Sri Hari Vayu Stuti

zrI hari vAyu stuti

zloka 1

atha nakhastutiH

pAntvasmAn puruhUtavairibalavanmAtaGgamAdyadghaTA-

-kumbhoccAdrivipATanAdhikapaTu pratyeka vajrAyitAH |

zrImatkaNThIravAsyapratatasunakharA dAritArAtidUra-

-pradhvastadhvAntazAntapravitatamanasA bhAvitA bhUribhAgaiH || 1 ||

lakSmIkAnta samantato'pi kalayan naivezituste samaM

pazyAmyuttamavastu dUrataratopAstaM raso yo'STamaH |

yadroSotkara dakSa netra kuTila prAntotthitAgni sphurat

khadyotopama visphuliGgabhasitA brahmezazakrotkarAH || 2 ||

atha vAyustutiH

zrImadviSNvaGghriniSThAtiguNagurutamazrImadAnandatIrtha-

-trailokyAcAryapAdojjvalajalajalasatpAMsavo'smAn punantu |

vAcAM yatra praNetrI tribhuvanamahitA zAradA zAradendu-

-jyotsnAbhadrasmitazrIdhavalitakakubhA premabhAraM babhAra || 1 ||

utkaNThAkuNThakolAhalajavavijitAjasrasevAnuvRddha-

-prAjJAtmajJAnadhUtAndhatamasasumanomauliratnAvalInAm |

bhaktyudrekAvagADhapraghaTanasadhaTAtkArasaGghRSyamANa-

prAntaprAgryAGghripIThotthitakanakarajaHpiJjarAraJjitAzAH || 2 ||

janmAdhivyAdhyupAdhipratihativirahaprApakANAM guNAnAM

agryANAmarpakANAM ciramuditacidAnandasandohadAnAm |

eteSAmeSa doSapramuSitamanasAM dveSiNAM dUSakANAM

daityAnAmArtimandhe tamasi vidadhatAM saMstave nAsmi zaktaH || 3 ||

asyAviSkartukAmaM kalimalakaluSe'smin jane jJAnamArgaM

vandyaM candrendrarudradyumaNiphaNivayonAyakAdyairihAdya |

madhvAkhyaM mantrasiddhaM kimuta kRtavato mArutasyAvatAraM

pAtAraM pArameSTyaM padamapavipadaH prApturApannapuMsAm || 4 ||

udyadvidyutpracaNDAM nijarucinikaravyAptalokAvakAzo

bibhradbhImo bhuje yo'bhyuditadinakarAbhAGgadADhya prakANDe |

vIryoddhAryAM gadAgryAmayamiha sumatiM vAyudevo vidadhyAt

adhyAtmajJAnanetA yativaramahito bhUmibhUSAmaNirme || 5 ||

saMsArottApanityopazamadasadayasnehahAsAmbupUra-

-prodyadvidyAnavadyadyutimaNikiraNazreNisampUritAzaH |

zrIvatsAGkAdhivAsocitatarasaralazrImadAnandatIrtha-

-kSIrAmbhodhirvibhindyAdbhavadanabhimataM bhUri me bhUtihetuH || 6 ||

mUrdhanyeSo'Jjalirme dRDhataramiha te badhyate bandhapAza-

-cchetre dAtre sukhAnAM bhajati bhuvi bhaviSyadvidhAtre dyubhartre |

atyantaM santataM tvaM pradiza padayuge hanta santApabhAjA-

-masmAkaM bhaktimekAM bhagavata uta te mAdhavasyAtha vAyoH || 7 ||

sAbhroSNAbhIzuzubhraprabhamabhaya nabho bhUribhUbhRdvibhUti-

-bhrAjiSNurbhUrRbhUNAM bhavanamapi vibho'bhedi babhre babhUve |

yena bhrUvibhramaste bhramayatu subhRzaM babhruvaddurbhRtAzAn

bhrAntirbhedAvabhAsastviti bhayamabhibhUrbhokSyato mAyibhikSUn || 8 ||

ye'muM bhAvaM bhajante suramukhasujanArAdhitaM te tRtIyaM

bhAsante bhAsuraiste sahacaracalitaizcAmaraizcAruveSAH |

vaikuNThe kaNThalagnasthirazucivilasatkAntitAruNyalIlA-

lAvaNyApUrNakAntAkucabharasulabhAzleSasammodasAndrAH || 9 ||

AnandAnmandamandA dadati hi marutaH kundamandAranandyA-

