saundarya laharI

prathama bhAgaH - Ananda lahari

bhumauskhalita pAdAnAM bhUmirevA valambanam |

tvayI jAtA parAdhAnAM tvameva sharaNaM shive ||

shivaH shaktyA yukto yadi bhavati shaktaH prabhavituM

na chedevaM devo na khalu kushalaH spanditumapi |

atastvAmArAdhyAM hariharaviri~nchAdibhirapi

praNantuM stotuM vA kathamakRRitapuNyaH prabhavati || 1 ||

tanIyAMsaM pAMsuM tava charaNapa~NkeruhabhavaM

virinchissanchinvan virachayati lokAnavikalam |

vahatyenaM shauriH kathamapi sahasreNa shirasAM

harassa~NkShudyainaM bhajati bhasitoddhUlanavidhim || 2 ||

avidyAnAmanta-stimira-mihiradvIpanagarI

jaDAnAM chaitanya-stabaka-makaranda-srutijharI |

daridrANAM chintAmaNiguNanikA janmajaladhau

nimagnAnAM daMShTrA muraripu-varAhasya bhavati || 3 ||

tvadanyaH pANibhyAmabhayavarado daivatagaNaH

tvamekA naivAsi prakaTitavarAbhItyabhinayA |

bhayAt trAtuM dAtuM phalamapi cha vA~nChAsamadhikaM

sharaNye lokAnAM tava hi charaNAveva nipuNau || 4 ||

haristvAmArAdhya praNatajanasaubhAgyajananIM

purA nArI bhUtvA puraripumapi kShobhamanayat |

smaro.api tvAM natvA ratinayanalehyena vapuShA

munInAmapyantaH prabhavati hi mohAya mahatAm || 5 ||

dhanuH pauShpaM maurvI madhukaramayI pa~ncha vishikhAH

vasantaH sAmanto malayamarudAyodhanarathaH |

tathApyekaH sarvaM himagirisute kAmapi kRRipAm

apANgAtte labdhvA jagadida-manaNgo vijayate || 6 ||

kvaNatkA~nchIdAmA karikalabhakumbhastananatA

parikShINA madhye pariNatasharachchandravadanA |

dhanurbANAn pAshaM sRRiNimapi dadhAnA karatalaiH

purastAdAstAM naH puramathiturAhopuruShikA || 7 ||

sudhAsindhormadhye suraviTapivATIparivRRite

maNidvIpe nIpopavanavati chintAmaNigRRihe |

shivAkAre manche paramashivaparyaNkanilayAM

bhajanti tvAM dhanyAH katichana chidAnandalaharIm || 8 ||

mahIM mUlAdhAre kamapi maNipUre hutavahaM

sthitaM svAdhiShThAne hRRidi marutamAkAshamupari |

mano.api bhrUmadhye sakalamapi bhitvA kulapathaM

sahasrAre padme saha rahasi patyA viharase || 9 ||

sudhAdhArAsAraishcharaNayugalAntarvigalitaiH

prapanchaM sinchantI punarapi rasAmnAyamahasaH |

avApya svAM bhUmiM bhujaganibhamadhyuShTavalayaM

svamAtmAnaM kRRitvA svapiShi kulakuNDe kuhariNi || 10 ||

chaturbhiH shrIkaNThaiH shivayuvatibhiH pa~nchabhirapi

prabhinnAbhiH shambhornavabhirapi mUlaprakRRitibhiH |

chatushchatvAriMshadvasudalakalAshratrivalaya- [trayashchatvAri]

trirekhAbhiH sArdhaM tava sharaNakoNAH pariNatAH || 11 || [charaNakoNAH, bhavanakiNAH]

