શ્રી હરિ વાયુ સ્તુતિ

શ્રી હરિ વાયુ સ્તુતિ

શ્લોક 1

અથ નખસ્તુતિઃ

પાન્ત્વસ્માન્ પુરુહૂતવૈરિબલવન્માતઙ્ગમાદ્યદ્ઘટા-

-કુમ્ભોચ્ચાદ્રિવિપાટનાધિકપટુ પ્રત્યેક વજ્રાયિતાઃ ।

શ્રીમત્કણ્ઠીરવાસ્યપ્રતતસુનખરા દારિતારાતિદૂર-

-પ્રધ્વસ્તધ્વાન્તશાન્તપ્રવિતતમનસા ભાવિતા ભૂરિભાગૈઃ

શ્લોક 2

લક્ષ્મીકાન્ત સમન્તતોઽપિ કલયન્ નૈવેશિતુસ્તે સમં

પશ્યામ્યુત્તમવસ્તુ દૂરતરતોપાસ્તં રસો યોઽષ્ટમઃ ।

યદ્રોષોત્કર દક્ષ નેત્ર કુટિલ પ્રાન્તોત્થિતાગ્નિ સ્ફુરત્

ખદ્યોતોપમ વિસ્ફુલિઙ્ગભસિતા બ્રહ્મેશશક્રોત્કરાઃ

॥ 1 ॥

શ્લોક 3

અથ વાયુસ્તુતિઃ

શ્રીમદ્વિષ્ણ્વઙ્ઘ્રિનિષ્ઠાતિગુણગુરુતમશ્રીમદાનન્દતીર્થ-

-ત્રૈલોક્યાચાર્યપાદોજ્જ્વલજલજલસત્પાંસવોઽસ્માન્ પુનન્તુ ।

વાચાં યત્ર પ્રણેત્રી ત્રિભુવનમહિતા શારદા શારદેન્દુ-

-જ્યોત્સ્નાભદ્રસ્મિતશ્રીધવલિતકકુભા પ્રેમભારં બભાર

॥ 2 ॥

શ્લોક 4

ઉત્કણ્ઠાકુણ્ઠકોલાહલજવવિજિતાજસ્રસેવાનુવૃદ્ધ-

-પ્રાજ્ઞાત્મજ્ઞાનધૂતાન્ધતમસસુમનોમૌલિરત્નાવલીનામ્ ।

ભક્ત્યુદ્રેકાવગાઢપ્રઘટનસધટાત્કારસઙ્ઘૃષ્યમાણ-

પ્રાન્તપ્રાગ્ર્યાઙ્ઘ્રિપીઠોત્થિતકનકરજઃપિઞ્જરારઞ્જિતાશાઃ

॥ 1 ॥

શ્લોક 5

જન્માધિવ્યાધ્યુપાધિપ્રતિહતિવિરહપ્રાપકાણાં ગુણાનાં

અગ્ર્યાણામર્પકાણાં ચિરમુદિતચિદાનન્દસન્દોહદાનામ્ ।

એતેષામેષ દોષપ્રમુષિતમનસાં દ્વેષિણાં દૂષકાણાં

દૈત્યાનામાર્તિમન્ધે તમસિ વિદધતાં સંસ્તવે નાસ્મિ શક્તઃ

॥ 2 ॥

શ્લોક 6

અસ્યાવિષ્કર્તુકામં કલિમલકલુષેઽસ્મિન્ જને જ્ઞાનમાર્ગં

વન્દ્યં ચન્દ્રેન્દ્રરુદ્રદ્યુમણિફણિવયોનાયકાદ્યૈરિહાદ્ય ।

મધ્વાખ્યં મન્ત્રસિદ્ધં કિમુત કૃતવતો મારુતસ્યાવતારં

પાતારં પારમેષ્ટ્યં પદમપવિપદઃ પ્રાપ્તુરાપન્નપુંસામ્

॥ 3 ॥

શ્લોક 7

ઉદ્યદ્વિદ્યુત્પ્રચણ્ડાં નિજરુચિનિકરવ્યાપ્તલોકાવકાશો

બિભ્રદ્ભીમો ભુજે યોઽભ્યુદિતદિનકરાભાઙ્ગદાઢ્ય પ્રકાણ્ડે ।

