Sri Hari Stotram (Jagajjalapalam)

śrī hari stotram (jagajjālapālam)

Śloka 1

jagajjālapālaṃ kanatkaṇṭhamālaṃ

śaraccandraphālaṃ mahādaityakālam |

nabhonīlakāyaṃ durāvāramāyaṃ

supadmāsahāyaṃ bhaje'haṃ bhaje'ham || 1 ||

sadāmbhodhivāsaṃ galatpuṣpahāsaṃ

jagatsannivāsaṃ śatādityabhāsam |

gadācakraśastraṃ lasatpītavastraṃ

hasaccāruvaktraṃ bhaje'haṃ bhaje'ham || 2 ||

ramākaṇṭhahāraṃ śrutivrātasāraṃ

jalāntarvihāraṃ dharābhārahāram |

cidānandarūpaṃ manojñasvarūpaṃ

dhṛtānekarūpaṃ bhaje'haṃ bhaje'ham || 3 ||

jarājanmahīnaṃ parānandapīnaṃ

samādhānalīnaṃ sadaivānavīnam |

jagajjanmahetuṃ surānīkaketuṃ

trilokaikasetuṃ bhaje'haṃ bhaje'ham || 4 ||

kṛtāmnāyagānaṃ khagādhīśayānaṃ

vimukternidānaṃ harārātimānam |

svabhaktānukūlaṃ jagadvṛkṣamūlaṃ

nirastārtaśūlaṃ bhaje'haṃ bhaje'ham || 5 ||

samastāmareśaṃ dvirephābhakeśaṃ

jagadbimbaleśaṃ hṛdākāśaveśam |

sadā divyadehaṃ vimuktākhilehaṃ

suvaikuṇṭhagehaṃ bhaje'haṃ bhaje'ham || 6 ||

surālībaliṣṭhaṃ trilokīvariṣṭhaṃ

gurūṇāṃ gariṣṭhaṃ svarūpaikaniṣṭham |

sadā yuddhadhīraṃ mahāvīravīraṃ

bhavāmbhodhitīraṃ bhaje'haṃ bhaje'ham || 7 ||

ramāvāmabhāgaṃ talālagnanāgaṃ

kṛtādhīnayāgaṃ gatārāgarāgam |

munīndraissugītaṃ suraissamparītaṃ

guṇaughairatītaṃ bhaje'haṃ bhaje'ham || 8 ||

phalaśruti |

idaṃ yastu nityaṃ samādhāya cittaṃ

paṭhedaṣṭakaṃ kaṇṭhahāraṃ murāreḥ |

sa viṣṇorviśokaṃ dhruvaṃ yāti lokaṃ

jarājanmaśokaṃ punarvindate no || 9 ||

iti śrī paramahaṃsasvāmi brahmānandaviracitaṃ śrīharistotram ||