Narayaniyam Dashaka 8

nArAyaNIyaM dazaka 8 - pralayavarNanam

zloka 1

evaM tAvat prAkRtaprakSayAnte

brAhme kalpe hyAdime labdhajanmA |

brahmA bhUyastvatta evApya vedAn

sRSTiM cakre pUrvakalpopamAnAm ||1||

so'yaM caturyugasahasramitAnyahAni

tAvanmitAzca rajanIrbahuzo ninAya |

nidrAtyasau tvayi nilIya samaM svasRSTai-

rnaimittikapralayamAhurato'sya rAtrim ||2||

asmAdRzAM punaraharmukhakRtyatulyAM

sRSTiM karotyanudinaM sa bhavatprasAdAt |

prAgbrAhmakalpajanuSAM ca parAyuSAM tu

suptaprabodhanasamAsti tadA'pi sRSTiH ||3||

paJcAzadabdamadhunA svavayordharUpa-

mekaM parArdhamativRtya hi vartate'sau |

tatrAntyarAtrijanitAn kathayAmi bhUman

pazcAddinAvataraNe ca bhavadvilAsAn ||4||

dinAvasAne'tha sarojayoniH

suSuptikAmastvayi sannililye |

jaganti ca tvajjaTharaM samIyu-

stadedamekArNavamAsa vizvam ||5||

tavaiva veSe phaNirAji zeSe

jalaikazeSe bhuvane sma zeSe |

AnandasAndrAnubhavasvarUpaH

svayoganidrAparimudritAtmA ||6||

kAlAkhyazaktiM pralayAvasAne

prabodhayetyAdizatA kilAdau |

tvayA prasuptaM parisuptazakti-

vrajena tatrAkhilajIvadhAmnA ||7||

caturyugANAM ca sahasramevaM

tvayi prasupte punaradvitIye |

kAlAkhyazaktiH prathamaprabuddhA

prAbodhayattvAM kila vizvanAtha ||8||

vibudhya ca tvaM jalagarbhazAyin

vilokya lokAnakhilAn pralInAn |

teSveva sUkSmAtmatayA nijAntaH -

sthiteSu vizveSu dadAtha dRSTim ||9||

tatastvadIyAdayi nAbhirandhrA-

dudaJcitaM kiJcana divyapadmam |

nilInanizzeSapadArthamAlA-

saGkSeparUpaM mukulAyamAnam ||10||

tadetadambhoruhakuDmalaM te

kalevarAt toyapathe prarUDham |

bahirnirItaM paritaH sphuradbhiH

svadhAmabhirdhvAntamalaM nyakRntat ||11||

samphullapatre nitarAM vicitre

tasmin bhavadvIryadhRte saroje |

sa padmajanmA vidhirAvirAsIt

svayamprabuddhAkhilavedarAziH ||12||

asmin parAtman nanu pAdmakalpe

tvamitthamutthApitapadmayoniH |

anantabhUmA mama rogarAziM

nirundhi vAtAlayavAsa viSNo ||13||