Soundarya Lahari

saundarya laharI

zloka 1

prathama bhAgaH - Ananda lahari

bhumauskhalita pAdAnAM bhUmirevA valambanam |

tvayI jAtA parAdhAnAM tvameva zaraNaM zive ||

zivaH zaktyA yukto yadi bhavati zaktaH prabhavituM

na cedevaM devo na khalu kuzalaH spanditumapi |

atastvAmArAdhyAM hariharaviriJcAdibhirapi

praNantuM stotuM vA kathamakRtapuNyaH prabhavati || 1 ||

tanIyAMsaM pAMsuM tava caraNapaGkeruhabhavaM

viriJcissaJcinvan viracayati lokAnavikalam |

vahatyenaM zauriH kathamapi sahasreNa zirasAM

harassaGkSudyainaM bhajati bhasitoddhUlanavidhim || 2 ||

avidyAnAmanta-stimira-mihiradvIpanagarI

jaDAnAM caitanya-stabaka-makaranda-srutijharI |

daridrANAM cintAmaNiguNanikA janmajaladhau

nimagnAnAM daMSTrA muraripu-varAhasya bhavati || 3 ||

tvadanyaH pANibhyAmabhayavarado daivatagaNaH

tvamekA naivAsi prakaTitavarAbhItyabhinayA |

bhayAt trAtuM dAtuM phalamapi ca vAJchAsamadhikaM

zaraNye lokAnAM tava hi caraNAveva nipuNau || 4 ||

haristvAmArAdhya praNatajanasaubhAgyajananIM

purA nArI bhUtvA puraripumapi kSobhamanayat |

smaro'pi tvAM natvA ratinayanalehyena vapuSA

munInAmapyantaH prabhavati hi mohAya mahatAm || 5 ||

dhanuH pauSpaM maurvI madhukaramayI paJca vizikhAH

vasantaH sAmanto malayamarudAyodhanarathaH |

tathApyekaH sarvaM himagirisute kAmapi kRpAm

apAGgAtte labdhvA jagadida-manaGgo vijayate || 6 ||

kvaNatkAJcIdAmA karikalabhakumbhastananatA

parikSINA madhye pariNatazaraccandravadanA |

dhanurbANAn pAzaM sRNimapi dadhAnA karatalaiH

purastAdAstAM naH puramathiturAhopuruSikA || 7 ||

sudhAsindhormadhye suraviTapivATIparivRte

maNidvIpe nIpopavanavati cintAmaNigRhe |

zivAkAre maJce paramazivaparyaGkanilayAM

bhajanti tvAM dhanyAH katicana cidAnandalaharIm || 8 ||

mahIM mUlAdhAre kamapi maNipUre hutavahaM

sthitaM svAdhiSThAne hRdi marutamAkAzamupari |

mano'pi bhrUmadhye sakalamapi bhitvA kulapathaM

sahasrAre padme saha rahasi patyA viharase || 9 ||

sudhAdhArAsAraizcaraNayugalAntarvigalitaiH

prapaJcaM siJcantI punarapi rasAmnAyamahasaH |

avApya svAM bhUmiM bhujaganibhamadhyuSTavalayaM

svamAtmAnaM kRtvA svapiSi kulakuNDe kuhariNi || 10 ||

caturbhiH zrIkaNThaiH zivayuvatibhiH paJcabhirapi

prabhinnAbhiH zambhornavabhirapi mUlaprakRtibhiH |

catuzcatvAriMzadvasudalakalAzratrivalaya- [trayazcatvAri]

trirekhAbhiH sArdhaM tava zaraNakoNAH pariNatAH || 11 || [caraNakoNAH, bhavanakiNAH]

