Narayaniyam Dashaka 8
Narayaniyam Dashaka 8
ନାରାଯଣୀଯଂ ଦଶକ 8 - ପ୍ରଲଯଵର୍ଣନମ୍
ଶ୍ଲୋକ 1
ଏଵଂ ତାଵତ୍ ପ୍ରାକୃତପ୍ରକ୍ଷଯାନ୍ତେ
ବ୍ରାହ୍ମେ କଲ୍ପେ ହ୍ଯାଦିମେ ଲବ୍ଧଜନ୍ମା ।
ବ୍ରହ୍ମା ଭୂଯସ୍ତ୍ଵତ୍ତ ଏଵାପ୍ଯ ଵେଦାନ୍
ସୃଷ୍ଟିଂ ଚକ୍ରେ ପୂର୍ଵକଲ୍ପୋପମାନାମ୍
ଶ୍ଲୋକ 2
ସୋଽଯଂ ଚତୁର୍ଯୁଗସହସ୍ରମିତାନ୍ଯହାନି
ତାଵନ୍ମିତାଶ୍ଚ ରଜନୀର୍ବହୁଶୋ ନିନାଯ ।
ନିଦ୍ରାତ୍ଯସୌ ତ୍ଵଯି ନିଲୀଯ ସମଂ ସ୍ଵସୃଷ୍ଟୈ-
ର୍ନୈମିତ୍ତିକପ୍ରଲଯମାହୁରତୋଽସ୍ଯ ରାତ୍ରିମ୍
॥1॥
ଶ୍ଲୋକ 3
ଅସ୍ମାଦୃଶାଂ ପୁନରହର୍ମୁଖକୃତ୍ଯତୁଲ୍ଯାଂ
ସୃଷ୍ଟିଂ କରୋତ୍ଯନୁଦିନଂ ସ ଭଵତ୍ପ୍ରସାଦାତ୍ ।
ପ୍ରାଗ୍ବ୍ରାହ୍ମକଲ୍ପଜନୁଷାଂ ଚ ପରାଯୁଷାଂ ତୁ
ସୁପ୍ତପ୍ରବୋଧନସମାସ୍ତି ତଦାଽପି ସୃଷ୍ଟିଃ
॥2॥
ଶ୍ଲୋକ 4
ପଞ୍ଚାଶଦବ୍ଦମଧୁନା ସ୍ଵଵଯୋର୍ଧରୂପ-
ମେକଂ ପରାର୍ଧମତିଵୃତ୍ଯ ହି ଵର୍ତତେଽସୌ ।
ତତ୍ରାନ୍ତ୍ଯରାତ୍ରିଜନିତାନ୍ କଥଯାମି ଭୂମନ୍
ପଶ୍ଚାଦ୍ଦିନାଵତରଣେ ଚ ଭଵଦ୍ଵିଲାସାନ୍
॥3॥
ଶ୍ଲୋକ 5
ଦିନାଵସାନେଽଥ ସରୋଜଯୋନିଃ
ସୁଷୁପ୍ତିକାମସ୍ତ୍ଵଯି ସନ୍ନିଲିଲ୍ଯେ ।
ଜଗନ୍ତି ଚ ତ୍ଵଜ୍ଜଠରଂ ସମୀଯୁ-
ସ୍ତଦେଦମେକାର୍ଣଵମାସ ଵିଶ୍ଵମ୍
॥4॥
ଶ୍ଲୋକ 6
ତଵୈଵ ଵେଷେ ଫଣିରାଜି ଶେଷେ
ଜଲୈକଶେଷେ ଭୁଵନେ ସ୍ମ ଶେଷେ ।
ଆନନ୍ଦସାନ୍ଦ୍ରାନୁଭଵସ୍ଵରୂପଃ
ସ୍ଵଯୋଗନିଦ୍ରାପରିମୁଦ୍ରିତାତ୍ମା