tvadIyaM saundaryaM tuhinagirikanye tulayituM

kavIndrAH kalpante kathamapi viri~nchiprabhRRitayaH |

yadAlokautsukyAdamaralalanA yAnti manasA

tapobhirduShprApAmapi girishasAyujyapadavIm || 12 ||

naraM varShIyAMsaM nayanavirasaM narmasu jaDaM

tavApA~NgAloke patitamanudhAvanti shatashaH |

galadveNIbandhAH kuchakalashavisrastasichayA

haThAt truTyatkA~nchyo vigalitadukUlA yuvatayaH || 13 ||

kShitau ShaTpanchAshad dvisamadhikapanchAshadudake

hutAshe dvAShaShTishchaturadhikapa~nchAshadanile |

divi dviShShaTtriMshanmanasi cha chatuShShaShTiriti ye

mayUkhAsteShAmapyupari tava pAdAmbujayugam || 14 ||

sharajjyotsnAshuddhAM shashiyutajaTAjUTamakuTAM

varatrAsatrANasphaTikaghaTikApustakakarAm |

sakRRinna tvA natvA kathamiva satAM sannnidadhate

madhukShIradrAkShAmadhurimadhurINAH bhaNitayaH || 15|| [phaNitayaH]

kavIndrANAM chetaHkamalavanabAlAtaparuchiM

bhajante ye santaH katichidaruNAmeva bhavatIm |

virinchipreyasyAstaruNatarasha{}RRiNgAralaharI-

gabhIrAbhirvAgbhirvidadhati satAM ra~njanamamI || 16 ||

savitrIbhirvAchAM shashimaNishilAbha~NgaruchibhiH

vashinyAdyAbhistvAM saha janani sa~nchintayati yaH |

sa kartA kAvyAnAM bhavati mahatAM bha~NgiruchibhiH

vachobhirvAgdevIvadanakamalAmodamadhuraiH || 17 ||

tanuchChAyAbhiste taruNataraNishrIsaraNibhiH

divaM sarvAmurvImaruNimani magnAM smarati yaH |

bhavantyasya trasyadvanahariNashAlInanayanAH

sahorvashyA vashyAH kati kati na gIrvANagaNikAH || 18 ||

mukhaM binduM kRRitvA kuchayugamadhastasya tadadho

harArdhaM dhyAyedyo haramahiShi te manmathakalAm |

sa sadyaH sa~NkShobhaM nayati vanitA ityatilaghu

trilokImapyAshu bhramayati ravIndustanayugAm || 19 ||

kirantIma~NgebhyaH kiraNanikurambAmRRitarasaM

hRRidi tvAmAdhatte himakarashilAmUrtimiva yaH |

sa sarpANAM darpaM shamayati shakuntAdhipa iva

jvarapluShTAn dRRiShTyA sukhayati sudhAdhArasirayA || 20 ||

taTillekhAtanvIM tapanashashivaishvAnaramayIM

niShaNNAM ShaNNAmapyupari kamalAnAM tava kalAm |

mahApadmATavyAM mRRiditamalamAyena manasA

mahAntaH pashyanto dadhati paramAhlAdalaharIm || 21 ||

bhavAni tvaM dAse mayi vitara dRRiShTiM sakaruNA-

miti stotuM vA~nChan kathayati bhavAni tvamiti yaH |

tadaiva tvaM tasmai dishasi nijasAyujyapadavIM

mukundabrahmendrasphuTamakuTanIrAjitapadAm || 22 ||

tvayA hRRitvA vAmaM vapurapari-tRRiptena manasA

sharIrArdhaM shambhoraparamapi sha~Nke hRRitamabhUt |

yadetattvadrUpaM sakalamaruNAbhaM trinayanaM

kuchAbhyAmAnamraM kuTilashashichUDAlamakuTam || 23 ||

jagatsUte dhAtA hariravati rudraH kShapayate

tiraskurvannetatsvamapi vapurIshastirayati |

sadApUrvaH sarvaM tadidamanugRRihNAti cha shiva-

stavAj~nAmAlambya kShaNachalitayorbhrUlatikayoH || 24 ||

trayANAM devAnAM triguNajanitAnAM tava shive