tvadIyaM saundaryaM tuhinagirikanye tulayituM

kavIndrAH kalpante kathamapi viriJciprabhRtayaH |

yadAlokautsukyAdamaralalanA yAnti manasA

tapobhirduSprApAmapi girizasAyujyapadavIm || 12 ||

naraM varSIyAMsaM nayanavirasaM narmasu jaDaM

tavApAGgAloke patitamanudhAvanti zatazaH |

galadveNIbandhAH kucakalazavisrastasicayA

haThAt truTyatkAJcyo vigalitadukUlA yuvatayaH || 13 ||

kSitau SaTpaJcAzad dvisamadhikapaJcAzadudake

hutAze dvASaSTizcaturadhikapaJcAzadanile |

divi dviSSaTtriMzanmanasi ca catuSSaSTiriti ye

mayUkhAsteSAmapyupari tava pAdAmbujayugam || 14 ||

zarajjyotsnAzuddhAM zaziyutajaTAjUTamakuTAM

varatrAsatrANasphaTikaghaTikApustakakarAm |

sakRnna tvA natvA kathamiva satAM sannnidadhate

madhukSIradrAkSAmadhurimadhurINAH bhaNitayaH || 15|| [phaNitayaH]

kavIndrANAM cetaHkamalavanabAlAtaparuciM

bhajante ye santaH katicidaruNAmeva bhavatIm |

viriJcipreyasyAstaruNataraza‍RGgAralaharI-

gabhIrAbhirvAgbhirvidadhati satAM raJjanamamI || 16 ||

savitrIbhirvAcAM zazimaNizilAbhaGgarucibhiH

vazinyAdyAbhistvAM saha janani saJcintayati yaH |

sa kartA kAvyAnAM bhavati mahatAM bhaGgirucibhiH

vacobhirvAgdevIvadanakamalAmodamadhuraiH || 17 ||

tanucchAyAbhiste taruNataraNizrIsaraNibhiH

divaM sarvAmurvImaruNimani magnAM smarati yaH |

bhavantyasya trasyadvanahariNazAlInanayanAH

sahorvazyA vazyAH kati kati na gIrvANagaNikAH || 18 ||

mukhaM binduM kRtvA kucayugamadhastasya tadadho

harArdhaM dhyAyedyo haramahiSi te manmathakalAm |

sa sadyaH saGkSobhaM nayati vanitA ityatilaghu

trilokImapyAzu bhramayati ravIndustanayugAm || 19 ||

kirantImaGgebhyaH kiraNanikurambAmRtarasaM

hRdi tvAmAdhatte himakarazilAmUrtimiva yaH |

sa sarpANAM darpaM zamayati zakuntAdhipa iva

jvarapluSTAn dRSTyA sukhayati sudhAdhArasirayA || 20 ||

taTillekhAtanvIM tapanazazivaizvAnaramayIM

niSaNNAM SaNNAmapyupari kamalAnAM tava kalAm |

mahApadmATavyAM mRditamalamAyena manasA

mahAntaH pazyanto dadhati paramAhlAdalaharIm || 21 ||

bhavAni tvaM dAse mayi vitara dRSTiM sakaruNA-

miti stotuM vAJchan kathayati bhavAni tvamiti yaH |

tadaiva tvaM tasmai dizasi nijasAyujyapadavIM

mukundabrahmendrasphuTamakuTanIrAjitapadAm || 22 ||

tvayA hRtvA vAmaM vapurapari-tRptena manasA

zarIrArdhaM zambhoraparamapi zaGke hRtamabhUt |

yadetattvadrUpaM sakalamaruNAbhaM trinayanaM

kucAbhyAmAnamraM kuTilazazicUDAlamakuTam || 23 ||

jagatsUte dhAtA hariravati rudraH kSapayate

tiraskurvannetatsvamapi vapurIzastirayati |

sadApUrvaH sarvaM tadidamanugRhNAti ca ziva-

stavAjJAmAlambya kSaNacalitayorbhrUlatikayoH || 24 ||

trayANAM devAnAM triguNajanitAnAM tava zive

