Narayaniyam Dashaka 84

nArAyaNIyaM dazaka 84 - samantapaJcakatIrthayAtrA - bandhumitrAdi samAgamam

zloka 1

kvacidatha tapanoparAgakAle puri nidadhat kRtavarmakAmasUnU |

yadukulamahilAvRtaH sutIrthaM samupagato'si samantapaJcakAkhyam ||1||

bahutarajanatAhitAya tatra tvamapi punan vinimajya tIrthatoyam |

dvijagaNaparimuktavittarAziH samamilathAH kurupANDavAdimitraiH ||2||

tava khalu dayitAjanaiH sametA drupadasutA tvayi gADhabhaktibhArA |

taduditabhavadAhRtiprakAraiH atimumude samamanyabhAminIbhiH ||3||

tadanu ca bhagavan nirIkSya gopAnatikutukAdupagamya mAnayitvA|

cirataravirahAturAGgarekhAH pazupavadhUH sarasaM tvamanvayAsIH ||4||

sapadi ca bhavadIkSaNotsavena pramuSitamAnahRdAM nitambinInAm |

atirasaparimuktakaJculIke paricayahRdyatare kuce nyalaiSIH ||5||

ripujanakalahaiH punaH punarme samupagatairiyatI vilambanA'bhUt |

iti kRtaparirambhaNetvayi drAk ativivazA khalu rAdhikA nililye ||6||

apagatavirahavyathAstadA tA rahasi vidhAya dadAtha tattvabodham |

paramasukhacidAtmako'hamAtmetyudayatu vaH sphuTameva cetasIti ||7||

sukharasaparimizrito viyogaH kimapi purA'bhavaduddhavopadezaiH |

samabhavadamutaH paraM tu tAsAM paramasukhaikyamayI bhavadvicintA ||8||

munivaranivahaistavAtha pitrA duritazamAya zubhAni pRcchyamAnaiH |

tvayi sati kimidaM zubhAntaraiH rityuruhasitairapi yAjitastadA'sau ||9||

sumahati yajane vitAyamAne pramuditamitrajane sahaiva gopAH |

yadujanamahitAstrimAsamAtraM bhavadanuSaGgarasaM pureva bheju H ||10||

vyapagamasamaye sametya rAdhAM dRDhamupagUhya nirIkSya vItakhedAm |

pramuditahRdayaH puraM prayAtaH pavanapurezvara pAhi mAM gadebhyaH ||11||