bhavet pUjA pUjA tava charaNayoryA virachitA |

tathA hi tvatpAdodvahanamaNipIThasya nikaTe

sthitA hyete shashvanmukulitakarottaMsamakuTAH || 25 ||

virinchiH panchatvaM vrajati harirApnoti viratiM

vinAshaM kInAsho bhajati dhanado yAti nidhanam |

vitandrI mAhendrI vitatirapi sammIlitadRRishA

mahAsaMhAre.asmin viharati sati tvatpatirasau || 26 ||

japo jalpaH shilpaM sakalamapi mudrAvirachanA

gatiH prAdakShiNyakramaNamashanAdyAhutividhiH |

praNAmassaMveshassukhamakhilamAtmArpaNadRRishA

saparyAparyAyastava bhavatu yanme vilasitam || 27 ||

sudhAmapyAsvAdya pratibhayajarAmRRityuhariNIM

vipadyante vishve vidhishatamakhAdyA diviShadaH |

karAlaM yatkShvelaM kabalitavataH kAlakalanA

na shambhostanmUlaM tava janani tATa~NkamahimA || 28 ||

kirITaM vairi~nchaM parihara puraH kaiTabhabhidaH

kaThore koTIre skhalasi jahi jambhArimukuTam |

praNamreShveteShu prasabhamupayAtasya bhavanaM

bhavasyAbhyutthAne tava parijanoktirvijayate || 29 ||

svadehodbhUtAbhirghRRiNibhiraNimAdyAbhirabhito

niShevye nitye tvAmahamiti sadA bhAvayati yaH |

kimAshcharyaM tasya trinayanasamRRiddhiM tRRiNayato

mahAsaMvartAgnirvirachayati nirAjanavidhim || 30 ||

chatuShShaShTyA tantraiH sakalamatisandhAya bhuvanaM

sthitastattatsiddhiprasavaparatantraiH pashupatiH |

punastvannirbandhAdakhilapuruShArthaikaghaTanA-

svatantraM te tantraM kShititalamavAtItaradidam || 31 ||

shivaH shaktiH kAmaH kShitiratha raviH shItakiraNaH

smaro haMsaH shakrastadanu cha parAmAraharayaH |

amI hRRillekhAbhistisRRibhiravasAneShu ghaTitA

bhajante varNAste tava janani nAmAvayavatAm || 32 ||

smaraM yoniM lakShmIM tritayamidamAdau tava mano-

rnidhAyaike nitye niravadhimahAbhogarasikAH |

bhajanti tvAM chintAmaNigunanibaddhAkShavalayAH

shivAgnau juhvantaH surabhighRRitadhArAhutishataiH || 33 ||

sharIraM tvaM shambhoH shashimihiravakShoruhayugaM

tavAtmAnaM manye bhagavati navAtmAnamanagham |

atashsheShashsheShItyayamubhayasAdhAraNatayA

sthitaH sambandho vAM samarasaparAnandaparayoH || 34 ||

manastvaM vyoma tvaM marudasi marutsArathirasi

tvamApastvaM bhUmistvayi pariNatAyAM na hi param |

tvameva svAtmAnaM pariNamayituM vishvavapuShA

chidAnandAkAraM shivayuvati bhAvena bibhRRiShe || 35 ||

tavAj~nAchakrasthaM tapanashashikoTidyutidharaM

paraM shambhuM vande parimilitapArshvaM parachitA |

yamArAdhyan bhaktyA ravishashishuchInAmaviShaye

nirAloke.aloke nivasati hi bhAlokabhuvane || 36 ||

vishuddhau te shuddhasphaTikavishadaM vyomajanakaM

shivaM seve devImapi shivasamAnavyavasitAm |

yayoH kAntyA yAntyAH shashikiraNasArUpyasaraNe-

vidhUtAntardhvAntA vilasati chakorIva jagatI || 37 ||

samunmIlat saMvit kamalamakarandaikarasikaM

bhaje haMsadvandvaM kimapi mahatAM mAnasacharam |

