Sanusvara Prasna (Sunnala Pannam)

sānusvāra praśna (sunnāla pannam)

Śloka 1

śrī gurubhyo namaḥ | hariḥ om |

brahma̭ṇe brāhma॒ṇamāla̭bhate | kṣa॒ttrāya̭ rāja॒nyam᳚ |

ma॒rudbhyo॒ vaiśyam᳚ | tapa̭se śū॒dram |

tama̭se॒ taska̭ram | nāra̭kāya vīra॒haṇam᳚ |

pā॒pmane᳚ klī॒bam | ā॒kra॒yāyā̭yo॒gūm |

kāmā̭ya pugg‍śca॒lūm | ati̭kruṣṭāya māga॒dham || 1 ||

gī॒tāya̭ sū॒tam | nṛ॒ttāya̭ śailū॒ṣam |

dharmā̭ya sabhāca॒ram | na॒rmāya̭ re॒bham |

nari̭ṣṭhāyai bhīma॒lam | hasā̭ya॒ kārim᳚ |

ā॒na॒ndāya̭ strīṣa॒kham | pra॒mudḙ kumārīpu॒tram |

me॒dhāyai̭ rathakā॒ram | dhairyā̭ya॒ takṣā̭ṇam || 2 ||

śramā̭ya kaulā॒lam | mā॒yāyai̭ kārmā॒ram |

rū॒pāya̭ maṇikā॒ram | śubhḙ va॒pam |

śa॒ra॒vyā̭yā iṣukā॒ram | he॒tyai dha̭nvakā॒ram |

karma̭ṇe jyākā॒ram | di॒ṣṭāya̭ rajjusa॒rgam |

mṛ॒tyavḙ mṛga॒yum | anta̭kāya śva॒nitam᳚ || 3 ||

sa॒ndhayḙ jā॒ram | ge॒hāyo̭papa॒tim |

nir-ṛ̭tyai parivi॒ttam | ārtyai̭ parivividā॒nam |

arā᳚dhyai didhiṣū॒patim᳚ | pa॒vitrā̭ya bhi॒ṣajam᳚ |

pra॒jñānā̭ya nakṣatrada॒r​śam | niṣkṛ̭tyai peśaskā॒rīm |

balā̭yopa॒dām | varṇā̭yānū॒rudham᳚ || 4 ||

na॒dībhyaḥ̭ pauñji॒ṣṭam | ṛ॒kṣīkā᳚bhyo॒ naiṣā̭dam |

pu॒ru॒ṣa॒vyā॒ghrāya̭ du॒rmadam᳚ | pra॒yudbhya॒ unma̭ttam |

ga॒ndha॒rvā॒psa॒rābhyo॒ vrātyam᳚ | sa॒rpa॒de॒va॒ja॒nebhyo-'pra̭tipadam |

ave᳚bhyaḥ kita॒vam | i॒ryatā̭yā॒ aki̭tavam |

pi॒śā॒cebhyo̭ bidalakā॒ram | yā॒tu॒dhāne᳚bhyaḥ kaṇṭakakā॒ram || 5 ||

u॒thsā॒debhyaḥ̭ ku॒bjam | pra॒mudḙ vāma॒nam |

dvā॒rbhya-ssrā॒mam | svapnā̭yā॒ndham |

adha̭rmāya badhi॒ram | sa॒ñjñānā̭ya smarakā॒rīm |

pra॒kā॒modyā̭yopa॒sadam᳚ | ā॒śi॒kṣāyai᳚ pra॒śninam᳚ |

u॒pa॒śi॒kṣāyā̭ abhipra॒śninam᳚ | ma॒ryādā̭yai praśnavivā॒kam || 6 ||

ṛtyai᳚ ste॒nahṛ̭dayam | vaira̭hatyāya॒ piśṷnam |

vivi̭ttyai kṣa॒ttāram᳚ | aupa̭draṣṭāya saṅgrahī॒tāram᳚ |