bhavet pUjA pUjA tava caraNayoryA viracitA |

tathA hi tvatpAdodvahanamaNipIThasya nikaTe

sthitA hyete zazvanmukulitakarottaMsamakuTAH || 25 ||

viriJciH paJcatvaM vrajati harirApnoti viratiM

vinAzaM kInAzo bhajati dhanado yAti nidhanam |

vitandrI mAhendrI vitatirapi sammIlitadRzA

mahAsaMhAre'smin viharati sati tvatpatirasau || 26 ||

japo jalpaH zilpaM sakalamapi mudrAviracanA

gatiH prAdakSiNyakramaNamazanAdyAhutividhiH |

praNAmassaMvezassukhamakhilamAtmArpaNadRzA

saparyAparyAyastava bhavatu yanme vilasitam || 27 ||

sudhAmapyAsvAdya pratibhayajarAmRtyuhariNIM

vipadyante vizve vidhizatamakhAdyA diviSadaH |

karAlaM yatkSvelaM kabalitavataH kAlakalanA

na zambhostanmUlaM tava janani tATaGkamahimA || 28 ||

kirITaM vairiJcaM parihara puraH kaiTabhabhidaH

kaThore koTIre skhalasi jahi jambhArimukuTam |

praNamreSveteSu prasabhamupayAtasya bhavanaM

bhavasyAbhyutthAne tava parijanoktirvijayate || 29 ||

svadehodbhUtAbhirghRNibhiraNimAdyAbhirabhito

niSevye nitye tvAmahamiti sadA bhAvayati yaH |

kimAzcaryaM tasya trinayanasamRddhiM tRNayato

mahAsaMvartAgnirviracayati nirAjanavidhim || 30 ||

catuSSaSTyA tantraiH sakalamatisandhAya bhuvanaM

sthitastattatsiddhiprasavaparatantraiH pazupatiH |

punastvannirbandhAdakhilapuruSArthaikaghaTanA-

svatantraM te tantraM kSititalamavAtItaradidam || 31 ||

zivaH zaktiH kAmaH kSitiratha raviH zItakiraNaH

smaro haMsaH zakrastadanu ca parAmAraharayaH |

amI hRllekhAbhistisRbhiravasAneSu ghaTitA

bhajante varNAste tava janani nAmAvayavatAm || 32 ||

smaraM yoniM lakSmIM tritayamidamAdau tava mano-

rnidhAyaike nitye niravadhimahAbhogarasikAH |

bhajanti tvAM cintAmaNigunanibaddhAkSavalayAH

zivAgnau juhvantaH surabhighRtadhArAhutizataiH || 33 ||

zarIraM tvaM zambhoH zazimihiravakSoruhayugaM

tavAtmAnaM manye bhagavati navAtmAnamanagham |

atazzeSazzeSItyayamubhayasAdhAraNatayA

sthitaH sambandho vAM samarasaparAnandaparayoH || 34 ||

manastvaM vyoma tvaM marudasi marutsArathirasi

tvamApastvaM bhUmistvayi pariNatAyAM na hi param |

tvameva svAtmAnaM pariNamayituM vizvavapuSA

cidAnandAkAraM zivayuvati bhAvena bibhRSe || 35 ||

tavAjJAcakrasthaM tapanazazikoTidyutidharaM

paraM zambhuM vande parimilitapArzvaM paracitA |

yamArAdhyan bhaktyA ravizazizucInAmaviSaye

nirAloke'loke nivasati hi bhAlokabhuvane || 36 ||

vizuddhau te zuddhasphaTikavizadaM vyomajanakaM

zivaM seve devImapi zivasamAnavyavasitAm |

yayoH kAntyA yAntyAH zazikiraNasArUpyasaraNe-

vidhUtAntardhvAntA vilasati cakorIva jagatI || 37 ||

samunmIlat saMvit kamalamakarandaikarasikaM

bhaje haMsadvandvaM kimapi mahatAM mAnasacaram |

