୍ତଶକ୍ତ୍ଯା-

-ଦ୍ଯସ୍ତ୍ରଵ୍ରାତାର୍ଦିତାଂସ୍ତ୍ଵଦ୍ଦ୍ଵିଷ ଉପଜିହତେ ଵଜ୍ରକଲ୍ପା ଜଲୂକାଃ

॥ 12 ॥

ଶ୍ଲୋକ 16

ମାତର୍ମେ ମାତରିଶ୍ଵନ୍ ପିତରତୁଲଗୁରୋ ଭ୍ରାତରିଷ୍ଟାପ୍ତବନ୍ଧୋ

ସ୍ଵାମିନ୍ ସର୍ଵାନ୍ତରାତ୍ମନ୍ନଜର ଜରଯିତର୍ଜନ୍ମମୃତ୍ଯାମଯାନାମ୍ ।

ଗୋଵିନ୍ଦେ ଦେହି ଭକ୍ତିଂ ଭଵତି ଚ ଭଗଵନ୍ନୂର୍ଜିତାଂ ନିର୍ନିମିତ୍ତାଂ

ନିର୍ଵ୍ଯାଜାଂ ନିଶ୍ଚଲାଂ ସଦ୍ଗୁଣଗଣବୃହତୀଂ ଶାଶ୍ଵତୀମାଶୁ ଦେଵ

॥ 13 ॥

ଶ୍ଲୋକ 17

ଵିଷ୍ଣୋରତ୍ତ୍ଯୁତ୍ତମତ୍ଵାଦଖିଲଗୁଣଗଣୈସ୍ତତ୍ର ଭକ୍ତିଂ ଗରିଷ୍ଠାଂ

ଆଶ୍ଲିଷ୍ଟେ ଶ୍ରୀଧରାଭ୍ଯାମମୁମଥ ପରିଵାରାତ୍ମନା ସେଵକେଷୁ ।

ଯଃ ସନ୍ଧତ୍ତେ ଵିରିଞ୍ଚଶ୍ଵସନଵିହଗପାନନ୍ତରୁଦ୍ରେନ୍ଦ୍ରପୂର୍ଵେ-

-ଷ୍ଵାଧ୍ଯାଯଂସ୍ତାରତମ୍ଯଂ ସ୍ଫୁଟମଵତି ସଦା ଵାଯୁରସ୍ମଦ୍ଗୁରୁସ୍ତମ୍

॥ 14 ॥

ଶ୍ଲୋକ 18

ତତ୍ତ୍ଵଜ୍ଞାନ୍ ମୁକ୍ତିଭାଜଃ ସୁଖଯିସି ହି ଗୁରୋ ଯୋଗ୍ଯତାତାରତମ୍ଯା-

-ଦାଧତ୍ସେ ମିଶ୍ରବୁଦ୍ଧିଂସ୍ତ୍ରିଦିଵନିରଯଭୂଗୋଚରାନ୍ ନିତ୍ଯବଦ୍ଧାନ୍ ।

ତାମିସ୍ରାନ୍ଧାଦିକାଖ୍ଯେ ତମସି ସୁବହୁଲଂ ଦୁଃଖଯସ୍ଯନ୍ଯଥାଜ୍ଞାନ୍

ଵିଷ୍ଣୋରାଜ୍ଞାଭିରିତ୍ଥଂ ଶୃତିଶତମିତିହାସାଦି ଚାକର୍ଣଯାମଃ

॥ 15 ॥

ଶ୍ଲୋକ 19

ଵନ୍ଦେଽହଂ ତଂ ହନୂମାନିତି ମହିତମହାପୌରୁଷୋ ବାହୁଶାଲୀ

ଖ୍ଯାତସ୍ତେଽଗ୍ର୍ଯୋଽଵତାରଃ ସହିତ ଇହ ବହୁବ୍ରହ୍ମଚର୍ଯାଦିଧର୍ମୈଃ ।

ସସ୍ନେହାନାଂ ସହସ୍ଵାନହରହରହିତଂ ନିର୍ଦହନ୍ ଦେହଭାଜାଂ

ଅଂହୋମୋହାପହୋ ଯଃ ସ୍ପୃହଯତି ମହତୀଂ ଭକ୍ତିମଦ୍ଯାପି ରାମେ

॥ 16 ॥

