Sri Aadya Kali Stotram

zrI Adya kAlI stotraM

zloka 1

brahmovAca

zRNu vatsa pravakSyAmi AdyAstotraM mahAphalam |

yaH paThet satataM bhaktyA sa eva viSNuvallabhaH || 1 ||

mRtyurvyAdhibhayaM tasya nAsti kiJcit kalau yuge |

aputrA labhate putraM tripakSaM zravaNaM yadi || 2 ||

dvau mAsau bandhanAnmukti vipravaktrAt zrutaM yadi |

mRtavatsA jIvavatsA SaNmAsaM zravaNaM yadi || 3 ||

naukAyAM saGkaTe yuddhe paThanAjjayamApnuyAt |

likhitvA sthApayedgehe nAgnicaurabhayaM kvacit || 4 ||

rAjasthAne jayI nityaM prasannAH sarvadevatA |

OM hrIm |

brahmANI brahmaloke ca vaikuNThe sarvamaGgalA || 5 ||

indrANI amarAvatyAmambikA varuNAlaye |

yamAlaye kAlarUpA kuberabhavane zubhA || 6 ||

mahAnandAgnikoNe ca vAyavyAM mRgavAhinI |

nairRtyAM raktadantA ca aizAnyAM zUladhAriNI || 7 ||

pAtAle vaiSNavIrUpA siMhale devamohinI |

surasA ca maNidvipe laGkAyAM bhadrakAlikA || 8 ||

rAmezvarI setubandhe vimalA puruSottame |

virajA auDradeze ca kAmAkSyA nIlaparvate || 9 ||

kAlikA vaGgadeze ca ayodhyAyAM mahezvarI |

vArANasyAmannapUrNA gayAkSetre gayezvarI || 10 ||

kurukSetre bhadrakAlI vraje kAtyAyanI parA |

dvArakAyAM mahAmAyA mathurAyAM mahezvarI || 11 ||

kSudhA tvaM sarvabhUtAnAM velA tvaM sAgarasya ca |

navamI zuklapakSasya kRSNasyaikAdazI parA || 12 ||

dakSasA duhitA devI dakSayajJavinAzinI |

rAmasya jAnakI tvaM hi rAvaNadhvaMsakAriNI || 13 ||

caNDamuNDavadhe devI raktabIjavinAzinI |

nizumbhazumbhamathinI madhukaiTabhaghAtinI || 14 ||

viSNubhaktipradA durgA sukhadA mokSadA sadA |

AdyAstavamimaM puNyaM yaH paThet satataM naraH || 15 ||

sarvajvarabhayaM na syAt sarvavyAdhivinAzanam |

koTitIrthaphalaM tasya labhate nAtra saMzayaH || 16 ||

jayA me cAgrataH pAtu vijayA pAtu pRSThataH |

nArAyaNI zIrSadeze sarvAGge siMhavAhinI || 17 ||

zivadUtI ugracaNDA pratyaGge paramezvarI |

vizAlAkSI mahAmAyA kaumArI zaGkhinI zivA || 18 ||

cakriNI jayadAtrI ca raNamattA raNapriyA |

durgA jayantI kAlI ca bhadrakAlI mahodarI || 19 ||

nArasiMhI ca vArAhI siddhidAtrI sukhapradA |

bhayaGkarI mahAraudrI mahAbhayavinAzinI || 20 ||

iti zrIbrahmayAmale brahmanAradasaMvAde zrI AdyA stotram ||