Narayaniyam Dashaka 69
Narayaniyam Dashaka 69
ନାରାଯଣୀଯଂ ଦଶକ 69 - ରାସକ୍ରୀଡା
ଶ୍ଲୋକ 1
କେଶପାଶଧୃତପିଞ୍ଛିକାଵିତତିସଞ୍ଚଲନ୍ମକରକୁଣ୍ଡଲଂ
ହାରଜାଲଵନମାଲିକାଲଲିତମଙ୍ଗରାଗଘନସୌରଭମ୍ ।
ପୀତଚେଲଧୃତକାଞ୍ଚିକାଞ୍ଚିତମୁଦଞ୍ଚଦଂଶୁମଣିନୂପୁରଂ
ରାସକେଲିପରିଭୂଷିତଂ ତଵ ହି ରୂପମୀଶ କଲଯାମହେ
ଶ୍ଲୋକ 2
ତାଵଦେଵ କୃତମଣ୍ଡନେ କଲିତକଞ୍ଚୁଲୀକକୁଚମଣ୍ଡଲେ
ଗଣ୍ଡଲୋଲମଣିକୁଣ୍ଡଲେ ଯୁଵତିମଣ୍ଡଲେଽଥ ପରିମଣ୍ଡଲେ ।
ଅନ୍ତରା ସକଲସୁନ୍ଦରୀଯୁଗଲମିନ୍ଦିରାରମଣ ସଞ୍ଚରନ୍
ମଞ୍ଜୁଲାଂ ତଦନୁ ରାସକେଲିମଯି କଞ୍ଜନାଭ ସମୁପାଦଧାଃ
॥1॥
ଶ୍ଲୋକ 3
ଵାସୁଦେଵ ତଵ ଭାସମାନମିହ ରାସକେଲିରସସୌରଭଂ
ଦୂରତୋଽପି ଖଲୁ ନାରଦାଗଦିତମାକଲଯ୍ଯ କୁତୁକାକୁଲା ।
ଵେଷଭୂଷଣଵିଲାସପେଶଲଵିଲାସିନୀଶତସମାଵୃତା
ନାକତୋ ଯୁଗପଦାଗତା ଵିଯତି ଵେଗତୋଽଥ ସୁରମଣ୍ଡଲୀ
॥2॥
ଶ୍ଲୋକ 4
ଵେଣୁନାଦକୃତତାନଦାନକଲଗାନରାଗଗତିଯୋଜନା-
ଲୋଭନୀଯମୃଦୁପାଦପାତକୃତତାଲମେଲନମନୋହରମ୍ ।
ପାଣିସଙ୍କ୍ଵଣିତକଙ୍କଣଂ ଚ ମୁହୁରଂସଲମ୍ବିତକରାମ୍ବୁଜଂ
ଶ୍ରୋଣିବିମ୍ବଚଲଦମ୍ବରଂ ଭଜତ ରାସକେଲିରସଡମ୍ବରମ୍
॥3॥
ଶ୍ଲୋକ 5
ସ୍ପର୍ଧଯା ଵିରଚିତାନୁଗାନକୃତତାରତାରମଧୁରସ୍ଵରେ
ନର୍ତନେଽଥ ଲଲିତାଙ୍ଗହାରଲୁଲିତାଙ୍ଗହାରମଣିଭୂଷଣେ ।
ସମ୍ମଦେନ କୃତପୁଷ୍ପଵର୍ଷମଲମୁନ୍ମିଷଦ୍ଦିଵିଷଦାଂ କୁଲଂ
ଚିନ୍ମଯେ ତ୍ଵଯି ନିଲୀଯମାନମିଵ ସମ୍ମୁମୋହ ସଵଧୂକୁଲମ୍
॥4॥
ଶ୍ଲୋକ 6
ସ୍ଵିନ୍ନସନ୍ନତନୁଵଲ୍ଲରୀ ତଦନୁ କାପି ନାମ ପଶୁପାଙ୍ଗନା
କାନ୍ତମଂସମଵଲମ୍ବତେ ସ୍ମ ତଵ ତାନ୍ତିଭାରମୁକୁଲେକ୍ଷଣା ॥