yadAlApAdaSTAdazaguNitavidyApariNati-

ryadAdatte doSAd guNamakhilamadbhyaH paya iva || 38 ||

tava svAdhiSThAne hutavahamadhiSThAya nirataM

tamIDe saMvartaM janani mahatIM tAM ca samayAm |

yadAloke lokAn dahati mahati krodhakalite

dayArdrA yA dRSTiH ziziramupacAraM racayati || 39 ||

taTittvantaM zaktyA timiraparipanthiphuraNayA

sphurannAnAratnAbharaNapariNaddhendradhanuSam |

tava zyAmaM meghaM kamapi maNipUraikazaraNaM

niSeve varSantaM haramihirataptaM tribhuvanam || 40 ||

tavAdhAre mUle saha samayayA lAsyaparayA

navAtmAnaM manye navarasamahAtANDavanaTam |

ubhAbhyAmetAbhyAmudayavidhimuddizya dayayA

sanAthAbhyAM jajJe janakajananImajjagadidam || 41 ||

dvitIya bhAgaH - saundarya laharI

gatairmANikyatvaM gaganamaNibhiH sAndraghaTitaM

kirITaM te haimaM himagirisute kIrtayati yaH |

sa nIDeyacchAyAcchuraNazabalaM candrazakalaM

dhanuH zaunAsIraM kimiti na nibadhnAti dhiSaNAm || 42 ||

dhunotu dhvAntaM nastulitadalitendIvaravanaM

ghanasnigdhazlakSNaM cikuranikurumbaM tava zive |

yadIyaM saurabhyaM sahajamupalabdhuM sumanaso

vasantyasmin manye valamathanavATIviTapinAm || 43 ||

tanotu kSemaM nastava vadanasaundaryalaharI-

parIvAhasrotaHsaraNiriva sImantasaraNiH |

vahantI sindUraM prabalakabarIbhAratimira-

dviSAM bRndairbandIkRtamiva navInArkakiraNam || 44 ||

arAlaiH svAbhAvyAdalikalabhasazrIbhiralakaiH

parItaM te vaktraM parihasati paGkeruharucim |

darasmere yasmin dazanarucikiJjalkarucire

sugandhau mAdyanti smaradahanacakSurmadhulihaH || 45 ||

lalATaM lAvaNyadyutivimalamAbhAti tava ya-

ddvitIyaM tanmanye makuTaghaTitaM candrazakalam |

viparyAsanyAsAdubhayamapi sambhUya ca mithaH

sudhAlepasyUtiH pariNamati rAkAhimakaraH || 46 ||

bhruvau bhugne kiJcidbhuvanabhayabhaGgavyasanini

tvadIye netrAbhyAM madhukararucibhyAM dhRtaguNam |

dhanurmanye savyetarakaragRhItaM ratipateH

prakoSThe muSTau ca sthagayati nigUDhAntaramume || 47 ||

ahaH sUte savyaM tava nayanamarkAtmakatayA

triyAmAM vAmaM te sRjati rajanInAyakatayA |

tRtIyA te dRSTirdaradalitahemAmbujaruciH

samAdhatte sandhyAM divasanizayorantaracarIm || 48 ||

vizAlA kalyANI sphuTarucirayodhyA kuvalayaiH

kRpAdhArAdhArA kimapi madhurAbhogavatikA |

avantI dRSTiste bahunagaravistAravijayA

dhruvaM tattannAmavyavaharaNayogyA vijayate || 49 ||

kavInAM sandarbhastabakamakarandaikarasikaM

kaTAkSavyAkSepabhramarakalabhau karNayugalam |

amuJcantau dRSTvA tava navarasAsvAdataralA-

vasUyAsaMsargAdalikanayanaM kiJcidaruNam || 50 ||

zive za‍RGgArArdrA taditarajane kutsanaparA

saroSA gaGgAyAM girizacarite vismayavatI |

harAhibhyo bhItA sarasiruhasaubhAgyajananI (jayinI)