yadAlApAdaShTAdashaguNitavidyApariNati-

ryadAdatte doShAd guNamakhilamadbhyaH paya iva || 38 ||

tava svAdhiShThAne hutavahamadhiShThAya nirataM

tamIDe saMvartaM janani mahatIM tAM cha samayAm |

yadAloke lokAn dahati mahati krodhakalite

dayArdrA yA dRRiShTiH shishiramupachAraM rachayati || 39 ||

taTittvantaM shaktyA timiraparipanthiphuraNayA

sphurannAnAratnAbharaNapariNaddhendradhanuSham |

tava shyAmaM meghaM kamapi maNipUraikasharaNaM

niSheve varShantaM haramihirataptaM tribhuvanam || 40 ||

tavAdhAre mUle saha samayayA lAsyaparayA

navAtmAnaM manye navarasamahAtANDavanaTam |

ubhAbhyAmetAbhyAmudayavidhimuddishya dayayA

sanAthAbhyAM jaj~ne janakajananImajjagadidam || 41 ||

dvitIya bhAgaH - saundarya laharI

gatairmANikyatvaM gaganamaNibhiH sAndraghaTitaM

kirITaM te haimaM himagirisute kIrtayati yaH |

sa nIDeyachChAyAchChuraNashabalaM chandrashakalaM

dhanuH shaunAsIraM kimiti na nibadhnAti dhiShaNAm || 42 ||

dhunotu dhvAntaM nastulitadalitendIvaravanaM

ghanasnigdhashlakShNaM chikuranikurumbaM tava shive |

yadIyaM saurabhyaM sahajamupalabdhuM sumanaso

vasantyasmin manye valamathanavATIviTapinAm || 43 ||

tanotu kShemaM nastava vadanasaundaryalaharI-

parIvAhasrotaHsaraNiriva sImantasaraNiH |

vahantI sindUraM prabalakabarIbhAratimira-

dviShAM bRRindairbandIkRRitamiva navInArkakiraNam || 44 ||

arAlaiH svAbhAvyAdalikalabhasashrIbhiralakaiH

parItaM te vaktraM parihasati pa~Nkeruharuchim |

darasmere yasmin dashanaruchiki~njalkaruchire

sugandhau mAdyanti smaradahanachakShurmadhulihaH || 45 ||

lalATaM lAvaNyadyutivimalamAbhAti tava ya-

ddvitIyaM tanmanye makuTaghaTitaM chandrashakalam |

viparyAsanyAsAdubhayamapi sambhUya cha mithaH

sudhAlepasyUtiH pariNamati rAkAhimakaraH || 46 ||

bhruvau bhugne kinchidbhuvanabhayabhaNgavyasanini

tvadIye netrAbhyAM madhukararuchibhyAM dhRRitaguNam |

dhanurmanye savyetarakaragRRihItaM ratipateH

prakoShThe muShTau cha sthagayati nigUDhAntaramume || 47 ||

ahaH sUte savyaM tava nayanamarkAtmakatayA

triyAmAM vAmaM te sRRijati rajanInAyakatayA |

tRRitIyA te dRRiShTirdaradalitahemAmbujaruchiH

samAdhatte sandhyAM divasanishayorantaracharIm || 48 ||

vishAlA kalyANI sphuTaruchirayodhyA kuvalayaiH

kRRipAdhArAdhArA kimapi madhurAbhogavatikA |

avantI dRRiShTiste bahunagaravistAravijayA

dhruvaM tattannAmavyavaharaNayogyA vijayate || 49 ||

kavInAM sandarbhastabakamakarandaikarasikaM

kaTAkShavyAkShepabhramarakalabhau karNayugalam |

amu~nchantau dRRiShTvA tava navarasAsvAdataralA-

vasUyAsaMsargAdalikanayanaM ki~nchidaruNam || 50 ||

shive sha{}RRi~NgArArdrA taditarajane kutsanaparA

saroShA ga~NgAyAM girishacharite vismayavatI |

harAhibhyo bhItA sarasiruhasaubhAgyajananI (jayinI)