ଶ୍ଲୋକ 20

ପ୍ରାକ୍ପଞ୍ଚାଶତ୍ସହସ୍ରୈର୍ଵ୍ଯଵହିତମହିତଂ ଯୋଜନୈଃ ପର୍ଵତଂ ତ୍ଵଂ

ଯାଵତ୍ସଞ୍ଜୀଵନାଦ୍ଯୌଷଧନିଧିମଧିକପ୍ରାଣ ଲଙ୍କାମନୈଷିଃ ।

ଅଦ୍ରାକ୍ଷୀଦୁତ୍ପତନ୍ତଂ ତତ ଉତ ଗିରିମୁତ୍ପାଟଯନ୍ତଂ ଗୃହୀତ୍ଵା

ଯାନ୍ତଂ ଖେ ରାଘଵାଙ୍ଘ୍ରୌ ପ୍ରଣତମପି ତଦୈକକ୍ଷଣେ ତ୍ଵାଂ ହି ଲୋକଃ

॥ 17 ॥

ଶ୍ଲୋକ 21

କ୍ଷିପ୍ତଃ ପଶ୍ଚାତ୍ସତ୍ସଲୀଲଂ ଶତମତୁଲମତେ ଯୋଜନାନାଂ ସ ଉଚ୍ଚ-

-ସ୍ତାଵଦ୍ଵିସ୍ତାରଵଂଶ୍ଚାପ୍ଯୁପଲଲଵ ଇଵ ଵ୍ଯଗ୍ରବୁଦ୍ଧ୍ଯା ତ୍ଵଯାଽତଃ ।

ସ୍ଵସ୍ଵସ୍ଥାନସ୍ଥିତାତିସ୍ଥିରଶକଲଶିଲାଜାଲସଂଶ୍ଲେଷନଷ୍ଟ-

-ଛ୍ଛେଦାଙ୍କଃ ପ୍ରାଗିଵାଭୂତ୍ କପିଵରଵପୁଷସ୍ତେ ନମଃ କୌଶଲାଯ

॥ 18 ॥

ଶ୍ଲୋକ 22

ଦୃଷ୍ଟ୍ଵା ଦୁଷ୍ଟାଧିପୋରଃ ସ୍ଫୁଟିତକନକସଦ୍ଵର୍ମ ଘୃଷ୍ଟାସ୍ଥିକୂଟଂ

ନିଷ୍ପିଷ୍ଟଂ ହାଟକାଦ୍ରିପ୍ରକଟତଟତଟାକାତିଶଙ୍କୋ ଜନୋଽଭୂତ୍ ।

ଯେନାଽଜୌ ରାଵଣାରିପ୍ରିଯନଟନପଟୁର୍ମୁଷ୍ଟିରିଷ୍ଟଂ ପ୍ରଦେଷ୍ଟୁଂ

କିଂ ନେଷ୍ଟେ ମେ ସ ତେଽଷ୍ଟାପଦକଟକତଟିତ୍କୋଟିଭାମୃଷ୍ଟକାଷ୍ଠଃ

॥ 19 ॥

ଶ୍ଲୋକ 23

ଦେଵ୍ଯାଦେଶପ୍ରଣୀତିଦୃହିଣହରଵରାଵଧ୍ଯରକ୍ଷୋଵିଘାତା-

-ଦ୍ଯାସେଵୋଦ୍ଯଦ୍ଦଯାର୍ଦ୍ରଃ ସହଭୁଜମକରୋଦ୍ରାମନାମା ମୁକୁନ୍ଦଃ ।

ଦୁଷ୍ପ୍ରାପେ ପାରମେଷ୍ଠ୍ଯେ କରତଲମତୁଲଂ ମୂର୍ଧିଵିନ୍ଯସ୍ଯ ଧନ୍ଯଂ

ତନ୍ଵନ୍ଭୂଯଃ ପ୍ରଭୂତପ୍ରଣଯଵିକସିତାବ୍ଜେକ୍ଷଣସ୍ତ୍ଵେକ୍ଷମାଣଃ

॥ 20 ॥

ଶ୍ଲୋକ 24

ଜଘ୍ନେ ନିଘ୍ନେନ ଵିଘ୍ନୋ ବହୁଲବଲବକଧ୍ଵଂସନାଦ୍ଯେନ ଶୋଚ-

-ଦ୍ଵିପ୍ରାନୁକ୍ରୋଶପାଶୈରସୁଵିଧୃତିସୁଖସ୍ଯୈକଚକ୍ରାଜନାନାମ୍ ।