sakhISu smerA te mayi jananI dRSTiH sakaruNA || 51 ||

gate karNAbhyarNaM garuta iva pakSmANi dadhatI

purAM bhettuzcittaprazamarasavidrAvaNaphale |

ime netre gotrAdharapatikulottaMsakalike

tavAkarNAkRSTasmarazaravilAsaM kalayataH || 52 ||

vibhaktatraivarNyaM vyatikaritalIlAJjanatayA

vibhAti tvannetratritayamidamIzAnadayite |

punaH sraSTuM devAn druhiNaharirudrAnuparatAn

rajaH sattvaM bibhrattama iti guNAnAM trayamiva || 53 ||

pavitrIkartuM naH pazupatiparAdhInahRdaye

dayAmitrairnetrairaruNadhavalazyAmarucibhiH |

nadaH zoNo gaGgA tapanatanayeti dhruvamamuM

trayANAM tIrthAnAmupanayasi sambhedamanagham || 54 ||

nimeSonmeSAbhyAM pralayamudayaM yAti jagatI

tavetyAhuH santo dharaNidhararAjanyatanaye |

tvadunmeSAjjAtaM jagadidamazeSaM pralayataH

paritrAtuM zaGke parihRtanimeSAstava dRzaH || 55 ||

tavAparNe karNejapanayanapaizunyacakitA

nilIyante toye niyatamanimeSAH zapharikAH |

iyaM ca zrIrbaddhacchadapuTakavATaM kuvalayam

jahAti pratyUSe nizi ca vighaTayya pravizati || 56 ||

dRzA drAghIyasyA daradalitanIlotpalarucA

davIyAMsaM dInaM snapaya kRpayA mAmapi zive |

anenAyaM dhanyo bhavati na ca te hAniriyatA

vane vA harmye vA samakaranipAto himakaraH || 57 ||

arAlaM te pAlIyugalamagarAjanyatanaye

na keSAmAdhatte kusumazarakodaNDakutukam |

tirazcIno yatra zravaNapathamullaGghya vilasa-

nnapAGgavyAsaGgo dizati zarasandhAnadhiSaNAm || 58 ||

sphuradgaNDAbhogapratiphalitatATaGkayugalaM

catuzcakraM manye tava mukhamidaM manmatharatham |

yamAruhya druhyatyavanirathamarkenducaraNaM

mahAvIro mAraH pramathapataye sajjitavate || 59 ||

sarasvatyAH sUktIramRtalaharIkauzalaharIH

pibantyAH zarvANi zravaNaculukAbhyAmaviralam |

camatkArazlAghAcalitazirasaH kuNDalagaNo

jhaNatkAraistAraiH prativacanamAcaSTa iva te || 60 ||

asau nAsAvaMzastuhinagirivaMzadhvajapaTi

tvadIyo nedIyaH phalatu phalamasmAkamucitam |

vahannantarmuktAH zizirataranizvAsagalitaM

samRddhyA yattAsAM bahirapi ca muktAmaNidharaH || 61 ||

prakRtyA raktAyAstava sudati dantacchadaruceH

pravakSye sAdRzyaM janayatu phalaM vidrumalatA |

na bimbaM tadbimbapratiphalanarAgAdaruNitaM

tulAmadhyAroDhuM kathamiva vilajjeta kalayA || 62 ||

smitajyotsnAjAlaM tava vadanacandrasya pibatAM

cakorANAmAsIdatirasatayA caJcujaDimA |

ataste zItAMzoramRtalaharImamlarucayaH

pibanti svacchandaM nizi nizi bhRzaM kAJjikadhiyA || 63 ||

avizrAntaM patyurguNagaNakathAmreDanajapA

japApuSpacchAyA tava janani jihvA jayati sA |

yadagrAsInAyAH sphaTikadRSadacchacchavimayI

sarasvatyA mUrtiH pariNamati mANikyavapuSA || 64 ||

raNe jitvA daityAnapahRtazirastraiH kavacibhir-

nivRttaizcaNDAMzatripuraharanirmAlyavimukhaiH |