વીર્યોદ્ધાર્યાં ગદાગ્ર્યામયમિહ સુમતિં વાયુદેવો વિદધ્યાત્

અધ્યાત્મજ્ઞાનનેતા યતિવરમહિતો ભૂમિભૂષામણિર્મે

॥ 4 ॥

શ્લોક 8

સંસારોત્તાપનિત્યોપશમદસદયસ્નેહહાસામ્બુપૂર-

-પ્રોદ્યદ્વિદ્યાનવદ્યદ્યુતિમણિકિરણશ્રેણિસમ્પૂરિતાશઃ ।

શ્રીવત્સાઙ્કાધિવાસોચિતતરસરલશ્રીમદાનન્દતીર્થ-

-ક્ષીરામ્ભોધિર્વિભિન્દ્યાદ્ભવદનભિમતં ભૂરિ મે ભૂતિહેતુઃ

॥ 5 ॥

શ્લોક 9

મૂર્ધન્યેષોઽઞ્જલિર્મે દૃઢતરમિહ તે બધ્યતે બન્ધપાશ-

-ચ્છેત્રે દાત્રે સુખાનાં ભજતિ ભુવિ ભવિષ્યદ્વિધાત્રે દ્યુભર્ત્રે ।

અત્યન્તં સન્તતં ત્વં પ્રદિશ પદયુગે હન્ત સન્તાપભાજા-

-મસ્માકં ભક્તિમેકાં ભગવત ઉત તે માધવસ્યાથ વાયોઃ

॥ 6 ॥

શ્લોક 10

સાભ્રોષ્ણાભીશુશુભ્રપ્રભમભય નભો ભૂરિભૂભૃદ્વિભૂતિ-

-ભ્રાજિષ્ણુર્ભૂરૃભૂણાં ભવનમપિ વિભોઽભેદિ બભ્રે બભૂવે ।

યેન ભ્રૂવિભ્રમસ્તે ભ્રમયતુ સુભૃશં બભ્રુવદ્દુર્ભૃતાશાન્

ભ્રાન્તિર્ભેદાવભાસસ્ત્વિતિ ભયમભિભૂર્ભોક્ષ્યતો માયિભિક્ષૂન્

॥ 7 ॥

શ્લોક 11

યેઽમું ભાવં ભજન્તે સુરમુખસુજનારાધિતં તે તૃતીયં

ભાસન્તે ભાસુરૈસ્તે સહચરચલિતૈશ્ચામરૈશ્ચારુવેષાઃ ।

વૈકુણ્ઠે કણ્ઠલગ્નસ્થિરશુચિવિલસત્કાન્તિતારુણ્યલીલા-

લાવણ્યાપૂર્ણકાન્તાકુચભરસુલભાશ્લેષસમ્મોદસાન્દ્રાઃ

॥ 8 ॥

શ્લોક 12

આનન્દાન્મન્દમન્દા દદતિ હિ મરુતઃ કુન્દમન્દારનન્દ્યા-

-વર્તામોદાન્ દધાના મૃદુપદમુદિતોદ્ગીતકૈઃ સુન્દરીણામ્ ।

વૃન્દૈરાવન્દ્યમુક્તેન્દ્વહિમગુમદનાહીન્દ્રદેવેન્દ્રસેવ્યે

મૌકુન્દે મન્દિરેઽસ્મિન્નવિરતમુદયન્મોદિનાં દેવદેવ

॥ 9 ॥

શ્લોક 13

ઉત્તપ્તાઽત્યુત્કટત્વિટ્ પ્રકટકટકટધ્વાનસઙ્ઘટ્ટનોદ્ય-

-દ્વિદ્યુદ્વ્યૂઢસ્ફુલિઙ્ગપ્રકરવિકિરણોત્ક્વાથિતે બાધિતાઙ્ગાન્ ।

ઉદ્ગાઢં પાત્યમાના તમસિ તત ઇતઃ કિઙ્કરૈઃ પઙ્કિલે તે

પઙ્ક્તિર્ગ્રાવ્ણાં ગરિમ્ણા ગ્લપયતિ હિ ભવદ્વેષિણો વિદ્વદાદ્ય

