Narayaniyam Dashaka 8
Narayaniyam Dashaka 8
নারাযণীযং দশক 8 - প্রলযবর্ণনম্
শ্লোক 1
এবং তাবত্ প্রাকৃতপ্রক্ষযান্তে
ব্রাহ্মে কল্পে হ্যাদিমে লব্ধজন্মা ।
ব্রহ্মা ভূযস্ত্বত্ত এবাপ্য বেদান্
সৃষ্টিং চক্রে পূর্বকল্পোপমানাম্
শ্লোক 2
সোঽযং চতুর্যুগসহস্রমিতান্যহানি
তাবন্মিতাশ্চ রজনীর্বহুশো নিনায ।
নিদ্রাত্যসৌ ত্বযি নিলীয সমং স্বসৃষ্টৈ-
র্নৈমিত্তিকপ্রলযমাহুরতোঽস্য রাত্রিম্
॥1॥
শ্লোক 3
অস্মাদৃশাং পুনরহর্মুখকৃত্যতুল্যাং
সৃষ্টিং করোত্যনুদিনং স ভবত্প্রসাদাত্ ।
প্রাগ্ব্রাহ্মকল্পজনুষাং চ পরাযুষাং তু
সুপ্তপ্রবোধনসমাস্তি তদাঽপি সৃষ্টিঃ
॥2॥
শ্লোক 4
পঞ্চাশদব্দমধুনা স্ববযোর্ধরূপ-
মেকং পরার্ধমতিবৃত্য হি বর্ততেঽসৌ ।
তত্রান্ত্যরাত্রিজনিতান্ কথযামি ভূমন্
পশ্চাদ্দিনাবতরণে চ ভবদ্বিলাসান্
॥3॥
শ্লোক 5
দিনাবসানেঽথ সরোজযোনিঃ
সুষুপ্তিকামস্ত্বযি সন্নিলিল্যে ।
জগন্তি চ ত্বজ্জঠরং সমীযু-
স্তদেদমেকার্ণবমাস বিশ্বম্
॥4॥
শ্লোক 6
তবৈব বেষে ফণিরাজি শেষে
জলৈকশেষে ভুবনে স্ম শেষে ।
আনন্দসান্দ্রানুভবস্বরূপঃ
স্বযোগনিদ্রাপরিমুদ্রিতাত্মা
॥5॥
শ্লোক 7
কালাখ্যশক্তিং প্রলযাবসানে
প্রবোধযেত্যাদিশতা কিলাদৌ ।
ত্বযা প্রসুপ্তং পরিসুপ্তশক্তি-
ব্রজেন তত্রাখিলজীবধাম্না
॥6॥
শ্লোক 8
চতুর্যুগাণাং চ সহস্রমেবং
ত্বযি প্রসুপ্তে পুনরদ্বিতীযে ।
কালাখ্যশক্তিঃ প্রথমপ্রবুদ্ধা
প্রাবোধযত্ত্বাং কিল বিশ্বনাথ
॥7॥
শ্লোক 9
বিবুধ্য চ ত্বং জলগর্ভশাযিন্
বিলোক্য লোকানখিলান্ প্রলীনান্ ।
তেষ্বেব সূক্ষ্মাত্মতযা নিজান্তঃ -
স্থিতেষু বিশ্বেষু দদাথ দৃষ্টিম্
॥8॥
শ্লোক 10
ততস্ত্বদীযাদযি নাভিরন্ধ্রা-
দুদঞ্চিতং কিঞ্চন দিব্যপদ্মম্ ।
নিলীননিশ্শেষপদার্থমালা-
সঙ্ক্ষেপরূপং মুকুলাযমানম্
॥9॥
শ্লোক 11
তদেতদম্ভোরুহকুড্মলং তে
কলেবরাত্ তোযপথে প্ররূঢম্ ।
বহির্নিরীতং পরিতঃ স্ফুরদ্ভিঃ
স্বধামভির্ধ্বান্তমলং ন্যকৃন্তত্
॥10॥
শ্লোক 12
সম্ফুল্লপত্রে নিতরাং বিচিত্রে
তস্মিন্ ভবদ্বীর্যধৃতে সরোজে ।
স পদ্মজন্মা বিধিরাবিরাসীত্
স্বযম্প্রবুদ্ধাখিলবেদরাশিঃ
॥11॥
শ্লোক 13
অস্মিন্ পরাত্মন্ ননু পাদ্মকল্পে
ত্বমিত্থমুত্থাপিতপদ্মযোনিঃ ।
অনন্তভূমা মম রোগরাশিং
নিরুন্ধি বাতালযবাস বিষ্ণো
॥12॥