sakhIShu smerA te mayi jananI dRRiShTiH sakaruNA || 51 ||

gate karNAbhyarNaM garuta iva pakShmANi dadhatI

purAM bhettushchittaprashamarasavidrAvaNaphale |

ime netre gotrAdharapatikulottaMsakalike

tavAkarNAkRRiShTasmarasharavilAsaM kalayataH || 52 ||

vibhaktatraivarNyaM vyatikaritalIlA~njanatayA

vibhAti tvannetratritayamidamIshAnadayite |

punaH sraShTuM devAn druhiNaharirudrAnuparatAn

rajaH sattvaM bibhrattama iti guNAnAM trayamiva || 53 ||

pavitrIkartuM naH pashupatiparAdhInahRRidaye

dayAmitrairnetrairaruNadhavalashyAmaruchibhiH |

nadaH shoNo ga~NgA tapanatanayeti dhruvamamuM

trayANAM tIrthAnAmupanayasi sambhedamanagham || 54 ||

nimeShonmeShAbhyAM pralayamudayaM yAti jagatI

tavetyAhuH santo dharaNidhararAjanyatanaye |

tvadunmeShAjjAtaM jagadidamasheShaM pralayataH

paritrAtuM sha~Nke parihRRitanimeShAstava dRRishaH || 55 ||

tavAparNe karNejapanayanapaishunyachakitA

nilIyante toye niyatamanimeShAH shapharikAH |

iyaM cha shrIrbaddhachChadapuTakavATaM kuvalayam

jahAti pratyUShe nishi cha vighaTayya pravishati || 56 ||

dRRishA drAghIyasyA daradalitanIlotpalaruchA

davIyAMsaM dInaM snapaya kRRipayA mAmapi shive |

anenAyaM dhanyo bhavati na cha te hAniriyatA

vane vA harmye vA samakaranipAto himakaraH || 57 ||

arAlaM te pAlIyugalamagarAjanyatanaye

na keShAmAdhatte kusumasharakodaNDakutukam |

tirashchIno yatra shravaNapathamulla~Nghya vilasa-

nnapANgavyAsaNgo dishati sharasandhAnadhiShaNAm || 58 ||

sphuradgaNDAbhogapratiphalitatATa~NkayugalaM

chatushchakraM manye tava mukhamidaM manmatharatham |

yamAruhya druhyatyavanirathamarkenducharaNaM

mahAvIro mAraH pramathapataye sajjitavate || 59 ||

sarasvatyAH sUktIramRRitalaharIkaushalaharIH

pibantyAH sharvANi shravaNachulukAbhyAmaviralam |

chamatkArashlAghAchalitashirasaH kuNDalagaNo

jhaNatkAraistAraiH prativachanamAchaShTa iva te || 60 ||

asau nAsAvaMshastuhinagirivaMshadhvajapaTi

tvadIyo nedIyaH phalatu phalamasmAkamuchitam |

vahannantarmuktAH shishirataranishvAsagalitaM

samRRiddhyA yattAsAM bahirapi cha muktAmaNidharaH || 61 ||

prakRRityA raktAyAstava sudati dantachChadarucheH

pravakShye sAdRRishyaM janayatu phalaM vidrumalatA |

na bimbaM tadbimbapratiphalanarAgAdaruNitaM

tulAmadhyAroDhuM kathamiva vilajjeta kalayA || 62 ||

smitajyotsnAjAlaM tava vadanachandrasya pibatAM

chakorANAmAsIdatirasatayA cha~nchujaDimA |

ataste shItAMshoramRRitalaharImamlaruchayaH

pibanti svachChandaM nishi nishi bhRRishaM kA~njikadhiyA || 63 ||

avishrAntaM patyurguNagaNakathAmreDanajapA

japApuShpachChAyA tava janani jihvA jayati sA |

yadagrAsInAyAH sphaTikadRRiShadachChachChavimayI

sarasvatyA mUrtiH pariNamati mANikyavapuShA || 64 ||

raNe jitvA daityAnapahRRitashirastraiH kavachibhir-