vizAkhendropendraiH zazivizadakarpUrazakalA

vilIyante mAtastava vadanatAmbUlakabalAH || 65 ||

vipaJcyA gAyantI vividhamapadAnaM pazupateH

tvayArabdhe vaktuM calitazirasA sAdhuvacane |

tadIyairmAdhuryairapalapitatantrIkalaravAM

nijAM vINAM vANI niculayati colena nibhRtam || 66 ||

karAgreNa spRSTaM tuhinagiriNA vatsalatayA

girIzenodastaM muhuradharapAnAkulatayA |

karagrAhyaM zambhormukhamukuravRntaM girisute

kathaGkAraM brUmastava cibukamaupamyarahitam || 67 ||

bhujAzleSAn nityaM puradamayituH kaNTakavatI

tava grIvA dhatte mukhakamalanAlazriyamiyam |

svataH zvetA kAlAgurubahulajambAlamalinA

mRNAlIlAlityaM vahati yadadho hAralatikA || 68 ||

gale rekhAstisro gatigamakagItaikanipuNe

vivAhavyAnaddhapraguNaguNasaGkhyApratibhuvaH |

virAjante nAnAvidhamadhurarAgAkarabhuvAM

trayANAM grAmANAM sthitiniyamasImAna iva te || 69 ||

mRNAlImRdvInAM tava bhujalatAnAM catasRNAM

caturbhiH saundaryaM sarasijabhavaH stauti vadanaiH |

nakhebhyaH santrasyan prathamamathanAdandhakaripo-

zcaturNAM zIrSANAM samamabhayahastArpaNadhiyA || 70 ||

nakhAnAmuddyotairnavanalinarAgaM vihasatAM

karANAM te kAntiM kathaya kathayAmaH kathamume |

kayAcidvA sAmyaM bhajatu kalayA hanta kamalaM

yadi krIDallakSmIcaraNatalalAkSArasachaNam || 71 ||

samaM devi skandadvipavadanapItaM stanayugaM

tavedaM naH khedaM haratu satataM prasnutamukham |

yadAlokyAzaGkAkulitahRdayo hAsajanakaH

svakumbhau herambaH parimRzati hastena jhaDiti || 72 ||

amU te vakSojAvamRtarasamANikyakutupau

na sandehaspando nagapatipatAke manasi naH |

pibantau tau yasmAdaviditavadhUsaGgarasikau

kumArAvadyApi dviradavadanakrauJcadalanau || 73 ||

vahatyamba stamberamadanujakumbhaprakRtibhiH

samArabdhAM muktAmaNibhiramalAM hAralatikAm |

kucAbhogo bimbAdhararucibhirantaH zabalitAM

pratApavyAmizrAM puradamayituH kIrtimiva te || 74 ||

tava stanyaM manye dharaNidharakanye hRdayataH

payaHpArAvAraH parivahati sArasvatamiva |

dayAvatyA dattaM draviDazizurAsvAdya tava yat

kavInAM prauDhAnAmajani kamanIyaH kavayitA || 75 ||

harakrodhajvAlAvalibhiravalIDhena vapuSA

gabhIre te nAbhIsarasi kRtasaGgo manasijaH |

samuttasthau tasmAdacalatanaye dhUmalatikA

janastAM jAnIte tava janani romAvaliriti || 76 ||

yadetat kAlindItanutarataraGgAkRti zive

kRze madhye kiJcijjanani tava yadbhAti sudhiyAm |

vimardAdanyo'nyaM kucakalazayorantaragataM

tanUbhUtaM vyoma pravizadiva nAbhiM kuhariNIm || 77 ||

sthiro gaGgAvartaH stanamukularomAvalilatA-

kalAvAlaM kuNDaM kusumazaratejohutabhujaH |

raterlIlAgAraM kimapi tava nAbhirgirisute

biladvAraM siddhergirizanayanAnAM vijayate || 78 ||