କାଚିଦାଚଲିତକୁନ୍ତଲା ନଵପଟୀରସାରଘନସୌରଭଂ
ଵଞ୍ଚନେନ ତଵ ସଞ୍ଚୁଚୁମ୍ବ ଭୁଜମଞ୍ଚିତୋରୁପୁଲକାଙ୍କୁରା
॥5॥
ଶ୍ଲୋକ 7
କାପି ଗଣ୍ଡଭୁଵି ସନ୍ନିଧାଯ ନିଜଗଣ୍ଡମାକୁଲିତକୁଣ୍ଡଲଂ
ପୁଣ୍ଯପୂରନିଧିରନ୍ଵଵାପ ତଵ ପୂଗଚର୍ଵିତରସାମୃତମ୍ ।
ଇନ୍ଦିରାଵିହୃତିମନ୍ଦିରଂ ଭୁଵନସୁନ୍ଦରଂ ହି ନଟନାନ୍ତରେ
ତ୍ଵାମଵାପ୍ଯ ଦଧୁରଙ୍ଗନାଃ କିମୁ ନ ସମ୍ମଦୋନ୍ମଦଦଶାନ୍ତରମ୍
॥6॥
ଶ୍ଲୋକ 8
ଗାନମୀଶ ଵିରତଂ କ୍ରମେଣ କିଲ ଵାଦ୍ଯମେଲନମୁପାରତଂ
ବ୍ରହ୍ମସମ୍ମଦରସାକୁଲାଃ ସଦସି କେଵଲଂ ନନୃତୁରଙ୍ଗନାଃ ।
ନାଵିଦନ୍ନପି ଚ ନୀଵିକାଂ କିମପି କୁନ୍ତଲୀମପି ଚ କଞ୍ଚୁଲୀଂ
ଜ୍ଯୋତିଷାମପି କଦମ୍ବକଂ ଦିଵି ଵିଲମ୍ବିତଂ କିମପରଂ ବ୍ରୁଵେ
॥7॥
ଶ୍ଲୋକ 9
ମୋଦସୀମ୍ନି ଭୁଵନଂ ଵିଲାପ୍ଯ ଵିହୃତିଂ ସମାପ୍ଯ ଚ ତତୋ ଵିଭୋ
କେଲିସମ୍ମୃଦିତନିର୍ମଲାଙ୍ଗନଵଘର୍ମଲେଶସୁଭଗାତ୍ମନାମ୍ ।
ମନ୍ମଥାସହନଚେତସାଂ ପଶୁପଯୋଷିତାଂ ସୁକୃତଚୋଦିତ-
ସ୍ତାଵଦାକଲିତମୂର୍ତିରାଦଧିଥ ମାରଵୀରପରମୋତ୍ସଵାନ୍
॥8॥
ଶ୍ଲୋକ 10
କେଲିଭେଦପରିଲୋଲିତାଭିରତିଲାଲିତାଭିରବଲାଲିଭିଃ
ସ୍ଵୈରମୀଶ ନନୁ ସୂରଜାପଯସି ଚାରୁନାମ ଵିହୃତିଂ ଵ୍ଯଧାଃ ।
କାନନେଽପି ଚ ଵିସାରିଶୀତଲକିଶୋରମାରୁତମନୋହରେ
ସୂନସୌରଭମଯେ ଵିଲେସିଥ ଵିଲାସିନୀଶତଵିମୋହନମ୍
॥9॥
ଶ୍ଲୋକ 11
କାମିନୀରିତି ହି ଯାମିନୀଷୁ ଖଲୁ କାମନୀଯକନିଧେ ଭଵାନ୍
ପୂର୍ଣସମ୍ମଦରସାର୍ଣଵଂ କମପି ଯୋଗିଗମ୍ଯମନୁଭାଵଯନ୍ ।
ବ୍ରହ୍ମଶଙ୍କରମୁଖାନପୀହ ପଶୁପାଙ୍ଗନାସୁ ବହୁମାନଯନ୍
ଭକ୍ତଲୋକଗମନୀଯରୂପ କମନୀଯ କୃଷ୍ଣ ପରିପାହି ମାମ୍
॥10॥