ତସ୍ମୈ ତେ ଦେଵ କୁର୍ମଃ କୁରୁକୁଲପତଯେ କର୍ମଣା ଚ ପ୍ରଣାମାନ୍

କିର୍ମୀରଂ ଦୁର୍ମତୀନାଂ ପ୍ରଥମମଥ ଚ ଯୋ ନର୍ମଣା ନିର୍ମମାଥ

॥ 21 ॥

ଶ୍ଲୋକ 25

ନିର୍ମୃଦ୍ନନ୍ନତ୍ଯଯତ୍ନଂ ଵିଜରଵର ଜରାସନ୍ଧକାଯାସ୍ଥିସନ୍ଧୀନ୍

ଯୁଦ୍ଧେ ତ୍ଵଂ ସ୍ଵଧ୍ଵରେ ଵା ପଶୁମିଵ ଦମଯନ୍ ଵିଷ୍ଣୁପକ୍ଷଦ୍ଵିଡୀଶମ୍ ।

ଯାଵତ୍ପ୍ରତ୍ଯକ୍ଷଭୂତଂ ନିଖିଲମଖଭୁଜଂ ତର୍ପଯାମାସିଥାସୌ

ତାଵତ୍ଯାଽଯୋଜି ତୃପ୍ତ୍ଯା କିମୁ ଵଦ ଭଗଵନ୍ ରାଜସୂଯାଶ୍ଵମେଧେ

॥ 22 ॥

ଶ୍ଲୋକ 26

କ୍ଷ୍ଵେଲାକ୍ଷୀଣାଟ୍ଟହାସଂ ତଵ ରଣମରିହନ୍ନୁଦ୍ଗଦୋଦ୍ଦାମବାହୋଃ

ବହ୍ଵକ୍ଷୌହିଣ୍ଯନୀକକ୍ଷପଣସୁନିପୁଣଂ ଯସ୍ଯ ସର୍ଵୋତ୍ତମସ୍ଯ ।

ଶୁଶ୍ରୂଷାର୍ଥଂ ଚକର୍ଥ ସ୍ଵଯମଯମଥ ସଂଵକ୍ତୁମାନନ୍ଦତୀର୍ଥ-

-ଶ୍ରୀମନ୍ନାମନ୍ସମର୍ଥସ୍ତ୍ଵମପି ହି ଯୁଵଯୋଃ ପାଦପଦ୍ମଂ ପ୍ରପଦ୍ଯେ

॥ 23 ॥

ଶ୍ଲୋକ 27

ଦୃହ୍ଯନ୍ତୀଂ ହୃଦୃହଂ ମାଂ ଦୃତମନିଲ ବଲାଦ୍ଦ୍ରାଵଯନ୍ତୀମଵିଦ୍ଯା-

-ନିଦ୍ରାଂ ଵିଦ୍ରାଵ୍ଯ ସଦ୍ଯୋରଚନପଟୁମଥାଽପାଦ୍ଯ ଵିଦ୍ଯାସମୁଦ୍ର ।

ଵାଗ୍ଦେଵୀ ସା ସୁଵିଦ୍ଯାଦ୍ରଵିଣଦ ଵିଦିତା ଦ୍ରୌପଦୀ ରୁଦ୍ରପତ୍ନ୍ଯା-

-ଦୁଦ୍ରିକ୍ତା ଦ୍ରାଗଭଦ୍ରାଦ୍ରହଯତୁ ଦଯିତା ପୂର୍ଵଭୀମାଽଜ୍ଞଯା ତେ

॥ 24 ॥

ଶ୍ଲୋକ 28

ଯାଭ୍ଯାଂ ଶୁଶ୍ରୂଷୁରାସୀଃ କୁରୁକୁଲଜନନେ କ୍ଷତ୍ରଵିପ୍ରୋଦିତାଭ୍ଯାଂ

ବ୍ରହ୍ମଭ୍ଯାଂ ବୃଂହିତାଭ୍ଯାଂ ଚିତସୁଖଵପୁଷା କୃଷ୍ଣନାମାସ୍ପଦାଭ୍ଯାମ୍ ।

ନିର୍ଭେଦାଭ୍ଯାଂ ଵିଶେଷାଦ୍ଵିଵଚନଵିଷଯାଭ୍ଯାମମୂଭ୍ଯାମୁଭାଭ୍ଯାଂ

