Narayaniyam Dashaka 8

nArAyaNIyaM dashaka 8 - pralayavarNanam

shloka 1

evaM tAvat prAkRRitaprakShayAnte

brAhme kalpe hyAdime labdhajanmA |

brahmA bhUyastvatta evApya vedAn

sRRiShTiM chakre pUrvakalpopamAnAm ||1||

so.ayaM chaturyugasahasramitAnyahAni

tAvanmitAshcha rajanIrbahusho ninAya |

nidrAtyasau tvayi nilIya samaM svasRRiShTai-

rnaimittikapralayamAhurato.asya rAtrim ||2||

asmAdRRishAM punaraharmukhakRRityatulyAM

sRRiShTiM karotyanudinaM sa bhavatprasAdAt |

prAgbrAhmakalpajanuShAM cha parAyuShAM tu

suptaprabodhanasamAsti tadA.api sRRiShTiH ||3||

pa~nchAshadabdamadhunA svavayordharUpa-

mekaM parArdhamativRRitya hi vartate.asau |

tatrAntyarAtrijanitAn kathayAmi bhUman

pashchAddinAvataraNe cha bhavadvilAsAn ||4||

dinAvasAne.atha sarojayoniH

suShuptikAmastvayi sannililye |

jaganti cha tvajjaTharaM samIyu-

stadedamekArNavamAsa vishvam ||5||

tavaiva veShe phaNirAji sheShe

jalaikasheShe bhuvane sma sheShe |

AnandasAndrAnubhavasvarUpaH

svayoganidrAparimudritAtmA ||6||

kAlAkhyashaktiM pralayAvasAne

prabodhayetyAdishatA kilAdau |

tvayA prasuptaM parisuptashakti-

vrajena tatrAkhilajIvadhAmnA ||7||

chaturyugANAM cha sahasramevaM

tvayi prasupte punaradvitIye |

kAlAkhyashaktiH prathamaprabuddhA

prAbodhayattvAM kila vishvanAtha ||8||

vibudhya cha tvaM jalagarbhashAyin

vilokya lokAnakhilAn pralInAn |

teShveva sUkShmAtmatayA nijAntaH -

sthiteShu vishveShu dadAtha dRRiShTim ||9||

tatastvadIyAdayi nAbhirandhrA-

dudanchitaM kinchana divyapadmam |

nilInanishsheShapadArthamAlA-

sa~NkSheparUpaM mukulAyamAnam ||10||

tadetadambhoruhakuDmalaM te

kalevarAt toyapathe prarUDham |

bahirnirItaM paritaH sphuradbhiH

svadhAmabhirdhvAntamalaM nyakRRintat ||11||

samphullapatre nitarAM vichitre

tasmin bhavadvIryadhRRite saroje |

sa padmajanmA vidhirAvirAsIt

svayamprabuddhAkhilavedarAshiH ||12||

asmin parAtman nanu pAdmakalpe

tvamitthamutthApitapadmayoniH |

anantabhUmA mama rogarAshiM

nirundhi vAtAlayavAsa viShNo ||13||