nivRRittaishchaNDAMshatripuraharanirmAlyavimukhaiH |

vishAkhendropendraiH shashivishadakarpUrashakalA

vilIyante mAtastava vadanatAmbUlakabalAH || 65 ||

vipa~nchyA gAyantI vividhamapadAnaM pashupateH

tvayArabdhe vaktuM chalitashirasA sAdhuvachane |

tadIyairmAdhuryairapalapitatantrIkalaravAM

nijAM vINAM vANI nichulayati cholena nibhRRitam || 66 ||

karAgreNa spRRiShTaM tuhinagiriNA vatsalatayA

girIshenodastaM muhuradharapAnAkulatayA |

karagrAhyaM shambhormukhamukuravRRintaM girisute

katha~NkAraM brUmastava chibukamaupamyarahitam || 67 ||

bhujAshleShAn nityaM puradamayituH kaNTakavatI

tava grIvA dhatte mukhakamalanAlashriyamiyam |

svataH shvetA kAlAgurubahulajambAlamalinA

mRRiNAlIlAlityaM vahati yadadho hAralatikA || 68 ||

gale rekhAstisro gatigamakagItaikanipuNe

vivAhavyAnaddhapraguNaguNasa~NkhyApratibhuvaH |

virAjante nAnAvidhamadhurarAgAkarabhuvAM

trayANAM grAmANAM sthitiniyamasImAna iva te || 69 ||

mRRiNAlImRRidvInAM tava bhujalatAnAM chatasRRiNAM

chaturbhiH saundaryaM sarasijabhavaH stauti vadanaiH |

nakhebhyaH santrasyan prathamamathanAdandhakaripo-

shchaturNAM shIrShANAM samamabhayahastArpaNadhiyA || 70 ||

nakhAnAmuddyotairnavanalinarAgaM vihasatAM

karANAM te kAntiM kathaya kathayAmaH kathamume |

kayAchidvA sAmyaM bhajatu kalayA hanta kamalaM

yadi krIDallakShmIcharaNatalalAkShArasaChaNam || 71 ||

samaM devi skandadvipavadanapItaM stanayugaM

tavedaM naH khedaM haratu satataM prasnutamukham |

yadAlokyAsha~NkAkulitahRRidayo hAsajanakaH

svakumbhau herambaH parimRRishati hastena jhaDiti || 72 ||

amU te vakShojAvamRRitarasamANikyakutupau

na sandehaspando nagapatipatAke manasi naH |

pibantau tau yasmAdaviditavadhUsa~Ngarasikau

kumArAvadyApi dviradavadanakrau~nchadalanau || 73 ||

vahatyamba stamberamadanujakumbhaprakRRitibhiH

samArabdhAM muktAmaNibhiramalAM hAralatikAm |

kuchAbhogo bimbAdhararuchibhirantaH shabalitAM

pratApavyAmishrAM puradamayituH kIrtimiva te || 74 ||

tava stanyaM manye dharaNidharakanye hRRidayataH

payaHpArAvAraH parivahati sArasvatamiva |

dayAvatyA dattaM draviDashishurAsvAdya tava yat

kavInAM prauDhAnAmajani kamanIyaH kavayitA || 75 ||

harakrodhajvAlAvalibhiravalIDhena vapuShA

gabhIre te nAbhIsarasi kRRitasa~Ngo manasijaH |

samuttasthau tasmAdachalatanaye dhUmalatikA

janastAM jAnIte tava janani romAvaliriti || 76 ||

yadetat kAlindItanutaratara~NgAkRRiti shive

kRRishe madhye ki~nchijjanani tava yadbhAti sudhiyAm |

vimardAdanyo.anyaM kuchakalashayorantaragataM

tanUbhUtaM vyoma pravishadiva nAbhiM kuhariNIm || 77 ||

sthiro ga~NgAvartaH stanamukularomAvalilatA-

kalAvAlaM kuNDaM kusumasharatejohutabhujaH |

raterlIlAgAraM kimapi tava nAbhirgirisute

biladvAraM siddhergirishanayanAnAM vijayate || 78 ||