॥ 10 ॥

શ્લોક 14

અસ્મિન્નસ્મદ્ગુરૂણાં હરિચરણચિરધ્યાનસન્મઙ્ગલાનાં

યુષ્માકં પાર્શ્વભૂમિં ધૃતરણરણિકસ્વર્ગિસેવ્યાં પ્રપન્નઃ ।

યસ્તૂદાસ્તે સ આસ્તેઽધિભવમસુલભક્લેશનિર્મૂકમસ્ત-

-પ્રાયાનન્દં કથઞ્ચિન્ન વસતિ સતતં પઞ્ચકષ્ટેઽતિકષ્ટે

॥ 11 ॥

શ્લોક 15

ક્ષુત્ ક્ષામાન્ રૂક્ષરક્ષોરદખરનખરક્ષુણ્ણવિક્ષોભિતાક્ષા-

-નામગ્નાનાન્ધકૂપે ક્ષુરમુખમુખરૈઃ પક્ષિભિર્વિક્ષતાઙ્ગાન્ ।

પૂયાસૃઙ્મૂત્રવિષ્ઠાકૃમિકુલકલિલે તત્ક્ષણક્ષિપ્તશક્ત્યા-

-દ્યસ્ત્રવ્રાતાર્દિતાંસ્ત્વદ્દ્વિષ ઉપજિહતે વજ્રકલ્પા જલૂકાઃ

॥ 12 ॥

શ્લોક 16

માતર્મે માતરિશ્વન્ પિતરતુલગુરો ભ્રાતરિષ્ટાપ્તબન્ધો

સ્વામિન્ સર્વાન્તરાત્મન્નજર જરયિતર્જન્મમૃત્યામયાનામ્ ।

ગોવિન્દે દેહિ ભક્તિં ભવતિ ચ ભગવન્નૂર્જિતાં નિર્નિમિત્તાં

નિર્વ્યાજાં નિશ્ચલાં સદ્ગુણગણબૃહતીં શાશ્વતીમાશુ દેવ

॥ 13 ॥

શ્લોક 17

વિષ્ણોરત્ત્યુત્તમત્વાદખિલગુણગણૈસ્તત્ર ભક્તિં ગરિષ્ઠાં

આશ્લિષ્ટે શ્રીધરાભ્યામમુમથ પરિવારાત્મના સેવકેષુ ।

યઃ સન્ધત્તે વિરિઞ્ચશ્વસનવિહગપાનન્તરુદ્રેન્દ્રપૂર્વે-

-ષ્વાધ્યાયંસ્તારતમ્યં સ્ફુટમવતિ સદા વાયુરસ્મદ્ગુરુસ્તમ્

॥ 14 ॥

શ્લોક 18

તત્ત્વજ્ઞાન્ મુક્તિભાજઃ સુખયિસિ હિ ગુરો યોગ્યતાતારતમ્યા-

-દાધત્સે મિશ્રબુદ્ધિંસ્ત્રિદિવનિરયભૂગોચરાન્ નિત્યબદ્ધાન્ ।

તામિસ્રાન્ધાદિકાખ્યે તમસિ સુબહુલં દુઃખયસ્યન્યથાજ્ઞાન્

વિષ્ણોરાજ્ઞાભિરિત્થં શૃતિશતમિતિહાસાદિ ચાકર્ણયામઃ

॥ 15 ॥

શ્લોક 19

વન્દેઽહં તં હનૂમાનિતિ મહિતમહાપૌરુષો બાહુશાલી

ખ્યાતસ્તેઽગ્ર્યોઽવતારઃ સહિત ઇહ બહુબ્રહ્મચર્યાદિધર્મૈઃ ।

સસ્નેહાનાં સહસ્વાનહરહરહિતં નિર્દહન્ દેહભાજાં

અંહોમોહાપહો યઃ સ્પૃહયતિ મહતીં ભક્તિમદ્યાપિ રામે

॥ 16 ॥

શ્લોક 20

પ્રાક્પઞ્ચાશત્સહસ્રૈર્વ્યવહિતમહિતં યોજનૈઃ પર્વતં ત્વં