balā̭yānuca॒ram | bhū॒mne pa̭riṣka॒ndam |

pri॒yāya̭ priyavā॒dinam᳚ | ari̭ṣṭyā aśvasā॒dam |

medhā̭ya vāsaḥ palpū॒līm | pra॒kā॒māya̭ rajayi॒trīm || 7 ||

bhāyai̭ dārvāhā॒ram | pra॒bhāyā̭ āgne॒ndham |

nāka̭sya pṛ॒ṣṭhāyā̭bhiṣe॒ktāram᳚ |

bra॒dhnasya̭ vi॒ṣṭapā̭ya pātranirṇe॒gam |

de॒va॒lo॒kāya̭ peśi॒tāram᳚ | ma॒nu॒ṣya॒lo॒kāya̭ prakari॒tāram᳚ |

sarve᳚bhyo lo॒kebhya̭ upase॒ktāram᳚ |

ava̭rtyai va॒dhāyo̭pamanthi॒tāram᳚ | su॒va॒rgāya̭ lo॒kāya̭ bhāga॒dugham᳚ |

var​ṣi̭ṣṭhāya॒ nākā̭ya parive॒ṣṭāram᳚ || 8 ||

arme᳚bhyo hasti॒pam | ja॒vāyā᳚śva॒pam |

puṣṭyai̭ gopā॒lam | teja̭se-'japā॒lam |

vī॒ryā̭yāvipā॒lam | irā̭yai kī॒nāśam᳚ |

kī॒lālā̭ya surākā॒ram | bha॒drāya̭ gṛha॒pam |

śreya̭se vitta॒dham | adhya̭kṣāyānukṣa॒ttāram᳚ || 9 ||

ma॒nyavḙ-'yastā॒pam | krodhā̭ya nisa॒ram |

śokā̭yābhisa॒ram | u॒tkū॒la॒vi॒kū॒lābhyā᳚-ntri॒sthinam᳚ |

yogā̭ya yo॒ktāram᳚ | kṣemā̭ya vimo॒ktāram᳚ |

vapṷṣe mānaskṛ॒tam | śīlā̭yāñjanīkā॒ram |

nir-ṛ̭tyai kośakā॒rīm | ya॒māyā॒sūm || 10 ||

ya॒myai̭ yama॒sūm | atha̭rva॒bhyo-'va̭tokām |

saṃ॒​va~॒thsa॒rāya̭ paryā॒riṇī᳚m | pa॒ri॒va॒thsa॒rāyāvi̭jātām |

i॒dā॒va॒thsa॒rāyā̭pa॒skadva̭rīm | i॒dva॒tsa॒rāyā॒tītva̭rīm |

va॒thsa॒rāya॒ vija̭rjarām | saṃ॒​va~॒thsa॒rāya॒ pali̭knīm |

vanā̭ya vana॒pam | a॒nyato̭-'raṇyāya dāva॒pam || 11 ||

saro᳚bhyo dhaiva॒ram | veśa̭ntābhyo॒ dāśam᳚ |

u॒pa॒sthāva̭rībhyo॒ baindam᳚ | na॒ḍva॒lābhyaḥ̭ śauṣka॒lam |

pā॒ryā̭ya kaiva॒rtam | a॒vā॒ryā̭ya mārgā॒ram |

tī॒rthebhya̭ ā॒ndam | viṣa̭mebhyo mainā॒lam |

svane᳚bhyaḥ॒ parṇa̭kam | guhā᳚bhyaḥ॒ kirā̭tam |

sānṷbhyo॒ jambha̭kam | parva̭tebhyaḥ॒ kimpṷ̄ruṣam || 12 ||

pra॒ti॒śrutkā̭yā..ṛtu॒lam | ghoṣā̭ya bha॒ṣam |

antā̭ya bahuvā॒dinam᳚ | a॒na॒ntāya॒ mūkam᳚ |

maha̭se vīṇāvā॒dam | krośā̭ya tūṇava॒dhmam |