nisargakSINasya stanataTabhareNa klamajuSo

namanmUrternArItilaka zanakaistruTyata iva |

ciraM te madhyasya truTitataTinItIrataruNA

samAvasthAsthemno bhavatu kuzalaM zailatanaye || 79 ||

kucau sadyaHsvidyattaTaghaTitakUrpAsabhidurau

kaSantau dormUle kanakakalazAbhau kalayatA |

tava trAtuM bhaGgAdalamiti valagnaM tanubhuvA

tridhA naddhaM devi trivali lavalIvallibhiriva || 80 ||

gurutvaM vistAraM kSitidharapatiH pArvati nijA-

nnitambAdAcchidya tvayi haraNarUpeNa nidadhe |

ataste vistIrNo gururayamazeSAM vasumatIM

nitambaprAgbhAraH sthagayati laghutvaM nayati ca || 81 ||

karIndrANAM zuNDAn kanakakadalIkANDapaTalI-

mubhAbhyAmUrubhyAmubhayamapi nirjitya bhavatI |

suvRttAbhyAM patyuH praNatikaThinAbhyAM girisute

vidhijJye jAnubhyAM vibudhakarikumbhadvayamasi || 82 ||

parAjetuM rudraM dviguNazaragarbhau girisute

niSaGgau jaGghe te viSamavizikho bADhamakRta |

yadagre dRzyante dazazaraphalAH pAdayugalI-

nakhAgracchadmAnaH suramakuTazANaikanizitAH || 83 ||

zrutInAM mUrdhAno dadhati tava yau zekharatayA

mamApyetau mAtaH zirasi dayayA dhehi caraNau |

yayoH pAdyaM pAthaH pazupatijaTAjUTataTinI

yayorlAkSAlakSmIraruNaharicUDAmaNiruciH || 84 ||

namovAkaM brUmo nayanaramaNIyAya padayo-

stavAsmai dvandvAya sphuTarucirasAlaktakavate |

asUyatyatyantaM yadabhihananAya spRhayate

pazUnAmIzAnaH pramadavanakaGkelitarave || 85 ||

mRSA kRtvA gotraskhalanamatha vailakSyanamitaM

lalATe bhartAraM caraNakamale tADayati te |

cirAdantaHzalyaM dahanakRtamunmUlitavatA

tulAkoTikvANaiH kilikilitamIzAnaripuNA || 86 ||

himAnIhantavyaM himagirinivAsaikacaturau

nizAyAM nidrANaM nizi caramabhAge ca vizadau |

varaM lakSmIpAtraM zriyamatisRjantau samayinAM

sarojaM tvatpAdau janani jayatazcitramiha kim || 87 ||

padaM te kIrtInAM prapadamapadaM devi vipadAM

kathaM nItaM sadbhiH kaThinakamaThIkarparatulAm |

kathaM vA bAhubhyAmupayamanakAle purabhidA

yadAdAya nyastaM dRSadi dayamAnena manasA || 88 ||

nakhairnAkastrINAM karakamalasaGkocazazibhi-

starUNAM divyAnAM hasata iva te caNDi caraNau |

phalAni svaHsthebhyaH kisalayakarAgreNa dadatAM

daridrebhyo bhadrAM zriyamanizamahnAya dadatau || 89 ||

dadAne dInebhyaH zriyamanizamAzAnusadRzI-

mamandaM saundaryaprakaramakarandaM vikirati |

tavAsmin mandArastabakasubhage yAtu caraNe

nimajjanmajjIvaH karaNacaraNaH SaTcaraNatAm || 90 ||

padanyAsakrIDAparicayamivArabdhumanasaH

skhalantaste khelaM bhavanakalahaMsA na jahati |

atasteSAM zikSAM subhagamaNimaJjIraraNita-

cchalAdAcakSANaM caraNakamalaM cArucarite || 91 ||

gatAste maJcatvaM druhiNaharirudrezvarabhRtaH

zivaH svacchacchAyAghaTitakapaTapracchadapaTaH |