યાવત્સઞ્જીવનાદ્યૌષધનિધિમધિકપ્રાણ લઙ્કામનૈષિઃ ।

અદ્રાક્ષીદુત્પતન્તં તત ઉત ગિરિમુત્પાટયન્તં ગૃહીત્વા

યાન્તં ખે રાઘવાઙ્ઘ્રૌ પ્રણતમપિ તદૈકક્ષણે ત્વાં હિ લોકઃ

॥ 17 ॥

શ્લોક 21

ક્ષિપ્તઃ પશ્ચાત્સત્સલીલં શતમતુલમતે યોજનાનાં સ ઉચ્ચ-

-સ્તાવદ્વિસ્તારવંશ્ચાપ્યુપલલવ ઇવ વ્યગ્રબુદ્ધ્યા ત્વયાઽતઃ ।

સ્વસ્વસ્થાનસ્થિતાતિસ્થિરશકલશિલાજાલસંશ્લેષનષ્ટ-

-છ્છેદાઙ્કઃ પ્રાગિવાભૂત્ કપિવરવપુષસ્તે નમઃ કૌશલાય

॥ 18 ॥

શ્લોક 22

દૃષ્ટ્વા દુષ્ટાધિપોરઃ સ્ફુટિતકનકસદ્વર્મ ઘૃષ્ટાસ્થિકૂટં

નિષ્પિષ્ટં હાટકાદ્રિપ્રકટતટતટાકાતિશઙ્કો જનોઽભૂત્ ।

યેનાઽજૌ રાવણારિપ્રિયનટનપટુર્મુષ્ટિરિષ્ટં પ્રદેષ્ટું

કિં નેષ્ટે મે સ તેઽષ્ટાપદકટકતટિત્કોટિભામૃષ્ટકાષ્ઠઃ

॥ 19 ॥

શ્લોક 23

દેવ્યાદેશપ્રણીતિદૃહિણહરવરાવધ્યરક્ષોવિઘાતા-

-દ્યાસેવોદ્યદ્દયાર્દ્રઃ સહભુજમકરોદ્રામનામા મુકુન્દઃ ।

દુષ્પ્રાપે પારમેષ્ઠ્યે કરતલમતુલં મૂર્ધિવિન્યસ્ય ધન્યં

તન્વન્ભૂયઃ પ્રભૂતપ્રણયવિકસિતાબ્જેક્ષણસ્ત્વેક્ષમાણઃ

॥ 20 ॥

શ્લોક 24

જઘ્ને નિઘ્નેન વિઘ્નો બહુલબલબકધ્વંસનાદ્યેન શોચ-

-દ્વિપ્રાનુક્રોશપાશૈરસુવિધૃતિસુખસ્યૈકચક્રાજનાનામ્ ।

તસ્મૈ તે દેવ કુર્મઃ કુરુકુલપતયે કર્મણા ચ પ્રણામાન્

કિર્મીરં દુર્મતીનાં પ્રથમમથ ચ યો નર્મણા નિર્મમાથ

॥ 21 ॥

શ્લોક 25

નિર્મૃદ્નન્નત્યયત્નં વિજરવર જરાસન્ધકાયાસ્થિસન્ધીન્

યુદ્ધે ત્વં સ્વધ્વરે વા પશુમિવ દમયન્ વિષ્ણુપક્ષદ્વિડીશમ્ ।

યાવત્પ્રત્યક્ષભૂતં નિખિલમખભુજં તર્પયામાસિથાસૌ

તાવત્યાઽયોજિ તૃપ્ત્યા કિમુ વદ ભગવન્ રાજસૂયાશ્વમેધે

॥ 22 ॥

શ્લોક 26

ક્ષ્વેલાક્ષીણાટ્ટહાસં તવ રણમરિહન્નુદ્ગદોદ્દામબાહોઃ

બહ્વક્ષૌહિણ્યનીકક્ષપણસુનિપુણં યસ્ય સર્વોત્તમસ્ય ।

શુશ્રૂષાર્થં ચકર્થ સ્વયમયમથ સંવક્તુમાનન્દતીર્થ-