nisargakShINasya stanataTabhareNa klamajuSho

namanmUrternArItilaka shanakaistruTyata iva |

chiraM te madhyasya truTitataTinItIrataruNA

samAvasthAsthemno bhavatu kushalaM shailatanaye || 79 ||

kuchau sadyaHsvidyattaTaghaTitakUrpAsabhidurau

kaShantau dormUle kanakakalashAbhau kalayatA |

tava trAtuM bha~NgAdalamiti valagnaM tanubhuvA

tridhA naddhaM devi trivali lavalIvallibhiriva || 80 ||

gurutvaM vistAraM kShitidharapatiH pArvati nijA-

nnitambAdAchChidya tvayi haraNarUpeNa nidadhe |

ataste vistIrNo gururayamasheShAM vasumatIM

nitambaprAgbhAraH sthagayati laghutvaM nayati cha || 81 ||

karIndrANAM shuNDAn kanakakadalIkANDapaTalI-

mubhAbhyAmUrubhyAmubhayamapi nirjitya bhavatI |

suvRRittAbhyAM patyuH praNatikaThinAbhyAM girisute

vidhij~nye jAnubhyAM vibudhakarikumbhadvayamasi || 82 ||

parAjetuM rudraM dviguNasharagarbhau girisute

niShaNgau jaNghe te viShamavishikho bADhamakRRita |

yadagre dRRishyante dashasharaphalAH pAdayugalI-

nakhAgrachChadmAnaH suramakuTashANaikanishitAH || 83 ||

shrutInAM mUrdhAno dadhati tava yau shekharatayA

mamApyetau mAtaH shirasi dayayA dhehi charaNau |

yayoH pAdyaM pAthaH pashupatijaTAjUTataTinI

yayorlAkShAlakShmIraruNaharichUDAmaNiruchiH || 84 ||

namovAkaM brUmo nayanaramaNIyAya padayo-

stavAsmai dvandvAya sphuTaruchirasAlaktakavate |

asUyatyatyantaM yadabhihananAya spRRihayate

pashUnAmIshAnaH pramadavanaka~Nkelitarave || 85 ||

mRRiShA kRRitvA gotraskhalanamatha vailakShyanamitaM

lalATe bhartAraM charaNakamale tADayati te |

chirAdantaHshalyaM dahanakRRitamunmUlitavatA

tulAkoTikvANaiH kilikilitamIshAnaripuNA || 86 ||

himAnIhantavyaM himagirinivAsaikachaturau

nishAyAM nidrANaM nishi charamabhAge cha vishadau |

varaM lakShmIpAtraM shriyamatisRRijantau samayinAM

sarojaM tvatpAdau janani jayatashchitramiha kim || 87 ||

padaM te kIrtInAM prapadamapadaM devi vipadAM

kathaM nItaM sadbhiH kaThinakamaThIkarparatulAm |

kathaM vA bAhubhyAmupayamanakAle purabhidA

yadAdAya nyastaM dRRiShadi dayamAnena manasA || 88 ||

nakhairnAkastrINAM karakamalasa~Nkochashashibhi-

starUNAM divyAnAM hasata iva te chaNDi charaNau |

phalAni svaHsthebhyaH kisalayakarAgreNa dadatAM

daridrebhyo bhadrAM shriyamanishamahnAya dadatau || 89 ||

dadAne dInebhyaH shriyamanishamAshAnusadRRishI-

mamandaM saundaryaprakaramakarandaM vikirati |

tavAsmin mandArastabakasubhage yAtu charaNe

nimajjanmajjIvaH karaNacharaNaH ShaTcharaNatAm || 90 ||

padanyAsakrIDAparichayamivArabdhumanasaH

skhalantaste khelaM bhavanakalahaMsA na jahati |

atasteShAM shikShAM subhagamaNima~njIraraNita-

chChalAdAchakShANaM charaNakamalaM chArucharite || 91 ||

gatAste ma~nchatvaM druhiNaharirudreshvarabhRRitaH

shivaH svachChachChAyAghaTitakapaTaprachChadapaTaH |