tvadIyAnAM bhAsAM pratiphalanarAgAruNatayA

zarIrI za‍RGgAro rasa iva dRzAM dogdhi kutukam || 92 ||

arAlA kezeSu prakRtisaralA mandahasite

zirISAbhA citte dRSadupalazobhA kucataTe |

bhRzaM tanvI madhye pRthururasijArohaviSaye

jagattrAtuM zambhorjayati karuNA kAcidaruNA || 93 ||

kalaGkaH kastUrI rajanikarabimbaM jalamayaM

kalAbhiH karpUrairmarakatakaraNDaM nibiDitam |

atastvadbhogena pratidinamidaM riktakuharaM

vidhirbhUyo bhUyo nibiDayati nUnaM tava kRte || 94 ||

purArAterantaHpuramasi tatastvaccaraNayoH

saparyAmaryAdA taralakaraNAnAmasulabhA |

tathA hyete nItAH zatamakhamukhAH siddhimatulAM

tava dvAropAntasthitibhiraNimAdyAbhiramarAH || 95 ||

kalatraM vaidhAtraM katikati bhajante na kavayaH

zriyo devyAH ko vA na bhavati patiH kairapi dhanaiH |

mahAdevaM hitvA tava sati satInAmacarame

kucAbhyAmAsaGgaH kuravakatarorapyasulabhaH || 96 ||

girAmAhurdevIM druhiNagRhiNImAgamavido

hareH patnIM padmAM harasahacarImadritanayAm |

turIyA kApi tvaM duradhigamaniHsImamahimA

mahAmAyA vizvaM bhramayasi parabrahmamahiSi || 97 ||

kadA kAle mAtaH kathaya kalitAlaktakarasaM

pibeyaM vidyArthI tava caraNanirNejanajalam |

prakRtyA mUkAnAmapi ca kavitAkAraNatayA

kadA dhatte vANImukhakamalatAmbUlarasatAm || 98 ||

sarasvatyA lakSmyA vidhiharisapatno viharate

rateH pAtivratyaM zithilayati ramyeNa vapuSA |

ciraM jIvanneva kSapitapazupAzavyatikaraH

parAnandAbhikhyaM rasayati rasaM tvadbhajanavAn || 99 ||

pradIpajvAlAbhirdivasakaranIrAjanavidhiH

sudhAsUtezcandropalajalalavairarghyaracanA |

svakIyairambhobhiH salilanidhisauhityakaraNaM

tvadIyAbhirvAgbhistava janani vAcAM stutiriyam || 100 ||

saundaryalahari mukhyastotraM saMvArtadAyakam |

bhagavadpAda sankluptaM paThen muktau bhavennaraH ||

|| iti zrImatparamahaMsaparivrAjakAcAryasya

zrIgovindabhagavatpUjyapAdaziSyasya

zrImacchaGkarabhagavataH kRtau saundaryalaharI sampUrNA ||

|| OM tatsat ||

(anubandhaH)

samAnItaH padbhyAM maNimukuratAmambaramaNi-

rbhayAdAsyAdantaHstimitakiraNazreNimasRNaH |

(pAThabhedaH - bhayAdAsya snigdhastmita, bhayAdAsyasyAntaHstmita)

dadhAti tvadvaktrampratiphalanamazrAntavikacaM

nirAtaGkaM candrAnnijahRdayapaGkeruhamiva || 101 ||

samudbhUtasthUlastanabharamurazcAru hasitaM

kaTAkSe kandarpaH katicana kadambadyuti vapuH |

harasya tvadbhrAntiM manasi janayanti sma vimalAH

pAThabhedaH - janayAmAsa madano, janayantaH samatulAM, janayantA suvadane

bhavatyA ye bhaktAH pariNatiramISAmiyamume || 102 ||

nidhe nityasmere niravadhiguNe nItinipuNe

nirAghAtajJAne niyamaparacittaikanilaye |

niyatyA nirmukte nikhilanigamAntastutipade

nirAtaGke nitye nigamaya mamApi stutimimAm || 103 ||