ତୁଭ୍ଯଂ ଚ କ୍ଷେମଦେଭ୍ଯଃ ସରିସିଜଵିଲସଲ୍ଲୋଚନେଭ୍ଯୋ ନମୋଽସ୍ତୁ

॥ 25 ॥

ଶ୍ଲୋକ 29

ଗଚ୍ଛନ୍ ସୌଗନ୍ଧିକାର୍ଥଂ ପଥି ସ ହନୁମତଃ ପୁଚ୍ଛମଚ୍ଛସ୍ଯ ଭୀମଃ

ପ୍ରୋଦ୍ଧର୍ତୁଂ ନାଶକତ୍ସ ତ୍ଵମୁମୁରୁଵପୁଷା ଭୀଷଯାମାସ ଚେତି ।

ପୂର୍ଣଜ୍ଞାନୌଜସୋସ୍ତେ ଗୁରୁତମ ଵପୁଷୋଃ ଶ୍ରୀମଦାନନ୍ଦତୀର୍ଥ

କ୍ରୀଡାମାତ୍ରଂ ତଦେତତ୍ ପ୍ରମଦଦ ସୁଧିଯାଂ ମୋହକ ଦ୍ଵେଷଭାଜାମ୍

॥ 26 ॥

ଶ୍ଲୋକ 30

ବହ୍ଵୀଃ କୋଟୀରଟୀକଃ କୁଟଲକଟୁମତୀନୁତ୍କଟାଟୋପକୋପାନ୍

ଦ୍ରାକ୍ଚ ତ୍ଵଂ ସତ୍ଵରତ୍ଵାଚ୍ଚରଣଦ ଗଦଯା ପୋଥଯାମାସିଥାରୀନ୍ ।

ଉନ୍ମଥ୍ଯାତଥ୍ଯମିଥ୍ଯାତ୍ଵଵଚନଵଚନାନୁତ୍ପଥସ୍ଥାଂସ୍ତଥାଽନ୍ଯାନ୍

ପ୍ରାଯଚ୍ଛଃ ସ୍ଵପ୍ରିଯାଯୈ ପ୍ରିଯତମକୁସୁମଂ ପ୍ରାଣ ତସ୍ମୈ ନମସ୍ତେ

॥ 27 ॥

ଶ୍ଲୋକ 31

ଦେହାଦୁତ୍କ୍ରାମିତାନାମଧିପତିରସତାମକ୍ରମାଦ୍ଵକ୍ରବୁଦ୍ଧିଃ

କ୍ରୁଦ୍ଧଃ କ୍ରୋଧୈକଵଶ୍ଯଃ କ୍ରିମିରିଵ ମଣିମାନ୍ ଦୁଷ୍କୃତୀ ନିଷ୍କ୍ରିଯାର୍ଥମ୍ ।

ଚକ୍ରେ ଭୂଚକ୍ରମେତ୍ଯ କ୍ରକଚମିଵ ସତାଂ ଚେତସଃ କଷ୍ଟଶାସ୍ତ୍ରଂ

ଦୁସ୍ତର୍କଂ ଚକ୍ରପାଣେର୍ଗୁଣଗଣଵିରହଂ ଜୀଵତାଂ ଚାଧିକୃତ୍ଯ

॥ 28 ॥

ଶ୍ଲୋକ 32

ତଦ୍ଦୁଷ୍ପ୍ରେକ୍ଷାନୁସାରାତ୍କତିପଯକୁନରୈରାଦୃତୋଽନ୍ଯୈର୍ଵିସୃଷ୍ଟୋ

ବ୍ରହ୍ମାଽହଂ ନିର୍ଗୁଣୋଽହଂ ଵିତଥମିଦମିତି ହ୍ଯେଷ ପାଷଣ୍ଡଵାଦଃ ।

ତଦ୍ଯୁକ୍ତ୍ଯାଭାସଜାଲପ୍ରସରଵିଷତରୂଦ୍ଦାହଦକ୍ଷପ୍ରମାଣ-

-ଜ୍ଵାଲାମାଲାଧରାଗ୍ନିଃ ପଵନ ଵିଜଯତେ ତେଽଵତାରସ୍ତୃତୀଯଃ

॥ 29 ॥

ଶ୍ଲୋକ 33