tvadIyAnAM bhAsAM pratiphalanarAgAruNatayA

sharIrI sha{}RRi~NgAro rasa iva dRRishAM dogdhi kutukam || 92 ||

arAlA kesheShu prakRRitisaralA mandahasite

shirIShAbhA chitte dRRiShadupalashobhA kuchataTe |

bhRRishaM tanvI madhye pRRithururasijArohaviShaye

jagattrAtuM shambhorjayati karuNA kAchidaruNA || 93 ||

kala~NkaH kastUrI rajanikarabimbaM jalamayaM

kalAbhiH karpUrairmarakatakaraNDaM nibiDitam |

atastvadbhogena pratidinamidaM riktakuharaM

vidhirbhUyo bhUyo nibiDayati nUnaM tava kRRite || 94 ||

purArAterantaHpuramasi tatastvachcharaNayoH

saparyAmaryAdA taralakaraNAnAmasulabhA |

tathA hyete nItAH shatamakhamukhAH siddhimatulAM

tava dvAropAntasthitibhiraNimAdyAbhiramarAH || 95 ||

kalatraM vaidhAtraM katikati bhajante na kavayaH

shriyo devyAH ko vA na bhavati patiH kairapi dhanaiH |

mahAdevaM hitvA tava sati satInAmacharame

kuchAbhyAmAsa~NgaH kuravakatarorapyasulabhaH || 96 ||

girAmAhurdevIM druhiNagRRihiNImAgamavido

hareH patnIM padmAM harasahacharImadritanayAm |

turIyA kApi tvaM duradhigamaniHsImamahimA

mahAmAyA vishvaM bhramayasi parabrahmamahiShi || 97 ||

kadA kAle mAtaH kathaya kalitAlaktakarasaM

pibeyaM vidyArthI tava charaNanirNejanajalam |

prakRRityA mUkAnAmapi cha kavitAkAraNatayA

kadA dhatte vANImukhakamalatAmbUlarasatAm || 98 ||

sarasvatyA lakShmyA vidhiharisapatno viharate

rateH pAtivratyaM shithilayati ramyeNa vapuShA |

chiraM jIvanneva kShapitapashupAshavyatikaraH

parAnandAbhikhyaM rasayati rasaM tvadbhajanavAn || 99 ||

pradIpajvAlAbhirdivasakaranIrAjanavidhiH

sudhAsUteshchandropalajalalavairarghyarachanA |

svakIyairambhobhiH salilanidhisauhityakaraNaM

tvadIyAbhirvAgbhistava janani vAchAM stutiriyam || 100 ||

saundaryalahari mukhyastotraM saMvArtadAyakam |

bhagavadpAda sankluptaM paThen muktau bhavennaraH ||

|| iti shrImatparamahaMsaparivrAjakAchAryasya

shrIgovindabhagavatpUjyapAdashiShyasya

shrImachCha~NkarabhagavataH kRRitau saundaryalaharI sampUrNA ||

|| OM tatsat ||

(anubandhaH)

samAnItaH padbhyAM maNimukuratAmambaramaNi-

rbhayAdAsyAdantaHstimitakiraNashreNimasRRiNaH |

(pAThabhedaH - bhayAdAsya snigdhastmita, bhayAdAsyasyAntaHstmita)

dadhAti tvadvaktrampratiphalanamashrAntavikachaM

nirAtaNkaM chandrAnnijahRRidayapaNkeruhamiva || 101 ||

samudbhUtasthUlastanabharamurashchAru hasitaM

kaTAkShe kandarpaH katichana kadambadyuti vapuH |

harasya tvadbhrAntiM manasi janayanti sma vimalAH

pAThabhedaH - janayAmAsa madano, janayantaH samatulAM, janayantA suvadane

bhavatyA ye bhaktAH pariNatiramIShAmiyamume || 102 ||

nidhe nityasmere niravadhiguNe nItinipuNe

nirAghAtaj~nAne niyamaparachittaikanilaye |

niyatyA nirmukte nikhilanigamAntastutipade

nirAta~Nke nitye nigamaya mamApi stutimimAm || 103 ||