-શ્રીમન્નામન્સમર્થસ્ત્વમપિ હિ યુવયોઃ પાદપદ્મં પ્રપદ્યે

॥ 23 ॥

શ્લોક 27

દૃહ્યન્તીં હૃદૃહં માં દૃતમનિલ બલાદ્દ્રાવયન્તીમવિદ્યા-

-નિદ્રાં વિદ્રાવ્ય સદ્યોરચનપટુમથાઽપાદ્ય વિદ્યાસમુદ્ર ।

વાગ્દેવી સા સુવિદ્યાદ્રવિણદ વિદિતા દ્રૌપદી રુદ્રપત્ન્યા-

-દુદ્રિક્તા દ્રાગભદ્રાદ્રહયતુ દયિતા પૂર્વભીમાઽજ્ઞયા તે

॥ 24 ॥

શ્લોક 28

યાભ્યાં શુશ્રૂષુરાસીઃ કુરુકુલજનને ક્ષત્રવિપ્રોદિતાભ્યાં

બ્રહ્મભ્યાં બૃંહિતાભ્યાં ચિતસુખવપુષા કૃષ્ણનામાસ્પદાભ્યામ્ ।

નિર્ભેદાભ્યાં વિશેષાદ્વિવચનવિષયાભ્યામમૂભ્યામુભાભ્યાં

તુભ્યં ચ ક્ષેમદેભ્યઃ સરિસિજવિલસલ્લોચનેભ્યો નમોઽસ્તુ

॥ 25 ॥

શ્લોક 29

ગચ્છન્ સૌગન્ધિકાર્થં પથિ સ હનુમતઃ પુચ્છમચ્છસ્ય ભીમઃ

પ્રોદ્ધર્તું નાશકત્સ ત્વમુમુરુવપુષા ભીષયામાસ ચેતિ ।

પૂર્ણજ્ઞાનૌજસોસ્તે ગુરુતમ વપુષોઃ શ્રીમદાનન્દતીર્થ

ક્રીડામાત્રં તદેતત્ પ્રમદદ સુધિયાં મોહક દ્વેષભાજામ્

॥ 26 ॥

શ્લોક 30

બહ્વીઃ કોટીરટીકઃ કુટલકટુમતીનુત્કટાટોપકોપાન્

દ્રાક્ચ ત્વં સત્વરત્વાચ્ચરણદ ગદયા પોથયામાસિથારીન્ ।

ઉન્મથ્યાતથ્યમિથ્યાત્વવચનવચનાનુત્પથસ્થાંસ્તથાઽન્યાન્

પ્રાયચ્છઃ સ્વપ્રિયાયૈ પ્રિયતમકુસુમં પ્રાણ તસ્મૈ નમસ્તે

॥ 27 ॥

શ્લોક 31

દેહાદુત્ક્રામિતાનામધિપતિરસતામક્રમાદ્વક્રબુદ્ધિઃ

ક્રુદ્ધઃ ક્રોધૈકવશ્યઃ ક્રિમિરિવ મણિમાન્ દુષ્કૃતી નિષ્ક્રિયાર્થમ્ ।

ચક્રે ભૂચક્રમેત્ય ક્રકચમિવ સતાં ચેતસઃ કષ્ટશાસ્ત્રં

દુસ્તર્કં ચક્રપાણેર્ગુણગણવિરહં જીવતાં ચાધિકૃત્ય

॥ 28 ॥

શ્લોક 32

તદ્દુષ્પ્રેક્ષાનુસારાત્કતિપયકુનરૈરાદૃતોઽન્યૈર્વિસૃષ્ટો

બ્રહ્માઽહં નિર્ગુણોઽહં વિતથમિદમિતિ હ્યેષ પાષણ્ડવાદઃ ।

તદ્યુક્ત્યાભાસજાલપ્રસરવિષતરૂદ્દાહદક્ષપ્રમાણ-

-જ્વાલામાલાધરાગ્નિઃ પવન વિજયતે તેઽવતારસ્તૃતીયઃ

॥ 29 ॥

શ્લોક 33

આક્રોશન્તો નિરાશા ભયભરવિવશસ્વાશયાશ્છિન્નદર્પા