ଆକ୍ରୋଶନ୍ତୋ ନିରାଶା ଭଯଭରଵିଵଶସ୍ଵାଶଯାଶ୍ଛିନ୍ନଦର୍ପା

ଵାଶନ୍ତୋ ଦେଶନାଶସ୍ଵିତି ବତ କୁଧିଯାଂ ନାଶମାଶାଦଶାଽଶୁ ।

ଧାଵନ୍ତୋଽଶ୍ଲୀଲଶୀଲା ଵିତଥଶପଥଶାପାଶିଵାଃ ଶାନ୍ତଶୌର୍ଯା-

-ସ୍ତ୍ଵଦ୍ଵ୍ଯାଖ୍ଯାସିଂହନାଦେ ସପଦି ଦଦୃଶିରେ ମାଯିଗୋମାଯଵସ୍ତେ

॥ 30 ॥

ଶ୍ଲୋକ 34

ତ୍ରିଷ୍ଵପ୍ଯେଵାଵତାରେଷ୍ଵରିଭିରପଘୃଣଂ ହିଂସିତୋ ନିର୍ଵିକାରଃ

ସର୍ଵଜ୍ଞଃ ସର୍ଵଶକ୍ତିଃ ସକଲଗୁଣଗଣାପୂର୍ଣରୂପପ୍ରଗଲ୍ଭଃ ।

ସ୍ଵଚ୍ଛଃ ସ୍ଵଚ୍ଛନ୍ଦମୃତ୍ଯୁଃ ସୁଖଯସି ସୁଜନଂ ଦେଵ କିଂ ଚିତ୍ରମତ୍ର

ତ୍ରାତା ଯସ୍ଯ ତ୍ରିଧାମା ଜଗଦୁତ ଵଶଗଂ କିଙ୍କରାଃ ଶଙ୍କରାଦ୍ଯାଃ

॥ 31 ॥

ଶ୍ଲୋକ 35

ଉଦ୍ଯନ୍ମନ୍ଦସ୍ମିତଶ୍ରୀମୃଦୁ ମଧୁମଧୁରାଲାପପୀଯୂଷଧାରା-

-ପୂରାସେକୋପଶାନ୍ତାସୁଖସୁଜନମନୋଲୋଚନାପୀଯମାନମ୍ ।

ସନ୍ଦ୍ରକ୍ଷ୍ଯେ ସୁନ୍ଦରଂ ସନ୍ଦୁହଦିହ ମହଦାନନ୍ଦମାନନ୍ଦତୀର୍ଥ

ଶ୍ରୀମଦ୍ଵକ୍ତ୍ରେନ୍ଦୁବିମ୍ବଂ ଦୁରତନୁଦୁଦିତଂ ନିତ୍ଯଦାଽହଂ କଦା ନୁ

॥ 32 ॥

ଶ୍ଲୋକ 36

ପ୍ରାଚୀନାଚୀର୍ଣପୁଣ୍ଯୋଚ୍ଚଯଚତୁରତରାଚାରତଶ୍ଚାରୁଚିତ୍ତା-

-ନତ୍ଯୁଚ୍ଚାଂ ରୋଚଯନ୍ତୀଂ ଶ୍ରୁତିଚିତଵଚନାଂ ଶ୍ରାଵକାଂଶ୍ଚୋଦ୍ଯଚୁଞ୍ଚୂନ୍ ।

ଵ୍ଯାଖ୍ଯାମୁତ୍ଖାତଦୁଃଖାଂ ଚିରମୁଚିତମହାଚାର୍ଯ ଚିନ୍ତାରତାଂସ୍ତେ

ଚିତ୍ରାଂ ସଚ୍ଛାସ୍ତ୍ରକର୍ତାଶ୍ଚରଣପରିଚରାଞ୍ଛ୍ରାଵଯାସ୍ମାଂଶ୍ଚ କିଞ୍ଚିତ୍

॥ 33 ॥

ଶ୍ଲୋକ 37

ପୀଠେ ରତ୍ନୋକପକ୍ଲୃପ୍ତେ ରୁଚିରରୁଚିମଣିଜ୍ଯୋତିଷା ସନ୍ନିଷଣ୍ଣଂ

ବ୍ରହ୍ମାଣଂ ଭାଵିନଂ ତ୍ଵାଂ ଜ୍ଵଲତି ନିଜପଦେ ଵୈଦିକାଦ୍ଯା ହି ଵିଦ୍ଯାଃ ।