-vartAmodAn dadhAnA mRdupadamuditodgItakaiH sundarINAm |

vRndairAvandyamuktendvahimagumadanAhIndradevendrasevye

maukunde mandire'sminnaviratamudayanmodinAM devadeva || 10 ||

uttaptA'tyutkaTatviT prakaTakaTakaTadhvAnasaGghaTTanodya-

-dvidyudvyUDhasphuliGgaprakaravikiraNotkvAthite bAdhitAGgAn |

udgADhaM pAtyamAnA tamasi tata itaH kiGkaraiH paGkile te

paGktirgrAvNAM garimNA glapayati hi bhavadveSiNo vidvadAdya || 11 ||

asminnasmadgurUNAM haricaraNaciradhyAnasanmaGgalAnAM

yuSmAkaM pArzvabhUmiM dhRtaraNaraNikasvargisevyAM prapannaH |

yastUdAste sa Aste'dhibhavamasulabhaklezanirmUkamasta-

-prAyAnandaM kathaJcinna vasati satataM paJcakaSTe'tikaSTe || 12 ||

kSut kSAmAn rUkSarakSoradakharanakharakSuNNavikSobhitAkSA-

-nAmagnAnAndhakUpe kSuramukhamukharaiH pakSibhirvikSatAGgAn |

pUyAsRGmUtraviSThAkRmikulakalile tatkSaNakSiptazaktyA-

-dyastravrAtArditAMstvaddviSa upajihate vajrakalpA jalUkAH || 13 ||

mAtarme mAtarizvan pitaratulaguro bhrAtariSTAptabandho

svAmin sarvAntarAtmannajara jarayitarjanmamRtyAmayAnAm |

govinde dehi bhaktiM bhavati ca bhagavannUrjitAM nirnimittAM

nirvyAjAM nizcalAM sadguNagaNabRhatIM zAzvatImAzu deva || 14 ||

viSNorattyuttamatvAdakhilaguNagaNaistatra bhaktiM gariSThAM

AzliSTe zrIdharAbhyAmamumatha parivArAtmanA sevakeSu |

yaH sandhatte viriJcazvasanavihagapAnantarudrendrapUrve-

-SvAdhyAyaMstAratamyaM sphuTamavati sadA vAyurasmadgurustam || 15 ||

tattvajJAn muktibhAjaH sukhayisi hi guro yogyatAtAratamyA-

-dAdhatse mizrabuddhiMstridivanirayabhUgocarAn nityabaddhAn |

tAmisrAndhAdikAkhye tamasi subahulaM duHkhayasyanyathAjJAn

viSNorAjJAbhiritthaM zRtizatamitihAsAdi cAkarNayAmaH || 16 ||

vande'haM taM hanUmAniti mahitamahApauruSo bAhuzAlI

khyAtaste'gryo'vatAraH sahita iha bahubrahmacaryAdidharmaiH |

sasnehAnAM sahasvAnaharaharahitaM nirdahan dehabhAjAM

aMhomohApaho yaH spRhayati mahatIM bhaktimadyApi rAme || 17 ||

prAkpaJcAzatsahasrairvyavahitamahitaM yojanaiH parvataM tvaM

yAvatsaJjIvanAdyauSadhanidhimadhikaprANa laGkAmanaiSiH |

adrAkSIdutpatantaM tata uta girimutpATayantaM gRhItvA

yAntaM khe rAghavAGghrau praNatamapi tadaikakSaNe tvAM hi lokaH || 18 ||

kSiptaH pazcAtsatsalIlaM zatamatulamate yojanAnAM sa ucca-

-stAvadvistAravaMzcApyupalalava iva vyagrabuddhyA tvayA'taH |

svasvasthAnasthitAtisthirazakalazilAjAlasaMzleSanaSTa-

-chchedAGkaH prAgivAbhUt kapivaravapuSaste namaH kauzalAya || 19 ||

dRSTvA duSTAdhiporaH sphuTitakanakasadvarma ghRSTAsthikUTaM

niSpiSTaM hATakAdriprakaTataTataTAkAtizaGko jano'bhUt |

yenA'jau rAvaNAripriyanaTanapaTurmuSTiriSTaM pradeSTuM

kiM neSTe me sa te'STApadakaTakataTitkoTibhAmRSTakASThaH || 20 ||

devyAdezapraNItidRhiNaharavarAvadhyarakSovighAtA-

-dyAsevodyaddayArdraH sahabhujamakarodrAmanAmA mukundaH |

