Sri Durga Chandrakala Stuti

shrI durgA chandrakalA stuti

shloka 1

dhyAnam

umAkAnte ramAkAnte eShAmAsI-nmatissamA |

namAmi dIkShitendrAM stAn nayaShaTka-vishAradAm ||

vedhoharIshvarastutyAM vihartrIM vindhyabhUdhare |

haraprANeshvarIM vande hantrIM vibudhavidviShAm || 1 ||

abhyarthanena sarasIruhasambhavasya

tyaktvoditA bhagavadakShipidhAnalIlAm |

vishveshvarI vipadapAkaraNe purastAt

mAtA mamAstu madhukaiTabhayornihantrI || 2 ||

prA~NnirjareShu nihatairnijashaktileshaiH

ekIbhavadbhiruditA.akhilalokaguptyai |

sampannashastranikarA cha tadAyudhasthaiH

mAtA mamAstu mahiShAntakarI purastAt || 3 ||

prAleyashailatanayA tanukAntisampat

koshoditA kuvalayachChavichArudehA |

nArAyaNI namadabhIpsitakalpavallI

suprItimAvahatu shumbhanishumbhahantrI || 4 ||

vishveshvarIti mahiShAntakarIti yasyAH

nArAyaNItyapi cha nAmabhira~NkitAni |

sUktAni pa~NkajabhuvA cha surarShibhishcha

dRRiShTAni pAvakamukhaishcha shivAM bhaje tAm || 5 ||

utpattidaityahananastavanAtmakAni

saMrakShakANyakhilabhUtahitAya yasyAH |

sUktAnyasheShanigamAntavidaH paThanti

tAM vishvamAtaramajasramabhiShTavImi || 6 ||

ye vaiprachittapunarutthitashumbhamukhyaiH

durbhikShaghorasamayena cha kAritAsu |

AviShkRRitAstrijagadArtiShu rUpabhedAH

tairambikA samabhirakShatu mAM vipadbhyaH || 7 ||

sUktaM yadIyamaravindabhavAdi dRRiShTaM

Avartya devyanupadaM surathaH samAdhiH |

dvAvapyavApaturabhIShTamananyalabhyaM

tAmAdidevataruNIM praNamAmi mUrdhnA || 8 ||

mAhiShmatItanubhavaM cha ruruM cha hantuM

AviShkRRitairnijarasAdavatArabhedaiH |

aShTAdashAhatanavAhatakoTisa~NkhyaiH

ambA sadA samabhirakShatu mAM vipadbhyaH || 9 ||

etachcharitramakhilaM likhitaM hi yasyAH

sampUjitaM sadana eva niveshitaM vA |

durgaM cha tArayati dustaramapyasheShaM

shreyaH prayachChati cha sarvamumAM bhaje tAm || 10 ||

yatpUjanastutinamaskRRitibhirbhavanti

prItAH pitAmaharameshaharAstrayo.api |

teShAmapi svakaguNairdadatI vapUMShi

tAmIshvarasya taruNIM sharaNaM prapadye || 11 ||

kAntAramadhyadRRiDhalagnatayA.avasannAH

magnAshcha vAridhijale ripubhishcha ruddhAH |

yasyAH prapadya charaNau vipadastaranti

sA me sadA.astu hRRidi sarvajagatsavitrI || 12 ||

bandhe vadhe mahati mRRityubhaye prasakte

vittakShaye cha vividhe ya mahopatApe |

yatpAdapUjanamiha pratikAramAhuH

sA me samastajananI sharaNaM bhavAnI || 13 ||

bANAsuraprahitapannagabandhamokShaH

tadbAhudarpadalanAduShayA cha yogaH |

prAdyumninA drutamalabhyata yatprasAdAt

sA me shivA sakalamapyashubhaM kShiNotu || 14 ||

pApaH pulastyatanayaH punarutthito mAM

adyApi hartumayamAgata ityudItam |

yatsevanena bhayamindirayA.avadhUtaM

tAmAdidevataruNIM sharaNaM gato.asmi || 15 ||

yaddhyAnajaM sukhamavApyamanantapuNyaiH

sAkShAttamachyuta parigrahamAshvavApuH |

gopA~NganAH kila yadarchanapuNyamAtrAH

sA me sadA bhagavatI bhavatu prasannA || 16 ||

rAtriM prapadya iti mantravidaH prapannAn

udbodhya mRRityuvadhimanyaphalaiH pralobhya |

buddhvA cha tadvimukhatAM pratanaM nayantIM

AkAshamAdijananIM jagatAM bhaje tAm || 17 ||

deshakAleShu duShTeShu durgAchandrakalAstutiH |

sandhyayoranusandheyA sarvApadvinivRRittaye || 18 ||

iti shrImadapayyadIkShitavirachitA durgAchandrakalAstutiH ||