Narayaniyam Dashaka 2

nArAyaNIyaM dazaka 2 - bhagavataH svarUpamAdhuryaM tathA bhaktimahattvam

zloka 1

sUryaspardhikirITamUrdhvatilakaprodbhAsiphAlAntaraM

kAruNyAkulanetramArdrahasitollAsaM sunAsApuTam|

gaNDodyanmakarAbhakuNDalayugaM kaNThojvalatkaustubhaM

tvadrUpaM vanamAlyahArapaTalazrIvatsadIpraM bhaje||1||

keyUrAGgadakaGkaNottamamahAratnAGgulIyAGkita-

zrImadbAhucatuSkasaGgatagadAzaGkhAripaGkeruhAm |

kAJcit kAJcanakAJcilAJcchitalasatpItAmbarAlambinI-

mAlambe vimalAmbujadyutipadAM mUrtiM tavArticchidam ||2||

yatttrailokyamahIyaso'pi mahitaM sammohanaM mohanAt

kAntaM kAntinidhAnato'pi madhuraM mAdhuryadhuryAdapi |

saundaryottarato'pi sundarataraM tvadrUpamAzcaryato'-

pyAzcaryaM bhuvane na kasya kutukaM puSNAti viSNo vibho ||3||

tattAdRGmadhurAtmakaM tava vapuH samprApya sampanmayI

sA devI paramotsukA cirataraM nAste svabhakteSvapi |

tenAsyA bata kaSTamacyuta vibho tvadrUpamAnojJaka -

premasthairyamayAdacApalabalAccApalyavArtodabhUt ||4||

lakSmIstAvakarAmaNIyakahRtaiveyaM pareSvasthire-

tyasminnanyadapi pramANamadhunA vakSyAmi lakSmIpate |

ye tvaddhyAnaguNAnukIrtanarasAsaktA hi bhaktA janA-

steSveSA vasati sthiraiva dayitaprastAvadattAdarA ||5||

evambhUtamanojJatAnavasudhAniSyandasandohanaM

tvadrUpaM paracidrasAyanamayaM cetoharaM zRNvatAm |

sadyaH prerayate matiM madayate romAJcayatyaGgakaM

vyAsiJcatyapi zItavASpavisarairAnandamUrchodbhavaiH ||6||

evambhUtatayA hi bhaktyabhihito yogassa yogadvayAt

karmajJAnamayAt bhRzottamataro yogIzvarairgIyate |

saundaryaikarasAtmake tvayi khalu premaprakarSAtmikA

bhaktirnizramameva vizvapuruSairlabhyA ramAvallabha ||7||

niSkAmaM niyatasvadharmacaraNaM yat karmayogAbhidhaM

taddUretyaphalaM yadaupaniSadajJAnopalabhyaM punaH |

tattvavyaktatayA sudurgamataraM cittasya tasmAdvibho

tvatpremAtmakabhaktireva satataM svAdIyasI zreyasI ||8||

atyAyAsakarANi karmapaTalAnyAcarya niryanmalA

bodhe bhaktipathe'thavA'pyucitatAmAyAnti kiM tAvatA |

kliSTvA tarkapathe paraM tava vapurbrahmAkhyamanye puna-

zcittArdratvamRte vicintya bahubhissiddhyanti janmAntaraiH ||9||

tvadbhaktistu kathArasAmRtajharInirmajjanena svayaM

siddhyantI vimalaprabodhapadavImaklezatastanvatI |

sadyassiddhikarI jayatyayi vibho saivAstu me tvatpada-

premaprauDhirasArdratA drutataraM vAtAlayAdhIzvara ||10||