ā॒kra॒ndāya̭ dundubhyāghā॒tam | a॒va॒ra॒spa॒rāya̭ śaṅkha॒dhmam |

ṛ॒bhubhyo̭-'jinasandhā॒yam | sā॒dhyebhya̭ścarma॒mṇam || 13 ||

bī॒bha॒thsāyai̭ paulka॒sam | bhūtyai̭ jāgara॒ṇam |

abhū᳚tyai svapa॒nam | tu॒lāyai̭ vāṇi॒jam |

varṇā̭ya hiraṇyakā॒ram | viśve᳚bhyo de॒vebhyaḥ̭ sidhma॒lam |

pa॒ścā॒ddo॒ṣāya̭ glā॒vam | ṛtyai̭ janavā॒dinam᳚ |

vyṛ̭ddhyā apaga॒lbham | sa॒gṃ॒‍śa॒rāya̭ pra॒cchidam᳚ || 14 ||

hasā̭ya pugg‍śca॒lūmāla̭bhate | vī॒ṇā॒vā॒da-ṅgaṇa̭ka-ṅgī॒tāya̭ |

yāda̭se śābu॒lyām | na॒rmāya̭ bhadrava॒tīm |

tū॒ṣṇa॒va॒dhma-ṅgrā̭ma॒ṇya̭-mpāṇisaṅghā॒ta-nnṛ॒ttāya̭ |

modā̭yānu॒krośa̭kam | ā॒na॒ndāya̭ tala॒vam || 15 ||

a॒kṣa॒rā॒jāya̭ kita॒vam | kṛ॒tāya̭ sabhā॒vinam᳚ |

tretā̭yā ādinavada॒r​śam | dvā॒pa॒rāya̭ bahi॒-ssadam᳚ |

kala̭ye sabhāsthā॒ṇum | du॒ṣkṛ॒tāya̭ ca॒rakā̭cāryam |

adhva̭ne brahmacā॒riṇam᳚ | pi॒śā॒cebhyaḥ̭ saila॒gam |

pi॒pā॒sāyai̭ govya॒ccham | nir-ṛ̭tyai goghā॒tam |

kṣu॒dhe go̭vika॒rtam | kṣu॒ttṛ॒ṣṇābhyā॒-ntam |

yo gāṃ-vi~॒kṛnta̭nta-mmā॒gṃ॒sa-mbhikṣa̭māṇa upa॒tiṣṭha̭te || 16 ||

bhūmyai̭ pīṭhasa॒rpiṇa॒māla̭bhate | a॒gnaye-'gṃ̭sa॒lam |

vā॒yavḙ cāṇḍā॒lam | a॒ntari̭kṣāya vagṃśana॒rtinam᳚ |

di॒ve kha̭la॒tim | sūryā̭ya harya॒kṣam |

ca॒ndrama̭se mirmi॒ram | nakṣa̭trebhyaḥ ki॒lāsam᳚ |

ahnḙ śu॒kla-mpi̭ṅga॒lam | rātri̭yai kṛ॒ṣṇa-mpi̭ṅgā॒kṣam || 17 ||

vā॒ce purṷṣa॒māla̭bhate | prā॒ṇama̭pā॒naṃ-vyā~॒namṷdā॒nagṃ sa̭mā॒na-ntānvā॒yave᳚ |

sūryā̭ya॒ cakṣu॒rāla̭bhate | mana̭śca॒ndrama̭se |

di॒gbhya-śśrotram᳚ | pra॒jāpa̭taye॒ purṷṣam || 18 ||

athai॒tānarṷ̄pebhya॒ āla̭bhate | ati̭hrasva॒mati̭dīrgham |

ati̭kṛśa॒matyagṃ̭salam | ati̭śukla॒mati̭kṛṣṇam |

ati̭ślakṣṇa॒mati̭lomaśam | ati̭kiriṭa॒mati̭danturam |

ati̭mirmira॒mati̭memiṣam | ā॒śāyai̭ jā॒mim | pra॒tī॒kṣāyai̭ kumā॒rīm || 19 ||