duSprApe pArameSThye karatalamatulaM mUrdhivinyasya dhanyaM

tanvanbhUyaH prabhUtapraNayavikasitAbjekSaNastvekSamANaH || 21 ||

jaghne nighnena vighno bahulabalabakadhvaMsanAdyena zoca-

-dviprAnukrozapAzairasuvidhRtisukhasyaikacakrAjanAnAm |

tasmai te deva kurmaH kurukulapataye karmaNA ca praNAmAn

kirmIraM durmatInAM prathamamatha ca yo narmaNA nirmamAtha || 22 ||

nirmRdnannatyayatnaM vijaravara jarAsandhakAyAsthisandhIn

yuddhe tvaM svadhvare vA pazumiva damayan viSNupakSadviDIzam |

yAvatpratyakSabhUtaM nikhilamakhabhujaM tarpayAmAsithAsau

tAvatyA'yoji tRptyA kimu vada bhagavan rAjasUyAzvamedhe || 23 ||

kSvelAkSINATTahAsaM tava raNamarihannudgadoddAmabAhoH

bahvakSauhiNyanIkakSapaNasunipuNaM yasya sarvottamasya |

zuzrUSArthaM cakartha svayamayamatha saMvaktumAnandatIrtha-

-zrImannAmansamarthastvamapi hi yuvayoH pAdapadmaM prapadye || 24 ||

dRhyantIM hRdRhaM mAM dRtamanila balAddrAvayantImavidyA-

-nidrAM vidrAvya sadyoracanapaTumathA'pAdya vidyAsamudra |

vAgdevI sA suvidyAdraviNada viditA draupadI rudrapatnyA-

-dudriktA drAgabhadrAdrahayatu dayitA pUrvabhImA'jJayA te || 25 ||

yAbhyAM zuzrUSurAsIH kurukulajanane kSatraviproditAbhyAM

brahmabhyAM bRMhitAbhyAM citasukhavapuSA kRSNanAmAspadAbhyAm |

nirbhedAbhyAM vizeSAdvivacanaviSayAbhyAmamUbhyAmubhAbhyAM

tubhyaM ca kSemadebhyaH sarisijavilasallocanebhyo namo'stu || 26 ||

gacchan saugandhikArthaM pathi sa hanumataH pucchamacchasya bhImaH

proddhartuM nAzakatsa tvamumuruvapuSA bhISayAmAsa ceti |

pUrNajJAnaujasoste gurutama vapuSoH zrImadAnandatIrtha

krIDAmAtraM tadetat pramadada sudhiyAM mohaka dveSabhAjAm || 27 ||

bahvIH koTIraTIkaH kuTalakaTumatInutkaTATopakopAn

drAkca tvaM satvaratvAccaraNada gadayA pothayAmAsithArIn |

unmathyAtathyamithyAtvavacanavacanAnutpathasthAMstathA'nyAn

prAyacchaH svapriyAyai priyatamakusumaM prANa tasmai namaste || 28 ||

dehAdutkrAmitAnAmadhipatirasatAmakramAdvakrabuddhiH

kruddhaH krodhaikavazyaH krimiriva maNimAn duSkRtI niSkriyArtham |

cakre bhUcakrametya krakacamiva satAM cetasaH kaSTazAstraM

dustarkaM cakrapANerguNagaNavirahaM jIvatAM cAdhikRtya || 29 ||

tadduSprekSAnusArAtkatipayakunarairAdRto'nyairvisRSTo

brahmA'haM nirguNo'haM vitathamidamiti hyeSa pASaNDavAdaH |

tadyuktyAbhAsajAlaprasaraviSatarUddAhadakSapramANa-

-jvAlAmAlAdharAgniH pavana vijayate te'vatArastRtIyaH || 30 ||

Akrozanto nirAzA bhayabharavivazasvAzayAzchinnadarpA

vAzanto dezanAzasviti bata kudhiyAM nAzamAzAdazA'zu |

dhAvanto'zlIlazIlA vitathazapathazApAzivAH zAntazauryA-

-stvadvyAkhyAsiMhanAde sapadi dadRzire mAyigomAyavaste || 31 ||

triSvapyevAvatAreSvaribhirapaghRNaM hiMsito nirvikAraH

sarvajJaH sarvazaktiH sakalaguNagaNApUrNarUpapragalbhaH |

svacchaH svacchandamRtyuH sukhayasi sujanaM deva kiM citramatra