॥5॥
ଶ୍ଲୋକ 7
କାଲାଖ୍ଯଶକ୍ତିଂ ପ୍ରଲଯାଵସାନେ
ପ୍ରବୋଧଯେତ୍ଯାଦିଶତା କିଲାଦୌ ।
ତ୍ଵଯା ପ୍ରସୁପ୍ତଂ ପରିସୁପ୍ତଶକ୍ତି-
ଵ୍ରଜେନ ତତ୍ରାଖିଲଜୀଵଧାମ୍ନା
॥6॥
ଶ୍ଲୋକ 8
ଚତୁର୍ଯୁଗାଣାଂ ଚ ସହସ୍ରମେଵଂ
ତ୍ଵଯି ପ୍ରସୁପ୍ତେ ପୁନରଦ୍ଵିତୀଯେ ।
କାଲାଖ୍ଯଶକ୍ତିଃ ପ୍ରଥମପ୍ରବୁଦ୍ଧା
ପ୍ରାବୋଧଯତ୍ତ୍ଵାଂ କିଲ ଵିଶ୍ଵନାଥ
॥7॥
ଶ୍ଲୋକ 9
ଵିବୁଧ୍ଯ ଚ ତ୍ଵଂ ଜଲଗର୍ଭଶାଯିନ୍
ଵିଲୋକ୍ଯ ଲୋକାନଖିଲାନ୍ ପ୍ରଲୀନାନ୍ ।
ତେଷ୍ଵେଵ ସୂକ୍ଷ୍ମାତ୍ମତଯା ନିଜାନ୍ତଃ -
ସ୍ଥିତେଷୁ ଵିଶ୍ଵେଷୁ ଦଦାଥ ଦୃଷ୍ଟିମ୍
॥8॥
ଶ୍ଲୋକ 10
ତତସ୍ତ୍ଵଦୀଯାଦଯି ନାଭିରନ୍ଧ୍ରା-
ଦୁଦଞ୍ଚିତଂ କିଞ୍ଚନ ଦିଵ୍ଯପଦ୍ମମ୍ ।
ନିଲୀନନିଶ୍ଶେଷପଦାର୍ଥମାଲା-
ସଙ୍କ୍ଷେପରୂପଂ ମୁକୁଲାଯମାନମ୍
॥9॥
ଶ୍ଲୋକ 11
ତଦେତଦମ୍ଭୋରୁହକୁଡ୍ମଲଂ ତେ
କଲେଵରାତ୍ ତୋଯପଥେ ପ୍ରରୂଢମ୍ ।
ବହିର୍ନିରୀତଂ ପରିତଃ ସ୍ଫୁରଦ୍ଭିଃ
ସ୍ଵଧାମଭିର୍ଧ୍ଵାନ୍ତମଲଂ ନ୍ଯକୃନ୍ତତ୍
॥10॥
ଶ୍ଲୋକ 12
ସମ୍ଫୁଲ୍ଲପତ୍ରେ ନିତରାଂ ଵିଚିତ୍ରେ
ତସ୍ମିନ୍ ଭଵଦ୍ଵୀର୍ଯଧୃତେ ସରୋଜେ ।
ସ ପଦ୍ମଜନ୍ମା ଵିଧିରାଵିରାସୀତ୍
ସ୍ଵଯମ୍ପ୍ରବୁଦ୍ଧାଖିଲଵେଦରାଶିଃ
॥11॥
ଶ୍ଲୋକ 13
ଅସ୍ମିନ୍ ପରାତ୍ମନ୍ ନନୁ ପାଦ୍ମକଲ୍ପେ
ତ୍ଵମିତ୍ଥମୁତ୍ଥାପିତପଦ୍ମଯୋନିଃ ।
ଅନନ୍ତଭୂମା ମମ ରୋଗରାଶିଂ
ନିରୁନ୍ଧି ଵାତାଲଯଵାସ ଵିଷ୍ଣୋ
॥12॥