વાશન્તો દેશનાશસ્વિતિ બત કુધિયાં નાશમાશાદશાઽશુ ।

ધાવન્તોઽશ્લીલશીલા વિતથશપથશાપાશિવાઃ શાન્તશૌર્યા-

-સ્ત્વદ્વ્યાખ્યાસિંહનાદે સપદિ દદૃશિરે માયિગોમાયવસ્તે

॥ 30 ॥

શ્લોક 34

ત્રિષ્વપ્યેવાવતારેષ્વરિભિરપઘૃણં હિંસિતો નિર્વિકારઃ

સર્વજ્ઞઃ સર્વશક્તિઃ સકલગુણગણાપૂર્ણરૂપપ્રગલ્ભઃ ।

સ્વચ્છઃ સ્વચ્છન્દમૃત્યુઃ સુખયસિ સુજનં દેવ કિં ચિત્રમત્ર

ત્રાતા યસ્ય ત્રિધામા જગદુત વશગં કિઙ્કરાઃ શઙ્કરાદ્યાઃ

॥ 31 ॥

શ્લોક 35

ઉદ્યન્મન્દસ્મિતશ્રીમૃદુ મધુમધુરાલાપપીયૂષધારા-

-પૂરાસેકોપશાન્તાસુખસુજનમનોલોચનાપીયમાનમ્ ।

સન્દ્રક્ષ્યે સુન્દરં સન્દુહદિહ મહદાનન્દમાનન્દતીર્થ

શ્રીમદ્વક્ત્રેન્દુબિમ્બં દુરતનુદુદિતં નિત્યદાઽહં કદા નુ

॥ 32 ॥

શ્લોક 36

પ્રાચીનાચીર્ણપુણ્યોચ્ચયચતુરતરાચારતશ્ચારુચિત્તા-

-નત્યુચ્ચાં રોચયન્તીં શ્રુતિચિતવચનાં શ્રાવકાંશ્ચોદ્યચુઞ્ચૂન્ ।

વ્યાખ્યામુત્ખાતદુઃખાં ચિરમુચિતમહાચાર્ય ચિન્તારતાંસ્તે

ચિત્રાં સચ્છાસ્ત્રકર્તાશ્ચરણપરિચરાઞ્છ્રાવયાસ્માંશ્ચ કિઞ્ચિત્

॥ 33 ॥

શ્લોક 37

પીઠે રત્નોકપક્લૃપ્તે રુચિરરુચિમણિજ્યોતિષા સન્નિષણ્ણં

બ્રહ્માણં ભાવિનં ત્વાં જ્વલતિ નિજપદે વૈદિકાદ્યા હિ વિદ્યાઃ ।

સેવન્તે મૂર્તિમત્યઃ સુચરિત ચરિતં ભાતિ ગન્ધર્વ ગીતં

પ્રત્યેકં દેવસંસત્સ્વપિ તવ ભગવન્નર્તિતદ્યોવધૂષુ

॥ 34 ॥

શ્લોક 38

સાનુક્રોશૈરજસ્રં જનિમૃતિનિરયાદ્યૂર્મિમાલાવિલેઽસ્મિન્

સંસારાબ્ધૌ નિમગ્નાન્ શરણમશરણાનિચ્છતો વીક્ષ્ય જન્તૂન્ ।

યુષ્માભિઃ પ્રાર્થિતઃ સન્ જલનિધિશયનઃ સત્યવત્યાં મહર્ષે-

-ર્વ્યક્તશ્ચિન્માત્રમૂર્તિર્ન ખલુ ભગવતઃ પ્રાકૃતો જાતુ દેહઃ

॥ 35 ॥

શ્લોક 39

અસ્તવ્યસ્તં સમસ્તશ્રુતિગતમધમૈ રત્નપૂગં યથાઽન્ધૈ-

-રર્થં લોકોપકૃત્યૈ ગુણગણનિલયઃ સૂત્રયામાસ કૃત્સ્નમ્ ।

યોઽસૌ વ્યાસાભિધાનસ્તમહમહરહર્ભક્તિતસ્ત્વત્પ્રસાદાત્