trAtA yasya tridhAmA jagaduta vazagaM kiGkarAH zaGkarAdyAH || 32 ||

udyanmandasmitazrImRdu madhumadhurAlApapIyUSadhArA-

-pUrAsekopazAntAsukhasujanamanolocanApIyamAnam |

sandrakSye sundaraM sanduhadiha mahadAnandamAnandatIrtha

zrImadvaktrendubimbaM duratanududitaM nityadA'haM kadA nu || 33 ||

prAcInAcIrNapuNyoccayacaturatarAcAratazcArucittA-

-natyuccAM rocayantIM zruticitavacanAM zrAvakAMzcodyacuJcUn |

vyAkhyAmutkhAtaduHkhAM ciramucitamahAcArya cintAratAMste

citrAM sacchAstrakartAzcaraNaparicarAJchrAvayAsmAMzca kiJcit || 34 ||

pIThe ratnokapaklRpte rucirarucimaNijyotiSA sanniSaNNaM

brahmANaM bhAvinaM tvAM jvalati nijapade vaidikAdyA hi vidyAH |

sevante mUrtimatyaH sucarita caritaM bhAti gandharva gItaM

pratyekaM devasaMsatsvapi tava bhagavannartitadyovadhUSu || 35 ||

sAnukrozairajasraM janimRtinirayAdyUrmimAlAvile'smin

saMsArAbdhau nimagnAn zaraNamazaraNAnicchato vIkSya jantUn |

yuSmAbhiH prArthitaH san jalanidhizayanaH satyavatyAM maharSe-

-rvyaktazcinmAtramUrtirna khalu bhagavataH prAkRto jAtu dehaH || 36 ||

astavyastaM samastazrutigatamadhamai ratnapUgaM yathA'ndhai-

-rarthaM lokopakRtyai guNagaNanilayaH sUtrayAmAsa kRtsnam |

yo'sau vyAsAbhidhAnastamahamaharaharbhaktitastvatprasAdAt

sadyo vidyopalabdhyai gurutamamaguruM devadevaM namAmi || 37 ||

AjJAmanyairadhAryAM zirasi parisaradrazmikoTIrakoTau

kRSNasyAkliSTakarmA dadhadanusarANAdarthito devasaGghaiH |

bhUmAvAgatya bhUmannasukaramakarorbrahmasUtrasya bhASyaM

durbhASyaM vyasya dasyormaNimata uditaM vedasadyuktibhistvam || 38 ||

bhUtvA kSetre vizuddhe dvijagaNanilaye raupyapIThAbhidhAne

tatrApi brahmajAtistribhuvanavizade madhyagehAkhyagehe |

pArivrAjyAdhirAjaH punarapi badarIM prApya kRSNaM ca natvA

kRtvA bhASyANi samyag vyatanuta ca bhavAn bhAratArthaprakAzam || 39 ||

vande taM tvAM supUrNapramatimanudinAsevitaM devavRndaiH

vande vandArumIze zriya uta niyataM zrImadAnandatIrtham |

vande mandAkinIsatsaridamalajalAsekasAdhikyasaGgaM

vande'haM deva bhaktyA bhavabhayadahanaM sajjanAnmodayantam || 40 ||

subrahmaNyAkhyasUreH suta iti subhRzaM kezavAnandatIrtha-

zrImatpAdAbjabhaktaH stutimakRta harervAyudevasya cAsya |

tatpAdArcAdareNa grathitapadalasanmAlayA tvetayA ye

saMrAdhyAmU namanti pratatamatiguNA muktimete vrajanti || 41 ||

atha zrInakhastutiH

pAntvasmAn puruhUtavairibalavanmAtaGgamAdyadghaTA

kumbhoccAdrivipATanAdhikapaTupratyekavajrAyitAH |

zrImatkaNThIravAsya pratata sunakharA dAritArAtidUra-

pradhvastadhvAntazAntapravitatamanasA bhAvitA nAkivRndaiH || 1 ||

lakSmIkAnta samantato'vikalayan naivezituste samaM

pazyAmyuttamavastu dUratarato'pAstaM raso yo'STamaH |

yadroSotkaradakSanetrakuTilaprAntotthitAgnisphurat

khadyotopamavisphuliGgabhasitA brahmezazakrotkarAH || 2 ||

iti zrItrivikramapaNDitAcArya viracitA vAyustutiH samAptA ||