ସେଵନ୍ତେ ମୂର୍ତିମତ୍ଯଃ ସୁଚରିତ ଚରିତଂ ଭାତି ଗନ୍ଧର୍ଵ ଗୀତଂ

ପ୍ରତ୍ଯେକଂ ଦେଵସଂସତ୍ସ୍ଵପି ତଵ ଭଗଵନ୍ନର୍ତିତଦ୍ଯୋଵଧୂଷୁ

॥ 34 ॥

ଶ୍ଲୋକ 38

ସାନୁକ୍ରୋଶୈରଜସ୍ରଂ ଜନିମୃତିନିରଯାଦ୍ଯୂର୍ମିମାଲାଵିଲେଽସ୍ମିନ୍

ସଂସାରାବ୍ଧୌ ନିମଗ୍ନାନ୍ ଶରଣମଶରଣାନିଚ୍ଛତୋ ଵୀକ୍ଷ୍ଯ ଜନ୍ତୂନ୍ ।

ଯୁଷ୍ମାଭିଃ ପ୍ରାର୍ଥିତଃ ସନ୍ ଜଲନିଧିଶଯନଃ ସତ୍ଯଵତ୍ଯାଂ ମହର୍ଷେ-

-ର୍ଵ୍ଯକ୍ତଶ୍ଚିନ୍ମାତ୍ରମୂର୍ତିର୍ନ ଖଲୁ ଭଗଵତଃ ପ୍ରାକୃତୋ ଜାତୁ ଦେହଃ

॥ 35 ॥

ଶ୍ଲୋକ 39

ଅସ୍ତଵ୍ଯସ୍ତଂ ସମସ୍ତଶ୍ରୁତିଗତମଧମୈ ରତ୍ନପୂଗଂ ଯଥାଽନ୍ଧୈ-

-ରର୍ଥଂ ଲୋକୋପକୃତ୍ଯୈ ଗୁଣଗଣନିଲଯଃ ସୂତ୍ରଯାମାସ କୃତ୍ସ୍ନମ୍ ।

ଯୋଽସୌ ଵ୍ଯାସାଭିଧାନସ୍ତମହମହରହର୍ଭକ୍ତିତସ୍ତ୍ଵତ୍ପ୍ରସାଦାତ୍

ସଦ୍ଯୋ ଵିଦ୍ଯୋପଲବ୍ଧ୍ଯୈ ଗୁରୁତମମଗୁରୁଂ ଦେଵଦେଵଂ ନମାମି

॥ 36 ॥

ଶ୍ଲୋକ 40

ଆଜ୍ଞାମନ୍ଯୈରଧାର୍ଯାଂ ଶିରସି ପରିସରଦ୍ରଶ୍ମିକୋଟୀରକୋଟୌ

କୃଷ୍ଣସ୍ଯାକ୍ଲିଷ୍ଟକର୍ମା ଦଧଦନୁସରାଣାଦର୍ଥିତୋ ଦେଵସଙ୍ଘୈଃ ।

ଭୂମାଵାଗତ୍ଯ ଭୂମନ୍ନସୁକରମକରୋର୍ବ୍ରହ୍ମସୂତ୍ରସ୍ଯ ଭାଷ୍ଯଂ

ଦୁର୍ଭାଷ୍ଯଂ ଵ୍ଯସ୍ଯ ଦସ୍ଯୋର୍ମଣିମତ ଉଦିତଂ ଵେଦସଦ୍ଯୁକ୍ତିଭିସ୍ତ୍ଵମ୍

॥ 37 ॥

ଶ୍ଲୋକ 41

ଭୂତ୍ଵା କ୍ଷେତ୍ରେ ଵିଶୁଦ୍ଧେ ଦ୍ଵିଜଗଣନିଲଯେ ରୌପ୍ଯପୀଠାଭିଧାନେ

ତତ୍ରାପି ବ୍ରହ୍ମଜାତିସ୍ତ୍ରିଭୁଵନଵିଶଦେ ମଧ୍ଯଗେହାଖ୍ଯଗେହେ ।

ପାରିଵ୍ରାଜ୍ଯାଧିରାଜଃ ପୁନରପି ବଦରୀଂ ପ୍ରାପ୍ଯ କୃଷ୍ଣଂ ଚ ନତ୍ଵା

