Nataraja Stotram (Patanjali Krutam)

naTarAja stotraM (pataJjali kRtam)

zloka 1

atha caraNazRGgarahita zrI naTarAja stotraM

sadaJcita-mudaJcita nikuJcita padaM jhalajhalaM-calita maJju kaTakam |

pataJjali dRgaJjana-manaJjana-macaJcalapadaM janana bhaJjana karam |

kadambarucimambaravasaM paramamambuda kadamba kaviDambaka galam

cidambudhi maNiM budha hRdambuja raviM para cidambara naTaM hRdi bhaja || 1 ||

haraM tripura bhaJjana-manantakRtakaGkaNa-makhaNDadaya-mantarahitaM

viriJcisurasaMhatipurandhara vicintitapadaM taruNacandramakuTam |

paraM pada vikhaNDitayamaM bhasita maNDitatanuM madanavaJcana paraM

cirantanamamuM praNavasaJcitanidhiM para cidambara naTaM hRdi bhaja || 2 ||

avantamakhilaM jagadabhaGga guNatuGgamamataM dhRtavidhuM surasarit-

taraGga nikurumba dhRti lampaTa jaTaM zamanadambhasuharaM bhavaharam |

zivaM dazadigantara vijRmbhitakaraM karalasanmRgazizuM pazupatiM

haraM zazidhanaJjayapataGganayanaM para cidambara naTaM hRdi bhaja || 3 ||

anantanavaratnavilasatkaTakakiGkiNijhalaM jhalajhalaM jhalaravaM

mukundavidhi hastagatamaddala layadhvanidhimiddhimita nartana padam |

zakuntaratha barhiratha nandimukha bhRGgiriTisaGghanikaTaM bhayaharam

sananda sanaka pramukha vandita padaM para cidambara naTaM hRdi bhaja || 4 ||

anantamahasaM tridazavandya caraNaM muni hRdantara vasantamamalam

kabandha viyadindvavani gandhavaha vahnimakha bandhuravimaJju vapuSam |

anantavibhavaM trijagadantara maNiM trinayanaM tripura khaNDana param

sananda muni vandita padaM sakaruNaM para cidambara naTaM hRdi bhaja || 5 ||

acintyamalivRnda ruci bandhuragalaM kurita kunda nikurumba dhavalam

mukunda sura vRnda bala hantR kRta vandana lasantamahikuNDala dharam |

akampamanukampita ratiM sujana maGgalanidhiM gajaharaM pazupatim

dhanaJjaya nutaM praNata raJjanaparaM para cidambara naTaM hRdi bhaja || 6 ||

paraM suravaraM puraharaM pazupatiM janita dantimukha SaNmukhamamuM

mRDaM kanaka piGgala jaTaM sanaka paGkaja raviM sumanasaM himarucim |

asaGghamanasaM jaladhi janmagaralaM kavalayanta matulaM guNanidhim

sananda varadaM zamitamindu vadanaM para cidambara naTaM hRdi bhaja || 7 ||

ajaM kSitirathaM bhujagapuGgavaguNaM kanaka zRGgi dhanuSaM karalasat

kuraGga pRthu TaGka parazuM rucira kuGkuma ruciM DamarukaM ca dadhatam |

mukunda vizikhaM namadavandhya phaladaM nigama vRnda turagaM nirupamaM

sa caNDikamamuM jhaTiti saMhRtapuraM para cidambara naTaM hRdi bhaja || 8 ||

anaGgaparipanthinamajaM kSiti dhurandharamalaM karuNayantamakhilaM

jvalantamanalaM dadhatamantakaripuM satatamindra suravanditapadam |

udaJcadaravindakula bandhuzata bimbaruci saMhati sugandhi vapuSaM

pataJjali nutaM praNava paJjara zukaM para cidambara naTaM hRdi bhaja || 9 ||

iti stavamamuM bhujagapuGgava kRtaM pratidinaM paThati yaH kRtamukhaH

sadaH prabhupada dvitayadarzanapadaM sulalitaM caraNa zRGga rahitam |

saraH prabhava sambhava haritpati haripramukha divyanuta zaGkarapadaM

sa gacchati paraM na tu janurjalanidhiM paramaduHkhajanakaM duritadam || 10 ||

iti zrI pataJjalimuni praNItaM caraNazRGgarahita naTarAja stotraM sampUrNam ||