સદ્યો વિદ્યોપલબ્ધ્યૈ ગુરુતમમગુરું દેવદેવં નમામિ

॥ 36 ॥

શ્લોક 40

આજ્ઞામન્યૈરધાર્યાં શિરસિ પરિસરદ્રશ્મિકોટીરકોટૌ

કૃષ્ણસ્યાક્લિષ્ટકર્મા દધદનુસરાણાદર્થિતો દેવસઙ્ઘૈઃ ।

ભૂમાવાગત્ય ભૂમન્નસુકરમકરોર્બ્રહ્મસૂત્રસ્ય ભાષ્યં

દુર્ભાષ્યં વ્યસ્ય દસ્યોર્મણિમત ઉદિતં વેદસદ્યુક્તિભિસ્ત્વમ્

॥ 37 ॥

શ્લોક 41

ભૂત્વા ક્ષેત્રે વિશુદ્ધે દ્વિજગણનિલયે રૌપ્યપીઠાભિધાને

તત્રાપિ બ્રહ્મજાતિસ્ત્રિભુવનવિશદે મધ્યગેહાખ્યગેહે ।

પારિવ્રાજ્યાધિરાજઃ પુનરપિ બદરીં પ્રાપ્ય કૃષ્ણં ચ નત્વા

કૃત્વા ભાષ્યાણિ સમ્યગ્ વ્યતનુત ચ ભવાન્ ભારતાર્થપ્રકાશમ્

॥ 38 ॥

શ્લોક 42

વન્દે તં ત્વાં સુપૂર્ણપ્રમતિમનુદિનાસેવિતં દેવવૃન્દૈઃ

વન્દે વન્દારુમીશે શ્રિય ઉત નિયતં શ્રીમદાનન્દતીર્થમ્ ।

વન્દે મન્દાકિનીસત્સરિદમલજલાસેકસાધિક્યસઙ્ગં

વન્દેઽહં દેવ ભક્ત્યા ભવભયદહનં સજ્જનાન્મોદયન્તમ્

॥ 39 ॥

શ્લોક 43

સુબ્રહ્મણ્યાખ્યસૂરેઃ સુત ઇતિ સુભૃશં કેશવાનન્દતીર્થ-

શ્રીમત્પાદાબ્જભક્તઃ સ્તુતિમકૃત હરેર્વાયુદેવસ્ય ચાસ્ય ।

તત્પાદાર્ચાદરેણ ગ્રથિતપદલસન્માલયા ત્વેતયા યે

સંરાધ્યામૂ નમન્તિ પ્રતતમતિગુણા મુક્તિમેતે વ્રજન્તિ

॥ 40 ॥

શ્લોક 44

અથ શ્રીનખસ્તુતિઃ

પાન્ત્વસ્માન્ પુરુહૂતવૈરિબલવન્માતઙ્ગમાદ્યદ્ઘટા

કુમ્ભોચ્ચાદ્રિવિપાટનાધિકપટુપ્રત્યેકવજ્રાયિતાઃ ।

શ્રીમત્કણ્ઠીરવાસ્ય પ્રતત સુનખરા દારિતારાતિદૂર-

પ્રધ્વસ્તધ્વાન્તશાન્તપ્રવિતતમનસા ભાવિતા નાકિવૃન્દૈઃ

॥ 41 ॥

શ્લોક 45

લક્ષ્મીકાન્ત સમન્તતોઽવિકલયન્ નૈવેશિતુસ્તે સમં

પશ્યામ્યુત્તમવસ્તુ દૂરતરતોઽપાસ્તં રસો યોઽષ્ટમઃ ।

યદ્રોષોત્કરદક્ષનેત્રકુટિલપ્રાન્તોત્થિતાગ્નિસ્ફુરત્

ખદ્યોતોપમવિસ્ફુલિઙ્ગભસિતા બ્રહ્મેશશક્રોત્કરાઃ

॥ 1 ॥

શ્લોક 46

ઇતિ શ્રીત્રિવિક્રમપણ્ડિતાચાર્ય વિરચિતા વાયુસ્તુતિઃ સમાપ્તા ॥