କୃତ୍ଵା ଭାଷ୍ଯାଣି ସମ୍ଯଗ୍ ଵ୍ଯତନୁତ ଚ ଭଵାନ୍ ଭାରତାର୍ଥପ୍ରକାଶମ୍

॥ 38 ॥

ଶ୍ଲୋକ 42

ଵନ୍ଦେ ତଂ ତ୍ଵାଂ ସୁପୂର୍ଣପ୍ରମତିମନୁଦିନାସେଵିତଂ ଦେଵଵୃନ୍ଦୈଃ

ଵନ୍ଦେ ଵନ୍ଦାରୁମୀଶେ ଶ୍ରିଯ ଉତ ନିଯତଂ ଶ୍ରୀମଦାନନ୍ଦତୀର୍ଥମ୍ ।

ଵନ୍ଦେ ମନ୍ଦାକିନୀସତ୍ସରିଦମଲଜଲାସେକସାଧିକ୍ଯସଙ୍ଗଂ

ଵନ୍ଦେଽହଂ ଦେଵ ଭକ୍ତ୍ଯା ଭଵଭଯଦହନଂ ସଜ୍ଜନାନ୍ମୋଦଯନ୍ତମ୍

॥ 39 ॥

ଶ୍ଲୋକ 43

ସୁବ୍ରହ୍ମଣ୍ଯାଖ୍ଯସୂରେଃ ସୁତ ଇତି ସୁଭୃଶଂ କେଶଵାନନ୍ଦତୀର୍ଥ-

ଶ୍ରୀମତ୍ପାଦାବ୍ଜଭକ୍ତଃ ସ୍ତୁତିମକୃତ ହରେର୍ଵାଯୁଦେଵସ୍ଯ ଚାସ୍ଯ ।

ତତ୍ପାଦାର୍ଚାଦରେଣ ଗ୍ରଥିତପଦଲସନ୍ମାଲଯା ତ୍ଵେତଯା ଯେ

ସଂରାଧ୍ଯାମୂ ନମନ୍ତି ପ୍ରତତମତିଗୁଣା ମୁକ୍ତିମେତେ ଵ୍ରଜନ୍ତି

॥ 40 ॥

ଶ୍ଲୋକ 44

ଅଥ ଶ୍ରୀନଖସ୍ତୁତିଃ

ପାନ୍ତ୍ଵସ୍ମାନ୍ ପୁରୁହୂତଵୈରିବଲଵନ୍ମାତଙ୍ଗମାଦ୍ଯଦ୍ଘଟା

କୁମ୍ଭୋଚ୍ଚାଦ୍ରିଵିପାଟନାଧିକପଟୁପ୍ରତ୍ଯେକଵଜ୍ରାଯିତାଃ ।

ଶ୍ରୀମତ୍କଣ୍ଠୀରଵାସ୍ଯ ପ୍ରତତ ସୁନଖରା ଦାରିତାରାତିଦୂର-

ପ୍ରଧ୍ଵସ୍ତଧ୍ଵାନ୍ତଶାନ୍ତପ୍ରଵିତତମନସା ଭାଵିତା ନାକିଵୃନ୍ଦୈଃ

॥ 41 ॥

ଶ୍ଲୋକ 45

ଲକ୍ଷ୍ମୀକାନ୍ତ ସମନ୍ତତୋଽଵିକଲଯନ୍ ନୈଵେଶିତୁସ୍ତେ ସମଂ

ପଶ୍ଯାମ୍ଯୁତ୍ତମଵସ୍ତୁ ଦୂରତରତୋଽପାସ୍ତଂ ରସୋ ଯୋଽଷ୍ଟମଃ ।

ଯଦ୍ରୋଷୋତ୍କରଦକ୍ଷନେତ୍ରକୁଟିଲପ୍ରାନ୍ତୋତ୍ଥିତାଗ୍ନିସ୍ଫୁରତ୍

ଖଦ୍ଯୋତୋପମଵିସ୍ଫୁଲିଙ୍ଗଭସିତା ବ୍ରହ୍ମେଶଶକ୍ରୋତ୍କରାଃ

॥ 1 ॥

ଶ୍ଲୋକ 46

ଇତି ଶ୍ରୀତ୍ରିଵିକ୍ରମପଣ୍ଡିତାଚାର୍ଯ ଵିରଚିତା ଵାଯୁସ୍ତୁତିଃ ସମାପ୍ତା ॥