Sri Durga Chandrakala Stuti

zrI durgA candrakalA stuti

zloka 1

dhyAnam

umAkAnte ramAkAnte eSAmAsI-nmatissamA |

namAmi dIkSitendrAM stAn nayaSaTka-vizAradAm ||

vedhoharIzvarastutyAM vihartrIM vindhyabhUdhare |

haraprANezvarIM vande hantrIM vibudhavidviSAm || 1 ||

abhyarthanena sarasIruhasambhavasya

tyaktvoditA bhagavadakSipidhAnalIlAm |

vizvezvarI vipadapAkaraNe purastAt

mAtA mamAstu madhukaiTabhayornihantrI || 2 ||

prAGnirjareSu nihatairnijazaktilezaiH

ekIbhavadbhiruditA'khilalokaguptyai |

sampannazastranikarA ca tadAyudhasthaiH

mAtA mamAstu mahiSAntakarI purastAt || 3 ||

prAleyazailatanayA tanukAntisampat

kozoditA kuvalayacchavicArudehA |

nArAyaNI namadabhIpsitakalpavallI

suprItimAvahatu zumbhanizumbhahantrI || 4 ||

vizvezvarIti mahiSAntakarIti yasyAH

nArAyaNItyapi ca nAmabhiraGkitAni |

sUktAni paGkajabhuvA ca surarSibhizca

dRSTAni pAvakamukhaizca zivAM bhaje tAm || 5 ||

utpattidaityahananastavanAtmakAni

saMrakSakANyakhilabhUtahitAya yasyAH |

sUktAnyazeSanigamAntavidaH paThanti

tAM vizvamAtaramajasramabhiSTavImi || 6 ||

ye vaipracittapunarutthitazumbhamukhyaiH

durbhikSaghorasamayena ca kAritAsu |

AviSkRtAstrijagadArtiSu rUpabhedAH

tairambikA samabhirakSatu mAM vipadbhyaH || 7 ||

sUktaM yadIyamaravindabhavAdi dRSTaM

Avartya devyanupadaM surathaH samAdhiH |

dvAvapyavApaturabhISTamananyalabhyaM

tAmAdidevataruNIM praNamAmi mUrdhnA || 8 ||

mAhiSmatItanubhavaM ca ruruM ca hantuM

AviSkRtairnijarasAdavatArabhedaiH |

aSTAdazAhatanavAhatakoTisaGkhyaiH

ambA sadA samabhirakSatu mAM vipadbhyaH || 9 ||

etaccaritramakhilaM likhitaM hi yasyAH

sampUjitaM sadana eva nivezitaM vA |

durgaM ca tArayati dustaramapyazeSaM

zreyaH prayacchati ca sarvamumAM bhaje tAm || 10 ||

yatpUjanastutinamaskRtibhirbhavanti

prItAH pitAmaharamezaharAstrayo'pi |

teSAmapi svakaguNairdadatI vapUMSi

tAmIzvarasya taruNIM zaraNaM prapadye || 11 ||

kAntAramadhyadRDhalagnatayA'vasannAH

magnAzca vAridhijale ripubhizca ruddhAH |

yasyAH prapadya caraNau vipadastaranti

sA me sadA'stu hRdi sarvajagatsavitrI || 12 ||

bandhe vadhe mahati mRtyubhaye prasakte

vittakSaye ca vividhe ya mahopatApe |

yatpAdapUjanamiha pratikAramAhuH

sA me samastajananI zaraNaM bhavAnI || 13 ||

bANAsuraprahitapannagabandhamokSaH

tadbAhudarpadalanAduSayA ca yogaH |

prAdyumninA drutamalabhyata yatprasAdAt

sA me zivA sakalamapyazubhaM kSiNotu || 14 ||

pApaH pulastyatanayaH punarutthito mAM

adyApi hartumayamAgata ityudItam |

yatsevanena bhayamindirayA'vadhUtaM

tAmAdidevataruNIM zaraNaM gato'smi || 15 ||

yaddhyAnajaM sukhamavApyamanantapuNyaiH

sAkSAttamacyuta parigrahamAzvavApuH |

gopAGganAH kila yadarcanapuNyamAtrAH

sA me sadA bhagavatI bhavatu prasannA || 16 ||

rAtriM prapadya iti mantravidaH prapannAn

udbodhya mRtyuvadhimanyaphalaiH pralobhya |

buddhvA ca tadvimukhatAM pratanaM nayantIM

AkAzamAdijananIM jagatAM bhaje tAm || 17 ||

dezakAleSu duSTeSu durgAcandrakalAstutiH |

sandhyayoranusandheyA sarvApadvinivRttaye || 18 ||

iti zrImadapayyadIkSitaviracitA durgAcandrakalAstutiH ||